Ester 8

₁Qaq nacheso se'eso na'a'q, da so nta'a Asuero nme naqa'en aso nate'e Ester so lma' so Amán, som ipa'agueetac so judiopi, qaq so Mardoqueo nachaateua'a so nta'a, cha'aye aso Ester mashe ỹa'axat co'ollaxa da maiche ntesoqo' so Mardoqueo. ₂Qaq huaña nache so nta'a, nqat aso chiguishaqte maye hueto'ot co'ollaxa so Amán, nache ỹanem so Mardoqueo. Qaq aso Ester qalaq ỹanem so Mardoqueo da ilo'ogue 'enauac som logoxoshetpi co'ollaxa so Amán. ₃Qaq co'ollaq ime, nache aso Ester, qaltaq detaxaỹot so nta'a, nache qapaloiguilo naua lchel so nta'a, nache ñettrañi naua lache' da nachoxoreetacot somaye da yaqto' nlaxaañi som qauem lamaxasoxonaxac so Amán, qataq da saipaguelec da ỹo'ot som lapaxañi lataxac maye dataỹa'aguet so judiopi. ₄Nache so nta'a, ỹaneuga aso Ester aso lashelte oro. Nache asomaye ñesheguem, nache co'ollaq nachatto'ot somaye ₅nache, 'eeta':

'Am nta'a, da 'auaỹamaxareeta qataq da ỹaỹamaqchiguiñi 'anqa'en da iquiquiaxac, qataq da ỹataqta 'eesa 'am nta'a da aỹem 'auauotec, qataq aỹem 'anqopita, nache no'on qome da qoỹiyiñi ca namaxasoxonaxac da qanlaxaañi aso nereguishepi maye ỹamaq co'ollaxa so Amán, asom huetalec da qanmatchiguiñi na judiopi maye netalec nam 'alhuapi maye 'aulotague'. ₆Cha'aye ¿ca 'eeteco' da ishet da ñala'aguet dam qauem maye huotaique da talec na ihuo' le'ecpi, qataq da qanmatchiguiñi nam ỹalamaxat iqaỹañecpi?

₇Nache so nta'a Asuero, ỹasateguet aso Ester, qataq so Mardoqueo maye judío, 'eeta':

Aỹem mashe sanem añi Ester, ñi lma' so Amán, qaq somaye mashe qaicoñerasheguem, cha'aye somaye huotaique co'ollaxa da ỹalauat na judiopi. ₈Qaq nagui qami' samaxaleguete da qauauo'oi ca qa'iyiiñi qara'aqtaqui nache nanettalec qanqa'eñi da ỹe'enaxat, cam ỹataqta ỹaỹamaqchiguiñi qanqa'eñi da taalec na judiopi. ¡Nache aca'aca nere, qautoqñiilec aca ỹa'anaxanaqte!

Qaq aca nere da huetalec da le'enaxat ca nta'a, qataq da qaitoqootalec aca la'anaxanaqte, nache acamaye saishet da qanlaxaañi.

₉Qaq nache sa qaỹaỹaloxon da qaiỹaxaneuga so leraxanaxanecpi so nta'a. Qaq damaye huetoigui so na'a'q veintitrés so ca'agoxoic tres, som le'enaxat Siván, nache 'enauac som damaxasoxoolecpi so Mardoqueo, qoỹiyiñi da yaqto' taỹa'a so judiopi, qataq so nta'alpi maye ilotague' so laỹepi 'alhuapi, qataq so laỹepi nataxala'pi maye hueta'a so ciento veintisiete 'alhuapi, chegoqchiguiña ye la India, nache ivitta'a ye Etiopía, qaq aso nerepi qalaq qoỹettaleguete naua maiche la'aqtaqa, qataq dam maiche leraxanaxac som shiỹaxauapi maye hueta'a nam 'alhuapi. Qaq nataqa'en qoỹerelec asomaye naua la'aqtaqa, qataq da maiche leraxanaxac so judiopi. ₁₀Qaq aso nerepi nanettalec qanqa'en so le'enaxat so nta'a Asuero, qaq co'ollaq ime da qaitoqoolec aso la'anaxanaqte so nta'a nache qaỹamaq, ỹache qanqa'en so ỹalleppi maye netalec so caipi, maye ỹataqta qayaqaicpi maye chegaqaigui so lalopi so nta'a. ₁₁Qaq asomaye nache huetalec da la'aqtac so nta'a da ỹamaxalec so judiopi, da laỹona't maicheye cam hueta'a som huaqta'a't nỹecpi maye ỹotta'a't naua nañalo, da yaqto' npaxaalec da maiche nachaalataxac, qataq ỹalauat, ilaxachigui, nmichiguiñi naqa'en, qataq deuotaxanec nam logoxoshetpi cam shiỹaxauapi maye na'atchiguiñi na lo'ogoxonaxatpi, maye hueta'a ca camachaqca nam 'alhuapi da iloquiaxan somayepi, qataq saishet da huo'o ca naigui naqa'en na 'alpi qataq na ñaqpiolec. ₁₂Qaq 'enauac de'era, iuen da 'oonolec na'a'q qanqa'en ca huaigui da qaỹo'ot, 'enauac na 'alhuapi maye ilotague' so nta'a Asuero. Qaq so na'a'q maye qoỹecchigui nacheso so na'a'q trece, som ca'agoxoic doce, som ca'agoxoic maye le'enaxat Adar. ₁₃Qaq añi 'oonole asom nere maye huetalec da namaxasoxonaxac, iuen da qaỹa'axatec da ỹoqta namaxasoxonaxac da qaỹa'axatem 'enauac nam shiỹaxauapi, maye hueta'a na 'alhuapi, yaqto' nam judiopi naỹamaxattai' da ivita que'eca na'a'q, da yaqto' ỹe'eguelaxateguet so mpa'aguenaxauapi. ₁₄Qaq cha'aye la'aqtac so nta'a, nache so na'axaỹaxac lo'opi jec ỹataqta sancherapec da nelec so caipi maye ỹataqta qayaqaicpi, qaq se'eso qalapaxañi lataxac nataqa'en qaỹa'axatem som hueta'a so huaqta'a't nỹecpi ye Susa. ₁₅Qaq so Mardoqueo pa'auec co'ollaxa chegoqtoigui so lma' lta'araic so nta'a, ỹaatañi aso lapoto da nta'a, maye malaxarai qataq lapagaxai da lo'oxoỹaxac, qataq aso late'erai naro'o maye oro, qataq so lapo' maye chegaqaigui so lino, qataq so togaxaraic da lo'oxoỹaxac. Nache 'enauac so shiỹaxauapi maye hueta'a so huaqta'a't nỹecpi ye Susa, ỹataqta ỹa'alaqtagui souaxat da ntonaxac, ₁₆qaq som judiopi, qalaq 'eeta'am da yo'oqchiguiñi naqa'en se'eso na'a'q, nache huo'o da ntonaxac, lamaicỹaxac, qataq da llo'oxoyec naqa'en. ₁₇Qaq 'enauac som 'alhuapi, qataq so huaqta'a't nỹecpi maye ivira'a se'eso lamaxasoxonaxac so nta'a, nache so judiopi ỹataqta nlaqchigui da ntonaxac, qataq da lamaicỹaxac, nache ỹo'ot so lquia'axac qataq la'ashaxac. Qaq nataqa'en som shiỹaxauapi maye hueta'a se'eso 'alhua, qalota co'ollaxa som nañigui da judío, cha'aye souaxat da lli'iỹaxa.