Ñim Nataxala' itauan so Israel le'ecpi
1So Moisés qaltaq detaqa, 'eeta': «Ñaq aỹem qana'axaỹaxañiỹa qami' Israel le'ecpi, cha'aye mashe ivita nagui da qaua'axasoxoñiilec ye tala Jordán da yaqto' qauo'oyiỹauec, qataq qauacoñiỹa ye na'alhuapi ye shiỹaxauapi maye qami' napacaleguete da la'amaqchec, qataq da la'añaxac, qataq netaigui ye huaqta'a't nỹecpi maye ỹataqta qaỹoqotcheguemec na lpaqtaxat. 2Qaq yi'iye shiỹaxauapi ỹataqta 'añaxaicpi qataq logoraicpi, cha'aye chegoxoguet co'ollaxa so shiỹaxaua logoraic le'enaxat Anac, qataq qaua'aqaitega naxa da na'aqtacaic, maye 'eeta': ¿Negue'tom ca ishet da dataỹa'aguet ye anaquiitapi?
3Qalaxaye qauaỹaañita nagui da Ñim Nataxala' maye Qanatamnaxala'ai, Nacheñi ñim hua'auta'ague qome da qa'aita'ague, qaq Ñimaye 'eeta'am ca norec da huo'o ca ỹavigaxat nache nlachiguiñi naqa'en, qaq nache 'eetec qome da qauauañiichigui da nlaxaañi, qataq huetaiya' naqa'en ye ỹotta'a't shiỹaxauapi. Qataq ỹataqta sa qaỹaloq qome da qauo'oyiỹauec qataq nlachiguiñi qanqa'eñi yemayepi, cha'aye nache 'enapec co'ollaxa Ñimaye. 4Qaq Ñim Nataxala' maye Qanatamnaxala'ai da mashe ỹo'orauec yi'iye shiỹaxauapi, nache saishet qome da 'eeta' da qarhuennataqai: ‹Ñim Nataxala' qomi' ỹanema ne'ena 'alhua souaxat da ỹaỹamaqchiguiñi na so'otaqpi.› 'A'i, saishet qome da qara'aqtaqui de'era, cha'aye Ñim Nataxala' ỹo'orauec yemayepi souaxat da qauem lataxac. 5Cha'aye saishet da nacheca da ỹaỹamaqchiguiñi maye qauo'ochiitac ca huo'omshe qauacoñiỹa yi'iye na'alhua yemayepi, cha'aye Ñim Nataxala' ỹo'orauec qome yemayepi souaxat da qauem lataxac da yaqto' ipacchigui da ỹachaxanapecot co'ollaxa soua hua'au' qarta'alli', Abraham, Isaac qataq Jacob. 6Ỹoqo'oye qauaỹaañita qome da saishet da nacheca da ỹaỹamaqchiguiñi maye qauo'ocheetac ca huo'omshe qami' ỹanema yi'iye 'alhua Ñim Nataxala' maye Qanatamnaxala'ai, cha'aye qami' saishet naxa da ỹataqta qaualaqai.
7Qataq saishet qome da qaucouaỹa'ai da ỹataqta dalemata naxa qanqa'eñi Ñim Nataxala' maye Qanatamnaxala'ai co'ollaq huaña ye toolec 'alhua. Cha'aye nache chegoqta'a co'ollaq qoquiỹa'ai ye Egipto, nache ivitta'a nagui da saishet naxa da qaualaqai. 8Qataq qantooñita'ac da huaña co'ollaxa ye Horeb, nache ỹataqta dalemata qanqa'eñi Ñim Nataxala', ỹoqo'oye huac da ỹataqta qami' ilaxachiguilo Ñimaye. 9Huaña caillaye nache aỹem senossheguemec añi qasoxonaxa da yaqto' saconegueta soua coma'ye maye nanettaleguete da naỹamaxataxac Ñim Nataxala' da qami' naỹamaxateto. Nache sootasheguemec añimaye soua cuarenta na'axa'te, qataq soua cuarenta pe', qaq nache qaica ca sachec qataq qaica ca ñeỹomgui. 10Nache Ñim Nataxala' aỹem ỹanema se'esoua dos coma'ye, maye ỹauota'a ana llaxaata da ỹereleguete 'enauac na la'aqtacpi maye qami' da'aqtaxanema co'ollaq huetaigui so norec le'eraxa, huaña añi qasoxonaxa. 11Qaq co'ollaq inoxoorec se'esoua cuarenta na'axa'te, qataq cuarenta pe', nache Ñim Nataxala' aỹem ỹanema se'esoua coma'ye, maye nanettaleguete da naỹamaxataxac Ñimaye, 12nache aỹem 'enapega, 'eeta': ‹'Aue, 'aunotec, qoca'ai ana qasoxonaxa, cha'aye yi'iye 'arhuo' le'ecpi maye 'anqateeguesop co'ollaxa ye Egipto, yemayepi mashe dasheuec. Qataq sa ỹaỹaloxon da ca'ai na ỹapaxaguenataxanaxacpi, nache ỹo'ot ñi le'enaqtac chegaqaigui na lcat maye qaỹavigaxat.›
13Nataqa'en Ñimaye, 'eeta': ‹Mashe semeteetac yi'iye nhuo' le'ecpi, da yemayepi ỹataqta sa ỹalaq. 14Qaq aỹem 'aua'aqta'a qome da selaxachigui qataq ỹataqta pal ñaqa'en da le'enaxat yemayepi ana'ana 'alhua. Qalaxaye 'am sachegoxotchigui qome ca qalota ỹotta'a't shiỹaxauapi, 'añaxaicpi qataq napacalec ye lcata yemayepi.›
15Qaq co'ollaq senotec, da sheca'ai añi qasoxonaxa maye ỹataqta 'ettangui na le'eraxa, nache ñacheta'ape soua dos coma'ye maye nanettaleguete da aỹamaxataxac. 16Nache qami' sela'alo da huo'o da qarasouaxashichi hueto'ot Ñim Nataxala' maye Qanatamnaxala'ai, cha'aye qauo'oche so qare'enaqtaqui huaca llalec maye chegaqaigui so lcat qaỹavigaxat, nache ỹataqta sa qaỹaloq da qoquiỹa'ai da lataxac da ñecỹaxac maye qami' ỹachaxanalo co'ollaxa Ñim Nataxala', 17nache aỹem ñeuaxaareñi co'ollaxa soua coma'ye maye ñasoqta'alo, nache qauauañiichiguilo da ỹataqta dolachiguilo ñaqa'en soomaye. 18Ime, qaltaq she'eguelaxalec da sa'aldoto naua illecte Ñim Nataxala', se'enaxatchigui da sheetec soua cuarenta na'axa'te, qataq soua cuarenta pe', co'ollaq qaica ca sachec qataq qaica ca ñeỹomgui, souaxat da lta'araic qarasouaxashichi da qauo'ocheetac da qauem maye ỹauaachigui Ñim Nataxala', nache dalemata naqa'en Ñimaye. 19Qaq aỹem ỹataqta shi'iỹa se'eso layeloxo, qataq lalemataic Ñim Nataxala', souaxat da huotaique da ỹataqta qami' ilaxachiguilo. Qalaxaye ishet da qaltaq aỹem na'axaỹaxana Ñimaye. 20Ñim Nataxala' ỹataqta dalemataỹa nataqa'en so Aarón, nache huotaique da ỹalauat. Qalaxaye aỹem ñachoxoreetapeguelec somaye, 21ime, nache sacona so qare'enaqtaqui huaca llalec maye atamnaxala', som ỹo'ot da qarasouaxashichi, nache sasaxangui so norec. Ime, qataq selaxachigui ivitta'a da ndotec lsoche nache sasaxangui so la'auaxac maye chegaqasheguema añi qasoxonaxa.
22Qaq nache 'eeta'am co'ollaq huaña ye Tabera, Masah qataq ye Quibrot Hatavá da dalemata qanqa'eñi Ñim Nataxala'. 23Qataq co'ollaq qami' ỹamaxaleguete da qoquiỹa'ai ye Cadés Barnea da yaqto' qauacoñiỹa ye 'alhua maye qami' ỹanema. Qaq nataqa'en saishet da qaualaqaiguet qataq saishet da qaua'amaqchiñi Ñimaye. 24Qaq nache chegoqta'a co'ollaxa da qami' sauatto'n, da saishet naxa da qaualaqaiguet Ñim Nataxala'. 25Qaq souaxat co'ollaxa da Ñim Nataxala' qami' ỹareetegalo da ỹataqta qami' nlaxaayiñi, nache aỹem sa'atto'oto naua illecte Ñimaye soua cuarenta na'axa'te qataq cuarenta pe', 26nache ñatameetacot Ñim Nataxala', sheeta': ‹'Am Nataxala', saishet qome da 'anlaxaañi ne'ena nhuo' le'ecpi, maye maiche 'aralamaxatpi, maye 'anqateeguesop co'ollaxa ye Egipto 'aurolec da 'ara'amaqchec, qataq da lta'araic 'ara'añaxac. 27'Auennata'alo qome soua 'aramaxa'she Abraham, Isaac, qataq Jacob. Nache saishet qome da 'aulotagui da ỹataqta sa ỹalaq ne'ena shiỹaxauapi, qataq qauem da lataxac qataq souaxat na lasouaxashetpi, 28yaqto' na lma' yi'iye 'alhua maye qomi' 'auachegoxotchiguiñalo, saishet da 'eeta': Ñim Nataxala' saishet da ỹañoxot da inoxonaqcheteua'a ye 'alhua maye ỹachaxanapeguem co'ollaxa yemayepi, souaxat da choche nquiỹatega yemayepi, nache ỹauega da yaqto' ileuaña naqa'en ye toolec 'alhua. 29Qalaxaye namayepi ye maiche 'aralamaxatpi, qataq 'anqateeguesop co'ollaxa ye Egipto 'aurolec da ỹataqta lta'araic 'ara'añaxac.›»
