Ñim Nataxala' naỹamaxate' so Israel le'ecpi huaña ye Moab
1Qaq 'enaua naua na'aqtaqa co'ollaq qaỹo'ot da aỹamaxataxac, maye Ñim Nataxala' ỹamaxalec co'ollaxa so Moisés da ỹo'ot, huaña ye Moab da yaqto' Ñimaye naỹamaxate' so Israel le'ecpi 'eeta'am co'ollaxa so huaña ye Horeb. 2Nache so Moisés laỹona't co'ollaxa so Israel le'ecpi nache, 'eeta': Qami' qauauañiichigui co'ollaxa 'enauac nam ỹo'otpi Ñim Nataxala' co'ollaq huaña ye Egipto da ỹo'otec so faraón, qataq so ltauapi qataq 'enauac na lma' co'ollaxa yi'iye 'alhua. 3Qataq ỹataqta qauauañiichigui 'enauac som na'anecpi qataq som ỹo'ot da na'aalaxa. 4Qalaxaye ivitta'a nagui da Ñim Nataxala', saxanaxa da ỹo'ot da lauattonaxanaxac naua qarquiyaqchilli', qataq saxanaxa da nauaayiñi naqa'en naua qara'ai'chilli', qataq saxanaxa da hua'axai' naua qartelai. 5Qaq ivittraue'c soua cuarenta vi'iye da qami' sauecta'agueta da qoquiitalec ye toolec 'alhua, yem huaña da saishet da ltoi' soua qorogolli' qataq soua qarapela'achilli'. 6Qataq saishet da qollequi aca nauole 'ayiiña, qataq saishet da qanỹomiigui ca lataxa, da yaqto' qauaỹachiñi da Ñim Nataxala' nacheñi Ñim Qanatamnaxala'ai.
7Qaq co'ollaq ñevitaxa ne'ena 'alhua, nache so Sijón, maye lta'a so netaña ye Jesbón, qataq so Og, maye lta'a so netaña ye Basán, qomi' ca'ata'agueta co'ollaxa da yaqto' qomi' iloquiaxa'n qalaxaye qoroxonec. 8Nache saconaxa co'ollaxa ye na'alhua, nache sanaxam so chegoxoguetpi so Rubén, qataq so Gad, qataq so laỹepi maiche nhuo' le'ecpi maye chegoxoguet so Manasés da yaqto' lalamaxat. 9Ỹoqo'oye nagui, ỹataqta qaupaquiichigui qome da qauo'oche 'enauac na qalapaxañi lataxacpi de'era aỹamaxataxac, yaqto' 'enauac ca qauacoñiilec da qauo'oche, ỹataqta ỹaỹamaqchiguiñi.
10Qaq nagui qami' ỹauaachiguilo Ñim Nataxala' maye Qanatamnaxala'ai da qalapoñiita'a't 'enauac qami', qataq lataxala'pi na maiche nhuo' le'ecpi, nqueroxonecpi, alleppi, qataq 'enauac na ỹalleppi Israel le'ecpi, 11'alpi, ñaqpiolec, qataq na chegaqauecpi maye qami' netaiguilo, nam qo'oipaq lo'opi qataq na 'etaxat lo'opi, 12da yaqto' qaltaq qanaỹamaxachi' Ñim Nataxala' maye Qanatamnaxala'ai, maye lapaxañi nagui de'era naỹamaxataxac da yaqto' qami' naỹamaxateto, ỹachegotchigui da ỹan la'aqtac. 13Qaq 'era da 'eetec nagui da 'itchiguiñi da ỹataqta qami' lalamaqa'ate qami' nhuo' le'ecpi, qataq Ñimaye nacheñi Ñim Qanatamnaxala'ai, 'eeta'am co'ollaxa da 'eetec da naỹamaxateto soua hua'au' qarta'alli' Abraham, Isaac qataq so Jacob. 14Qalaxaye saishet da nachenata na hueta'a ne'ena nagui da naỹamaxate', qataq ỹanem da la'aqtac Ñimaye, 15cha'aye nataqa'en ivira'a qome ca saishet da qomi' ỹalecta'agueta nagui, da qomi' hueta'agueta Ñim Nataxala'. 16Qataq qami', qauaỹaañita da 'eetec da qarataxac co'ollaq souaqta'a ye Egipto, qataq da 'eetec co'ollaq sa'asoxonaxalec ye qalota na'alhuapi yem ỹotta'a't shiỹaxauapi maye selaqalec nam qoyec, choche ñeviraqta'a ne'ena, 17qataq da 'eetec da qauauañiichigui da nqaigaxa yemayepi, nataqa'en ye natamnaxala'pi maye chegaqaigui na qo'oipaq, coma', lcat plata qataq na oro. 18Qaq saishet qome da huo'o ca ỹale, 'alo, namoxou' maye huo'o ca llalaqpi, huo'otaq ca maiche nalamaxat nhuo' le'ecpi da ca'ai Ñim Nataxala' maye Qanatamnaxala'ai, da ca'ategue da natamnot ca natamnaxala'pi na ỹotta'a't shiỹaxauapi. Ỹataqta qarvichiỹa'a qome da huo'o ca 'oonolec da qoñiita da 'eeta'am aca huoue chem na lpa'a' qataq qanlem.
19Qaq qom ime da qana'axaỹaxañiitega ne'ena qoỹan na'aqtacpi, nache da huo'o ca 'oonolec da qoñiita da ipi'itaxaatega da no'on da lataxac, nache 'eeta': 'Enauac na so'otpi ỹaỹamaqchiguiñi, na'aictaxa da so'ot nam maiche sheetapeguecpi nache camaye nacheca ca qami' ỹasouaxa't qome. 20Qaq Ñim Nataxala' saishet qome da ỹapalaxat cam lasouaxashet que'eca shiỹaxaua, cha'aye Ñim Nataxala' ca'alaxanaxaic, nache 'eroigui qome da layeloxo nache talec naqa'en que'eca shiỹaxaua 'enauac ne'ena nhuaxanaguecpi cam shiỹaxaua maye nanettalec ana'ana nere, nache Ñim Nataxala' pal naqa'en ca le'enaxat camaye da huetalec ana 'alhua. 21Nache Ñim Nataxala' nqateeguesop qome na laỹepi nhuo' le'ecpi na Israel que'eca shiỹaxaua da talec naqa'en 'enauac ca qauempi, nache ipacchigui da qauem lataxac maye nanettalec ana'ana nere maye lmalate da nqataxac. 22Nache cam shiỹaxauapi maye ñaq taỹa'a da yo'oq, cam qami' chegoxogueta maye ñaq natauopi, qataq cam chegaqauecpi maye chegaqa'alo naua qaỹoqtalo 'aleu', ỹauaachigui qome da qauem maye talec que'eca 'alhua, qataq ca nalolaxapi maye namaq qome Ñim Nataxala'. 23Nache ỹauaachigui qome que'eca 'alhua da nda'a't da nlaqtelec na quiquiaxaraic, qataq na toue, qataq ỹataqta ỹavicta, nache saishet da qoỹanaxaalec, cha'aye qaica ca ñaxaalec camaye. Qaq nache 'eeta'am qome som huaqta'a't nỹecpi ye Sodoma, Gomorra, Admá qataq ye Seboim maye ilaxachigui co'ollaxa Ñim Nataxala', irolec da ỹataqta lta'araic layeloxo.
24Nache 'enauac qome na ỹotta'a't shiỹaxauapi da denataxaatac, 'eeta': ¿Chaq ta'ainco' Ñim Nataxala' da ỹo'otec de'era ne'ena shiỹaxauapi? Qataq ¿chaq ta'ainco' da ỹataqta lta'araic da lalemataic Ñimaye? 25Nache da nasataxac qome, 'eeta': Qomye namayepi ca'ai da llec da naỹamaxataxac Ñim Nataxala' maye Natamnaxala' som hua'au lta'alpi, maye ỹo'ot co'ollaq nqateeguesop somayepi ye Egipto, 26nache ca'ata da natamnot qataq ỹa'aroto naua l-llecte na laỹepi atamnaxala'pi maye saỹauanapega, qataq saishet da itauan namayepi. 27Ỹoqo'oye Ñim Nataxala' ỹataqta dalemataỹa ne'ena shiỹaxauapi, nache talec naqa'en ana 'alhua 'enauac na nhuaxanaguecpi maye nanettalec ana'ana nere, 28nache ca'ai naqa'en nam na'alhua namayepi, irolec da ỹataqta lta'araic layeloxo da taỹa naqa'en naua ỹaqa'alo 'aleu', 'eeta'am da 'eetec nagui.
29Nam saqcha'a lataxacpi namayepi lalamaxatpi Ñim Nataxala' maye Qanatamnaxala', qalaxaye nam yo'oqta lataxacpi namayepi qomi' qaỹachaxanalo qome, qataq ca qoyalaqpi, yaqto' sepagaqtelec da so'otaq 'enauac ne'ena na'aqtacpi ne'ena qoỹan nqataxacpi.
