So Aarón qataq soua llalqa qoỹanaguilo da ntaxaỹaxanaxanaqa
1«Qaq da 'auỹotaugalo da aỹem do'onataxaarot da itaxaỹaxanaxanqa. Nache 'auacona ca 'oonolec huaca llalec qataq caua dos qagueta maye qaica ca lque'emaxa, 2qataq ca ỹataqta no'on 'ayiiña nache 'auo'ot caua nauole 'ayiiña maye saishet da ỹaleeguet ca ỹasheeraxachigui na ndaqñiguishec, ndotec aca qairaqneguet ca aceite, qataq aca lỹa nauole sanquesaxan maye choche qaicorelec ca aceite, 3qaq da ime, nache 'auachangui aca npaqtole maye laỹe' aca nauole, yaqto' 'aroua'a ca npe'l maye huaña qome da nauaare' Ñim Nataxala', qataq ca huaca llalec qataq caua dos qagueta.
4Ime, nache 'auauegueua'alo ca lasom ca npe'l, ñi Aarón qataq ñeua llalqa nache 'auamaxaleguete da nache'l, 5ime, qaq 'auaconalo caua alogo ca ntaxaỹaxanaxanec, nache 'aỹa'anaxanaxanguilo ñi Aarón aca lapoto qataq ca ltogue lapoxot le'enaxat pectoral, qataq ca lomaxaqui huomaigui le'enaxat efod, qataq nsaachigui 'anqa'en ca lasot alaxa que'eca lomaxaqui nhuomaigui, 6nataqa'en 'anaxanaxangui ca lqaic alaxa, qataq npa'atcheguem ca latapshec maye la'anaxat da 'aỹotauga da ntaxaỹaxanaxanec. 7Ime, nache 'auacona ca aceite nache 'aucorelec na lqaic da yaqto' 'aỹotauga da ntaxaỹaxanaxanec. 8Qaq da ime, nache 'auỹaxanalo nataqa'en ñeua llalqa da yaqto' 'ano'otaxanaxa'n. 9Ime, nache nsaachiguilo 'anqa'en caua lasot alaxa, ñi Aarón qataq ñeua llalqa, nataqa'en 'anaxanaxanguilo caua lqaic alaxa. Qaq 'era da qonetec da yaqto' huo'o da 'eneque da 'aỹa'anaguilo da lo'onataxanaxa'c, qaq damaye nache 'eetai' qome da llecỹaxac ca ntaxaỹaxanaxanecpi.
10Qaq da ime, nache 'auauegueua'a ca lasom ca npe'l ca huaca llalec, yaqto' ñi Aarón qataq ñeua llalqa, ỹashel-leguete na lqaic que'eca shiguiỹac, 11nache ỹauaachigui 'anqa'en Ñim Nataxala' da 'aualauat que'eca huaca llalec, huaña ca ñegueuo ca npe'l. 12Ime, nache 'auacona aca laỹe' ca ltago'q ca huaca llalec, nache 'aua'ayingui ana 'aya'axaata, nache 'aua'ame'n naua lcoue aca nca'atoxonaxalate, qaq ca no'onañi que'eca ntago'q nache 'aucorot na pa'aguiñi acamaye. 13Qaq ca lcheta ca lailshecpi, qataq ca l-lamec qataq caua lchiguishel, nache 'auavigaxa't 'auachalec aca nca'atoxonaxalate, 14qalaxaye ca lapat, qataq lo'oc, qataq ca aloq nache 'auavigaxa't, 'arouga ca pa'auec ca nanataqa' maye qanayeuta'a, cha'aye camaye nachetaqtaxanaxat maye sa imauaq da qaỹavigaxat.
15Qataq 'auacona ca 'oonolec caua qagueta, yaqto' ñi Aarón qataq ñeua llalqa ỹashel-leguete qome na lqaic que'eca shiguiỹac. 16Qaq da ime, nache 'aualauat, nache ca ltago'q 'achegoqoto caua laỹel aca nca'atoxonaxalate, 17Ime, nache 'ampilliguiñi, qataq 'aỹo ca lailshecpi qataq 'alaỹoota't caua lapia'ate, nache ima'agueta 'anqa'en ca laỹepi, qataq ca lqaic. 18Qaq 'enauac camaye 'auavigaxat, 'auachalec aca nca'atoxonaxalate da nachetaqtaxanaxat maye qaỹavigaxatta, yaqto' da ama laitaỹaxac ỹamaateguet Ñim Nataxala'.
19Ime, qataq 'auacona ca lỹa qagueta yaqto' ñi Aarón qataq ñeua llalqa ỹashel-leguete na lqaic camaye. 20Qaq da ime, nache 'aualauat, qataq 'auacona ca laỹe ltago'q nache 'aua'amen ana aloiguishe ltela da'am ñi Aarón, qataq ñeua llalqa, qataq naua aloiguishe llaxaata late'erail, qataq naua aloiguishe lqona late'erail. 21Qaq ca no'onañi que'eca ntago'q, nache 'aucorot na pa'aguiñi aca nca'atoxonaxalate, qataq 'auacona ca laỹolec ca aceite, nache 'achegoxolec na lqaic ñi Aarón qataq caua alogo, qataq ñeua llalqa qataq caua alogo. Cha'aye seỹotaugalo da Aỹem do'onataxanoto.
22Ime, qataq 'anqateua'a ca lcheta so la'araxashet, lailshecpi, l-lamec, lchiguishel, qataq ca lcheta na aloiguishec ltele'eta, cha'aye que'eca qagueta nachetaqtaxanaxat da huo'o ca qoỹanagui da lo'onataxanaxac da ntaxaỹaxanaxanec. 23Qaq aca nauolepi maye saishet da lalegue ana ỹasheeraxachigui ca ndaqñiguishec maye huetangui aca npaqtole maye netaña ca lanataqa' Ñim Nataxala', nache 'auacona qome aca 'oonole connagui, qataq aca 'oonole maye lalegue ca aceite, qataq aca 'oonole aca nauole maye sanquesaxan. 24Nache 'enauac 'anem ñi Aarón qataq ñeua llalqa yaqto' ỹaayeshegue'm da ỹanot Ñim Nataxala'. 25Qaq da ime da ỹaayeshegue'm, nache 'auavigaxat, 'auachalec aca nca'atoxonaxalate, qataq lỹateuaq ca nachetaqtaxanaxat maye qaỹavigaxatta, yaqto' da ama laitaỹaxac ỹamaateguet Ñim Nataxala'.
26Qaq da ime, nache 'auacona ca ltogue lapat que'eca qagueta maye nachetaqtaxanaxat, da qoỹanagui da lo'onataxanaxac ñi Aarón, nache 'aỹa'aasheguem da 'aỹa'anot Ñim Nataxala'. Qaq que'eca ltogue lapat maye 'aỹa'aasheguem, camaye nache 'aralamaxat. 27Qaq nache 'aỹotauga qome ca ltogue lapat maye 'aỹa'aasheguem da 'aỹa'anot Ñim Nataxala', qataq ca ltele'eta que'eca qagueta maye nachetaqtaxanaxat da qoỹanagui da lo'onataxanaxac ñi Aarón, qataq ñeua llalqa, cha'aye maiche lalamaxa't caamaye. 28Qaq damaye lalamaxat qome ñi Aarón qataq ñeua llalqa. Qaq 'era qome da chochaq tatec lataxac, qataq llec aca nachetaqtaxanaqte maye qaỹamaxalec na Israel le'ecpi. Qaq 'enauac aca'aca nachetaqtaxanaqte da nhuaachigui qome da ỹan na Israel le'ecpi, acamaye qoỹaasheguem da qoỹanot Ñim Nataxala'.
29Qaq que'ecaua alogo da ntaxaỹaxanaxanec ñi Aarón, nache talec qome ca chegoxoguetpi qom ivita da talec da lo'onataxanaxac da ntaxaỹaxanaxanec. 30Nache ca chegoxoguet ñi Aarón maye talec da lo'onataxanaxac da ntaxaỹaxanaxanec, da taua'a ca npe'l maye huaña da detaxaỹapegue' Ñim Nataxala' da ỹacoolec da lo'onataxanaxac, nache ỹaatrañi qome que'ecaua anogo, ivittrec caua siete na'axa'te.
31Qataq 'auacona ca qagueta llalec maye qoỹaneuo da huo'o ca qoỹanagui da lo'onataxanaxac, nache 'aneuaq camaye huaña 'anqa'en ca maiche no'onataqa'. 32Nache ñi Aarón qataq ca chegoxoguetpi, chec qome ca lapat que'eca qagueta llalec, qataq aca nauole maye huetangui aca laỹe' npaqtole da huaña ca lasom ca npe'l. 33Qaq che'c camaye, cha'aye qoỹaneuo da yaqto' qaỹapalaxat na lasouaxashetpi, cha'aye mashe qoỹanema da huo'o naq 'eneque souaxat da lo'onataxanaxa'c da ntaxaỹaxanaxanaqa. Ỹoqo'oye saishet da anac ca chegaqauec da chec que'eca lapat, cha'aye camaye ỹataqta sa qaishetapec. 34Qaq da huo'otaq iviraigui ca lỹa na'a'q da huo'o aca no'onañi aca nauole, qataq ca lapat que'eca nachetaqtaxanaxat da huo'o ca qoỹanagui da lo'onataxanaxac, nache camaye saishet da qanallec, nacherata da qaỹavigaxat, cha'aye saishet da qaishetapec.
35Qaq 'era da qonetec ñi Aarón qataq ñeua llalqa, qataq 'apactelec qome 'enauac na ỹamaxasoxonaxacpi. Qalaxaye huaiguilo 'anqa'en caua siete na'axa'te da 'aỹa'anaguilo de'era no'onataxanaxac, 36nache ca 'oonolec na'a'q 'aỹa'aneuo ca 'oonolec huaca llalec da nachetaqtaxanaxat, da yaqto' qaỹapalaxat ca nasouaxashet, qataq 'auqui'itaxatta qome aca nca'atoxonaxalate da 'auavigaxat ca nachetaqtaxanaxat maye sa imauaq da qaỹavigaxat, qataq da 'aỹa'aneuo aca nca'atoxonaxalate da yaqto' qui'itta acamaye, nache 'aucorelec ca aceite. 37Qataq ivittrec que'ecaua siete na'axa'te da 'auavigaxattac aca nachetaqtaxanaqte maye sa imauaq da qaỹavigaxat, nache aca'aca nca'atoxonaxalate ỹataqta sa qaishetapec, qaq da huo'otaq huo'o ca ipoteua'a, huo'otaq nhuoiguet acamaye, nache nataqa'en camaye sa qaishetapec.»
Ana nachetaqtaxanaqte ye na'a'q
38«Qaq 'enauaque naua na'axa'te da 'auachalec qome aca nca'atoxonaxalate da 'auavigaxattac aca nachetaqtaxanaqte. Ye 'oonolec na'a'q dos qagueta ca mashe ivi' ca 'oonolec vi'i ca 'aỹa'aareuo. 39Nache ca 'oonolec 'aỹa'aneuo ye nte'eta, qaq ca lỹa nache 'aỹa'aneuo ye avit. 40Qataq que'eca qagueta maye la'auaxanec da qoỹaneuo, nache lỹateuo ca dos kilos ca ỹataqta no'on 'ayiiña maye qairaqneguet ca aceite, qataq ca 'oonolec litro ca lataxa da yaqto' qaicorelec aca nca'atoxonaxalate.
41Qaq ca lỹa qagueta maye 'aỹa'aneuo ye avit, nache 'eeta'am 'anqa'en da lataxac ca hua'auñi nachetaqtaxanaxat, qataq ca lataxa maye 'aucorelec ca nachetaqtaxanaxat da ama laitaỹaxac ỹamaateguet Ñim Nataxala'. 42Qaq 'era qome da chochaq tatec lataxac da qoyecỹaxaqui qataq cam qami' chegoxogueta. Da llec aca'aca nachetaqtaxanaqtepi maye qaỹavigaxat da Aỹem qoỹanot, acamaye qandoua'a ca ñegueuo ca npe'l maye huaña qome da Aỹem 'anauane' da 'am setaxaỹapegue'. 43Qataq nache huaña da ñauane' na Israel le'ecpi, nache que'eca nanataqa' hueta'a da ỹo'oxoyec cha'aye soota'a. 44Nache ca npe'l qataq aca nca'atoxonaxalate ỹataqta qui'itta, nataqa'en ñi Aarón qataq na chegoxoguetpi, namayepi seỹotauga da nalemaqte' da Aỹem do'onataxanot. 45Qaq Aỹem, nache sootaigui qome na Israel le'ecpi, nache namayepi Aỹem Natamnaxala'. 46Huaña nache Aỹem ỹauatton da Nachaỹem Nataxala', qataq Aỹem Natamnaxala' maye ñeqateeguesop co'ollaxa ye Egipto da yaqto' sootaigui namayepi. Aỹem maye Nachaỹem Nataxala' maye Natamnaxala'.»
