Deuteronómio 4

₁Qaq nagui qami' shenapegalo qami' Israel le'ecpi, qana'axaỹaxañiỹalo qome naua qalapaxayiñi lataxaco, qataq naua namaxasoxonaxaco maye qami' sapaxagueneque, qataq ỹataqta qauo'oche' qome, yaqto' qarca'alliiuec, qataq qoñiỹalec ye 'alhua maye qami' ỹanema qome Ñim Nataxala' maye Natamnaxala' so hua'au qarta'ailpi. ₂Qataq saishet qome da qanqotchiñiiuec, huo'otaq da huo'o ca qanqache ne'enaua na'aqtaqa maye qami' samaxaleguete, nacherata da qaualaqaigueta qome ne'enaua lamaxasoxonaxaco Ñim Nataxala' maye Qanatamnaxala'ai. ₃Qataq qami' qauauañiichigui co'ollaxa som ỹo'otpi Ñim Nataxala' co'ollaq huaña ye Baal Pegor qataq da 'eetec co'ollaq nmichiguiñi naqa'en 'enauac so quegue so natamnaxala'pi na lma' yemaye, ₄qalaxaye 'enauac qami' maye qaualaqaiguet co'ollaxa Ñim Nataxala' maye Qanatamnaxala'ai, ñaq qanca'alleetauec nagui. ₅Aỹem mashe qami' sapaxagueneque naua nqataxaco maye aỹem ỹamaxaleguete co'ollaxa Ñim Nataxala' maye Qanatamnaxala' da yaqto' qauo'oche', qom mashe qoñiỹalec ye 'alhua maye qarma'ai qome. ₆Qaualaqaigueta qataq qaupaquiichiguilo da qauo'oche' qome ne'enaua na'aqtaqa, yaqto' ne'ena ỹotta'a't shiỹaxauapi da qami' detaxaỹalo, nache qami' ỹaanaxanaxaiqa, qataq huattonaxanaxaiqa. Qataq qom hua'aqchigui ne'ena lataxacpi, nache 'eeta': «¡Ỹataqta 'eesa ne'ena nhuo' le'ecpi da ỹaanaxanaxaicpi qataq ỹaanataxanaxaicpi!» ₇Cha'aye ne'ena ỹotta'a't shiỹaxauapi 'amaqtaqaicpi, ¿negue't ca sa qaỹapeque naxa ca natamnaxala'pi, da 'eeta'ama qomi' da sa qaỹapeque naxa da ñatamnaqot Ñim Nataxala' maye Qanatamnaxala'? ₈Qataq ne'ena ỹotta'a't shiỹaxauapi 'amaqtaqaicpi, ¿negue't ca hueto'ot ca ỹaỹamaqchiguiñi nqataxacpi, qataq ca qalapaxañi lataxacpi da 'eeta'am ne'ena napaxaguenataxanaxacpi maye qami' sanema nagui? ₉Qaq ỹoqo'oye saishet qome da qaucouaỹa'ai 'enauac na qauauañiichigui, qataq saishet da qaỹa'axañiiuec qom ña qanca'alliitauec, nacherata da qaua'aqtaxañim qome ca qaỹa'alquipi qataq ca qarhuallipi.

₁₀Qaq se'eso na'a'q co'ollaq qauataito'ot Ñim Nataxala' maye Qanatamnaxala'ai huaña añi qasoxonaxa Horeb, nache Ñimaye aỹem 'enapega, 'eeta': «'Alaỹona't qome ne'ena nhuo' le'ecpi, yaqto' hua'aqchigui na ỹa'aqtacpi, qataq napaxaguena da huo'o naq 'enec naqa'en Aỹem, da ñaq huo'o da nachaalataxac namayepi, qataq ỹapaxaguenec qome de'era ca llalaqpi.» ₁₁Nache qami' qanquiquiiua'a co'ollaxa na pa'aguiñi añi qasoxonaxa, nache qauauañiichigui na le'eraxa so norec maye taỹot na piguem, nache nañigui na sa nsatchiguiñi lo'oc qataq napalñi, ₁₂nache Ñim Nataxala' detaqa huetaigui so norec. Nache qami' qaua'aqaichiguilo 'enauaque naua la'aqtaqa, qataq choche qaua'aqaitega da l-lamaxa naua la'aqtaqa, qalaxaye saishet da qauloỹa'a da yo'oqchiguiñi lataxac Ñimaye. ₁₃Nache Ñim Nataxala' qami' ỹanema da naỹamaxataxac, da yaqto' qauo'oche' naua diez lamaxasoxonaxaco maye ỹereleguete co'ollaxa soua dos coma'ye. ₁₄Ime, nache aỹem ỹamaxalec da qami' sapaxagueneque ne'ena lqataxacpi qataq na lapaxañi lataxacpi, yaqto' ỹataqta qauo'oche da ivita da qoñiỹalec yi'iye 'alhua.

₁₅Qaq se'eso na'a'q co'ollaq qami' detaqtegueto Ñim Nataxala' huetaigui so norec huaña añi qasoxonaxa Horeb, nache saishet da qauauañiichigui da lataxac. Ỹoqo'oye qanchilliỹa'a qome da qanachaalataxaqui, ₁₆saishet qome da qana'axache da qarataxaqui da qauo'oche ca qanatamnaxala'aipi ne'enaqtacpi, da 'eeta'am da lataxac ca ỹale huo'otaq 'alo, ₁₇huo'otaq ca shiguiỹacpi maye 'alhua le'ec qataq ca qoỹo, ₁₈huo'otaq ca ỹaualgaxaata ana da'am, huo'otaq ca nỹaq. ₁₉Cha'aye sa iuena'a da qauamachiỹo'ot na piguem, nache qauloỹa'a añi nala', ca'agoxoic, huaqaañi, qataq ana laỹepi maye neto'ot na piguem, nache ishet da qauauochiỹa'ac da qanatamñiỹot. Cha'aye Ñim Nataxala' ỹo'ot co'ollaxa anamaye da yaqto' icoỹarelec 'enauac na ỹotta'a't shiỹaxauapi maye netalec ana 'alhua. ₂₀Cha'aye Ñim Nataxala' qami' ỹacoosopa co'ollaxa da qami' nqateeguesopa ye Egipto maye 'eeta'am aca nqatelaxanaxaqui, maye lqatelaxaqui ca lcat, da yaqto' ỹauo'oi qami' lalamaqa'ate Ñimaye. ₂₁Qalaxaye Ñim Nataxala' aỹem dalemataỹa souaxat qami', nache ỹan da la'aqtac da saishet da sevira'a da sa'axasoxoolec ye tala Jordán, qataq saishet da aỹem inoxonaqcheteua'a ye 'alhua maye qami' ỹanema qome Ñimaye. ₂₂Qaq ỹoqo'oye aỹem nache seleuaña qome ne'ena 'alhua, nache saishet da sa'axasoxoolec ye tala Jordán, qalaxaye qami' maye qaua'axasoxoñiilec qome nache qoñiỹalec yi'iye no'on 'alhua. ₂₃Qalaxaye maxatchaxa qome, saishet da qaucouaỹa'ai da aỹamaxataxac maye qami' ỹo'oteque Ñim Nataxala' maye Qanatamnaxala'ai. Qataq saishet da qauo'oche ca qare'enaqtaqui qanatamnaxala'ai, cha'aye Ñim Nataxala' maye Qanatamnaxala'ai qami' illapeguema co'ollaxa namaye, ₂₄cha'aye Ñim Nataxala' maye Qanatamnaxala'ai, Ñimaye ỹataqta ca'alaxanaxaic, ỹoqo'oye da huo'o ca ỹavigaxat, nache 'eeta'am ca norec da nlachiguiñi naqa'en ca ỹavigaxat.

₂₅Qaq da ivita da qoñiỹalec yi'iye 'alhua qataq da mashe huo'o ca qaỹa'alquipi qataq ca qarhuallipi, nache saishet qome da qana'axache da qarataxaqui souaxat da qauo'oche ca qare'enaqtaqui da yaqto' qanatamñiỹot, cha'aye da ỹauaachigui Ñim Nataxala', nache qami' dalemataỹalo. ₂₆Ỹoqo'oye nagui ana 'alhua qataq na piguem hua'aqchigui ñaqa'en da ỹa'aqtac da sa qaỹaloq qome da qami' imereuo, qom mashe qoñiitalec yi'iye 'alhua maye pa'aitague da le'ego ye tala Jordán. Qataq saishet qome qaỹoqtegue da qoñiitalec yemaye. ₂₇Qataq Ñim Nataxala' qami' ilagaxatoiguilo qome na ỹotta'a't shiỹaxauapi, nache da qoñiita saq 'amaqtaq qome ca ishet da nca'alec da netalec yi'iye 'alhua. ₂₈Qaq huaña yemaye nache qami' ishet da qanatamñiỹot qome ca ne'enaqtacpi 'epaq, coma' maye sa nauaañi, saishet da hua'aqa, qataq saishet da deque'e, huo'otaq da huo'oi naua la'a'che, cha'aye maiche lo'onatac ca shiỹaxauapi. ₂₉Qalaxaye da huaña yemaye da ỹataqta 'enauac da qarquiyaqteỹaxaqui, qataq da qanachaalataxaqui da qanmichiỹaique Ñim Nataxala' maye Qanatamnaxala'ai, nache ishet da qauanachiỹa. ₃₀Qaq qom qaviyeeguet ca qanque'eenaxaqui, qataq ca qanqui'icỹaxaqui, nache da qavi'iguelaqaiỹa da qaualaqaiguet Ñim Nataxala', ₃₁qaq cha'aye Ñimaye choxonnataxanaxaic, nache saishet da qami' sa ichoxore'n, huo'otaq da qami' nlaxaayiñi, qataq saishet da icoua'ai da ỹan la'aqtac maye 'eetega ipacchigui co'ollaq naỹamaxate' so hua'au qarta'ailpi.

₃₂Qaq ỹoqo'oye qanmichi' qome soua hua'au' vi'iye co'ollaq saxanaxa da qami' huo'oi, chegoqchiguiña co'ollaq Ñim Lo'onatac 'Enauacna ỹo'ot so shiỹaxaua da ỹanalec ana 'alhua. Qataq qauchemaxachiỹalo naua loga'te na piguem, da huo'o ca qaỹa'aqtapeguelec, huo'otaq da qaỹauaachigui ca qaỹo'ot lta'araic da 'eeta'am de'era. ₃₃Na ỹotta'a't nhuo' le'ecpi ana 'alhua, ¿peta'a huo'o co'ollaxa ca 'eeta'ama qami' da hua'aqtega da detaqtac Ñim Nataxala' huetaigui ca norec, nache saishet da ileu? ₃₄¿Qataq huo'o peta'a ca atamnaxala' da nqatec ca shiỹaxauapi da ỹachegoxottoigui ca laỹepi nhuo' le'ecpi da yaqto' ỹauo'o lalamaxatpi, ỹauota'a na na'anecpi, ñe'eguenataguecpi, qataq na ỹo'ot da na'aalaxa, alaataxac, lchecỹaxac, huo'otaq da irolec da lta'araic la'añaxac da 'eeta'am da qami' ỹo'oteque Ñim Nataxala' maye Qanatamnaxala'ai, co'ollaq qami' nqateeguesopa ye Egipto? ₃₅Qaq damaye qami' qaỹachaxanalo yaqto' qauaỹachiñiita da Ñim Nataxala' nacheñi Ñim Lo'onatac 'Enauacna, qataq qaica ca lỹa 'eeta'am Ñimaye. ₃₆Qataq chegoqtot naqa'en na piguem da lavilỹaxac, nache qaua'aqaitega da qami' ỹapaxagueeta'ape. Qataq huaña naqa'en ana 'alhua da qami' ỹachaxanalo so lta'araic norec, qataq nache chemaqtapoigui somaye co'ollaq qaua'aqaitegalo naua la'aqtaqa. ₃₇Ñimaye ỹataqta ỹauotec co'ollaxa so hua'au qarta'ailpi, ỹoqo'oye lca'aua'a nam chegoxoguetpi somayepi da yaqto' qami' nqateeguesopa ye Egipto, irolec da ỹataqta lta'araic la'añaxac. ₃₈Qataq qauauañiichigui da ỹo'orauec 'enauac so ỹotta'a't shiỹaxauapi maye 'amaqtaqaicpi, qataq 'añaxaicpi da yaqto' qami' ỹanema na na'alhuapi somayepi da yaqto' qaralamaxache nagui.

₃₉Qaq ỹoqo'oye nagui qauauattoñiita, qataq qauaỹaañita da Ñim Nataxala' nacheñi Ñim Lo'onatac 'Enauacna, maye ilo'ogue na piguem qataq ana 'alhua qataq qaica ca lỹa. ₄₀Ỹoqo'oye qaualaqaiguet qome na lqataxacpi, qataq na lamaxasoxonaxacpi maye qami' sanema nagui, yaqto' qaica ca da, da qanachaalataxaqui, qataq ca qami' chegoxogueta, qataq logoraic da qanachaalataxaqui da qoñiitalec yi'iye 'alhua maye qami' ỹanema qome Ñim Nataxala' maye Qanatamnaxala'ai.

₄₁Ime, nache so Moisés iỹotaugalo soua tres som huaqta'a't nỹecpi maye ỹotta'a't naua nañalo maye pa'aỹa'ague da nala' lliguisheguem ye tala Jordán, ₄₂da yaqto' lle'eguenaqa' ca shiỹaxaua maye ilamaxata'a da ỹalauat ca lỹa maye saishet da mpa'aguenaxaua, nache ishet da taỹa camaye da naneltaxan yaqto' saishet da qaỹalauat. ₄₃Qaq 'eso som huaqta'a't nỹecpi maye ỹotta'a't naua nañalo: Beser maye huaña ye comarelecpi ye toolec 'alhua, qoỹanem na lauo' le'ecpi so Rubén, qaq soo huaqta'a't nỹecpi ye Ramot maye huaigui ye Galaad, qoỹanem na lauo' le'ecpi so Gad, qaq ye Golán maye huaigui ye Basán, qoỹanem na lauo' le'ecpi so Manasés.

₄₄Qaq 'ena na napaxaguenataxanaxacpi maye ỹa'axatem co'ollaxa so Moisés so Israel le'ecpi, ₄₅qataq na namaxasoxonaxacpi, nqataxacpi, qataq na qalapaxañi lataxacpi maye ỹa'axatem somayepi co'ollaq ca'ai ye Egipto, ₄₆co'ollaq ñaq hueta'a ye pa'aigue da nala' lliguisheguem ye tala Jordán, yem ca'amapega't maye nalotta ye Bet Pegor, maye na'alhua co'ollaxa so Sijón, som lta'a na amorreopi. Qaq se'eso Sijón, netaña co'ollaxa ye Jesbón, qaq so Moisés qataq so Israel le'ecpi loxonec co'ollaxa somaye co'ollaq ca'ai somayepi ye Egipto. ₄₇Nache so Israel le'ecpi ỹacona co'ollaxa ye na'alhua somayepi, qataq ye na'alhua so Og, maye lta'a so netaña ye Basán, qaq soomaye nachesoua soua dos lta'al na amorreopi, qaq soomaye netraña co'ollaxa ye pa'aỹa'ague da nala' lliguisheguem ye tala Jordán. ₄₈Nache chegoqchiguiña ye Aroer, maye quetot na loigue so la'auaxac Arnón, choche ivitta'a añi qasoxonaxa Sirión, qaq da lỹa le'enaxat Hermón, ₄₉qataq 'enauac ye Arabá, qataq ye pa'aỹa'ague da nala' lliguisheguem so tala Jordán, nache ivitta'a aso Auaxai Leuaxai, maye huaña da pa'aguiñi añi qasoxonaxa Pisga.