So Pablo taỹa ye nỹecpi ye Jerusalén
1Qaq can mashe ñecoyeguenaqtagueto soua lataxala'ate na 'amqaanataxanaxaicpi maye lma' ye nỹecpi ye Éfeso, nache senotaxaua'a aso notaxaqui maye quiguingui na 'etaxat, nache salamaxataqchigui añi ỹaqa'ata 'alhua le'enaxat da Cos. Qaq so lỹa na'a'q nache qolaqa'ai añimaye da ñeqo'onaxata añi lỹa ỹaqa'ata 'alhua le'enaxat da Rodas, qaq nache sachegoxosoqchiguiña da ñeqo'onaxa ye ñegaxasom le'enaxat Pátara. 2Qaq huaña yemaye, nache ñatenaqteguet aso notaxaqui maye quiguingui na 'etaxat asomaye taỹa'ague da 'alhua Fenicia. Nache senotaxaua'a, nache qolaq. 3Qaq can qolaqta, nache choche seloqtaua'a añim ỹaqa'ata 'alhua maye le'enaxat da Chipre pa'aỹa'ague da qane'emaq, nache choche seviraqta'a ye 'alhua Siria. Qaq cha'aye aso notaxaqui qanỹoxoñi na le'ec can huaña ye ñegaxasom ye Tiro, nache saxaua'a yemaye. 4Nache qomi' ñauanaxai' nam ỹa'amaqteetac So Jesús, nache souaqta'aguet somayepi soua siete na'axa'te. Nache So Saqcha'a Na'añaxac Qui'itta da'aqtaxanem somayepi, da yaqto' 'enapega so Pablo da saishet da taigue da Jerusalén. 5Qaq can inoxoore'c soua siete na'axa'te, nache qaltaq qolaq. Nache 'enauac so 'amqaanataxanaxaicpi lỹatac na 'alpi qataq na llalaqpi da qomi' ca'ateueeguelo da laỹe ye nỹecpi. Qaq can seviraqaama so loigue, nache qomi' sa'araxayiñi naua qarllectel, nache ñeqouagaxaunaqtac. 6Huaña, nache ñeqapalaqtague' somayepi da ñecoyeguenaqtague', nache senotaxaua'a aso notaxaqui maye quiguingui na 'etaxat. Qaq somayepi ỹe'eguelaxaua'alo naua lma'ate.
7Nache sachegoxosoqchiguiña ye Tiro, choche seviraqta'a ye ñegaxasom maye naña ye nỹecpi le'enaxat da Tolemaida. Huaña yemaye, nache tachiguiña da qoyecỹaxac da qolaqtangui na 'etaxat. Qaq huaña yemaye, nache ñauanaxai' so qarqaỹañicpi, nache ñequinaqtague', nache 'oonolec so na'a'q da souaqta'aguet. 8Qaq so lỹa na'a'q, nache so Pablo nataqa'e'n qomi' qaltaq qolaq qalaxaye sapiaqtañi, nache seviraqa'a ye nỹecpi ye Cesarea. Qaq huaña yemaye, nache ñeqo'onaxaua'a ye lma' so Felipe som ỹa'axattac da no'on na'axaỹaxac, som 'oonolec soua siete ltauapi co'ollaxa soua Jesús lamaxa'she. Nache souaqa'a ye lma'. 9Qaq se'eso Felipe huo'oi soua cuatro llalel. Soomaye saxanaxa da huaro'n, qaq soomaye la'aqtaxanaxanal Ñim Lo'onatac 'Enauacna. 10Qaq mashe huo'oi soua na'axa'te da souaqta'a ye nỹecpi ye Cesarea, nache nvi' so la'aqtaxanaxanec Ñim Lo'onatac 'Enauacna le'enaxat Agabo, chegoqta'ague da Judea. 11Somaye qomi' namaqtegalo. Nache somaye ỹacona so nsaataxaqui so Pablo, nache maiche icoñiyiguilo naua lchel qataq naua lhua'q. Nache 'enapeco':
–So Saqcha'a Na'añaxac Qui'itta 'enapec da la'aqtaxanaxac ye cam judiopi maye lma' ye Jerusalén, nache 'eetec qome de'era ñim lalamaxat ne'ena saataxaqui da icoñi'. Ime, nache ỹaneua'a na nta'alpi ye Roma.
12Qaq co'ollaq sa'axasoqchigui de'era, nache qomi' qataq na qaraỹepi maye netaña ye nỹecpi ye Cesarea ñachoxonnaqtacot so Pablo, da yaqto' saishet da taigue da Jerusalén. 13Qalaxaye so Pablo 'enapec:
–¡Saishet da qanỹiñiitac, cha'aye da nache qoñiita'ac de'era, nache aỹem qauaquicoqchichi! Aỹem ỹataqta sauotec So Qarataxala', qaq ỹoqo'oye aỹem lhuotta. Qaica ca shectega da aỹem qaicoñe', qataq na'aictaxa da seleualec Somaye da huaña ye Jerusalén.
14Qaq cha'aye saishet da qomi' ỹalaxagueta so Pablo, nache saxanaxañi, nache shenaqtega, shenaqta':
–Hua', no'on da ỹataqta ipacchigui ca 'eetapeguec So Qarataxala' Jesús.
15Qaq co'ollaq ime de'era, nache ñaỹamaxataq, nache saxague da Jerusalén. 16Nache huo'oi soua qarỹata'ape nam 'amqaanataxanaxaicpi maye lma' ye nỹecpi ye Cesarea, nataqa'en nache ỹalectaiguilo soomaye so chegaqa'ata añi ỹaqa'ata 'alhua le'enaxat da Chipre, somaye le'enaxat Mnasón. Qaq somaye mashe salcoshe'egue da ỹa'amaqteetac So Jesús. Qaq nacheso so 'eetega da qaranataqa' ca lma' da seviraq.
So Pablo namaqtega so Santiago
17Qaq can sevitaxa ye Jerusalén, nache na qarqaỹañicpi ỹataqta qomi' ntootapegueque. 18Qaq so lỹa na'a'q, nache so Pablo qataq qomi' ñeqo'onaxaua'a so Santiago som lqaỹa So Jesús da ñamaxasoqtegueua'a. Qaq can seviraxaua'a, nache selaqalec so laỹepi lataxala'pi na 'amqaanataxanaxaicpi da hueta'aguet somaye. 19Nache so Pablo nquiitague' 'enauac somayepi. Ime, nache ỹachegoxottot da ỹa'axattac 'enauac nam ỹo'otpi Ñim Lo'onatac 'Enauacna maye ỹachegoxotchigui somaye da huaigui naqa'en nam saishet da judiopi. 20Qaq co'ollaq hua'aqchigui 'enauac de'era so 'amqaanataxanaxaicpi, nache ỹataqta ỹaatacot da na'achecỹaxac Ñim Lo'onatac 'Enauacna. Ime, nache qoỹeetega so Pablo, qoỹeeta':
–Hua', 'am qarqaỹa qataq qanauochaxaua Pablo, cha'aye 'am mashe 'aumeteetac da qalota na judiopi da ỹa'amaqten So Jesús. Qalaxaye 'enauac namayepi ỹa'axattac da iuen da qaipactelec da qanayeegue 'enauac nam namaxasoxonaxacpi maye chegoqo'ot so Moisés. 21Qaq namayepi la'axaỹaxac da 'am 'auapaxagueetapegueco' 'enauac nam judiopi maye neta'alo naua ỹaqa'alo 'aleu', da yaqto' saishet da ỹalaxaguet nam namaxasoxonaxacpi maye chegoqo'ot so Moisés, qataq qonetego' da saishet da ỹauo'o na na'anaxat na lo'oc na llalec, qataq saishet da ỹo'ot 'enauac nam so'otaqtac qomi' judiopi. 22Qaq ¿chaq hua'ague ca shenaqtec? Cha'aye na shiỹaxauapi laỹona't qom la'axaỹaxac da 'am mashe 'anvi'. 23Qaq ỹoqo'oye 'am no'on da 'auo'ot qome da qarqataxac, 'eeta': Huo'oi naua cuatro ỹale't souaqta'agueta maye yaqta'a da ivita ca laloqo' cam la'aqta'c co'olloxocheye da yaqto' ỹauo'oi ca ỹaarot Ñim Lo'onatac 'Enauacna. 24Qaq nacheñiua qome 'annaicapegueto da 'anỹoxou', ime, nache qaushiichiñi acam lasheue da qanỹoxoqui. Qaq qom ime, nache naamaye ishe't da npete'c na laue. Qaq 'era qome da qonetec, yaqto' 'enauac ishet da qaỹaỹaten da saishet da 'eesa de'era 'ana'aqtaguec, cha'aye nachaqrata da 'am nataqa'en ỹataqta 'aupacchigui 'enauac da 'aualaxalec na namaxasoxonaxacpi. 25Qaq nam saishet da judiopi maye ỹa'amaqten So Jesús, qalaxaye mashe sauoqo'o co'ollaxa aso qorere da shenaqtega, da yaqto' saishet da taỹapegueua'a de'era qarataxac. Nachaqrata da namayepi saishet qome da chec na lapat nam mashe qoỹanot na ne'enaqtacpi maye qanatameetacotpi, qataq saishet da chec na ntago'q qataq na lapat ca choche ichegueuo na lqosot, qataq saishet qome da huo'o ca ncachetague' aca sa lhua.
Qaicoñe' so Pablo huaigui aso no'onaxanaxaqui
26Nache so Pablo ỹaue'c soua lỹa't cuatro ỹale't. Nache so lỹa na'a'q, nache nỹo nataqa'en soomaye. Qaq co'ollaq ime', nache nqo'ooreua'a aso no'onaxanaxaqui late'erai da ỹa'axatreuo cam na'a'q maye laloxoqui da ime' da nỹoxo'c, cam na'a'q maye huetoigui da ỹaareuo aca lachetaqtaxanaqte'.
27Qalaxaye co'ollaq yaqta'a da inoxoore'c soua siete na'axa'te, nache huo'oi soua judío lashe' maye chegoqra'ague da 'alhua Asia. Soomaye ilaleguete so Pablo da huetaigui aso no'onaxanaxaqui late'erai. Nache soomaye ỹo'o't da la'axa, ỹataqta lliỹa't naqa'en na shiỹaxauapi. Nache ỹaconeua'alo so Pablo. 28Nache ỹa'alaqtalec somaye, 'eeta':
–¡Qami' Israel le'ecpi, ña qomi' qautauañi'! 'Ena nam ỹale maye ỹataqta nmatte' 'enauaque naua 'aleu' da ỹapaxagueetapeguec na shiỹaxauapi, da yaqto' npa'aguene' na qarhuo' le'ecpi, qataq na namaxasoxonaxacpi maye chegoqo'ot so Moisés, qataq anam qaro'onaxanaxaqui. Qaq namaye nagui qataq huenoxonoigui naqa'en ana qaro'onaxanaxaqui ne'enaua ỹale't Grecia lashe', qaq ỹataqta ishepaxanaqche't ne'ena no'onaxanqa' maye qui'itta.
29Qaq soomaye 'enapec de'era, cha'aye ỹauaachiguilo co'ollaxa so Pablo huaigui so nỹecpi da nnaictague' so Trófimo som lma' ye Éfeso. Nache ipi'itaxaategalo da so Pablo ỹauegoigui aso no'onaxanaxaqui late'erai somaye.
30Nache 'enauac na shiỹaxauapi maye netaña so nỹecpi ỹataqta qalagaxa't, nqalgoqtagui. Nache qaỹaconeua'a so Pablo, qaỹauogonnaueegue da laỹe aso no'onaxanaxaqui late'erai. Nache ỹataqta saqaỹaloq da qaỹapoguilo naua laso'omi. 31Nache qanshetaique da qaỹalauat. Qalaxaye mashe huo'o co'ollaxa da la'axaỹaxac so huataxanaq lta'a da 'enauac se'eso Jerusalén ỹataqta huo'o da la'axa. 32Nache se'eso huataxanaq lta'a laỹona't so nalleppi qataq so ltauapi, nache nqalgoqta'a ca hueta'a so shiỹaxauapi. Nache co'ollaq qaila'aguet so huataxanaq lta'a qataq so nalleppi, nache qoỹaxaañi da qaiuaxaatac so Pablo. 33Nache so huataxanaq lta'a nqocheneuo, nache ỹaconeua'a so Pablo, nache damaxasoxoolec da qaicoñera'a't naua lhua'q. Qaq co'ollaq ime, nache dechemaqtaxaatapeguelec somaye da chaq negue't cam ỹo'ot. 34Qalaxaye so shiỹaxauapi ỹataqta ỹa'alaqtagui, saq ỹataq ca 'eetec ca la'aqtaxanaxac, qaq ỹoqo'oye se'eso huataxanaq lta'a sa ỹaỹaten ca 'eetec souaxat na na'alaxac. Nache damaxasoxoolec da qaỹauega so lma' na huataxanaqpi. 35Qaq co'ollaq qanayeetaua'a ca lma' na huataxanaq, nache ỹataqta qanachesheguem so Pablo, souaxat da lhuaxanaxanaxac na shiỹaxauapi. 36Cha'aye 'enauac namayepi nca'attauo, ỹataqta ỹa'alaqtagui, 'eeta':
–¡No'on da qaỹalauat!
So Pablo ỹauo'o so ltaxaỹaxac da dataỹa'aguet so shiỹaxauapi
37Qaq co'ollaq mashe huotaique da qaipa'axaneuo so Pablo, nache somaye inattaco' so lta'a na huataxanaq, 'eeta':
–¿Peta'a ishet da huo'o ca ỹa'aqtac?
Nache so nta'a 'enapeco':
–¡'A! ¿Qache 'auaỹateno' naua la'aqtaqa na griegopi? 38¿Saishet qone' da nache 'am som sepettega Egipto le'ec maye huo'o so na'a'q, nache npa'aguene' ñim lta'a na nta'alpi maye neta'ague da Roma, nache ỹauegueuga so toolec so cuatro mil ỹalleppi maye laataxanaxaicpi?
39Nache so Pablo 'enapeco':
–'A'i, aỹem judío le'ec, ỹañoqo' ye Tarso maye ỹo'oxoraic yem huaigui ye 'alhua le'enaxat da Cilicia. Qalaxaye ñaq aỹem 'auchoxoren, aỹem 'auasheetem da sauo'o ca ỹa'aqtac nam shiỹaxauapi.
40Nache so huataxanaq lta'a ỹasheetem so Pablo da detaqa. Nache somaye nachaañi cam ñiguisheguem, nache ỹachaxaasheguem na lhuaq da 'enapega na shiỹaxauapi da de'enaxaatai'. Qaq co'ollaq mashe ntochiguiñi, nache somaye detaqa, huota'aisalo naua la'aqtaqa na judiopi. Nache 'eeta':
