Da lataxac da nalara't caua nhua't
1Qaq da huo'o ca ỹale da huaroneguet aca 'alo, qaq da qaỹata'ague da lhua acamaye, nache da huo'o ca sa ỹaỹamaxaren camaye. Nache camaye ishet da ỹauo'o aca lereguishe, lmalate da nalate' acamaye. Qaq da ime, nache ỹanem acamaye qataq ca'ai naqa'en ca lma'. 2Qaq acamaye da ime da ca'ai ca nma', nache ishet da qaltaq huaroneguet ca lỹa ỹale, 3qalaxaye que'eca dalaxaic lhua, da qaltaq ỹo'otan acamaye, nache qaltaq ỹanem aca lereguishe lmalate da nalate' acamaye, ime nache ca'ai naqa'en ca lma'. Qaq da huo'otaq ileu que'eca dalaxaic lhua, 4nache que'eca hua'auteguet lhua acamaye, saishet da qaltaq huaroneguet acamaye, cha'aye acamaye mashe saishet da qui'itta. Cha'aye de'era nataxac damaye ỹataqta deqaiga Ñim Nataxala'. Qataq saishet qome da qana'axache ye 'alhua maye qami' ỹanema qome Ñim Nataxala' maye Qanatamnaxala'ai da yaqto' qaralamaxache.
5Qaq da huo'o ca ỹale da ñaq cheta'ague da huaron, nache saishet qome da qaỹamaxa ca alaataxac, huo'otaq da huo'o ca lỹa qaỹamaxalec da ỹo'ot. Nacherata da 'oonolec vi'i qanqa'en da huapegue' ca lma', qataq da machiguiñi naqa'en aca lhua.
6Qaq da huo'o ca 'am neto'ot aca lavigaxaiste, nache saishet qome da 'auacona ca lamaicnaxanaxat coma', huo'otaq ca coma' maye lo'o da huo'o ca qailaxachigui, cha'aye damaye 'eeta'am da qaỹacona da nachaalataxac camaye.
7Qaq da huo'o ca qaỹauanalec Israel le'ec da decachiỹa ca maiche lauo' le'ec da ỹauo'o l-latac, huo'otaq imen, nache que'eca cachaxaic qaỹalauat. Qaq 'era da 'eetec da ỹataqta qanqachiiua'a qome 'enauac ca qauem maye qami' huetanguilo.
8Qaq da huo'otaq huo'o ca nchega na lo'oc, nache qaupaquiichigui qome ca lapaxaguenataxanaxacpi na ntaxaỹaxanaxanecpi leviitapi. Yaqto' ipacchigui 'enauac da samaxalec namayepi. 9Qataq qantooñita'ac qome da ỹo'otec Ñim Nataxala' aso María co'ollaq huangui so nqa'aic, co'ollaq mashe qoquiỹa'ai ye Egipto.
10Qaq da huo'o ca ỹa'aalaxanaxan ca lỹa, nache camaye saishet qome da pa'aigui ca lma' ca lỹa da ỹacona ca camachaqca logoxoshet da nmeneguet naqa'en. 11Nacherata da pa'atauec camaye da iuata'aguet ca lỹa, da maiche ndouec ca lpatanec. 12Qaq da huo'otaq choxoraq que'eca shiỹaxaua maye ipatanauo ca lapo', nache saishet da qaiviraxatta'a ca pe da qaỹe'eguelaxatot ca lpatanec. 13Nacherata da qaỹe'eguelaxatem que'eca lpatanec da yaqta'a da inoxooñi añi nala', yaqto' napogoña camaye da do'oche da pe. Yaqto' 'am ỹasaxalec ca 'onaxaic la'aqtac, qataq ỹaỹamaxareeta da 'arataxac da 'am ỹalletagui Ñim Nataxala' maye 'Anatamnaxala'.
14Qaq da 'auo'onataxanaxan ca shiỹaxaua choxoraq maye huo'o da lhuenaxanaxa, nache saishet da sa 'ausheeten, na'aictaxa da Israel le'ec huo'otaq ca chegaqauec. 15Qaq camaye nacheye ye na'a'q da 'ausheeten aca laueque, da ñaq saxanaxa inoxooñi añi nala', cha'aye camaye choxoraq qataq iuen aca'aca laueque da yaqto' deque'etac. Ten qom iỹaxanot Ñim Nataxala' da 'am talec naqa'en ca qauem, nache huo'o qome ca 'arasouaxashet.
16Saishet qome da qaỹalaua't caua nta'al souaxat ca lasouaxashet ca llalaqpi, qataq ca ñalaqpi saishet da qaỹalauat souaxat ca lasouaxashe't caua lta'al. Nacherata da ñi 'oonolec ilem ca maiche lasouaxashet.
17Saishet qome da qauo'ochec ca sa ỹaỹamaxañi ca ỹaqa'a ca chegaqa'ague, qataq ca saploq, huo'otaq da qauacoñiỹa ca lpatanec lapo' aca pa'ai. 18Qataq saishet qome da qaucouaỹa'ai da qami' nlataqa co'ollaq qoviita'a ye Egipto, qalaxaye Ñim Nataxala' maye Qanatamnaxala'ai qami' nqateeguesopa co'ollaxa yemaye. Qaq ỹoqo'oye nagui, qami' samaxaleguete da qaupaquiichigui qome da qauo'oche de'era.
19Qataq da qanqache aca ala ca qorañiguishiqui, nache da huo'o aca qaucouaỹa'ai aca naqtapi, nache saishet da huo'o ca ỹe'eguelaxauec da ỹe'eguenauga acamayepi, nacherata da qauaqaita'a qome yaqto' natosheguem cam chegaqauec, huo'otaq ca saploq, huo'otaq aca pa'ai, yaqto' Ñim Nataxala' maye Qanatamnaxala'ai, ỹo'ot ca qanchoxonnataguiiqui, chegoqchigui naqa'en da qaro'onataxanaxaqui.
20Qataq da ivita da qanacholaxañiiñi aca ala aca qa'añiguishi olivo, nache saishet qome da qaltaq qanapoqui aca ñaq netagui aca lcouepi, nacherata da qauaqaita'a qome da yaqto' natosheguem cam chegaqauecpi, qataq ca saploqpi, qataq aca pa'aipi.
21Qataq da qanqache aca qa'añiguishepi uva, nache saishet da qanmachiita aca ala, qaq aca no'onañipi, nache qauaqaita'a qome, yaqto' nqat ca chegaqauecpi, qataq ca saploqpi, qataq aca pa'aipi. 22Qataq qantooñita'ac qome da qami' nlataqa co'ollaq qoviita'a ye Egipto, qaq ỹoqo'oye qami' samaxaleguete da qaupaquiichigui qome da qauo'oche de'era.
