Ester 9

₁Qaq so na'a'q trece, som ca'agoxoic doce, maye le'enaxat Adar, nacheso so qoỹecchiguiña da ipacchigui qanqa'en so lamaxasoxonaxac so nta'a, qaq nacheso nataqa'en som na'a'q maye som mpa'aguenaxauapi so judiopi, iuatta'aguet da yaqto' loxonec somayepi, qalaxaye damaye saipaigui cha'aye so judiopi loxonec co'ollaxa se'eso mpa'aguenaxauapi. ₂Qaq 'enauac so 'alhuapi maye ilotague' so nta'a Asuero, so judiopi laỹona't da hua'a so maiche lalamaxat huaqta'a't nỹecpi maye ỹotta'a't naua nañalo, da yaqto' iloquiaxan som huotaique da ỹo'otec namayepi ca qauem. Qaq qaica co'ollaxa ca ishet da dataỹa'aguet somayepi, cha'aye 'enauac so shiỹaxauapi da ỹataqta nlaxagui da lli'iỹaxa. ₃Qaq 'enauac so nataxala'pi maye ilotague' so 'alhuapi, qataq so nta'alpi maye ilotague' so saq 'amaqtaq 'alhuapi, qataq so ltauapi so nta'a, qataq som huetalec da 'amaqtaqaic no'onataxanaxac maye do'onataxaatacot so nta'a, somayepi itauaatac so judiopi souaxat da ñe'etega so Mardoqueo, ₄cha'aye so Mardoqueo, mashe huo'o da la'amaqchec da hueta'a so lma' lta'araic so nta'a, qataq da na'aqtaguec mashe imauec da qaỹaỹaten 'enauac so 'alhuapi, qaq nacheye ye na'a'q da nquictauec da la'añaxac. ₅Qaq so judiopi ỹalauat co'ollaxa so mpa'aguenaxauapi irolec so ỹeelonec, nache ỹataqta imauec da nmichiguiñi naqa'en, nache maiche ỹoiqueetac cam ỹataxaateuga somayepi. ₆Qaq nachesota so huaqta'a't nỹecpi ye Susa, da qaỹalauat co'ollaxa so quinientos ỹalleppi, ₇qaq nataqa'en qaỹalauat so Parsandata, Dalfón, Aspata, ₈Porata, Adalía, Aridata, ₉Parmasta, Arisay, Ariday qataq so Vaizata, ₁₀soomaye nachesoua soua diez llalqa so Amán, som ipa'agueetac co'ollaxa so judiopi, qalaxaye saishet da huo'o ca qoỹena'ac som lalamaxat logoxoshetpi.

₁₁Qaq nacheso se'eso na'a'q, co'ollaq so nta'a ỹaỹaten ye lcata so ileupi maye huaña so huaqta'a't nỹecpi ye Susa, ₁₂nache 'enapega aso nate'e Ester, 'eeta': Nam judiopi ỹalauat so quinientos ỹalleppi, qataq soua diez llalqa so Amán, huaña ye huaqta'a't nỹecpi ye Susa. Qaq ¿chaq negue't ca lỹa ỹo'ot da huaña na laỹepi 'alhuapi maye selotague'? ¡Ñaq aỹem 'aua'aqtaxanem, negue't ca lỹa qonetapeguec, nache aỹem 'am sanem qome camaye! ₁₃Nache aso Ester ỹasat, 'eeta': 'Am nta'a, da 'auaỹamaxareeta de'era, nache 'auasheetem na judiopi maye hueta'a ye Susa da ỹo'ot qonte' ca 'eeta'am de'era qalapaxañi lataxac, qaq nache qaicoñeldashegue'm qome soua diez llalqa so Amán. ₁₄Nache so nta'a damaxasoxoolec da nache qoỹeetec de'era. Nache se'eso qalapaxañi lataxac qaỹa'axatec ye Susa, nache soua diez llalqa so Amán qaicoñeldashegue'm.

₁₅Qaq so judiopi maye hueta'a ye Susa, qaltaq ỹe'eguelaxalec da laỹona't huaigui so na'a'q catorce, so ca'agoxoic maye le'enaxat Adar, qaq huaña yemaye da qaltaq ỹalauat so trescientos ỹalleppi, qalaxaye saishet da huo'o ca qoỹena'ac so logoxoshetpi somayepi. ₁₆Qaq nataqa'en so laỹepi judiopi maye hueta'a so laỹepi 'alhuapi, laỹona't co'ollaxa, nache naỹamaxat da mpaxaalec da nachaalataxac, qataq dataỹa'aguet so mpa'aguenaxauapi, nache ỹalauat so setenta y cinco mil somayepi, qalaxaye saishet da huo'o ca ỹacona so logoxoshetpi somayepi. ₁₇Qaq de'era huetoigui co'ollaxa so na'a'q trece so ca'agoxoic Adar, qaq so na'a'q catorce se'eso ca'agoxoic nache nmatec, qaq nache ỹo'ot da laloxoqui naqa'en se'eso na'a'q so lquia'axac, qataq da lamaicỹaxac. ₁₈Qaq so judiopi maye hueta'a ye Susa, laỹona't co'ollaxa so na'a'q trece qataq so catorce se'eso ca'agoxoic, nache somayepi nmatec so na'a'q quince, nache nataqa'en ỹo'ot da laloxoqui naqa'en se'eso na'a'q so lquia'axac, qataq da lamaicỹaxac. ₁₉Qalaxaye so judiopi maye netauga so no'onaxa, qataq som netaigui so nma'piolec maye qaica ca lpaqtaxat, ỹo'ot se'eso na'a'q catorce som ca'agoxoic Adar, da laloxoqui naqa'en so lquia'axac qataq da lamaicỹaxac, nache ñi 'oonolec ỹachet ñi lỹa, ỹauo'o na nme.

₂₀Qaq so Mardoqueo ỹeyiñi co'ollaxa de'era qanayeuaigui, nache ỹamaxa aso lerepi 'enauac so judiopi maye hueta'a so 'alhuapi maye ilotague' so nta'a Asuero, som saqaỹapeque qataq so qaỹoqtapi, ₂₁nache ỹamaxalec da ye 'oonolec vi'i, nache ỹo'ot ca na'ashaxac da ivireuga se'eso na'a'q catorce, qataq quince som ca'agoxoic Adar, ₂₂'eeta'ama soua na'axa'te co'ollaq so judiopi, dataỹa'aguet so mpa'aguenaxauapi, da yaqto' huo'o da l-lagaxayec, qataq 'eeta'am som ca'agoxoic maye huaigui so laquicoxo, qataq so la'alaxac souaxat da nqui'ic, maye nmeneguet da lta'araic lamaicỹaxac qataq na'ashaxac. Qaq que'ecaua na'axa'te, iuen da qaỹo'ot ca nquia'axac qataq ca namaicỹaxac, qataq nache huetoiguilo da ñi 'oonolec, ỹauo'o ca nme ca lỹa, qataq qaitauan na choxoraqpi. ₂₃Qaq so judiopi, ỹasateguet da ipacchigui da ỹo'ot som lamaxasoxonaxac so Mardoqueo. ₂₄Qaq cha'aye so Amán, som ipa'agueetac co'ollaxa 'enauac so judiopi, somaye lhuennataxac co'ollaxa da nmatchiguiñi, nache ỹo'ot so alletaxac da ỹalauat qataq ilaxachigui so judiopi, ₂₅qalaxaye aso Ester, co'ollaq nachaateua'a so nta'a, nache so nta'a ỹeyiñi so lamaxasoxonaxac, da 'enauac nam qauem lhuennataxacpi so Amán, da huotaique ỹo'otec so judiopi, da maiche talec so Amán. Qaq 'era da 'eetec da so Amán, qataq soua llalqa da qaicoñeldasheguemec co'ollaxa aso 'epaq. ₂₆Qaq 'era da huo'omshe se'esoua na'axa'te qoỹanagui da le'enaxat purim, som chegoqchigui so na'aqtac pur.

Qaq 'era da 'eetec, da ipacchigui qanqa'en aso lere so Mardoqueo, qataq som ỹauaachiguipi qataq so ỹalectaua'api co'ollaxa de'era, ₂₇nache so judiopi lapaxañi co'ollaxa de'era lataxac da yaqto' lalamaxat somayepi, qataq cam llalaqpi, qataq 'enauac cam ishet da taigui na judiopi, da 'enauaque naua vi'iye da ỹo'oxoren se'esoua na'axa'te, qataq da ipacchigui da ỹo'ot da ivireugalo se'esoua na'axa'te, ipacchigui dam napaxaguenataxanaxac maye qoỹanem co'ollaxa, ₂₈qataq saishet da qaicoua'aisalo se'esoua na'axa'te, da qaỹo'oxore'n dam qotata'ague, 'enauac so nhuo' le'ecpi, qataq 'enauac so 'alhuapi, qataq so huaqta'a't nỹecpi maye ỹotta'a't naua nañalo, yaqto' na judiopi qataq cam chegoxoguetpi, saishet qome da icoua'ai damaye. ₂₉Qaq aso nate'e Ester, maye llale so Abijaíl, qataq so Mardoqueo maye judío, ỹataqta huo'o da 'eneque co'ollaq ỹelyiñi asa'aso lỹa nere, maye ỹa'axat so na'ashaxac maye huaigui so na'a'q Purim, da yaqto' 'eesa naqa'en aso hua'auñi nere, ₃₀nache asa'aso nere qaỹamaxa 'enauac so judiopi, maye netalec so ciento veintisiete 'alhuapi maye ilotague' so nta'a Asuero, qaq asomaye huetaleguete naua na'aqtaqa maye ỹataqta qaỹamaategueta qataq huesotte', ₃₁maye damaxasoxoolec da qaỹo'ot so na'ashaxac da ivita so na'a'q Purim, maye qoỹecchigui co'ollaxa, nache qaipacchigui da lamaxasoxonaxac so Mardoqueo, qataq aso nate'e Ester, maye taalec somayepi qataq cam chegoxoguetpi. Qaq nataqa'en qaỹalecnaxaneuo som lataxac da qaỹo'ot ca qouaqchetaxac, qataq ca naquicoxo, ₃₂qaq se'eso lamaxasoxonaxac aso Ester, nacheso so ỹo'ot da qalapaxañi na lataxacpi, maye iuen da qanayectalec da qaỹo'oxoren se'eso na'a'q Purim. Qaq 'enauac de'era, qoỹettalec aso nere.