Ezequiel 48

₁Qaq 'ana ana lmalate naua le'enaqa'ate soua chegoxogueta so Israel: So Dan huo'o qome ca taỹot chegoqchiguiña da pa'aỹa'ague da nala' lliguisheguem, nache ivira'a ye pa'aỹa'ague da nala' lliguiñi, qataq chegoqchiguiña ye sheu' nache quetelec ye Jetlón, nache taỹa'a ye Hamat, qataq ye Jasar Enán, maye pa'aỹa'ague da taguiñi ye 'alhua ye Damasco qataq ye Hamat.

₂Qaq so Aser huo'o qome ca taỹot maye chegoqchiguiña ye loga't ye na'alhua so Dan, chegoqchiguiña da pa'aỹa'ague da nala' lliguisheguem, nache ivira'a ye loigue aso auaxai.

₃Qaq so Neftalí huo'o qome ca taỹot chegoqchiguiña ye loga't ye na'alhua so Aser, chegoqchiguiña ye pa'aỹa'ague da nala' lliguisheguem, nache ivira'a ye loigue aso auaxai.

₄Qaq so Manasés huo'o qome ca taỹot chegoqchiguiña ye loga't ye na'alhua so Neftalí, chegoqchiguiña ye pa'aỹa'ague da nala' lliguisheguem, nache ivira'a ye loigue aso auaxai.

₅Qaq so Efraín huo'o qome ca taỹot chegoqchiguiña ye loga't ye na'alhua so Manasés, chegoqchiguiña ye pa'aỹa'ague da nala' lliguisheguem, nache ivira'a ye loigue aso auaxai.

₆Qaq so Rubén huo'o qome ca taỹot chegoqchiguiña ye loga't ye na'alhua so Efraín, chegoqchiguiña ye pa'aỹa'ague da nala' lliguisheguem, nache ivira'a ye loigue aso auaxai.

₇Qaq so Judá huo'o qome ca taỹot chegoqchiguiña ye loga't ye na'alhua so Rubén, chegoqchiguiña ye pa'aỹa'ague da nala' lliguisheguem, nache ivira'a ye loigue aso auaxai.

₈Qaq yem loga't ye na'alhua so Judá, chegoqchiguiña ye pa'aỹa'ague da nala' lliguisheguem, nache ivira'a ye loigue aso auaxai, nache huaña qome ca qano'onataxañi 'alhua laỹe maye ivi' doce kilómetros y medio ye lcateueegue, qaq ye lalogaxa qalaq 'eeta'am ye lalogaxa na laỹepi 'alhuapi maye chegoqchiguiña da pa'aỹa'ague da nala' lliguisheguem, nache ivira'a ye pa'aỹa'ague da nala' lliguiñi. Qaq ye laiñi camaye qalaq nache naña qome aca atamnaxaqui.

₉Qaq cam 'alhua maye qoỹanot qome Ñim Nataxala' maye huaigui que'eca 'alhua, camaye ivi' qome doce kilómetros y medio ye lalogaxa, qataq diez kilómetros ye lcateueegue. ₁₀Qaq nache huaigui qome que'eca 'alhua cam qaiỹotauga da yaqto' lalamaxat na ntaxaỹaxanaxanecpi, qaq chegoqchiguiña qome da pa'aỹa'ague da sheu', nache ivira'a ye pa'aỹa'ague da taguiñi, qaq camaye ivi' doce kilómetros y medio, qaq da chegoqchiguiña da pa'aỹa'ague da nala' lliguisheguem, nache ivira'a ye pa'aỹa'ague da nala' lliguiñi nache ivi' cinco kilómetros. Qaq ca laiñi que'eca 'alhua, nache naña qome aca atamnaxaqui maye lalamaqte Ñim Nataxala'. ₁₁Qaq que'eca 'alhua qaiỹotauga qome da lalamaxat na ntaxaỹaxanaxanecpi maye chegoxoguetpi so Sadoc, nam nañanot Ñim Nataxala', qataq huetague' na ỹo'onatacpi, qataq saishet da quegue da lataxac na laỹepi Israel le'ecpi, co'ollaq namayepi ca'ai da ñeqa'aicỹaxac, 'eeta'am da 'eetec co'ollaxa na leviitapi. ₁₂Qaq ỹoqo'oye que'eca 'alhua maye qaiỹotauga da qoỹanot Ñim Nataxala', cam huaqta'ai' ca na'alhua na leviitapi, nache huaigui qome ca na'alhua na ntaxaỹaxanaxanecpi, qaq camaye ỹataqta saqaishetapec qome. ₁₃Qaq cam na'alhua nam ntaxaỹaxanaxanecpi, nache huaqta'ai' qome ca na'alhua na leviitapi, qaq camaye ivi' qome doce kilómetros y medio ye lalogaxa, qataq cinco kilómetros ye lcateueegue, qaq ca 'alhua maye qoỹanot Ñim Nataxala' da ima'a't, qalaq ivi' doce kilómetros metros y medio ye lalogaxa, qataq diez kilómetros ye lcateueegue. ₁₄Qaq que'eca nacheca ca ỹataqta no'on 'alhua maye qaiỹotauga. Qaq camaye saishet qome da qaimen ca laỹe, huo'otaq da huo'o ca nmeneguet qanqa'en, huo'otaq da huo'o ca qoỹanem lỹa shiỹaxaua, cha'aye camaye lalamaxat Ñim Nataxala'. ₁₅Qaq ca laỹe maye no'onañi maye ivi' doce kilómetros y medio ye lalogaxa, qataq dos y medio kilómetros ye lcateueegue, qaq camaye ishet da qaiuen. Qataq camaye ishet da nalec na shiỹaxauapi, qataq da ñaxaalec qome qanqa'en na 'auaqpi da yaqto' lquia'aqa' ca shiguiỹacpi. Qaq na laiñi camaye, qalaq nache naña qome ca huaqta'a't nỹecpi, ₁₆qaq camaye iuen ca 'alhua maye ivi' dos mil doscientos cincuenta metros naua cuatro laỹel. ₁₇Qaq naua loiguiye que'eca huaqta'a't nỹecpi, nache huaña qome ca 'auaqpisat maye ivi' ciento veinticinco metros ye lcateueegue 'enauaque naua cuatro laỹel. ₁₈Qaq naua laỹel que'eca huaqta'a't nỹecpi, nache huaqta'ai' qome ca 'alhua maye lalamaxat Ñim Nataxala', maye ivi' cinco kilómetros ye lalogaxa ca dataigue da nala' lliguisheguem, qataq ca dataigue da nala' lliguiñi. Qaq que'eca 'alhua camaye ishet da qoỹanaxaalec, qaq na chegaqaigui ala qalaq ishet qome da aloq cam shiỹaxauapi maye ỹo'ottac cam huaqta'a't nỹecpi. ₁₉Qaq cam ỹo'ottac qome que'eca huaqta'a't nỹecpi, qalaq chegaqaigui qome 'enauac na chegoxoguetpi so Israel. ₂₀Qaq 'enauac ca 'alhua maye qaiỹotauga, qataq cam lalamaxat Ñim Nataxala', qataq cam 'alhua maye netalec ca huaqta'a't nỹecpi da ima'a't qome, nache ivi' doce kilómetros y medio ñi 'oonolec naua cuatro laỹel.

₂₁Qaq cam 'alhua maye hueto'ot naua laỹel cam 'alhua maye ỹalamaxat, qataq cam 'alhua maye lalamaxat ca huaqta'a't nỹecpi, camaye lalamaxat qome ca nta'a. Qaq que'eca nta'a, taỹot qome ca 'alhua maye ivi' doce kilómetros y medio ye lcateueegue maye dataigue da nala' lliguisheguem, nache ivira'a ye loga't maye pa'aigue da nala' lliguiñi, nache ivira'a aso auaxai. Qaq 'enauac que'eca 'alhua, nache huaqta'ai' na laỹepi 'alhuapi. Qaq na laiñi nache huaña ca qaiỹotauga 'alhua, qataq aca atamnaxaqui. ₂₂Qaq nache 'eeta'am cam 'alhua maye lalamaxat na leviitapi, qataq ca 'alhua maye lalamaxat ca huaqta'a't nỹecpi, vichiguinguilo qome naua loga'te ye na'alhua so Judá qataq so Benjamím, qataq vichiguingui na laiñi yemaye ca lalamaxat ca nta'a.

₂₃Qaq na laỹepi nhuo' le'ecpi, so Benjamín huo'o qome ca taỹot 'alhua chegoqchiguiña ye pa'aỹa'ague da nala' lliguisheguem, nache ivira'a ye loigue aso auaxai.

₂₄Qaq so Simeón huo'o qome ca taỹot 'alhua chegoqchiguiña ye loga't ye na'alhua so Benjamín, chegoqchiguiña ye pa'aỹa'ague da nala' lliguisheguem, nache ivira'a ye loigue aso auaxai.

₂₅Qaq so Isacar huo'o qome ca taỹot 'alhua chegoqchiguiña ye loga't ye na'alhua so Simeón, chegoqchiguiña ye pa'aỹa'ague da nala' lliguisheguem, nache ivira'a ye loigue aso auaxai.

₂₆Qaq so Zabulón huo'o qome ca taỹot 'alhua chegoqchiguiña ye loga't ye na'alhua so Isacar, chegoqchiguiña ye pa'aỹa'ague da nala' lliguisheguem, nache ivira'a ye loigue aso auaxai.

₂₇Qaq so Gad huo'o qome ca taỹot 'alhua chegoqchiguiña ye loga't ye na'alhua so Zabulón, chegoqchiguiña ye pa'aỹa'ague da nala' lliguisheguem, nache ivira'a ye loigue aso auaxai.

₂₈Qaq ye loga't ye na'alhua so Gad maye dataigue da taguiñi, nache chegoqchiguiña ye Tamar, nache ivira'a añi lapel maye naña ye Meribá Cadés, qataq taalec so la'auaxac ye Egipto, nache iviraxaama aso auaxai Mediterráneo. ₂₉Qaq 'ena nam 'alhua maye taỹot qome da lalamaxat nam chegoxoguetpi so Israel, qataq 'era da lataxac da qaumiñiiuec qome namaye. Qaq 'era da ỹamaxasoxonaxac Aỹem Nataxala'.

₃₀Qaq 'ena na ñeguecpi qome ca huaqta'a't nỹecpi: Da laỹe maye pa'aỹa'ague da sheu' qalaq ivi' dos mil doscientos cincuenta metros.

₃₁Qaq ñi 'oonolec que'ecaua laso'omi ca huaqta'a't nỹecpi, nache huetalec ca le'enaxat ñi 'oonolec soua doce chegoxogueta so Israel. Qaq que'ecaua tres maye pa'aira'ague da sheu' nache ca 'oonolec huetalec qome da le'enaxat so Rubén, qaq ca lỹa qalaq huetalec ca le'enaxat so Judá, qaq ca lỹa qalaq huetalec da le'enaxat so Leví.

₃₂Qaq da pa'aỹa'ague da nala' lliguisheguem ca huaqta'a't nỹecpi, qalaq ivi' dos mil doscientos cincuenta metros. Qaq caua tres laso'omi, nache huetalec ca le'enaxat so José, Benjamín qataq so Dan.

₃₃Qaq da pa'aỹa'ague da taguiñi ca huaqta'a't nỹecpi, qalaq ivi' dos mil doscientos cincuenta metros. Qaq caua tres laso'omi nache huetalec ca le'enaxat so Simeón, Isacar qataq so Zabulón.

₃₄Qaq da pa'aỹa'ague da nala' lliguiñi ca huaqta'a't nỹecpi, qalaq ivi' dos mil doscientos cincuenta metros. Qaq caua tres laso'omi, nache huetalec da le'enaxat so Gad, Aser qataq so Neftalí.

₃₅Qaq cam mpaqtaxanaxat da ima'a't qome nache ivi' nueve mil metros ye lalogaxa, qaq dam le'enaxat qome que'eca huaqta'a't nỹecpi qalaq, 'eeta': «Ñim Nataxala' hueta'a ne'ena.»