1Qaq co'ollaq mashe ivi' soua tres vi'iye da lo'onataxanaxac so Joaquim, da nta'a ye Judá, nache so Nabucodonosor maye nta'a ye Babilonia ivita ye Jerusalén, nache somaye, qataq som nalleppi coleesop yemaye. 2Qaq Ñim Nataxala' ỹanem so Nabucodonosor, da loxonec so Joaquim, qataq da deuotaxanec so qalota nhuenecpi aso atamnaxaqui maye lalamaqte Ñim Lo'onatac 'Enauacna. Nache so Nabucodonosor, ỹauec so lcoñeteguishecpi ỹauega ye Babilonia, qaq se'eso nhuenecpi maye saqaishetapec, qalaq ỹachaigui co'ollaxa aso laỹe' na logoxoshetpi aso atamnaxaqui maye netaigui som natamnaxala'pi somaye, 3qaq so Nabucodonosor, 'enapega nataqa'en so Aspenaz, som lataxala' som do'onataxaategueua'a so lma' lta'araic somaye, da ỹauo'o ca ỹauegueua'a somaye, nam Israel le'ecpi maye chegoxoguet so nta'alpi. 4Qaq camayepi, iuen da nsoxoppiolec maye ỹataqta nalochiyiñi da lataxa'c, qataq qaica ca lque'emaxa na lo'oc, qataq ỹataqta nalaua'a da nauattonaxanaxac, qataq da naỹaanataxanaxac, qataq ỹaanataxanaxaicpi, qataq sanqalat da huo'o ca qaỹapaxaguenec, qataq nalaua'a da do'onataxaneua'a ñi lma' lta'araic ñi nta'a. Qaq camayepi qaỹapaxaguenec qome da neraxanaxac, qataq na la'aqtacpi na caldeopi. 5Qaq so Nabucodonosor nataqa'en damaxasoxoolec da que'eca nsoxoppiolec, iuen da 'enauaque naua na'axa'te da qaiquia'axaateguec nam nallec, qataq na lataxa maye qoỹaata'am naxa somaye, qataq tres vi'iye da qaỹapaxagueetac, qaq da ivildec caamaye, nache ishet da do'onataxanot so nta'a.
6Qaq se'eso nsoxoppiolec, nache ỹalectraigui soua Daniel, Ananías, Misael qataq so Azarías, maye chegoxoreguet so Judá, 7qaq som lataxala' som do'onataxaategueua'a so nma' lta'araic, somaye naralaxa't naua le'enaqa'ate soomaye. So Daniel ỹanagui da Beltsasar, so Ananías qalaq ỹanagui da Sadrac, so Misael qalaq ỹanagui da Mesac, qaq so Azarías qalaq ỹanagui da Abednego. 8Qalaxaye so Daniel, lhuennataxac co'ollaxa da saishet da nshepaxanaqcheela't, da chec so nallec qataq so lataxa maye qoỹaata'am naxa so nta'a, qaq ỹoqo'oye dequiguiỹo'ot som ilotague' so nma' lta'araic, da saishet da ỹamaqtalec da chec se'eso nallec da yaqto' saishet ishepaxanaqchet somaye. 9Qaq Ñim Lo'onatac 'Enauacna, ỹo'ot co'ollaxa da som ilotague' so nma' lta'araic, ỹataqta ỹamaateguet so Daniel, 10qalaxaye 'enapego' somaye, 'eeta': Aỹem ỹataqta huo'o da icolanaxa ñi ña'aco', maye nta'a. Cha'aye ñimaye mashe aỹem ỹamaxalec nam nallec qataq na lataxa maye iuen da qami' sanema, qaq ñimaye qom ila'a da qaica ca qaryaqui, saqanachiñiiguet na laỹepi nsoxoppiolec, qaq huaña qome nache qami' chegoqchiguilo da ñi nta'a aỹem ỹalauat. 11Nache som lataxala' so do'onataxaategueua'a so nma' lta'araic, ỹauo'o so ipataxagueta da ilo'oguelo soua Daniel, Ananías, Misael qataq so Azarías, nache so Daniel detaxaỹapegue' somaye, nache 'eeta': 12Aỹem 'am ñachoxonnot da ñaq 'avi'igue'n qome ne'enaua 'aramaxa'she: 'Auauo'o qome ca 'ara'aqtac da ivittrec caua diez na'axa'te da sacheguenaqtac qanqa'en ana huoue maye nañiguishe, qataq da nda'a't na 'etaxat da ñeỹomaqtapigui. 13Qaq qom inoxoorec que'ecaua na'axa'te, nache 'analoqneguet qome da qarasheguiỹaxac, da lasheguiỹaxac na laỹepi nsoxoppiolec maye deque'etegueua'a na aloq ñi nta'a, qaq ime qome nache qomi' 'auo'oteque cam 'eetec cam 'armeenaxanaxac da shenaqta. 14Nache som ilotegueto soomaye ỹaỹamaxareeta de'era, nache ivittrec naqa'en soua diez na'axa'te da ỹe'egue'n soomaye. 15Qaq co'ollaq inoxoorec soua diez na'axa'te, nache da lashiguiỹaxa'c soomaye ỹataqta 'onaxaiqa qataq sansatte', qaq saishet da 'ena'am som laỹepi nsoxoppiolec maye deque'etegueua'a na aloq so nta'a. 16Qaq 'era da 'eetec da som ilotagueto soomaye, da saishet da ỹanema soomaye so nallec maye aloq so nta'a, qataq so lataxa maye nỹomtapigui somaye, nache nmeneguet naqa'en ana huoue maye nañiguishe da iquia'axaategueque soomaye. 17Qaq Ñim Lo'onatac 'Enauacna ỹanema se'esoua cuatro nsoxoye da laỹaane'c, qataq da laỹaanataxanaxa'c da ỹaỹateetegueta 'enauac ana nerepi, qataq 'enauac na laỹepi naỹaanecpi. Qaq so Daniel qalaq nataqa'en ỹaỹaten da ỹa'axategue da naigui na nauanaqchecpi, qataq na nchoxonaxacpi. 18Qaq co'ollaq ivireuga so laloqo' maye ỹecchiguiña so nta'a da qaỹauegueua'a somaye se'esoua nsoxoye, nache som lataxala' som do'onataxaategueua'a so nma' lta'araic, ỹauegueua'alo so nta'a soomaye. 19Nache so nta'a detaxaỹapegueto soomaye, qaq so nsoxoppiolec maye ỹalectraigui soomaye, qalaq qaica ca 'eeta'ama soua Daniel, Ananías, Misael qataq so Azarías, qaq ỹoqo'oye soomaye nache do'onataxaarot so nta'a. 20Qaq 'enauac nam lataxacpi maye iuen ca naỹaanec, qataq naỹaanataxanaxac, maye denataxanec so nta'a, qaq somaye ila'a da ỹactec da laỹaane'c soomaye, napacalec som 'oiquiaxaipi, qataq som ilaviigui ca lỹa maye lo'onataxanaxanecpi somaye. 21Qaq so Daniel, nache hueta'a co'ollaxa yemaye, ivitta'a da inoxonec so 'oonolec vi'i da lo'onataxanaxac da nta'a so Ciro.
