Qaivitaqno'ot da qanatamnot na laỹe atamnaxala'pi
1Qaq Ñim Nataxala' maye Qanatamnaxala'ai, qom qami' inoxonaqcheteua'alo ye 'alhua maye qami' ỹanema da qaralamaxache, nache qauauañiichigui qome da ỹo'orauec ye ỹotta'a't shiỹaxauapi maye ỹataqta 'amaqtaqaicpi, qataq 'añaxaicpi maye netañalo yeua siete 'aleu', qaq yemayepi nacheye ye: hitiitapi, gergeseopi, amorreopi, cananeopi, ferezeopi, heveopi qataq ye jebuseopi. 2Qaq Ñim Nataxala' qom qami' ỹanema da qo'oxoñiqui yi'iye ỹotta'a't shiỹaxauapi maye netalec yi'iye 'alhua, nache qanmachiichiguiñi qome da qaualauache, saishet da qauchoxonñiitac, huo'otaq da qanaỹamaxache'. 3Qataq saishet da qauashiñiiguet na qaỹa'alquipi qataq qaỹa'alliipi da huaroneguet na llalaqpi yi'iye shiỹaxauapi, 4cha'aye yemayepi ỹo'ot qome da na qaỹa'alquipi ca'ai Ñim Nataxala', nache natamnot na laỹe atamnaxala'pi. Qaq huaña qome, nache qami' dalemataỹalo Ñimaye, nache sa ỹaỹaloxon da qami' ilaxachiguilo. 5Qaq ỹoqo'oye qanlaxachiiñi qome 'enauac aye lca'atoxonaxalatepi, qataq aye natamnaxalatepi coma', qataq ye lqui'ipi aso Aserá, nache qauavigaxache yi'iye ne'enaqtacpi maye natamnaxala'pi. 6Cha'aye qami', ỹataqta qami' qaiỹotaugalo da qami' lalamaqa'ate Ñim Nataxala' maye Qanatamnaxala'ai. Qataq Ñimaye qami' lca'agui'she co'ollaq lca'agui 'enauac na shiỹaxauapi ana 'alhua da yaqto' qami' lalamaxatpi.
7Cha'aye Ñim Nataxala' ỹataqta qami' ỹauoteque ỹoqo'oye qami' lca'ateua'alo, qalaxaye saishet da souaxat da qami' qalota, cha'aye souaxat qami' ỹataqta qaica ca qara'amaqchiqui da qoñiitangui 'enauac na nhuo' le'ecpi. 8Qaq Ñimaye qami' nqateeguesopa co'ollaxa ye Egipto, yem huaña da qami' nlataqa, irolec da ỹataqta lta'araic la'añaxac so lta'a na netaña yemaye, souaxat da qami' ỹauoteque, qataq da yaqto' ipaqueelec da ỹo'ot da la'aqtac maye ỹanem co'ollaxa so hua'au qarta'ailpi. 9Ỹoqo'oye qauauattoñiita qome da Ñim Nataxala' maye Qanatamnaxala'ai, Ñimaye ỹataqta 'eesa, qataq ipactelec da naỹamaxataxac, qataq da lchoxonnataxanaxa maye ỹanem cam ỹauotec, qataq ỹo'ot na lamaxasoxonaxacpi Ñimaye, nache ivitta'a ca ỹataqta qalota maye chegoxoguetpi camaye, 10qalaxaye sa ỹaỹaloxon da ilaxachigui, qataq da ỹauo'o ca nhuaxanaguec cam nquiỹatega Ñimaye. 11Qaq ỹoqo'oye nagui ỹataqta qaualaqaigueta qome naua namaxasoxonaxaco, nqataxaco, qataq naua lapaqtrañi lataxaco maye qami' samaxaleguete nagui da qauo'oche.
Da nchoxonnataguec ca ỹalaq
12Qaq da ỹataqta qauloiteleguete ne'enaua nqataxaco, qataq qaupaquiichiguilo da qauo'oche', nache Ñim Nataxala' maye Qanatamnaxala'ai, ipacchigui qome da ỹo'ot 'enauac na ỹan la'aqtacpi co'ollaq naỹamaxate' so hua'au qarta'ailpi. 13Nache Ñimaye ỹataqta qami' ỹauoteque, qami' ichoxore'n, qataq nquictauec naqa'en na qaỹa'alquipi. Qataq ỹanem da lchoxonnataxanaxa ca qaỹa'alquipi qataq ca qana'alhuai no'on naqa'en da 'alaỹaxac ca qorañiguishequi, qataq ca 'atetpi, huaca qataq aca qagueta da huaña yi'iye 'alhua maye ỹachaxanapeguem co'ollaxa da ỹanem so hua'au qarta'ailpi. 14Nache qami' huetaleguete qome da nchoxonnataxanaxa saishet da qoñiita'am na laỹepi shiỹaxauapi. Cha'aye qaica qome ca ỹale, huo'otaq aca 'alo da sa deco'o, ivira'a ca shiguiỹacpi 'enauac da huo'o ca llalaqpi. 15Qataq Ñim Nataxala' ỹataqta qami' ntela'alo qome, saishet da qami' hueque naqa'en na nalolaxasat, qataq na ỹotta'a't napiina maye iuaxanec co'ollaxa so Egipto le'ecpi, nachecata na qami' ipa'agueeta'ape maye huec naqa'en. 16Qaq ỹoqo'oye qanmachiichiguiñi qome 'enauac na shiỹaxauapi maye qami' ỹanema Ñim Nataxala' da qoroxoñiqui. Qataq saishet da qauchoxonñiitac, qataq saishet da qanatamñiỹot ca natamnaxala'pi, cha'aye ishet da qami' isomaxanaqche't. 17Cha'aye sa iuena'a da qoñiita' da qarhuennataqai: «Ne'ena shiỹaxauapi ỹataqta qomi' napacaleguete ye lcata, ¿Qaq chaq shenaqteco' da so'oraqauec namayepi?» 18¡Qalaxaye saishet qome da qañi'iitega yemayepi! Qantooñita'ac qome na ỹo'otpi co'ollaxa Ñim Nataxala' maye Qanatamnaxala'ai co'ollaq ỹauo'o da nhuaxanaguec so faraón, qataq 'enauac so netaña ye Egipto. 19Cha'aye 'enauac da qoñiita qauauañiichigui co'ollaxa da lta'araic la'añaxac Ñim Nataxala' maye Qanatamnaxala'ai, qataq 'enauac so na'anecpi qataq so ỹo'ot da na'aalaxa co'ollaq qami' nqateeguesopa ye Egipto. Qaq 'era da 'eetec qome Ñim Nataxala' 'enauac yem shiỹaxauapi maye qañi'iitega. 20Qaq da huo'otaq huo'o ca lca'alaxaic yemayepi, nache Ñimaye namaq ca vi'inaq lalaxat da yaqto' nmatchiguiñi. Ivira'a ca nshetaique da qami' nqañoxocheesopa. 21Ỹoqo'oye saishet qome da qami' iviloxolaqche't da qarcolanaqai souaxat da qañi'iitega yemayepi, cha'aye Ñim Nataxala' maye Qanatamnaxala'ai, Ñim 'Amaqtaqaic qataq ncolanaxat qami' hueta'agueta. 22Ñim Nataxala' maye Qanatamnaxala'ai, maiche nqo'onaxattauec qome da ỹo'orauec ye ỹotta'a't shiỹaxauapi, cha'aye saishet da nache imauec da ỹo'orauec qome yemayepi, yaqto' na shiguiỹacpi maye huauec saishet da nquictauec da nlaxalec ca qana'alhuai nache detoxon. 23Qalaxaye Ñim Nataxala' maye Qanatamnaxala'ai qami' ỹanema qome da qoroxoñiqui yi'iye ỹotta'a't shiỹaxauapi choche ivitta'a da nlachiguiñi qanqa'eñi. 24Qaq qami' ỹanema da qoroxoñiqui ye lta'alpi yemayepi, ivitta'a da ỹataqta pal qanqa'eñi na le'enaxatpi yemayepi, cha'aye saishet da qami' nalo'ogueta qome da qami' deloguito. 25Nache qauavigaxache 'enauac ye ne'enaqtac atamnaxala'pi, qalaxaye saishet da qauqopichiỹa'a da qauacoñiỹa ca lcat oro, qataq plata maye lapaqtalec yemayepi, cha'aye Ñim Nataxala' ỹataqta deqaiga yemaye. 26Qaq ỹoqo'oye saishet da qauroiua'alo naua qarma'achilli' nam qaiqaiga, nacherata da 'enauac qauasaqaiuec qataq qauqaiquiỹa, yaqto' saishet da qami' qailaxachiguilo, cha'aye yemaye ỹataqta sa qaishetaxateguet.
