So Pedro qataq so Cornelio
1Qaq yem nỹecpi ye Cesarea, nache netaña so ỹale le'enaxat Cornelio. Somaye lta'a na huataxanaq maye Roma le'ecpi, nache ilotague' som cien huataxanaqpi maye qaỹamata'ac chegaqa'ague da Italia. 2Qaq se'eso ỹale qataq 'enauac so llalaqpi ỹalaxaguet Ñim Lo'onatac 'Enauacna qataq ỹo'oxoreetac Ñimaye. Somaye nataqa'en ỹataqta itauaatac na judiopi maye choxoraqpi qataq nache 'eetai' da nqouagaxaueetacot Ñim Lo'onatac 'Enauacna. 3Qaq huo'o so na'a'q mashe dasheta añi nala', nache somaye huo'o so lauanaqchec: ila'aguet so lamaxashec piguem le'ec Ñim Lo'onatac 'Enauacna da naỹa'a ca hueta'a somaye, nache 'enapego', 'eeta': «¡Cornelio!»
4Nache somaye ỹamato'ot se'eso namaxashec, qalaxaye ỹataqta ñi'i. Nache inattac, 'eeta':
–¿Negue'tca, 'am Ỹataxala'?
Nache som namaxashec 'enapego' somaye, 'eeta':
–Ñim Lo'onatac 'Enauacna ỹataqta ỹaỹamaxareeta da 'anqouagaxaunaxac qataq dam 'artaunaxanaxac da 'autauaatac nam choxoraqpi da lhuenaxanaxa. 5Qaq huo'oi qome caua 'aramaxa'she dos ỹale't da nqo'oora ye ñegaxasom le'enaxat Jope, da yaqto' ỹe'egueera'a ñi le'enaxat Simón, da lỹa le'enaxat Pedro. 6Ñimaye netaña ye lma' ñi le'enaqteua Simón, lo'oc lo'o, ye lma' neto'ot ye loigue aso auaxai. Qaq ñimaye qome 'am ỹa'axatem ca llec cam 'auo'ot.
7Qaq co'ollaq jec so namaxashec piguem le'ec maye da'aqtaxaatac, nache so Cornelio iỹaxaneugalo soua dos soua lamaxa'she qataq so 'oonolec huataxanaq le'ec maye nataqa'en ỹo'oxoreetac Ñim Lo'onatac 'Enauacna qataq ỹataqta lpe'et. 8Nache ỹataqta da'aqtaxaatrema soomaye 'enauac dam lauanaqchec. Ime, nache ỹamaxaregue da Jope.
9Nache so lỹa na'a'q co'ollaq mashe quete' soomaye, qaq mashe qanayeetaua'a ye Jope, nache so Pedro tasheguemo' ca nỹec l-laq da nqouagaxauen. Qaq mashe laiñi se'eso na'a'q. 10Nache somaye ỹataqta nomteguet na lqouaxa, nache huo'o da lyaxa da deque'e. Qalaxaye ña qaỹo'ottac so aloq, nache somaye huo'o so lauanaqchec. 11Ila'a na piguem da 'eeta'am da nauatoigui, nache ỹauaateguet so 'eeta'am na hualoq laỹe lta'araic, qaicoñetta'a't naua cuatro ltelal da naỹaña ana 'alhua. 12Qaq somaye, nache huetagui 'enauac na ỹotta'a't shiguiỹacpi: huo'o na cuatro naua lapia'ate, qataq na hualectapigui', qataq na maỹopi. 13Nache somaye hua'axaỹa so na'aqtac 'eeta':
–Pedro, 'anachaañi, 'auauo'o ca 'aualauat ne'enapi, nache qollec.
14Nache so Pedro 'enapeco':
–'A'i, 'am Ỹataxala', aỹem ỹataqta sa sauanapega da sachec ca qaỹamata'ac nshepaxan da lataxac, huo'otaq cam sa qaishetapec da qanallec.
15Qalaxaye se'eso nvilỹaxac qaltaq ỹe'eguelaxalec da, 'eeta':
–Cam mashe qui'itta naqa'en Ñim Lo'onatac 'Enauacna, camaye saishet da 'auamata'ac da nshepaxan da lataxac.
16Qaq se'eso na'aqtac tres da qaỹe'eguelaxalec, nache se'eso hualoq laỹe maye qoỹaxatta'a't naua ltelal qaltaq ỹe'eguelaxague da piguem. 17Qaq co'ollaq ña deuennataxaatac so Pedro da chaq 'eetec ca naigui se'eso lauanaqchec, nache mashe nvildeua'a ye lma' so Simón soua ỹale't maye lamaxa'she so Cornelio. 18Nache denataxaata'ape 'eetra': ¿Nachena peta'a ne'ena na netaña ca ỹale maye le'enaxat Pedro? 19Qaq so Pedro ñaq iuennatapega se'eso lauanaqchec, qalaxaye So Saqcha'a La'añaxac Ñim Qarataxala' 'enapego' somaye, 'eeta':
–Huo'oi daua ỹale't 'am nmittrapigui. 20Qoñisheguem, 'aunotec, nache 'auca'ateguelo daamaye. Saishet da huo'o ca 'ectega, cha'aye daamaye maiche ỹamaxa'she.
21Nache so Pedro huenotec, nache 'enapegalo se'esoua ỹale't, 'eeta':
–Nachaỹem maye aỹem qanmichiitaique. ¿Negue't ca huo'omshe qauanaqui?
22Nache soomaye 'ena'apo':
–Qomi' lamaxa'she ñi huataxanaq lta'a, le'enaxat Cornelio. Ñimaye no'on da lataxac qataq ỹataqta ỹalaxaguet Ñim Lo'onatac 'Enauacna. Ỹoqo'oye 'enauac na judiopi ỹataqta huo'o naq 'enec naqa'en qataq lauotaxat. Qaq huo'o so chegaqasheguem lamaxashec Ñim Lo'onatac 'Enauacna 'enapega da 'am namaxasoxona, da yaqto' 'anqo'ona ye lma', nache ñimaye ishet da na'axaỹaxana cam 'ara'aqtaxanaxac.
23Nache so Pedro ipa'axaareuo soomaye, nache lo'ochaqa't ca hueta'a somaye se'eso pe. Qaq so lỹa na'a'q, nache so Pedro ca'ateguelo soomaye, nataqa'en huo'oi soua lỹata'ape nam ỹa'amaqten So Jesús maye netaña ye Jope.
24Qaq so lỹa na'a'q, nache qaivita ye nỹecpi ye Cesarea yem netaña so Cornelio deuataxaatac. Qataq 'enauac som maiche lauo' le'ecpi ỹalecta'aguet, qataq 'enauac nam nauochaxauapi maye icoyeguen co'ollaxa. 25Qaq so Pedro co'ollaq ivireua'a ca nỹec, nache so Cornelio ca'ata'aguet somaye, nache ỹa'aroto naua l-llectel cha'aye huo'o naq 'enec naqa'en. 26Qalaxaye so Pedro 'enapega somaye, 'eeta':
–'Anachaañi, cha'aye aỹem, nache 'am sheeta'am da choche aỹem ỹale.
27Nache na'aqtaxaatague' somaye, nache so Pedro pa'auo, nache ilalec som ỹataqta qalota shiỹaxauapi maye lapoota'a't. 28Nache so Pedro 'enapego' somayepi, 'eeta':
–Qami' qauaỹaañi da na judiopi ỹasouaxat da la'amqaanataxanaxac, nache ỹataqta sa qaỹasheneguet da ỹaleeguet ca sa lauo' le'ec, huo'otaq da choche pa'aigui ca lauo' camaye. Qalaxaye Ñim Lo'onatac 'Enauacna aỹem ỹapaxaguenec da saishet da huo'o ca samata'ac da nshepaxan da lataxac, huo'otaq sa qaisheteguet. 29Qaq ỹoqo'oye ỹataqta qaica ca shega da ñanac co'ollaq aỹem qauỹaxañiỹa. Qaq ỹoqo'oye nagui aỹem sauotaique da saỹaten da chaq 'eetec ca huo'omshe aỹem qauỹaxañiỹa.
30Nache so Cornelio 'enapeco':
–Nagui mashe ivi' naua cuatro na'axa'te da 'eeta'am nagui ye ñichiguiña añi nala' co'ollaq aỹem soota'a na ima', ñeqouaqchettac qataq ñeqouagaxaueetac. Nache aỹem nachaxana so ỹale soua alogo ỹataqta qashelectrapiguiñi da lapagaqa'. 31Nache somaye aỹem 'enapega, 'eeta': «Cornelio, Ñim Lo'onatac 'Enauacna mashe hua'aqtega da 'anqouagaxaunaxac, qataq imeteetac 'enauac nam 'auo'otpi da 'autauaatac nam huo'o da lhuenaxanaxa. 32Qaq nagui 'auauo'o qome ca 'auamaxa ye nỹecpi ye Jope, da yaqto' ỹe'eguena'a ñi Simón, da lỹa le'enaxat Pedro. Ñimaye hueta'a ye lma' ñi le'enaqteua Simón, lo'oc lo'o. Ñimaye neto'ot so loigue aso auaxai ñi lma'.» 33Qaq ỹoqo'oye ỹataqta sa saỹaloxonai' da 'am samaxasoxona. Qaq nagui no'on, cha'aye mashe 'anvi'. Qaq nagui qomi' souaqta'a ne'ena, qomi' lhuotte' da ña'axaỹaxanaxa cam 'am ỹamaxalec Ñim Lo'onatac 'Enauacna da qomi' 'aua'aqtaxanema, qataq qomi' saỹatenaqta da Ñimaye qomi' imeteeta'ape ne'ena na'a'q.
Da la'aqtaxanaxac so Pedro co'ollaq huaña ye lma' so Cornelio
34Huaña, nache so Pedro da'aqtaxan, 'eeta':
–Nagui aỹem saỹaten da Ñim Lo'onatac 'Enauacna ỹoqta 'eesa da saishet da lca'atagui 'enauac na shiỹaxauapi. 35Chaqrata da Ñimaye ỹataqta ỹaỹamaxareeta ca camachaqca nam ỹotta'a't shiỹaxauapi da huo'otaq ỹataqta ỹalaxaguet Ñimaye qataq ỹo'ot ca ỹaỹamaqchiguiñi, saishet da ỹectega cam chegaqa'ague. 36Ñim Lo'onatac 'Enauacna namaxa co'ollaxa na Israel le'ecpi da la'aqtac, dam la'aqtac maye ỹo'ot da nlagaxayec, chegoqchigui So Jesucristo, Som Lca'aguishec qataq Lataxala' 'enauac na shiỹaxauapi. 37Qaq qami' mashe qauaỹaañita 'enauac dam huaña nam 'alhua Judea. 'Enauac de'era chegoqchiguiña co'ollaxa ye 'alhua Galilea, co'ollaq so Juan imat da nachelaxaatac 38So Jesús maye Nazaret le'ec. Qaq Ñim Lo'onatac 'Enauacna ỹanem co'ollaxa da la'añaxac Somaye So Saqcha'a Na'añaxac Qui'itta. Qaq Ñimaye ye hueta'aguet So Jesús, nache Somaye nache 'eetai' naxa da ỹo'ottac na ỹaỹamaqchiguiñi qataq nataren 'enauac nam huetalec da la'añaxac so pa'aguenataxanaxaic. 39Qaq qomi', maye nacheqomi' sauanaqchigui 'enauac nam ỹo'otpi So Jesús co'ollaq Somaye coleetapeguelec ye 'alhua Judea, qataq ye nỹecpi ye Jerusalén. Nataqa'en sauanaqchigui co'ollaq qaỹalauat qaiuaxaneguet so npe'enaxaqui. 40Qalaxaye Ñim Lo'onatac 'Enauacna qaltaq nca'alaxatec Somaye co'ollaq mashe ivi't soua tres na'axa'te, nache qaltaq qomi' ỹachaxanegueta. 41Qaq Somaye saishet da imauec da nachaxana 'enauac na shiỹaxauapi, nacheqomaqta da ñauanaxai'. Cha'aye Ñim Lo'onatac 'Enauacna qomi' lca'agui'she co'ollaxa, da yaqto' qomi' sa'axataq da qarauanaqchec. Qaq qomi' ỹataqta qarquia'axaua Somaye qataq qanỹomaxaua co'ollaq mashe qaltaq nca'alec qanqoỹen. 42Nache Somaye qomi' ỹamaxaleguete da sa'aqtaxanaxam 'enauac na shiỹaxauapi, da sa'axataq da Ñim Lo'onatac 'Enauacna ỹanagui Somaye da nacheso so nmit qome na lasouaxashetpi nam ñaq nca'altauecpi qataq nam mashe ileu. 43Nataqa'en soua hua'au' vi'iye 'enauac co'ollaxa som la'aqtaxanaxanecpi Ñim Lo'onatac 'Enauacna ỹa'axatta'aguet So Jesús, da ca ỹa'amaqten Somaye, nache qaỹapalaxat na lasouaxashetpi, chegoqchigui da la'añaxac Somaye. Qaq 'oonolec Somaye chegoqchigui da ishet da seviraqa'a da saconaxaguet da lchoxonnataxanaxa Ñim Lo'onatac 'Enauacna.
Ỹaconeguet So Saqcha'a Na'añaxac Qui'itta nam saq judiopi
44Qaq ña detaqtac so Pedro co'ollaq So Saqcha'a Na'añaxac Qui'itta anac, nache tanguit 'enauac so na'axaỹaxaatega da la'aqtaxanaxac. 45Nache soua judío lashe' maye nnaictagueto so Pedro, soomaye ỹataqta huo'o da la'aalaqa' da So Saqcha'a Na'añaxac Qui'itta nataqa'en ishet da qoỹanem nam saishet da judiopi. 46Cha'aye souaxat da hua'aqtrega namayepi da detaqtegoiguilo naua na'aqtaqa maye sa qaỹauanapegalo qataq ỹo'oxoreetac Ñim Lo'onatac 'Enauacna. 47Nache so Pedro da'aqtaxanema soua nnaictagueto, 'eeta':
–Ñim Lo'onatac 'Enauacna namaq So Saqcha'a Na'añaxac Qui'itta, yaqto' ỹaueca'aguet na shiỹaxauapi maye ỹaqa'a ca chegaqa'ague, 'ena'ama qomi' co'ollaxa da qomi' namaxalo maye qomi' judío lashe'. Qaq nagui qaica ca ishet da npaxateguet nataqa'en da namayepi ñachelaxanaq.
48Qaq co'ollaq da ime da la'aqtac de'era so Pedro, nache damaxasoxoolec da qanachelaxan somayepi, qaỹachelaxanataxana da le'enaxat So Jesucristo. Ime, nache qanachoxoreetacot so Pedro da cara'ac huo'oi na'axa'te da hueta'aguet somayepi.
