Da llecỹaxac so Pablo da taigue da Macedonia qataq da Grecia
1Qaq co'ollaq mashe ime se'eso cotaxac, nache so Pablo iỹaxaneuga na ỹa'amaqteetac So Jesús, da yaqto' ỹanem da lqataxac da saishet da ỹaxanec da la'amqaanataxanaxac So Jesús. Ime, nache ncoyegueetague' somayepi, nqapaltague', nache taỹa ye 'alhua Macedonia. 2Nache quetaguilo 'enauaque se'esoua 'aleu', ỹataqta ỹa'añaqchettac na 'amqaanataxanaxaicpi yi'iye 'alhua choche ivitta'a ye 'alhua Grecia. 3Huaña yemaye, nache ivi' tres ca'agoxoiqa da hueta'a. Qaq co'ollaq mashe huotaique da huenoteua'a aso notaxaqui maye quiguingui na 'etaxat da taỹa ye 'alhua Siria, nache somaye la'axaỹaxac da na judiopi ỹauotaique da ỹalauat somaye. Nache somaye ỹe'eguelaqtegue na llec, taalec ye 'alhua Macedonia. 4Nache nnaicapegue' so Sópater maye llalec so Pirro lma' ye nỹecpi Berea, qataq so Aristarco qataq so Segundo maye lma't ye nỹecpi ye Tesalónica, qataq so Gayo maye lma' ye nỹecpiolec Derbe, qataq so Timoteo, nataqa'en so Tíquico qataq Trófimo maye chegoqra'ague da 'alhua Asia. 5Nache soomaye hua'au', qaq co'ollaq ivilda ye nỹecpi ye Troas, nache qomi' iuattrapigui. 6Qaq so Pablo qataq qomi', can ime so naponaxac maye laloxoqui da qanallec ana nauole 'ayiiña maye qaca ana lalecte anam ỹasheeraxachigui, nache senoxonaxauec, sachegoxosoqchiguiña ye nỹecpi ye Filipos, senotaxaua'a aso notaxaqui maye quiguingui na 'etaxat. Qaq ivi't soua cinco na'axa'te, nache sevitaxa ye nỹecpi ye Troas yem huetra'a soomaye. Huaña yemaye, nache ivi' soua siete na'axa'te da souaqta'a.
So Pablo hueta'a ye nỹecpi ye Troas
7Qaq so la'auaxanec na'a'q naua na'axa'te, nache huo'o so qarquia'axac da seuennaqte da lquia'axac So Qarataxala'. Nache so Pablo ỹapaxagueetac na 'amqaanataxanaxaicpi. Qaq cha'aye somaye huotaique da jec so lỹa na'a'q, nache ỹataqta quetot da la'aqtaxanaxac, choche ivitta'a da laiñi so pe. 8Qaq se'eso qaraponaxac huasheguemec so pa'asheguem so nỹec, nache ỹataqta qalota ana ncoỹaraxanaxaquipi 'ettaigui. 9Qaq huo'o so nsoq, le'enaxat Eutico, somaye nso'ootañi netaigui so nalloxoc. Qaq cha'aye so Pablo ỹataqta qaỹoqtec da ltaxaỹaxac, nache somaye huo'o na lo'ochaxa, ivitta'a da ỹataqta lta'araic na lo'ochaxa, nache naañi, chegoqotcheguemec so souaqtasheguema nỹec, nache qaỹacoosop, cha'aye ỹoqta ileu. 10Nache so Pablo huenotec, nache nsoxouo se'eso nsoq, nache somaye 'enapego' so nqaỹañecpi, 'eeta':
–Saishet da leetapigui ye qarvilli; namaye ña nca'altauec.
11Nache so Pablo qaltaq ỹe'eguelaxasheguem. Ime, nache ỹacoolec da ỹo'ot da lquia'axac So Qarataxala', ncolaxaañi aso nauole, nache deque'e qataq so laỹepi. Ime, nache qataq queto'ot da la'aqtaxanaxac, choche ivitta'a da nnoxoosheguem aso nala', nache jec. 12Qaq so nsoq Eutico qaỹauega ca lma', cha'aye nca'alec ỹataqta no'oita. Nache 'enauac somayepi ỹataqta machiguiñi.
So Pablo chegoqchiguiña ye Troas da taigue da Mileto
13Qaq qomi' nache qaltaq ñeqotaqaua'a aso notaxaqui maye quiguingui na 'etaxat da sa'auaqta'a ye Asón. Qaq huaña yemaye, nache seuataqa'aguet so Pablo, cha'aye nache qarhuennataxac, cha'aye so Pablo nataqa'en maiche lhuennataxac da petañi. 14Qaq can ñauanaxai' somaye ye Asón, nache ñeqotaqa'ai' da senotaxaua'a aso notaxaqui maye quiguingui na 'etaxat, nache ñeqo'onaxa ye ñegaxasom le'enaxat Mitilene. 15Nache sachegoxosoqchiguiña yemaye da ñeqo'onaxata añi ỹaqa'ata 'alhuole le'enaxat Quío, nache souaqa'a ye naloteuga. Qaq so lỹa na'a'q, nache sevitaxa ye ñegaxasom le'enaxat Samos. Qaq so lỹa na'a'q, nache sevitaxa ye ñegaxasom Mileto. 16Qaq 'era da 'eetec da qoyecỹaxac, cha'aye so Pablo, nache lhuennataxac co'ollaxa da saishet da ỹoqta hua'a ye 'alhua Asia, qataq saishet da ipagueua'a ye nỹecpi ye Éfeso. Cha'aye somaye nshetaique da saqaỹaloq da iviregue da Jerusalén, da yaqto' hueta'a yemaye ca na'a'q Pentecostés, da huo'otaq ishet da ỹañoxot.
So Pablo qataq soua nataxala'ate ye Éfeso
17Qaq so Pablo co'ollaq hueta'a ye nỹecpi ye Mileto, nache damaxasoxoneugalo soua lataxala'ate nam 'amqaanataxanaxaicpi maye netaña ye nỹecpi ye Éfeso da yaqto' detaxaỹapegueto. 18Qaq co'ollaq mashe lapoota'a't, nache 'enapegalo', 'eeta':
–Qami' qauaỹaañi da 'eetec da ỹataxac chegoqchiguiña so la'auaxanec na'a'q co'ollaq cheta'ague da ñevireua'a na Asia. 19Qaq 'enauaque se'esoua na'axa'te da qami' soota'agueta da so'onataxaatacot So Qarataxala', qalaq qaica da ñapagaqcheetac. Nda'a't da qalota da ñenoinaxac, souaxat na qalota ñe'eguenataguecpi maye aỹem ỹo'otec na judiopi. 20Qalaxaye aỹem saishet da saxaañi da qami' sa'axattapeguema 'enauac nam ishet da qami' ỹo'oteque ca ỹaỹamaqchiguiñi, qataq da qami' sapaxagueeta'ape da huo'o na naponaxac qataq da huañalo naua qarma'achilli'. 21Qaq 'enauac nam judiopi qataq nam saishet da judiopi sheetega da ca'aisalo naua qauema lataxaco, nache ỹa'amaqten Ñim Lo'onatac 'Enauacna, qataq ỹa'amaqten So Qarataxala' Jesucristo. 22Qaq nagui aỹem saigue da Jerusalén, cha'aye aỹem ỹauec So Saqcha'a Na'añaxac Qui'itta. Qaq aỹem saishet da saỹaten ca 'eetec ca souaigui qom sevi'. 23Nachaqrata da saỹaten da huo'otaq huo'o ye sevita nam nỹecpi, nache So Saqcha'a Na'añaxac Qui'itta aỹem da'aqtaxaatapeguem da huo'o qome ca ñecoñetaguec, qataq ỹataqta qalota da ñeque'eenaxac qom huaña ye Jerusalén. 24Qalaxaye 'enauac namayepi qaica ca seqocha'a, ivira'a da maiche ñachaalataxac 'eeta'am ñaqa'en da qaica ca naigui. Chaqrata da ñeshetaique da samachiguiñi qom sematta da ñamaxasaguec qataq da sepaqueelec dam ỹo'onataxanaxac maye aỹem ỹami' So Qarataxala' Jesús.
25Qaq nagui ỹoqta da 'enauac da qoñiita nam sa'aqtaxaatapeguem co'ollaxa da lo'onataxanaxac Ñim Lo'onatac 'Enauacna, da nache tachiguiña nagui da aỹem sa nauane'. 26Qaq ỹoqo'oye nagui qami' sa'aqtaxanema da qaica ca ỹasouaqtac da qoñiita. 27Cha'aye aỹem ỹataqta sa'axatta 'enauac nam 'eetapeguecpi Ñim Lo'onatac 'Enauacna, qaica ca soxottapiguiñi. 28Qaq ỹoqo'oye ñi 'oonolec da qoñiita ỹataqta ntel-la't, qataq nataqa'en qarchilliỹa'a 'enauac na 'amqaanataxanaxaicpi maye qami' ipataxagueta So Saqcha'a Na'añaxac Qui'itta da yaqto' qauloỹeegue. Namayepi maiche lalamaxatpi Ñim Lo'onatac 'Enauacna, lsheenaxanaxatpi, lasheue co'ollaxa soua ltago'q so maiche Llalec. 29Cha'aye aỹem saỹateeta da qom sheca'ai ne'ena, nache huo'o qome ca lỹa anac da huotaique da nlaxaañi na 'amqaanataxanaxaicpi, 'eeta'am da 'eetec ca dequi'iỹapec da detoxongui ana qaguetapi. 30Qataq ivira'a da qoñiita, huo'o qome ca maiche qami' chegoqtoiguilo qara'amqaanataxanaxauai, nache dapaxaguenataxanec na choche natenataxanaxac, qaq saishet da ỹa'axat cam ỹoqta 'eesa, cha'aye nshetaique da na 'amqaanataxanaxaicpi ca'ategue qataq ỹalaxaguet camaye. 31Qaq maxatchaxa qome, qanloisheguem, qauennachiỹo' qome soua tres vi'iye, da ica'n naua na'axa'te qataq naua pe' da qami' seqattegalo, ñeỹeetalec ñi 'oonolec da qoñiita.
32Qaq nagui seỹaxanot Ñim Lo'onatac 'Enauacna da qami' ntela'alo, ỹauota'a da lta'araic lauotaxanaqtaic. Qataq da lta'araic lsoxoyec ishet da chegoqchigui da qanquiquiita'aguet da ỹaỹamaqchiguiñi. Qaq da qaualaqaiguet, nache Ñimaye ipaqueelec dam ỹachaxanapec da ỹami' 'enauac nam lca'aguishecpi da ỹauo'o lalamaxatpi. 33Aỹem saishet da choche ñaquitta'a co'ollaxa aca anom huo'otaq ca nogoxot. 34Chaqrata da qami' qauaỹaañita, da aỹem ỹataqta so'onataxaatac da yaqto' ñauec cam seueetac qataq naua iỹa't. 35Qaq nache 'eetai' da qami' sapaxagueetapegueque de'era, da ca shiỹaxaua iuen da do'onataxan yaqto' ishet da itauan cam huo'o da lhuenaxanaxa. Qaq ỹoqo'oye ñetoonaqta'ac qome da la'aqtac co'ollaxa So Qarataxala' Jesús, maye 'eeta': Ñim Lo'onatac 'Enauacna ntootapeguec cam «ỹataqta machiguiñi da dachetaqtaxan, qaq saq 'ena'am cam choche qaỹachet.»
36Qaq co'ollaq ime da ltaxaỹaxac so Pablo, nache somaye qataq 'enauaque soua lataxala'ate na 'amqaanataxanaxaicpi ỹa'alyiñi naua l-llectel, nache so Pablo nqouagaxaueetapegueleguete soomaye. 37Nache 'enauaque soomaye nỹeetaguilo, ime, nache nqapaltrapegue' somaye, qataq napigoqtrague'. 38Qataq ỹataqta lta'araic da laquicoqo', cha'aye so Pablo 'enapec ye nache tachiguiña da saishet da qaltaq qanauane'. Ime, nache nnaicapegueto, iviraxattrauga aso notaxaqui maye quiguingui na 'etaxat.
