Amós 2

₁Qaq Ñim Nataxala', 'eeta':

Na Moab le'ecpi ỹataqta qalota nam qauem ỹo'otpi,

ỹoqo'oye saishet qome da saxaañi da sauo'o na nhuaxanaguecpi,

cha'aye namayepi ỹavigaxa't co'ollaxa soua lpi'ineqa so nta'a ye Edom,

nache ivitta'a naqa'en da nañigui alo.

₂Ỹoqo'oye sauo'o qome ca norec da ỹavic ñaqa'en yi'iye 'alhua Moab,

nache que'eca norec nlachiguiñi naqa'en qome na nma' lta'araicpi ye Queriot,

nache da na'alaxac da qaỹa'alaxalec da alaataxac qataq da l-lamaxa ana nasheerepi,

qalaq nache huaigui qome da ileu na Moab le'ecpi.

₃Huaña, nache ñeqateua'a qome ca lta'a ne'ena nhuo' le'ecpi,

nache salauat, lỹaueegue' ñaqa'en ca 'amaqtaqaic ltauapi.

Qaq 'era da la'aqtac Ñim Nataxala'.

₄Qaq Ñim Nataxala', 'eeta':

Na Judá le'ecpi ỹataqta qalota nam qauem ỹo'otpi,

ỹoqo'oye saishet qome da saxaañi da sauo'o ca nhuaxanaguec,

cha'aye sa ỹaconeguet nam lapaxaguenataxanaxacpi Ñim Nataxala',

qataq sa ỹalaxagueta naua lqataxaco Ñimaye,

nacherata da natameetacot nam ỹaqa'a atamnaxala'pi,

maye natameetacot co'ollaxa so hua'au lta'alpi.

₅Qaq ỹoqo'oye sauo'o qome ca norec da ỹavic ñaqa'en ye Judá,

nache que'eca norec nlachiguiñi naqa'en qome na nma' lta'araicpi ye Jerusalén.

₆Qaq Ñim Nataxala', 'eeta':

Na Israel le'ecpi ỹataqta qalota nam qauem ỹo'otpi,

ỹoqo'oye saishet qome da saxaañi da sauo'o ca nhuaxanaguec,

cha'aye imen co'ollaxa nam no'on da lataxac

nache ỹataqta saq 'amaqtaq ana lasheue plata,

qataq da imen na choxoraqpi, qalaq 'eeta'am da lashiichiỹaxac ca pela'.

₇Qataq huetaiya' naqa'en na choxoraqpi,

qataq saishet da ỹo'otec ca ỹaỹamaqchiguiñi lataxac nam qaica ca la'amaqchec.

Qataq so nta'a qataq so ñalec qalaq lauatrapiguiñi' aso 'oonole 'alo,

nache qaica ca 'enec naqa'en da qui'itta ỹe'enaxat.

₈Qataq nca'aatrapeguelec nam choche npatanec nogoxotpi,

da hueta'a ca sa qaỹapeque aca camachaqaca ana nca'atoxonaxalatepi,

qataq desheenaxana na lataxa ỹauota'a ana anom ncachaqte,

nam nỹomtapigui da hueta'a anam atamnaxaqui

maye lalamaqte nam natamnaxala'pi.

₉Qataq ỹataqta ỹauaachigui ñaqa'en co'ollaq selaxachigui so amorreopi,

qaq na'aictaxa da ỹataqta logoraicpi 'eeta'am ana cedropi,

qataq ỹataqta 'añaxaicpi 'eeta'am ana qo'oipaqpi roble,

qataq dolagui ñaqa'en ana netasheguem alapi,

qataq na lpa'a'pi anamayepi.

₁₀Qataq aỹem, qami' ñeqateeguesopa co'ollaxa ye Egipto,

nache cuarenta vi'iye da qami' sauecta'agueta

co'ollaq qoquiitalec ye toolec 'alhua,

da yaqto' qami' sanema ye na'alhua na amorreopi.

₁₁Qaq saishet da qauqolliguichi de'era qami' Israel le'ecpi,

da sauo'o co'ollaxa na na'aqtaxanaxanecpi

sachegoxotaigui na qaỹa'alquipi,

qataq nam nazareopi maye sachegoxotaigui na nsoxoppi.

Qaq 'era da la'aqtac Ñim Nataxala'.

₁₂Qalaxaye qami' qanỹomaxañiigui co'ollaxa na lataxa so nazareopi,

qataq som na'aqtaxanaxanecpi saishet da qauashiñim da da'aqtaxan.

₁₃Qaq ỹoqo'oye qami' dapaxagueta qome ñaqa'en na 'alhua,

'eeta'am aca naigona maye nlaqchigui na trigo da huo'o ca dapaxañi naqa'en.

₁₄Huaña, nache ca ỹataqta qayaqaic qaica ca lle'eguenaqa' da datauec,

qataq ca ỹataqta 'añaxaic, qaica ca la'añaxac,

qataq cam ỹataqta qaramchigui ye lauel saishet da nca'alec.

₁₅Qataq nam ỹataqta ỹaỹaten da do'ogoxona na checnec qaica qome ca la'añaxac,

qataq nam ỹataqta qayaqaic da chegaqañi saishet da nca'alec,

qataq nam nelec na caaỹo da datauec, nataqa'en saishet qome da nca'alec.

₁₆Qaq que'eca na'a'q, nache na alaataxaicpi maye ỹataqta 'añaxaicpi,

qalaq nqata'a qome na lo'ogoxonaxatpi da yaqto' datauec.

Qaq 'era da la'aqtac Ñim Nataxala'.