Da ltaxaỹaxac so Pablo co'ollaq qaỹataxanot so nta'a Félix
1Qaq co'ollaq mashe inoxoore'c soua cinco na'axa'te, nache nvi' so Ananías som lataxala' na ntaxaỹaxanaxanecpi da qaitaxaỹapegue' Ñim Lo'onatac 'Enauacna nvita ye Cesarea, nataqa'en huo'oi soua nnaictagueto nam nqueroxonecpi maye nataxala'pi qataq so nanettalec da taunaxanaxaic, le'enaxat Tértulo. Nache soomaye nqo'oneua'alo so nta'a, da yaqto' qaỹa'axat cam lasouaxashet so Pablo. 2Qaq co'ollaq mashe qanauegueuo so Pablo, nache so Tértulo da'aqtaxanem so nta'a Félix dam 'eetega lasouaxashet so Pablo, 'eeta':
–Souaxat da qoneta 'am qarta'a, nache qomi' huo'o da qarlagaxayec yem souaqta'a qarma', qataq nam 'auamaxasoxoolecpi da qaỹo'ot, ỹataqta lta'araic da ltaunaxanaxac da shenaqta. 3Qaq 'enauac nam shiỹaxauapi maye neta'alo naua 'aleu' ỹataqta nache 'eetai' da ntootapeguec damaye, 'am qarta'a. 4Qaq qomi' saishet da sauoqtaique da qomi' 'ame'egueta, ỹoqo'oye nachaqrata da 'am seỹaxanaqot da cara'ac da qomi' 'ana'axaỹaxanalo. 5Cha'aye qomi' selaqalec ñi'iñi ỹale da ỹataqta sa qomi' ỹalemaxa't. Ỹataqta coleetac ivirapiguiñi, nache ỹo'ot da qomi' judiopi ñepa'aguenaxa't. Ñimaye nacheñi ñim lataxala' na ỹalleppi qataq 'alpi nam le'enaxat Nazarenos. 6-7Ñimaye nataqa'en ivira'a da huotaique da ỹe'enai' añi qaro'onaxanaxaqui late'erai; nache qomi' saconaxaua'a da secoñeraq. 8Qaq nagui 'am da 'auchemaxata, nache 'auaỹaten da ỹataqta 'eesa de'era sa'axattac.
9Nache nam judiopi maye ỹalectauo 'enauac nmasheguem da 'eetega da ỹataqta 'eesa de'era. 10Nache so nta'a ỹauota'a so la'anec da 'enapega so Pablo da yaqto' detaqa. Nache so Pablo 'enapeco':
–Aỹem saỹateeta da 'am 'alotague' ne'ena 'alhua, mashe qaỹoqteguelo soua vi'iye. Qaq ỹoqo'oye aỹem ỹataqta samachiguiñi da ishet da sauo'o ca itaxaỹaxac da ñeueela't da 'am satato'ot. 11Ñaq cha'ague da ñevita ye Jerusalén da yaqto' ñatamnot Ñim Lo'onatac 'Enauacna, qaq da 'auchemaxata damaye, nache 'auaỹaten dam sa'axattac da ỹataqta 'eesa. 12Nam shiỹaxauapi maye ỹauotaique ca ỹasouaxashet saishet da aỹem qanatenalec da huo'otaq huo'o ca ñecotatague', huo'otaq da so'ottac ca la'axa da huaigui añi no'onaxanaxaqui late'erai, huo'otaq da huaigui ana napaxaguenaxaquipi na judiopi, huo'otaq huo'o ca hua'ague yem nỹecpi. 13Qaq ne'ena shiỹaxauapi saishet da huo'o ca ỹoqta 'eesa 'enauac nam 'eetega da ỹasouaxashet. 14Qalaxaye aỹem sa'axatta da aỹem sho'oxoreetac Ñim Lo'onatac 'Enauacna maye ỹo'oxoreetac co'ollaxa som hua'au ita'alpi, qataq aỹem nataqa'en sa'amaqteetac So Jesús, namayepi 'eetega da sa ỹaỹamaxañi da qaỹa'amaqten Somaye, qalaxaye aỹem saỹaten da salaxaguet nam nanettañi namaxasoxonaxacpi. 15Qataq nache shena'am namayepi dam qanaquitaxac Ñim Lo'onatac 'Enauacna da na leuaxaicpi ishet da qaltaq nca'alec naqa'en, cam no'on da lataxac qataq cam qauem da lataxac. 16Qaq ỹoqo'oye aỹem ỹataqta ñepogoxoueetapegue' da salaxaguet Ñim Lo'onatac 'Enauacna, qaltaq da huo'o ca ilagaxayec da sootaigui na laỹepi shiỹaxauapi, qaq ỹoqo'oye da ivilỹaxac ỹataqta qaica ca tatapigui iuel.
17Qaq co'ollaq mashe qaỹoqteguelo soua vi'iye da secoleetac soota'a na laỹe 'alhua, nache aỹem ñe'eguelaxa ye ima' da ñeroi' aso itaunaxanaqte da setauan na choxoraqpi qataq da sanot aso ỹachetaqtaxanaqte Ñim Lo'onatac 'Enauacna. 18Qaq aỹem mashe so'ottac co'ollaxa de'era, nache huo'oi soua judío lashe' maye chegoqra'ague da 'alhua Asia. Soomaye aỹem iloralec da sootaigui añi no'onaxanaxaqui late'erai, can mashe seme da ñeỹoxoc da so'ottac dam maiche qarataxac. Qaq qaica da huo'otaq qalota na shiỹaxauapi, huo'otaq da huo'o ca la'axa. 19Qaq que'ecaua shiỹaxau' maye nachecauactaxa da ana'c, da yaqto' ỹa'axa't ca ỹasouaxashet da huo'otaq huo'o cam sa ỹaỹamaxare'n da sheeta, da yaqto' 'am da'aqtaxanem. 20Qalaxaye, nache 'ena'am ne'enapi da ishet da ỹa'axat nagui da huo'otaq huo'o ca ilalec ỹasouaxashet co'ollaq salectaigui so laponaxac nam lta'alpi na judiopi maye loicnatac na lataxaguesat. 21Cha'aye saiuena'a da huo'otaq nachera dam ỹa'aqtac da sasoilec co'ollaq ỹataqta sa ñecosaỹañi da sheeta': «Na na'a'q aỹem qanmichiitac souaxat da aỹem sa'amaqten da qaltaq qanca'alaxatec qome na leuaxaicpi.»
22Qaq co'ollaq hua'aqchigui de'era so nta'a Félix, qaq somaye ye ỹataqta ỹaỹateeta da llec nam ỹa'amaqteetac So Jesús, nache somaye nañaxaañi naqa'en so ntaxaỹaxac. Nache 'enapeco':
–Qom ivita da nvi' ca huataxanaq lta'a Lisias, nache qaltaq huo'o qome ca saỹaten de'era qancotaitapigui.
23Nache so nta'a Félix 'enapega som ilotague' na huataxanaqpi da ñaq 'eetalec da qaicoñettai' so Pablo, qalaxaye qoỹanem da ishet da huo'o ca ỹo'ot qataq qaỹasheetem na nauochaxauapi da namaqtegueua'a somaye, qataq da maiche qanayeuapegue' da qaitauan.
24Qaq soua lỹa't na'axa'te, nache qaltaq nvi' so Félix nnaictague' aso lhua Drusila, asomaye judío lashe. Nache somaye damaxasoxoneuga so Pablo da yaqto' na'axaỹaxana da ỹa'axat ca llec da qaipi'iỹa'a So Jesucristo. 25Qalaxaye co'ollaq so Pablo ỹa'axat da llec ca shiỹaxaua da no'on da lataxac, qataq da 'eetec da maiche ntel-la't, qataq cam pa'atec na'a'q qom qanmit 'enauacna, nache so Félix ỹataqta ñi'i. Nache 'enapeco':
–'Asoma qojec, maicheyo' qom qaltaq huo'o ca iraqa', nache qaltaq 'am seỹaxaneuga.
26Nataqa'en so Félix huo'o da lhuataxanaxac da huo'otaq so Pablo ishet da isheeten somaye, nache ishet da ỹaxanec. Qaq ỹoqo'oye ỹataqta qalota da iỹaxaneuga somaye da detaxaỹapegue'. 27Qaq ivi' soua dos vi'iye da 'eeta'ac de'era. Nache so Félix co'ollaq mashe saishet da nta'a, nache anac so Porcio Festo da qoỹanagui da lo'onataxanaxac somaye. Qalaxaye so Félix ye huotaique da qaica camachaqca naqa'en na judiopi, nache queto'ot co'ollaxa da icoñettai' so Pablo.
