Deuteronómio 17

₂«Qaq da huo'otaq huo'o ca ỹale, huo'otaq 'alo, nam maiche qarhuo'oi le'ecpi, maye netaigui ca huaqta'a't nỹecpi maye ỹotta'a't naua nañalo maye qami' ỹanema qome Ñim Nataxala' da ỹo'ot ca sa ỹaỹamaxañi da ỹauaachigui Ñim Nataxala', qataq sa ỹalaxaguet na naỹamaxataxacpi Ñimaye, ₃da ca'ata ca laỹe atamnaxala'pi da ỹa'aroto naua l-llecte da natamnot, huo'otaq añi nala', ca'agoxoic, huaqaañipi, maye neto'ot na piguem maye saishet da damaxasoxoolec Ñim Nataxala'. ₄Qaq da qauaỹaañi de'era nache ỹataqta qauchemaxachiỹa qome camaye, qaq da huo'otaq 'eesa da ỹo'ottac de'era qaiqaiga da netaña na Israel, ₅nache que'eca ỹale huo'otaq 'alo maye ỹo'ot de'era saỹaỹamaxañi, qaỹauegueuga ca ñegueuo ca huaqta'a't nỹecpi nache qaira'a ca coma' da qaỹasaq choche ivitta'a da ileu.»

₆«Qalaxaye iuen da dos huo'otaq tres caua shiỹaxau' maye ỹa'axa't da ỹauaachiyigui camaye, nache camaye ishet da qaỹalauat, qaq da huo'otaq 'oonolec shiỹaxaua ca da'aqtaxan, nache saishet da qaỹalauat camaye. ₇Qaq que'ecaua shiỹaxau' maye da'aqtaxa'n caamaye nachecaua caua la'auaxanaqa da ira'alo ca coma' da ỹasaq que'eca shiỹaxaua maye qaỹalauat. Qaq da ime, nache dasaxasoxon 'enauac ca maiche nhuo' le'ecpi, huaña nache imeuo qanqa'eñi que'eca qauem maye qami' huetanguilo.»

₈«Qaq da qanmichi ca ỹataqta qalaqaic, 'eeta'am ca nalaatac, cotaxac, huo'otaq da huo'o ca qaique'emaqchet, huo'otaq huo'o ca lỹa qanqalaata'ai', nache qauroiua'a qome ca lca'ateua'a da lanataqa' Ñim Nataxala' maye Qanatamnaxala'ai, ₉nache qanachaachiua'a ca ntaxaỹaxanaxanecpi leviitapi, qataq ca aloico lo'o' da qaua'aqtaxañim. Nache camayepi qami' da'aqtaxanema ca ỹaỹamaqchiguiñi lataxac ca qanqalañiita'ai', ₁₀nache qami', qaupaquiichigui da qauo'oche qome 'enauac na qami' qaỹapaxagueneque lataxac. ₁₁Qataq ỹataqta qauo'oche 'enauac cam qami' ỹapaxagueneque camayepi, qataq qoquiitelec da lataxac da nhuaxanaguec cam huo'o ca lasouaxashet, saishet da qauashaxañiiuec. ₁₂Qaq da huo'o ca shiỹaxaua napagaqaanaxaic da saỹalaxaguet ca la'aqtac ca ntaxaỹaxanaxanec, huo'otaq ca aloico lo'o maye lamaxa'she Ñim Nataxala', nache camaye qaỹalauat. Yaqto' imeuo, ca qauem maye huetaña na Israel. ₁₃Yaqto' da ỹaỹaten de'era na nhuo' le'ecpi, nache huo'o da lcolanaxa qataq saishet da na'amaqten.»

₁₄«Qaq da ivita da qaunoxoñiiua'a ye 'alhua maye qami' ỹanema Ñim Nataxala' maye Qanatamnaxala'ai da yaqto' qoñiỹalec, nache da qoñiita': ‹Sauoqtaique da huo'o ca qarta'a da yaqto' qomi' ilo'oguelo da 'eeta'am da 'eetec na ỹotta'a't shiỹaxauapi maye qarhuoreuapi›, ₁₅qaq da huo'o ca qaỹa'añiỹagui da nta'a que'eca qana'alhuai, nache qalca'aiua'a ca maiche qarhuo'oi le'ec, qataq lca'aguishec Ñim Nataxala' maye Qanatamnaxala'ai. Nache saishet da qauacoñiua'a ca chegaqauec maye saishet da qarhuo'oi le'ec da yaqto' qarta'ai. ₁₆Qataq que'eca nta'a saishet qome da qalota ca lalo caipi, qataq saishet da ỹamaxa ye Egipto ca shiỹaxauapi da yaqto' nquiguec ca lalo caipi, cha'aye Ñim Nataxala' qami' 'enapegalo co'ollaxa, 'eeta': ‹Saishet qome da qaltaq qavi'iguelaqaigue ne'ena qoyiqui› ₁₇Qataq camaye saishet qome da qalota aca lhuapi yaqto' saishet da dasheuec da lquiyaqteỹaxac, qataq saishet da ỹapagaqnauec da laỹootasheguem ca oro qataq ca plata.»

₁₈«Qaq que'eca nta'a qom ỹacoolec da lo'onataxanaxac da nta'a, nache damaxasoxoolec qome da qaỹo'ot aca nere da qoỹerelec ne'ena nqataxacpi, qaỹachegoxotaigui aca nere maye ilotague' na ntaxaỹaxanaxanecpi leviitapi. ₁₉Qaq nache sa iỹotec qome aca'aca nere maye qoỹerelec ne'ena nqataxacpi, qataq 'enauaque naua na'axa'te de'era nachaalataxac da itaxaỹaxaatac acamaye, yaqto' huo'o naq 'enec naqa'en Ñim Nataxala' maye Natamnaxala'. Qataq ipactelec da ỹo'ot 'enauac na napaxaguenataxanaxacpi qataq na namaxasoxonaxacpi, ₂₀yaqto' saishet da ipi'itaxaatega da nataỹaña na lauo' le'ecpi, qataq saishet da ỹaxanec na nqataxacpi. Yaqto' camaye qataq ca chegoxoguetpi, qaỹoqtec da lo'onataxanaxac da nta'a na Israel.»