So Pablo ivita ye Éfeso
1Qaq so Apolo co'ollaq ñaq hueta'a ye nỹecpi ye Corinto, nache so Pablo quetaguilo naua 'aleu' maye netaleguete ana qaỹoqotcheguemec 'alhuapi, choche nvitta'a ye nỹecpi ye Éfeso. Nache huaña yemaye, qaq huo'oi soua ilaleguete maye ỹa'amaqteetrac So Lca'aguishec Ñim Lo'onatac 'Enauacna, 2nache inatta'apo' soomaye, 'eeta':
–¿Qami' peta'a mashe qauacoñiiguet So Saqcha'a Na'añaxac Qui'itta co'ollaq cheta'ague da qaua'amaqchiñi So Jesús?
Nache soomaye 'ena'apo':
–Qomi' saishet da huo'otaq sa'axaỹaqapeguelec da huo'o ca Saqcha'a Na'añaxac Qui'itta.
3Nache so Pablo ina't soomaye, 'eeta':
–Qaq ¿chaq negue't lachelaxanataxanaxac cam qauacoñiiguet co'ollaxa?
Nache soomaye 'ena'apo':
–Qomye dam lachelaxanataxanaxac so Juan.
4Nache so Pablo 'enapeco':
–Aja', so Juan co'ollaxa nachelaxaatac nam shiỹaxauapi maye ỹaxaare'c naua no'onataxaco, qalaxaye nataqa'en 'enapega namayepi da yaqto' ỹa'amaqten cam anatai' maye nca'attalec, qaq nacheso So Jesús Som Lca'aguishec Ñim Lo'onatac 'Enauacna.
5Nache soomaye co'ollaq hua'aqchiguilo de'era, nache qanachelaxa'n, qaỹachelaxanataxana da le'enaxat So Qarataxala' Jesús. 6Nache so Pablo co'ollaq ỹasheltaleguete soomaye, nache So Saqcha'a Na'añaxac Qui'itta anac da tanguita soomaye. Huaña, nache detaxaiguilo naua na'aqtaqa maye sa qaỹauanapegalo, qataq ỹa'axa't naua na'aqtaqa maye chegoqo'oto Ñim Lo'onatac 'Enauacna. 7Qaq soomaye da ima'a't, nache ivi' doce ỹale't.
8Nache so Pablo ỹataqta iviraxattre'c soua tres ca'agoxoiqa da ỹe'eguelaqtaua'a aso napaxaguenaxaqui na judiopi da da'aqtaxaatac, qaica ca ñe'etaique, qataq ỹa'axattapeguem somayepi da mashe nvi' da lo'onataxanaxac Ñim Lo'onatac 'Enauacna da ilo'ogue 'enauacna, nache quetapegueua'a da da'amqaanataxan naqa'en somayepi. 9Qalaxaye huo'o na judiopi da ỹa'añaxattaguilo naua lquiyaqte da saishet da huotaique da da'amqaanataxan; chaqrata da ỹataqta sa iyacna'ape naua la'aqtaqa da detaqtega nam ỹa'amaqten So Jesús. Nache so Pablo ca'ai somayepi, nache ỹauec som dalaxaic da da'amqaanataxanpi, ỹauega aca lapaxaguenataxanaxaqui so ỹale le'enaxat Tirano. Qaq huaña, nache ima'ape naua na'axa'te da da'aqtaxaatac. 10Qaq 'era da 'eetec, choche iviraxattraue'c soua dos vi'iye. Nache ỹataqta 'enauac na netaña ye 'alhua Asia, judiopi qataq nam saishet da judiopi, na'axaỹaxaatega da na'aqtaguec So Qarataxala' Jesús. 11Nache Ñim Lo'onatac 'Enauacna ỹo'ot nam lta'araicpi maye sa qaỹauanapigui da chegoqchigui naqa'en so Pablo, 12ivira'a da huo'otaq qairoua'a somaye ca camachaqca, copaxa huo'otaq ca lỹa nogoxot da ipoteua'a qanqa'en somaye. Qaq da ime, nache qalapaxalec ca sa no'on, nache ishet da no'oita, qataq ỹo'orauec na saqcha'a na'añaxac leguemaxaicpi.
13Qalaxaye huo'oi soua judío lashe' maye quetragui na shiỹaxauapi da ỹo'ottrapeguec na saqcha'a na'añaxac leguemaxaicpi. Nache soomaye nshetraique da do'onataxaara da la'añaxac So Qarataxala' Jesús, da yaqto' ỹo'oldaue'c na saqcha'a na'añaxac leguemaxaicpi. Nache soomaye 'eetegalo' na ne'ecpi, 'eeta':
–Qami' seroxoleguete da le'enaxat So Jesús maye ỹa'axattac so Pablo da qoqui.
14Qaq 'era da 'eetec co'ollaxa soua siete llalqa so judío le'ec le'enaxat Esceva, somaye nache lataxala' na ntaxaỹaxanaxanecpi da qaitaxaỹapegue' Ñim Lo'onatac 'Enauacna. 15Qalaxaye co'ollaq ỹo'o't de'era, nache som saqcha'a na'añaxac leguemaxaic, 'eeta':
–Aỹem sauatton So Jesús, nataqa'en sauattoota so Pablo; qalaq qami', saishet da qami' sauatto'n.
16Nache se'eso ỹale maye huo'o so netaigui saqcha'a na'añaxac leguemaxaic parenaxanoiguilo soomaye, nache ỹataqta qaica ca 'eneque naqa'en, sa iyacna'ape, qataq icolaxatta'ape naua alogo, huetraue'c naqa'e'n qataq ique'emaqche't, nache soomaye datare'c. 17Nache 'enauac na netaña ye nỹecpi ye Éfeso, judiopi qataq nam saishet da judiopi ỹaỹaten de'era, nache ỹataqta qalota da lcolanaxa. Nache 'enauaque naua pa'aiguelo da ỹataqta huo'o naq 'enec qanqa'en da le'enaxat So Qarataxala' Jesús.
18Qaq nam ỹa'amaqten So Jesús, ỹa'axatem na shiỹaxauapi 'enauac nam qauem maye ỹo'otpi co'ollaq saxanaxa da da'amqaanataxan. 19Nache ỹataqta qalota nam napaxagueetego' co'ollaxa da saqcha'a lataxac da nalaataxanaxac, nam ndouo ana lere maye huetalec damaye. Nache qaỹavigaxat 'enauac anamayepi, ỹauaachigui qanqa'en na shiỹaxauapi. Qaq aso lasheue aso qaỹavigaxat nerepi, asomaye ivi' cincuenta mil aso anom plata. 20Qaq 'era da 'eetec da na'aqtaguec So Qarataxala' da nquictauec naua 'aleu' da ivira'a. Qataq nquictauec na shiỹaxauapi maye da'amqaanataxan, souaxat da ỹauaachigui da la'añaxac damaye.
21Qaq co'ollaq ime de'era, nache so Pablo huo'o da lhuennataxa da taigue da 'alhua Macedonia qataq da 'alhua Acaya, qataq nache huotaique da ivira'a ye Jerusalén. Qataq huotaique da huo'otaq imat ye Jerusalén, nache taỹa ye nỹecpi ye Roma. 22Nache somaye ỹamaxaregue da Macedonia soua dos ltau' Timoteo qataq so Erasto, qaq somaye ñaq huo'oi soua na'axa'te da ñaq hueta'a ye 'alhua Asia.
Da cotaxac co'ollaq huaña ye nỹecpi ye Éfeso
23Qaq se'esoua na'axa'te, nache huo'o so lta'araic cotaxac souaxat da la'aqtac Ñim Lo'onatac 'Enauacna. 24Qaq de'era cotaxac chegoqchigui so ỹale le'enaxat Demetrio maye do'onataxaatega na lcat le'enaxat plata. Qaq somaye nache ỹo'ottac na le'enaqtac nỹecpi, ỹe'enaxatchigui so lauo' aso Artemisa maye qanatameetacot. Qaq damaye nachera da ỹachegoxottapoigui da lta'araic lauegaxanaxac na lo'onataxanaxanecpi. 25Nache somaye laỹona't so lo'onataxanaxanecpi qataq 'enauac nam 'eeta'am da lo'onataxanaxac somaye. Nache 'enapego', 'eeta':
–Qami' ỹalleppi, qami' qauaỹaañi da de'era qaro'onataxanaxac, damaye nachera da saỹamaxasoqtapigui. 26Qalaxaye qami' mashe qauauañiichigui, qataq qaua'aqaichigui da se'eso Pablo, somaye 'eetega da na ne'enaqtacpi maye qanatameetacotpi maye maiche qaro'onatac, namayepi saishet da ỹoqta 'en da deca'alaqtaxan. Qaq somaye ỹataqta qalota na ỹañoxot da ỹa'amaqten dam 'eetega, qaq saishet da chaqnata na Éfeso, nataqa'en 'enauaque naua 'aleu' na 'alhua Asia. 27Qaq damaye ỹataqta huo'o da lchec, cha'aye de'era qaro'onataxanaxac ishet da nlaguiñi. Nataqa'en ñi lauo' añi ñatamnaqtacot qarate'e Artemisa, ñimaye ishet da deqat da llo'oxoyec. Huaña, nache saishet da huo'o ca 'enec qanqa'en qataq la'amaqchec añim qarate'e maye natameetacot na netaña na 'alhua Asia qataq 'enauac nam neta'alo naua lỹa't 'aleu'.
28Qaq co'ollaq choche qaỹa'aqchigui de'era, nache 'enauac somayepi ỹataqta dalemata. Nache ỹa'alaqtagui, 'eeta':
–¡Ỹataqta lta'araic da llo'oxoyec añi Artemisa maye late'e nam netaña na Éfeso!
29Nache ỹataqta huo'o da la'axa 'enauac so shiỹaxauapi maye hueta'a se'eso nỹecpi. Nache huo'oi soua je'c da ỹaconeua'alo so Gayo qataq so Aristarco maye maiche lỹa't so Pablo chegoqra'ague da 'alhua Macedonia, nache qaỹaueguereua'a cam nỹec maye huaña naxa da qaỹo'ot na ntaxaỹaxac. 30Qaq so Pablo huotaique da pa'aua'a somayepi da yaqto' da'aqtaxanem, qalaxaye som 'amqaanataxanaxaicpi saishet da ỹasheneuo somaye. 31Nataqa'en huo'o na 'amaqtaqaicpi maye lma' yi'iye nam nauattonaxauapi somaye, nam namaxa da la'aqtac da yaqto' saishet da pa'aua'a so shiỹaxauapi. 32Nache se'eso naponaxac ỹataqta huo'o da na'alaxac, ỹotta'a't na qaỹa'alaqtalecpi, cha'aye na shiỹaxauapi ỹataqta lliỹa't. Qaq ỹataqta qalota na ỹalectauo na saishet da ỹaỹaten ca huo'omshe hueta'a yi'iye. 33Qalaxaye huo'o na ỹalectauopi na da'aqtaxanem da 'eetec de'era so Alejandro, nache nam judiopi ỹamaqauo somaye da yaqto' dataỹa'aguet 'enauac somayepi. Nache somaye ỹachaxaasheguem na lhuaq, da yaqto' ỹe'emaqtom naqa'en na shiỹaxauapi, nache nshetaique da da'aqtaxanem namayepi da na judiopi saishet da lasouaxashet de'era. 34Qalaxaye co'ollaq qaỹauatton somaye da judío le'ec, nache somayepi qaltaq ỹa'alqagui, hua'c da ivi' dos horas da ỹa'alaqtagui, 'eeta':
–¡Chochaq tatec qome da llo'oxoyec añi Artemisa maye late'e na netaña na Éfeso!
35Nache som leraxanaxanec soua nataxala'ate maye ilotague' nam netaña se'eso nỹecpi, co'ollaq ỹañoxot da nañaxaañi naqa'en so shiỹaxauapi, nache 'enapeco':
–Qami' ỹalleppi maye qarmaye na Éfeso. Qami' qauaỹaañi da 'enauac na shiỹaxauapi ỹaỹaten da na Éfeso, nachena na ilotague' ñi lauo' añi qarate'e Artemisa, qataq ñim ne'enaqtac lqui'i maye chegoqo'ot co'olloxocheye na piguem. 36Qaq cha'aye saishet da huo'o ca iqoleguet de'era, qaq no'on da qanañaxañiiñi, qaq saishet qome da huo'o ca qauo'oche da huo'otaq sa qauennataxañiilec. 37Cha'aye ne'enaua ỹale't maye qanaviquiireuo, naamaye saishet da huo'otaq isheueetrac ñi lma' qataq añim late'e 'enauac da qoñiita. 38Qaq ỹoqo'oye dam Demetrio qataq nam lo'onataxanaxanecpi da huo'otaq huo'o ca ncotatrague', qalaxaye huo'o nam nmit na nasouaxashetpi da nqo'oneua'a, yaqto' ñi 'oonolec ỹa'axat ca sa ỹaỹamaxaren. 39Qaq da huo'otaq huo'o ca lỹa qauỹaxañiitaique, qaq no'on da qaua'axache da ivita da detaxaỹapega't na nataxala'pi ne'ena qarma'. 40Cha'aye qomi' nagui mashe souaqaigui da lchec da huo'otaq qoỹeetega da qomi' mpa'aguenaxaiqa souaxat de'era so'otaqtac nagui. Cha'aye qomi' qaica cam qara'aqtaxanaxac da huo'otaq qomi' ina't nam nmit na nasouaxashetpi ca huo'omshe huo'o de'era qancotaxac.
41Qaq co'ollaq ime de'era la'aqtaxanaxac se'eso neraxanaxanec, nache 'enapega so shiỹaxauapi da ỹe'eguelaxalo naua lma'ate.
