Éxodo 25

₁Nache Ñim Nataxala' 'enapega so Moisés, 'eeta':

₂«Qonapega qome na Israel le'ecpi da Aỹem ndoua'a aca lachetaqtaxanaqte. Qalaxaye saishet da 'auamaqalec nachaqrata da ñi 'oonolec maiche lhuennataxac, qataq lquiyaqteỹaxac da ndouo aca lachetaqtaxanaqte. ₃Qaq namayepi qome iuen da ndouo ca lcat oro, plata, cobre, ₄qataq ca hualoq laỹe maye naueralec da lmalaxa, qataq ca naueralec da ltogaxa, qataq ca togaxaraic, qataq ca no'on hualoq maye isotta, qataq ca laue aca quetaq, ₅qataq ca peenaq lo'oc maye nqo'oilliguishec togaxaraic, nataqa'en ca no'on lo'oc, qataq ca 'epaq le'enaxat acacia, ₆qataq ca aceite maye lalonaxat ana ncoỹaraxanaxaqui, qataq ca coraxat ama da laitaỹaxac lalegue na aceite, maye ncoraxanaxat da huo'o na qaicorelec, qataq na lalegue na nchenaxanaxat maye ama da laitaỹaxac, ₇qataq ca coma' le'enaxat ónice qataq ca no'on laỹepi maye qaỹauotaique da no'onataxat ca npo' le'enaxat efod, qataq caua lallagui'ishe som lataxala' ca ntaxaỹaxanaxanecpi. ₈Qataq 'auo'ot qome que'eca npe'l lta'araic, yaqto' Aỹem ishet da qami' sootaiguilo. ₉Nache que'eca npe'l qataq ca no'otaxatpi ỹataqta 'aue'enaxatchigui qome da no'onataxac cam 'am sachaxana.»

₁₀«'Auo'ot qome aca laỹe' naua nqataxaco, 'aua'ara't na 'epaq maye chegaqaigui ana acacia, acamaye ivi' un metro y diez centímetros ye lalogaxa, qataq sesenta y cinco centímetros ye lcateueegue, qataq sesenta y cinco centímetros ye loquitcheguema. ₁₁Nache 'alapaxalec ca ndotec oro ca pa'auec qataq ca pa'auo, qaq caua laỹel, nache queguelo 'anqa'en na oro. ₁₂Qataq 'auo'o't caua cuatro la'aitel lcat oro, naua'alo 'anqa'en caua cuatro lapia'ate, qaq dos 'anqa'en caua naua'alo ñi 'oonolec laỹe acamaye. ₁₃Nataqa'en 'auo'o't caua dos 'epaxaye da lachoxola'ate acamaye, 'auachegoxotaiguilo ana qo'oipaq acacia, nache 'alapaxaleguete ca oro, ₁₄nache 'aỹa'anaguilo caua laỹel, 'aushetoiguilo que'ecaua la'aitel maye naua'alo caua laỹel acamaye, da yaqto' ishet da qanachesheguem da qaỹachoxonalo que'ecaua 'epaxaye, ₁₅nache caamaye sa qairaxanai'salo qome, nache netaguilo qanqoỹen caua la'aitel acamaye. ₁₆Ime, nache 'auachanguilo acamaye que'ecaua nqataxaco maye 'am sanema qome.

₁₇Ime, qaq 'auo'ot ca lapoxot ndotec oro, qaq camaye ivi' un metro y diez centímetros ye lalogaxa, qataq sesenta y cinco centímetros ye lcateueegue. ₁₈Nache 'aỹa'analeguete qome caua dos ne'enaqtaqa huo'oi caua laua't, caamaye 'aurota'alo aca ntoqnaxanaqte da 'auo'o't, nache 'aỹa'ana'agueta caua lsheeneqa. ₁₉Que'eca lapoxot, qataq que'ecaua ne'enaqtaqa maye huo'oi naua laua't, caamaye nache ỹo'oxoorañi qanqa'en, ca 'oonolec neteguet ca lsheenec qataq ca lỹa neteguet ca lỹa lsheenec. ₂₀Nache caamaye datata'a't qanqa'en, qaq naua lashego nache ilotralec que'eca lapoxot, qaq naua laua't qalaq ivira'a't, nache 'eeta'am da ipegueetaleguete acamaye. ₂₁Ime, nache que'eca lapoxot qalapaxalec qome aca'aca laỹe', nache 'auachanguilo acamaye caua nqataxaco maye 'am sanema qome. ₂₂Qaq nache huaña qome camaxa da 'am ñauane'. Qaq ne'ena l-laq que'eca lapoxot maye datatraña que'ecaua dos ne'enaqtaqa maye huo'oi naua laua't, maye netralec aca laỹe' caua nqataxaco, camaye nache huaña da 'am saỹaanaxanaxanec 'enauac na ỹamaxasoxonaxacpi maye sami' na Israel le'ecpi.»

₂₃«'Auo'o't qome ca 'aua'ara't 'epaqpi da yaqto' nquia'axala' 'auachegoxotaigui ana qo'oipaq acacia, nache noventa centímetros ye lalogaxa, qataq cuarenta y cinco centímetros ye lcateueegue, qataq sesenta y cinco centímetros ye loquitcheguema. ₂₄Nache 'alapaxalec ca ndotec oro qaq caua laỹel nache queguelo 'anqa'en ca oro. ₂₅Qataq 'auo'ot ca mpa'aỹasheguem llo'oxoraxat caua laỹel siete centímetros ye lcateueegue, qataq que'eca llo'oxoraxat nache ỹa'añaxattañi naqa'en ca oro, ₂₆qataq 'auo'o't caua cuatro la'aitel, naua'alo caua cuatro laỹel qataq nalotegueta caua cuatro lapia'ate, ₂₇qaq que'ecaua la'aitel nache naua'alo caua laỹel que'eca llo'oxoraxat, yaqto' nache qaishetoiguilo caua 'epaxaye da lachoxola'ate que'eca nquia'axala'. ₂₈Qataq que'ecaua 'epaxaye maye lachoxola'ate da 'auo'o't nache 'auauota'a na chegaqaigui ana qo'oipaq acacia, qataq 'alapaxalec ca oro, ₂₉qataq 'auo'ot nataqa'en ca nquia'axaquipi oro, qataq ca nemaxanaxatpi, nemaxanaqtepi, qataq aca ỹomaxaquipi maye qaicoyingui ca nachetaqtaxanaxat maye lli'i aca nañiguishe ala. ₃₀Qataq nache 'eetai' qome da qaỹachetalec que'eca nquia'axala' aca nauolepi 'ayiiña maye Aỹem qoỹanot.»

₃₁«Nataqa'en 'auo'ot qome caua ncoỹaraxanaxaqui' chegaqaigui na oro, qalaxaye 'auauota'a aca ntoqnaxanaqte da 'auo'ot. Qaq aca lashe qataq caua lhuaxaye iuen da netagui ca lsheenec aca 'eeta'am aca lauoxo ana almendro, qaq acamaye nache ima'a't 'oonole aca lashe. ₃₂Qataq nache naua'alo caua laỹel caua seis lhua'q, nache tres caua neraua'alo ca 'oonolec laỹe qataq tres caua nera'ague da lỹa laỹe. ₃₃Qaq ñi 'oonolec caua seis lhuaxaye maye na'attaua'a aca lashe caua ncoỹaraxanaxaqui', iuen da huo'oi caua tres 'eeta'am ana ỹomaxaqui maye huo'oi naua lauoxo, 'eeta'am aca lauoxo ana almendro, qataq huo'oi naua laue aca lauoxo. ₃₄Qaq aca'aca lashe nache na'attaua'alo caua cuatro maye 'eeta'ama ana ỹomaxaqui maye 'eeta'am da lataxac aca lauoxo ana almendro, qataq huo'oi naua laue aca'aca lauoxo. ₃₅Qaq caua tres nauaxaỹaxau' lhua'q maye chegoqteua'alo aca lashe caua seis ncoỹaraxanaxaqui', nache na'attaua'alo aca llo'oxoraqte lauoxo na pa'aguiñi. ₃₆Qaq nataqa'en aca lauoxo qataq caua lhua'q nache ima'agueta aca'aca lashe caua ncoỹaraxanaxaqui', qataq chegaqaigui na oro qataq qairota'a aca ntoqnaxanaqte da qaỹo'ot. ₃₇Qataq 'auo'o't caua siete ncoỹaraxanaxaqui', da yaqto' icoỹattalec na dataỹaueegue, ₃₈qataq ca lchegaxat ca hualoq laỹe ncoỹaraxanaxat, qataq ca laỹe' ca alo ndotec qome na oro. ₃₉Qataq 'auo'onataxana ca treinta y tres kilos ca ndotec oro da yaqto' 'auo'ot caua ncoỹaraxanaxaqui' qataq 'enauac ca no'onataxatpi, ₄₀qalaxaye ỹataqta 'aue'enaxatchigui qome da lataxac da no'onataguec aso 'am sachaxana co'ollaq huaña añi qasoxonaxa.»