Soua diez namaxasoxonaxaco
1So Moisés iỹaxaneuga da laỹona't 'enauac so Israel le'ecpi nache, 'eeta': «Qami' Israel le'ecpi, ña qana'axaỹaxañiỹa nagui na qami' sanema nqataxacpi, qataq na qalapaxañi lataxacpi, nache qanapaxagueñiỹa qome qataq ỹataqta qauo'oche.
2Ñim Nataxala' maye Qanatamnaxala', qomi' naỹamaxateto co'ollaq huaña añi qasoxonaxa Horeb. 3Qaq saishet da nachaqsota so hua'au qartalpi da naỹamaxate' co'ollaxa Ñimaye, maye nataqa'en qomi' maye souaqta'a nagui ne'ena. 4Ñim Nataxala' ỹataqta qami' datata'agueta da qami' detaqtacoto co'ollaq huetaigui so le'eraxa so norec, huaña añi qasoxonaxa. 5Qaq qami' qataq Ñim Nataxala', nache sootangui na laiñi co'ollaxa, da yaqto' qami' sa'aqtaxanema na la'aqtacpi Ñimaye, cha'aye qami' qañi'iitega so norec, ỹoqo'oye saishet da qa'aỹeesheguema añi qasoxonaxa. Nache Ñim Nataxala', 'eeta': 6Aỹem, nachaỹem Nataxala' maye Qanatamnaxala'ai, qami' ñeqateeguesopa co'ollaxa ye 'alhua Egipto, ye huaña co'ollaq choche qami' nlataqa.
7Qaq saishet qome da qauauo'oi ca ỹaqauga qanatamnaxala'aipi da yaqto' 'eeta'am aỹem qanqa'eñi.
8Qataq saishet da qauo'oche ca qare'enaqtaqui da 'eeta'am na hueto'ot na piguem, huo'otaq na netalec ana 'alhua, huo'otaq na 'etaxat maye huetaña na ỹataqta pa'aguiñi ana 'alhua. 9Qataq saishet da qaua'ayiỹoto naua qarllecchilli' qataq da qavio'oxoyiñi namayepi. Cha'aye Aỹem Nataxala' maye Qanatamnaxala'ai, So'otapecna Aỹem ca'alaxanaxaic, qataq sauo'o ca nhuaxanaguec ca llalaqpi, laualpi, qataq cam llalaqpi ca laualpi que'eca nta'a maye ỹo'ottac na qauem, qataq aỹem nquiỹa. 10Qalaxaye ca Aỹem ỹauotec, qataq ỹalaxagueta naua ỹamaxasoxonaxaco, nache sanem da chochaq tatec ỹauotaxanaqtaic 'enauac ca chegoxoguetpi camaye.
11Ỹoqo'oye saishet da qaua'ashaxañiỹai' da le'enaxat Ñim Nataxala' maye Qanatamnaxala'ai, cha'aye saishet da saqca ca nhuaxanaguec naqa'en ca ỹa'ashaxanai' da le'enaxat Ñimaye.
12Qataq huo'o naq 'enec qanqa'eñi qome ye na'a'q mataxaqui, da ỹataqta qavio'oxoyiñi Ñim Nataxala' maye Qanatamnaxala'ai, nache ipacchigui qanqa'eñi da lamaxasoxonaxac. 13Qataq seis na'axa'te da qauo'onataxañiitac da qauo'oche 'enauac nam qansheetaique da qauo'oche, 14qaq ca na'a'q siete qalaxaye mataxaqui, nache huaigui da qaỹo'oxoren Ñim Nataxala' maye Atamnaxala'. Nache saishet da huo'o ca qaỹo'ot na no'onatacpi, qataq saishet da do'onataxan ca 'aỹa'alec, 'aỹa'ale, 'arlatac, 'arlata, 'arauegaxanaxala' huaca, 'arelo 'ashena, qataq camachaqca na laỹepi 'ana'atetpi, huo'otaq ca chegaqauec maye netaña ca 'arma'. Nache 'enauac namayepi da nmatec 'eeta'am 'am. 15Qataq qantooñita'ac da qami' nlataqa co'ollaq qoviita'a ye Egipto, qaq Ñim Nataxala' maye Qanatamnaxala'ai, qami' nqatrec co'ollaxa ỹauota'a da ỹataqta lta'araic la'añaxac. Qaq ỹoqo'oye Ñimaye qami' ỹamaxaleguete da huo'o naq 'enec qanqa'eñi ye na'a'q mataxaqui.
16Qataq huo'o naq 'enec 'anqa'en ca 'arta'a, qataq aca 'arate'e, cha'aye nachera da 'am ỹamaxalec Ñim Nataxala' maye 'Anatamnaxala', yaqto' qaỹoqtec da 'anachaalataxac da qonetalec ye 'alhua maye 'am ỹanem qome Ñimaye.
17Saishet da 'aualaataxan.
18Saishet da 'arauañi' aca sa 'arhua.
19Saishet da 'aucache.
20Saishet da qauema naua 'ara'aqtaqa da 'autaqtega ca 'arỹa.
21Saishet da 'auqopitta'a aca lhua ca 'arỹa, huo'otaq da 'auqopitta'a ca lma', na'alhua, l-latac, l-lata, huo'otaq ca lauegaxanaxala' huaca, 'ashena, huo'otaq ca camachaqca na lalamaxatpi camaye.»
Da lcolanaxa so shiỹaxauapi
22Qaq 'ena na la'aqtacpi maye na'axannec da nasaxauec co'ollaxa Ñim Nataxala' co'ollaq qoviito'ot na loigue añi qasoxonaxa, Ñimaye chemaqtapoigui so norec maye huetaigui so sansatchiguiñi qataq napalñi lo'oc. Qaq co'ollaq ime ne'ena la'aqtacpi, nache ỹereleguete soua dos coma'ye, nache aỹem ỹanema. 23Qalaxaye co'ollaq qaua'aqaichiguilo naua la'aqtaqa Ñimaye, da chemaqtapoigui so lo'oc maye napalñi, qataq qauloita'a añi qasoxonaxa da 'ettaigui, qaq huaña nache 'enauac qami', qataq na lataxala'pi na nalamaxat nhuo' le'ecpi, qataq na nqueroxonecpi maye lataxala' na Israel le'ecpi, anac da aỹem detaxaỹapegue', 24nache 'eeta': «Ñim Nataxala' maye Qanatamnaxala' ỹataqta qomi' ỹachaxanalo da la'añaxac, qataq da la'amaqchec, nache sa'axasoqchiguilo naua la'aqtaqa chemaqtapoigui so norec. Qaq nagui sauanaqchigui da ca shiỹaxaua ishet da detaxaỹapegue' Ñim Nataxala' qalaq saishet da ileu. 25Qaq nagui, ¿ta'ainectoxo' da ishet da qarelem na lta'araic norec? Cha'aye da ỹoltaq ỹe'eguelaxalec da sa'axasoqchigui da lavilỹaxac Ñim Nataxala' maye Qanatamnaxala', nache seleuaq qome, 26cha'aye, ¿negue'to' ca choche shiỹaxauatto da hua'aqchigui da lavilỹaxac Ñim Nataxala', chemaqtapoigui ca norec, qaq nache 'eetai' da nca'altauec da 'eeta'ama qomi'? 27Qaq ỹoqo'oye 'onaxaic da 'am qojec, nache 'ana'axaỹaxana qome 'enauac na la'aqtacpi maye 'am ỹanem Ñim Nataxala' maye Qanatamnaxala'. Ime, qaq qomi' 'aua'aqtaxanema qome yaqto' so'otaq qataq salaxasoxoguet.»
28Qaq Ñim Nataxala' qami' hua'aqchiguilo co'ollaq aỹem qoñiitega, qaq ỹoqo'oye Ñimaye, 'eeta': «Ỹaỹamaqchiguiñi da lhuennataxa namayepi. 29Qaq 'onaxaico' qome da nache 'eeta'ac de'era da lhuennataxa namayepi da aỹem ỹo'oxoreetac, qataq ỹalaxagueta naua ỹamaxasoxonaxaco, 'enauaque naua na'axa'te, yaqto' namayepi qataq na llalaqpi 'onaxaic qome da nachaalataxac. 30Qaq nagui nache qonapega namayepi da ỹe'eguelaxa na lpe'lpi, 31qalaxaye 'am ña qoua'a qome ne'ena, cha'aye 'am sanem na ỹamaxasoxonaxacpi, iqataxacpi, qataq na llapaxañi lataxacpi maye 'auapaxaguenec qome namayepi, yaqto' ỹo'ot qataq ỹalaxaguet qom mashe hueta'a yi'iye 'alhua maye sanem da lalamaxat. 32Qaq ỹoqo'oye ỹataqta qauo'oche, saishet da qauashaxañiiuec qome na qami' ỹamaxaleguete Ñim Nataxala' maye Qanatamnaxala'ai. 33Nacherata da ỹataqta qoquiitegue da llecỹaxac na qami' ỹamaxaleguete Ñim Nataxala' maye Qanatamnaxala'ai, yaqto' 'onaxaic da qoyecỹaxaqui, qataq qaỹoqtec da qanachaalataxaqui da qoñiitalec ye 'alhua maye qami' ỹanema qome Ñimaye.»
