Amós 3

₂«Nache qamiite' da qami' lleca'aua'alo,

co'ollaq lleca'agui nam nhuo' le'ecpi ana 'alhua.

Qaq ỹoqo'oye sauo'o qome ca qanhuaxanaguiiqui,

souaxat nam qauemsat maye qauo'oche».

₃Da huo'oi caua dos da nnaictega't,

qaq damaye ỹa'axat da caamaye naỹamaxareeta't.

₄Cha'aye ca llon da desoqo da huaigui ca aviaq, qache mashe huo'o ca loxonec,

qataq ca llalec camaye da desoqo da huetaigui ca lauac, qache huo'o ca loxonec.

₅Qaq ca qoỹo da naañi, da talec na 'alhua qache loxonec aca nqoina,

qaq aca nqoina da nchequiisheguem, qache huo'o ca loxonec.

₆Qaq da qaỹashiiyigui aca nasheere da huaña ca huaqta'a't nỹecpi,

nache na shiỹaxauapi ỹataqta ỹe'elaq,

qaq da huo'o ca qauem talec que'eca huaqta'a't nỹecpi,

qache maiche namaq Ñim Nataxala'.

₇Cha'aye Ñim Nataxala', saishet da huo'o ca ỹacoolec da ỹo'ot,

da saxanaxa da'aqtaxanem nam na'aqtaxanaxanecpi maye lamaxashecpi Ñimaye.

₈Qaq ¿negue'tom ca saishet da iviloxol da hua'axaỹa da desoqo ca llon?

qataq da damaxasoxon Ñim Nataxala', nache ¿negue't cam saishet da ỹa'axat cam ỹa'axata'a Ñimaye?

₉Ña qaua'aqtaxañi qome da huaña na nma' lta'araicpi ye Asdod,

qataq da huaña na nma' lta'araicpi ye Egipto, qoñiita':

«Qalapoñiỹa't qome huaña aye qasoxonaxapi ye Samaria,

nache qaumichiñi da qaica ca laỹamqa' nam hueta'a yemaye,

qataq da ỹataqta qaica ca qairen na hueta'a yemaye».

₁₀Qaq da la'aqtac Ñim Nataxala', 'eeta':

«Namayepi sa ỹaỹaten da ỹo'ot ca ỹaỹamaqchiguiñi lataxac,

qataq ỹoxotoiguilo naua nma'ate lta'araiqa na lcachaxatpi,

maye ỹachegoxotaigui da qaica ca iren».

₁₁Qaq ỹoqo'oye Ñim Lo'onatac 'Enauacna maye Nataxala', 'eeta':

«Huo'o qome ca anac nam qanpa'aguenaxauaipi

nache coleesop na qana'alhuai,

nache nlaxaañi qome na ñe'eguenaxaquipi,

qataq ỹacona da ỹache nam huetaigui na nma' lta'araicpi.»

₁₂Qaq da la'aqtac Ñim Nataxala', 'eeta':

«'Eeta'am ca qagueta lo'o da nhuo' ca llon

da deuotaxaneque caua dos lapia'ate,

huo'otaq caua ltela lsheeneqa aca qagueta,

qaq nache 'eetec qome da qoỹet nam Israel le'ecpi maye netaña na Samaria,

nam hua'aqtalec naxa nam na'axasoxola'pi

maye ỹataqta no'on maye chegaqa'a ye Damasco.»

₁₃Qaq Ñim Nataxala', Ñim Lo'onatac 'Enauacna, maye Qaica ca Ỹaqalanapec, nataqa'en 'eeta':

«Ña qana'axaỹaxañi qami', nache qaua'axachi da ỹa'aqtac maye dataỹa'aguet na lauo' le'ecpi so Jacob,

₁₄cha'aye qom ivita ca na'a'q da sauo'o ca nhuaxanaguec na Israel le'ecpi souaxat da lle'etaxaloxo,

nache selaxachigui qome ana nca'atoxonaxalatepi ye Betel,

qataq huacagre'c ñaqa'en naua lcoue aca nca'atoxonaxalate,

nache naayiñi huetraiya' ñaqa'en.

₁₅Qataq nlachiguiñi ñaqa'en na nỹecpi maye qanayeetaigui da nvi' na latomaxa,

qataq na nỹecpi maye qanayeetaigui da nvi' na napaxaỹaxa,

qataq nache loga't ñaqa'en na nỹecpi maye llo'oxoraxat na marfil,

qataq ỹataqta nlachiguiñi ñaqa'en na nma' lta'araicpi».

Qaq 'era da la'aqtac Ñim Nataxala'.