So Lapascua
1Nache Ñim Nataxala', detaxaỹapegue' so Moisés qataq so Aarón co'ollaq huaña ye Egipto, nache 'enapegalo', 'eeta':
2«Ne'ena ca'agoxoic nachena qome na huo'o naq 'enec qanqa'eñi, qataq nachena na la'auaxanec ca'agoxoic na vi'i. 3Qaq qonapega qome 'enauac na Israel le'ecpi, qoneta': Qom ivireuga ca na'a'q diez ne'ena ca'agoxoic, nache ñi 'oonolec nta'a da qoñiita, huaxaiguet ca llalaqpi, nache ỹaconeua'a ca 'oonolec qagueta llalec. 4Qalaxaye ca 'oonolec da qoñiita da saq 'amaqtaq ca llalaqpi, da huo'otaq sa nalo'oguet da chec ca 'oonolec qagueta llalec, nache camaye no'on da lquia'axaua ca lauoreua, qaq naloqteeta'ai' ca lcata camayepi, qataq ỹataqta ca nalota'ai' da chec ñi 'oonolec. 5Qaq que'eca shiguiỹac, camaye ỹale qataq ivi' qome ca 'oonolec vi'i, qataq ỹataqta qaica ca lque'emaxa, qagueta huo'otaq quetaq. 6Nache qaỹaỹamaxat que'eca shiguiỹac, nato' qom ivireuga ca na'a'q catorce ne'ena ca'agoxoic. Nache 'enauac na Israel le'ecpi ñi 'oonolec huaxaiguet ca llalaqpi, nache ỹalauat qom mashe napalchiguiñi. 7Qaq qom ime, nache qauacoñiỹa ca ltago'q que'eca qagueta llalec, nache qaua'amiñi' 'enauaque naua laso'omi que'eca nỹec maye huaña da qanallec que'eca qagueta llalec. 8Nache que'eca pe, qollequi ca nauoc lapat, qaỹalecneguet ana huoue maye ñe'eua qanqoỹen qataq ana nauole 'ayiiña maye sa qaỹauo'o aca lalegue na ỹasheeraxachigui. 9Qaq saishet qome da qollequi ca laỹe da ñaq tocchigui, huo'otaq ca qoỹaatauaq. Qaq ima ca shiguiỹac, lqaic, lapia'ate, qataq na lauel le'ec, namayepi qaỹauotta. 10Qaq saishet qome da huo'o ca qano'onaxatañi da taỹaigui ca lỹa na'a'q. Da huo'otaq huo'o ca no'onañi, nache camaye qaỹavigaxat, qaỹasaxangui ca norec. 11Qaq 'era da qoñiitec da qollequi ca qagueta llalec, qaq ỹataqta qansauachiita, qataq qaỹa'añiiyiñi naua qarapela'achilli', qataq qanasoqoita'alo naua qarashelchilli', qaq ỹataqta qanqui'imiigue, cha'aye de'era lapascua lalamaxat Ñim Nataxala'. 12Qaq que'eca pe nache Aỹem ñanaguelec 'enauac na Egipto. Nache salauat 'enauac na la'auaxanec llalec na Egipto le'ecpi, nataqa'en nam la'auaxanec llalec na na'atetpi. Qataq sauo'o da nhuaxanaguec 'enauac na l-latacpi na Egipto le'ecpi. Aỹem Nataxala', 'era da ỹa'aqtac.
13Qaq que'eca ltago'q nacheca qome ca la'anaxat naua qarma'achilli' maye qoñiitaiguilo. Qaq yaqto' qom aỹem salauat na Egipto le'ecpi, nache qaica ca 'oonolec da qoñiita da ileu. Cha'aye da sela'a ca ntago'q, nache aỹem sapactauec. 14Qaq que'eca na'a'q, nache qami' saishet da qaucoviỹa'ai da qauo'oche ca ỹataqta lta'araic qayo'oxonnataxanaxaqui da qavio'oxoyiñi Nam Nataxala'. Qaq damaye nache qalapaxañi namaxasoxonaxac da nache 'eetai' qome da ivireuga ye laloxoqui nache qami' qavi'iguelaqailec da qauo'oche, qataq nache 'ena'am qome ca qaỹa'alquipi. 15Qaq siete na'axa'te qome da qollequiitac ana nauole 'ayiiña maye sa qaỹauo'o anam lalegue maye ỹasheeraxachigui. Qaq ỹoqo'oye que'eca la'auaxanec na'a'q nache saishet da huo'otaq 'auaỹamaxattac nam lalegue maye ỹasheeraxachigui na ndaqñiguishec 'ayiiña que'eca 'arma'. Cha'aye da huo'o ca 'oonolec da qoñiita da huo'otaq chec aca nauole 'ayiiña maye qaỹauo'o aca lalegue maye ỹasheeraxachigui que'ecaua siete na'axa'te, nache camaye qaỹo'orauec da yaqto' saishet da ỹalegoigui na Israel le'ecpi. 16Qaq que'eca la'auaxanec na'a'q qataq nache 'ena'am ca pa'atec na'a'q qom mashe ivi' caua siete na'axa'te, nache huetoiguilo da qaỹo'ot ca lta'araic naponaxac da qavio'oxonnataxañi. Nache que'ecaua na'axa'te qaica ca ishet da do'onataxan. Nachaqrata da iqataxaatai' ca aloq ñi 'oonolec.
17Qaq qami' qauo'oche qome ca qayo'oxonnataxanaxaqui que'eca na'a'q maye huetoigui da qanallec ana nauole 'ayiiña maye sa qaỹauo'o ana lalecte, cha'aye que'eca na'a'q huetoigui da qami' ñeqateeguesopa na Egipto. Qaq damaye nache qalapaxañi namaxasoxonaxac da nache 'eetai' qome da ivireuga ye laloxoqui nache qami' qavi'iguelaqailec da qauo'oche, qaq nache 'ena'am qome ca qaỹa'alquipi.
18Qaq qollequi qome aca nauole 'ayiiña maye qaca aca lalecte ca avit que'eca na'a'q catorce ne'ena la'auaxanec naua ca'agoxoiqa, choche ivitta'a ca avit ca na'a'q veintiuno ne'ena ca'agoxoic. 19Qaq saishet qome da huo'o ca ỹaỹamaxattac aca lalecnaxanaqte que'ecaua siete na'axa'te. Cha'aye da huo'otaq huo'o ca chec aca nauole 'ayiiña maye huo'o ana lalegue, nache camaye qaỹo'orauec da yaqto' saishet da ỹalegoigui na Israel le'ecpi, na'aictaxa camaye da huo'otaq nachena na Israel le'ecpi, huo'otaq ca choche chegaqauec. 20Qaq ỹoqo'oye saishet qome da qollequi ca huo'o ana lalegue maye ỹasheeraxachigui. Na'aictaxa cam qapa'aita'ague, qalaxaye qollequi aca nauole 'ayiiña maye qaca aca lalecte maye ỹasheeraxachigui.»
21Nache so Moisés damaxasoxoolec da qaiỹaxaneuga 'enauac so lqueroxonecpi so Israel le'ecpi, nache 'enapega, 'eeta':
«Qauesomiỹa qome, qauacoñiiua'a ca qagueta llalec. Ime, qaq qaualauache, yaqto' ñi 'oonolec da qoñiita qataq ca llalaqpi ỹo'ot ca lquia'axac da yo'oxonnataxan. 22Qaq ca ltago'q huo'o ca qauachiỹangui laỹe'. Ime, qaq qauacoñiỹa aca naqtole hisopo, nache qa'ailchiingui ca ntago'q, nache qaua'amiñi' 'enauaque caua laso'omi ca nỹec. Qaq saishet qome da huo'o ca pa'auec da qoñiita qom saxanaxa da yo'oxoñi. 23Yaqto' Ñim Nataxala' qom anac da ỹalauat na Egipto le'ecpi, nache da ilalec ca ntago'q naua laso'omi, nache napactalec que'eca nỹec. Qaq saishet da ỹasheetem da inoxoneuo ca nleuaxa naua qarma'achilli'. 24Qaq de'era ỹa'aqtac, ỹataqta qaualaqailec qome, nache 'ena'am ca qaỹa'alquipi. Qaq de'era namaxasoxonaxac, nache 'eetai' qome qauo'ocheetac. 25Qaq qom mashe qaunoxoñiiua'a yi'iye 'alhua maye qami' ỹachaxanapeguema co'olloxocheye da qami' ỹanema Ñim Nataxala', nache qoquiitot qome da qauo'ocheetac de'era qarquia'axaqui da qavio'oxonnataxañi. 26Qaq qom qami' ina't ca qaỹa'alquipi da 'eeta': ‹¿Negue't cam naigui de'era qarquia'axaqui?› 27Nache qami' qoñiita' qome: Ñi'iñi shiguiỹac maye qaỹalauat da qanallec naigui da qaỹo'oxoren Ñim Nataxala'. Cha'aye Ñimaye co'ollaq ỹalauat so Egipto le'ecpi, nache napactaleguete naua lma'ate so Israel le'ecpi maye netaña ye Egipto, qaq 'era da 'eetec co'ollaq nca'alaxatec na qoyalaqpi.»
Nache na Israel le'ecpi ỹa'alyiñi co'ollaxa naua l-llecte da yo'oxonnataxan. 28Ime, nache jec somayepi da ỹo'ot 'enauac nam la'aqtac Ñim Nataxala' maye ỹamaxaleguete so Moisés qataq so Aarón.
Da l-leuaxa so na'auaxanec ñalaqpi ye Egipto
29Qaq co'ollaq mashe laiñi so pe, nache Ñim Nataxala' ỹalauat 'enauac so la'auaxanec llalec so Egipto le'ecpi, nataqa'en so la'auaxanec llalec so faraón maye taỹa'a da nta'a, qataq so la'auaxanec llalec so ncoñeteguishecpi, nataqa'en so la'auaxanec llalec so shiguiỹacpi. 30Nache so faraón qataq so ltauapi qataq 'enauac so Egipto le'ecpi ñisheguem se'eso pe, nache ỹataqta lta'araic da la'alaxac, souaxat da nqui'ic 'enauac ye Egipto. Cha'aye qaica ca nỹec da huo'otaq saqca ca leuaxaic. 31Nache so faraón damaxasoxoneuga so Moisés qataq so Aarón, qaq nacheso se'eso pe da 'enapegalo, 'eeta':
«Qauesomiỹa qome, qoqui, qoquiỹa'ai na ihuo' le'ecpi, qami' qataq 'enauac na Israel le'ecpi. Qanqo'oñiỹa da qanatamñiỹot cam Nataxala', qauo'oche qome dam qauquiquiitegueua'a. 32Qauache nataqa'en ana qareloi qaguetapi qataq ana huacapi maye qauquiquiitegueua'a. Nache qoqui da yaqto' qanqouagaxauñiỹot Ñim Lo'onatac 'Enauacna da aỹem qanqouagaxauñiilec».
33Nache so Egipto le'ecpi ỹataqta iỹalaqchet so Israel le'ecpi da sanaỹaloxon da ca'ai naqa'en yi'iye 'alhua, cha'aye tatapigui lauel da 'enauac nmichiguiñi da ileu. 34Nache so Israel le'ecpi ỹacoosop na ldaqñiguishec 'ayiiña maye saxanaxa da huo'o aca lalecte ỹasheeraxachigui, nache lpataxanoiguilo naua alogo. Ime, nache ỹasaxaleguete naua lallaco. 35Qaq somayepi ipactelec da la'aqtac so Moisés, da iỹaxanot na Egipto le'ecpi, iỹaxanaique na nogoxoshet maye chegaqaigui na lcat oro, plata qataq na nogoxot maye ỹataqta no'on. 36Nache Ñim Nataxala' ỹo'otec so Egipto le'ecpi da ỹanem 'enauac nam iỹaxanaique so Israel le'ecpi. Qaq 'era da 'eetec co'ollaxa so Israel le'ecpi da ỹataqta nhuotta so Egipto le'ecpi.
So Israel le'ecpi ca'ai ye Egipto
37Nache so Israel le'ecpi ca'ai ye Ramesés, tateuga ye Sucot. Somayepi huac da ivi' saiscientos mil ỹalleppi, ndotec so mashe ishet da taigui na huataxanaq, qaq saishet da qanaloqneuo so 'alpi qataq so ñaqpiolec. 38Nache somayepi ỹataqta qalota so lỹatec ỹotta'a't shiỹaxauapi. Nataqa'en ỹataqta qalota aso qaguetapi qataq aso huacapi. 39Qaq souaxat da qaica ca ldaqa' da ỹaqataxanai' ca aloq somayepi, cha'aye so Egipto le'ecpi ỹataqta ỹo'orauec da ca'ai naqa'en yi'iye 'alhua, nache ỹo'ot aso lauole na ndaqñiguishec 'ayiiña maye qaca aca lalecte maye ỹasheeraxachigui ỹachegoxotta'a ye Egipto.
40So Israel le'ecpi ivi' soua cuatrocientos treinta vi'iye da netaña ye Egipto, 41qaq co'ollaq mashe inoxoorec se'esoua cuatrocientos treinta vi'iye, nache 'enauac se'eso nalleppi Ñim Nataxala' ca'ai yi'iye 'alhua. 42Qaq se'eso pe co'ollaq Ñim Nataxala' nqateeguesop ye Egipto somayepi, nache ỹataqta nauaatalec. Qaq se'eso pe ỹataqta lalamaxat Ñim Nataxala' da qaỹo'oxoren. Ỹoqo'oye so Israel le'ecpi ỹataqta qaica ca do'oche se'eso pe. Qaq damaye nache 'eetai' qome da chochaq tatec da qaỹo'ottac.
Nam qalapaxañi lataxacpi so Lapascua
43Qaq Ñim Nataxala' 'enapega so Moisés qataq so Aarón, 'eeta':
«'Era qome da lataxac ca lapascua: Ca choche chegaqauec saishet qome da chec ca qagueta llalec maye qaỹalauat da qanallec, 44qalaxaye ca nlatac maye nsheenaxanaxat, camaye ishet da deque'e, qom huo'otaq mashe qaỹauo'o ca na'anaxat na lo'oc. 45Qaq ca choche chegaqauec qataq ca choche qaisheetetac, saishet da chec que'eca qagueta llalec. 46Qaq camaye da qanallec, qalaq huaña ca 'oonolec nỹec. Qataq saishet da huo'o ca qaicolaxatec laỹe que'eca lapat, nache qairoua'a ca lỹa nỹec. Qataq saishet da qainoxo'n naua lpi'ineqa. 47Qaq 'enauac qome na Israel le'ecpi da ỹo'ot damaye. 48Qaq que'eca shiỹaxaua maye chegaqauec, camaye da nshetaique da dequi'iỹapegueuo da ỹo'oxoren Ñim Nataxala', qaq no'on da qaỹa'auaxaañi da qaỹauo'o ca na'anaxat na lo'oc 'enauac ca llalaqpi ỹalleppi. Qaq da ime, nache camaye ishet da dequi'iỹapegueuo. Cha'aye camaye 'eeta'am ca maiche lañoqo' que'eca 'alhua. Qalaxaye que'eca qaica ca na'anaxat, saishet da chec que'eca qagueta llalec. 49Qaq de'era qalapaxañi lataxac nachera da qaỹo'otec qome ca maiche lañoqo' ne'ena 'alhua qataq ca choche chegaqauec da qami' netaiguilo.»
50Nache 'enauac so Israel le'ecpi da ỹo'ot 'enauac nam la'aqtacpi Ñim Nataxala' maye ỹamaxalec co'ollaxa so Moisés qataq so Aarón. 51Qaq nache huetoigui se'eso na'a'q da Ñim Nataxala' nqateeguesop ye Egipto so alleppi Israel le'ecpi.
