Éxodo 27

₁«Nataqa'en 'auo'ot qome aca nca'atoxonaxalate, chegaqaigui ana qo'oipaq acacia. Qaq acamaye ivi' qome dos metros y veinticinco centímetros ca lcateueegue 'enauaque caua cuatro laỹel, qataq un metro y veinticinco centímetros ye lshequitcheguema. ₂Qaq caua cuatro lsheeneqa nache netegueta 'anqa'en caua cuatro lcoue. Ime, nache mpa'aỹasheguem 'anqa'en ca lcat bronce da 'alapaxalec aca'aca nca'atoxonaxalate. ₃Qaq ca logoxoshetpi aca'aca nca'atoxonaxalate qalaq 'enauac qome da bronce: aca laỹe' ca alo da qalaỹona't, qataq ca lo'o aca poqo, qataq aca ỹomaxaquipi, qataq aca laỹe' aca poqo, qataq ca nquerenaxanaxatpi. ₄Nataqa'en 'auo'ot ca 'aua'ara't lcat bronce, nache 'auauo'oi caua cuatro la'aitel, netegueta caua cuatro lsheeneqa que'eca 'aua'ara't lcat. ₅Ime, nache que'eca 'aua'ara't lcat bronce, camaye 'aỹa'anagui qome ca lasot aca nca'atoxonaxalate. ₆Qataq 'auo'o't caua 'epaxaye hua'aqaguilo maye chegaqaigui na acacia, nache 'alapaxaleguete ca lcat bronce. ₇Qaq caamaye nache 'aua'aroiguilo caua la'aitel maye naua'alo caua laỹel aca nca'atoxonaxalate, yaqto' naconqa da qaỹache. ₈Qaq aca'aca nca'atoxonaxalate acamaye ỹasaataigui 'anqa'en na lauel, 'aue'enaxatchigui qome aso 'am sachaxana co'ollaq huaña añi qasoxonaxa».

₉«Qaq nataqa'en 'auo'ot qome ca nqasoxoc que'eca npe'l. Ca pa'aigue da taguiñi, qalaq ivi' qome ca cuarenta y cinco metros ca lalogaxa qataq lpaqtaxat ca hualoq laỹe maye chegaqaigui na lino. ₁₀Qataq veinte aca lauoqtepi, qataq veinte aca na'attalecpi maye qalapaxalec ca lcat bronce, qaq ca lemaxatpi, qataq aca la'aitepi que'eca lpaqtaxat ca npe'l, nache qaỹauota'a ca lcat plata. ₁₁Qaq ca pa'aỹa'ague da sheu' nataqa'en cuarenta y cinco metros ca lalogaxa ca lpaqtaxat, qataq veinte aca lauoqtepi qataq veinte aca na'attalecpi maye chegaqaigui ca lcat bronce, qaq ca lemaxaquipi qataq aca la'aitepi que'eca lpaqtaxat que'eca npe'l, qalaq chegaqaigui qome ca lcat plata. ₁₂Qaq ca pa'aỹa'ague da avit nache, ivi' qome ca veintidós metros y medio ca lcateueegue ca lpaqtaxat, qataq diez aca lauoqtepi qataq diez caua na'attaleguete. ₁₃Nataqa'en ca pa'aỹa'ague da nala' lliguisheguem, ivi' qome ca veintidós metros y medio ca lalogaxa ca lpaqtaxat qataq diez aca lauoqtepi. ₁₄Qaq ca 'oonolec laỹe maye pa'aỹa'ague ca ñegueuo ca qasoxoc, qalaq ivi' qome ca siete metros ca lpaqtaxat, qataq tres caua lauoqtel, qataq tres caua na'attaleguete. ₁₅Qataq nache 'eetec nataqa'en da lỹa laỹe, ivi' siete metros ca lpaqtaxat, qataq tres caua lauoqte, qataq tres caua na'attaleguete. ₁₆Qaq ca ñegueuo que'eca lpaqtaxat ca nqasoxoc que'eca npe'l, qalaq ivi' qome nueve metros ca locta ca napoxonaxat hualoq laỹe imalaqalec, tocalec, qataq ca togaxaraic da lo'oxoỹaxac, qataq ca ỹataqta no'on lino, qataq qantetta ca llo'oxoraxatpi, qataq cuatro caua lauoqtel, qataq caua na'attaleguete caamaye. ₁₇Qaq 'enauac aca'aca lauoqtepi que'eca lpaqtaxat ca nqasoxoc ca npe'l, nache qaỹauo'o aca la'aitepi, qataq ca lemaxatpi lcat plata, qaq ca na'attalecpi nache qaỹauota'a ca lcat bronce. ₁₈Nache que'eca qasoxoc ivi' ye cuarenta y cinco metros ca lalogaxa, qataq veintidós metros y medio ca lcachiguiñi 'enauaque caua laỹel. Qaq ca lshequitcheguema, ivi' dos metros y veinticinco centímetros, qaq ca lpaqtaxatpi qalaq chegaqaigui ca no'on lino, qaq ca na'attalecpi, chegaqaigui ca lcat bronce. ₁₉Qaq 'enauac ca no'onataxanaxatpi ca npe'l qataq aca qaitoqooñi da yaqto' nllañi aca lauoqtepi ca npe'l, qataq ca lpaqtaxat, 'enauac qome chegaqaigui ca lcat bronce.»

₂₀«Nataqa'en 'auamaxalec qome na Israel le'ecpi da ndouo ca aceite, yaqto' nache 'eetai' naqa'en da 'ettaigui aca ncoỹaraxanaxaquipi. ₂₁Qaq so Aarón qataq soua llalqa nache huapegueto da yaqto' nache 'eetai' da 'ettaigui ye na'a'q qataq ye pe aca ncoỹaraxanaxaquipi maye netaña ca pa'aueegue da laỹe ca netaña aca laỹe' caua aỹamaxataxaco. Qaq 'era qome, da nache 'eetai' lataxac da ipacchigui da ỹo'ot na Israel le'ecpi, qataq cam chegoxoguetpi qome».