2 Timoteo 4

₁Qaq de'era iqataxac 'am sami' nagui, ỹataqta qomi' ỹauaachiguilo Ñim Lo'onatac 'Enauacna qataq So Qarataxala' Jesucristo maye anac ca na'a'q da nachaxan da Nta'a, qataq nmit ñi 'oonolec na shiỹaxauapi maye ña nca'altauec qataq na mashe ileu. ₂Sauotaique da 'am 'aua'axat da na'aqtac da huo'o ca 'ardaqa', nache 'ena'am da qaica ca 'ardaqa'. 'Auachaxana da lsomaxac na shiỹaxauapi, 'auaỹamaxaañi qataq 'aua'añaqchet qataq 'anhualaxaune' da 'auapaxaguen. ₃Cha'aye huo'o qome ca na'a'q da na shiỹaxauapi saishet da isheteguet da napaxaguenataxanaxac no'oita. Nachaqrata da na'axaỹaxaata'ai ca maiche lqopitaxanaqtaic, qataq nmitta'a da ỹotta'a't naqa'en na napaxaguenaxala' da qaỹapaxaguenec cam nateeteguet ca maiche 'eetapeguec. ₄Qataq ỹapoguilo naua ltela lauaco da saishet da na'axaỹaxana da 'eesa lataxac. Nachaqrata da na'axaỹaxaata'ai na ỹotta'a't na'aqtaxanaxac maye qaica ca naigui. ₅Qalaxaye 'am Timoteo, ỹataqta 'anaỹanaxanaqchen qome, qataq 'ana'añaxateguet na 'anque'eenaxaguesat, qoqueto'ot da 'aua'axat da no'on na'axaỹaxac maye chegaqaigui da nca'alaxa, 'apactelco' da ỹoqta lataxac da 'aro'onataxanaxac.

₆Da ñachaalataxac mashe qoỹanot Ñim Lo'onatac 'Enauacna, 'eeta'ama caua ntago'q da qaicoreleguete aca nca'atoxonaxalate. Cha'aye mashe saqaỹapeque ye laloqo' da ñachaalataxac. ₇Mashe semat da seloctapeguelec da ỹo'onataxanaxac, qataq mashe senoxonaqchetec da ñaloxoyaxac. Cha'aye saishet da huo'o ca huaña da saxanec da ñaquitaxac, qataq da salaxaguet Ñim Lo'onatac 'Enauacna. ₈Saỹaten da Ñimaye maye sa depe'enaxan da nmit 'enauac na shiỹaxauapi. Ñimaye aỹem ỹami' ca nsheetenaguec da ñachaalataxac maye lasheue da ỹalaxayec. Qaq saishet da nachaỹemta da aỹem ỹami', maye nataqa'en 'enauac na shiỹaxauapi maye ỹayeeta'aguet ca lle'eguelaxasoxoc Ñimaye.

₉Ỹataqta sa 'anaỹaloxon qome da 'auanac da aỹem 'anauane'. ₁₀Cha'aye so Demas aỹem ca'ai, souaxat da lqopiche da 'onataxac lma'na, nache nqochena ye nỹecpi ye Tesalónica. Qaq so Crescente taigue da 'alhua Galacia, qaq so Tito taigue da 'alhua Dalmacia. ₁₁Nachaqñita ñi Lucas ñaq aỹem hueta'aguet. Qaq qom 'auanac, nache 'ananaỹalec ca Marcos da 'anauec, cha'aye camaye ishet da aỹem itauan da qaro'onataxanaxac. ₁₂Qaq so Tíquico samaxa ye nỹecpi Éfeso. ₁₃Qaq qom 'auanac, nache 'anache ca ipo' maye secotano'ot ca Carpo maye netaña ye nỹecpi ye Troas. Nataqa'en 'anache aca ỹerepi, qataq saishet da 'aucoua'ai aca ỹataqta no'on ỹeraxanaxalatepi.

₁₄So lcat lo'o, le'enaxat Alejandro, ỹataqta qalota na aỹem ỹo'otec qauem. Qalaxaye So Qarataxala' isheeteneguet qome 'enauac nam aỹem ỹo'otecpi. ₁₅Maxatchaxa, 'arvita'agueto' qome somaye, cha'aye somaye ỹataqta dataỹa'aguet da qara'aqtaxanaxac.

₁₆Se'eso na'a'q co'ollaq cheta'ague da so'ot so hua'auchiguiñi itaxaỹaxac da ñeueela't da sataỹa'aguet na nta'alpi maye hueta'a ye nỹecpi ye Roma, qalaq 'enauac da aỹem qaỹalata'a't, qaica ca aỹem nachaateua'a da aỹem detaqlec. Qalaxaye 'onaxaic da Ñim Lo'onatac 'Enauacna saishet da ilogui qome de'era. ₁₇Qalaxaye So Qarataxala' Jesús aỹem itauan, qataq aỹem ỹami' da ỹa'añaxac da ña sepactelec da sa'axat da na'aqtac maye chegaqaigui da nca'alaxa, yaqto' hua'axaỹa de'era 'enauac na saq judiopi. Qaq nache 'eetec de'era da aỹem nca'alaxateeguesop da loxonaxanaxac nam dequi'iỹapec 'eeta'am ca shiguiỹac. ₁₈Qataq aỹem isoueeguesop 'enauac nam qauem qataq aỹem nca'alaxatec, ime, nache aỹem ỹauegueua'a da lo'onataxanaxac maye ỹataqta lta'araic da llo'oxoyec chochaq tatec. Aja', nache 'eetec de'era.

₁₉Samaxa da iquinaxanaxac aca Priscila qataq ca lhua Aquila, qataq ca lauo' le'ecpi so Onesíforo. ₂₀Qaq so Erasto no'onaña ye nỹecpi ye Corinto, qaq so Trófimo ño'onaxataña ye nỹecpi ye Mileto, cha'aye souaxat da sa no'on. ₂₁Qaq 'aỹalapegue' qome da 'auanac, 'aqopitaxanapec da saxanaxa da nvi' na no'omaxa. 'Am ỹamaxa da lquinaxanaxac ñi Eubulo, Pudente, Lino, qataq añi Claudia, qataq 'enauac na qarqaỹañicpi.

₂₂Qaq So Qarataxala' Jesucristo 'am hueta'aguet qome, qataq Ñim Lo'onatac 'Enauacna qami' ỹaaleguete qome da lta'araic lqouagaxanaqtaic. Aja', nache 'eetec de'era.