Da lataxac so na'a'q mataxaqui
1Nache so Moisés laỹona't co'ollaxa so Israel le'ecpi nache, 'eeta': «Da lamaxasoxonaxac Ñim Nataxala', 'eeta': 2Seis na'axa'te da qauo'onataxañiitac qome, qalaxaye da ivita ye na'a'q siete, nache qanmachiiuec, cha'aye yi'iye na'a'q huetoigui da ỹataqta qaỹo'oxoren Ñim Nataxala'. Qaq da huo'otaq huo'o ca shiỹaxaua da do'onataxan yi'iye na'a'q maye mataxaqui nache camaye qaỹalauat. 3Qaq na'aictaxa cam pa'aigue ca qoñiitaña ana 'alhua, qalaxaye da ivita yi'iye na'a'q mataxaqui nache saishet qome da huo'otaq huo'o ca ỹalon ca l-le'.»
So qoỹaneuo da yaqto' qaỹa'ara't ca npe'l
4So Moisés 'enapega co'ollaxa 'enauac so Israel le'ecpi, 'eeta': «Da lamaxasoxonaxac Ñim Nataxala', 'eeta': 5Qami' qandoiuo qome aca qarachetaqtaxanaqche da yaqto' qaỹa'añiỹot Ñim Nataxala'. Qaq 'eca qome ca ishet da qaỹa'añiiuo da qarachetaqtaxanaxachi da qaỹa'añiỹot Ñim Nataxala', qataq ỹataqta lquiyaqteỹaxac qome da huo'o ca ỹaneuo ca lcat oro, plata, huo'otaq bronce, 6qataq ca ỹotta'a't hualoq laỹepi maye malaxaraic, tocalec, qataq togaxaraic da lo'oxoỹaxac, qataq ca ỹataqta no'on lino, qataq ca quetaq laue, 7qataq ca qagueta laue nqo'oilliguishec togaxaraic da lo'oxoỹaxac, qataq ca ỹataqta no'on lo'oc ca shiguiỹac, qataq ca 'epaq acacia, 8qataq ca aceite maye lca'atoxot aca ncoỹaraxanaxaquipi, qataq ca coraxat ama na laita da yaqto' lalegue ca ncoraxanaxat aceite, qataq ca nchenaxanaxat maye ama da laitaỹaxac, 9qataq ca coma' le'enaxat cornalina, qataq na laỹe coma'pi maye ỹataqta no'on da yaqto' qalapaxaleguete naua lapiiguishe ca nhuomaigui lomaxaqui le'enaxat efod, qataq ca ntogue lapoxot le'enaxat pectoral.»
So nogoxoshetpi maye lalamaxat ca npe'l
10«Qaq ca shiỹaxauapi maye ỹaỹaten da ỹo'ot na ỹotta'a't no'onatacpi, nachecapi qome ca anac da ỹo'ot nam damaxasoxoolecpi Ñim Nataxala', nache ỹo'ot ca: 11nanataqa' maye huaña da qanauane' Ñim Nataxala', nache ỹo'ot aca lauoqtepi, qataq ca lo'oxonaxala'pi acamaye qataq ca l-llecnaxanaxatpi, qataq ca lemaxaquipi ca lquetpi da yaqto' nllañi que'eca npe'l, 12qataq aca laỹe' caua aỹamaxataxaco qataq caua 'epaxaye maye lachoxola'ate, qataq ca lapoxot maye qalapaxalec, qataq ca napoxonaxat maye ỹapotaua'a acamaye, 13qataq ca nquia'axala', qataq caua 'epaxaye maye lachoxola'ate, qataq cam laỹepi logoxoshetpi, qataq aca nauole maye qoỹanot Ñim Nataxala', 14qataq aca ncoỹaraxanaxaqui, qataq ca laỹe logoxoshetpi, qataq ca aceite maye lca'atoxot acamaye, 15qataq aca lca'atoxolate ca nchenaxanaxat, qataq caua 'epaxaye maye lachoxola'ate, qataq ca aceite maye ncoraxanaxat, qataq ca nchenaxanaxat maye ama da laitaỹaxac, qataq ca lapoxonaxat ca ñegueuo que'eca npe'l, 16qataq aca nca'atoxonaxalate da qaỹavigaxat ca nachetaqtaxanaxat, qataq ca qaỹa'ara't lcat bronce, qataq caua 'epaxaye maye lachoxola'ate, qataq 'enauac ca laỹe logoxoshetpi, qataq ca nỹoxonaxaqui qataq ca lmala' camaye, 17qataq ca lapoxonaxat maye lpaqtaxat ca nqasoxoc que'eca npe'l, qataq aca lashepi, qataq ca lo'oxonaxala'pi acamayepi, qataq ca lapoxonaxat ca ñegueuo ca nqasoxoc que'eca npe'l, 18qataq aca qaitoqnañi lashepi ca npe'l, qataq aca qaitoqnañi lashepi ca lapoxonaxat ca nqasoxoc, qataq ca lquetpi maye nllañi, 19qataq caua anogo da qaỹacoolec da qanayeuapegue' nam no'onatacpi que'eca npe'l, qataq caua alogo ñi ntaxaỹaxanaxanec Aarón, qataq caua alogo ñeua llalqa.»
So nhuo' le'ecpi ndouo so lachetaqtaxanaxat
20Nache 'enauac se'eso nhuo' Israel le'ecpi ca'ai co'ollaxa so Moisés, 21qaq co'ollaq ime, nache 'enauac som nanomta da ỹataqta lquiyaqteỹaxac da huo'o ca ỹaneuo, nache ỹe'eguelaxauo da yaqto' ỹanot Ñim Nataxala' ca lachetaqtaxanaxat, da yaqto' qanauaxaỹaxaasheguen so npe'l, qataq cam laỹe qaỹo'otpi da qaỹo'ot camaye, qataq caua alogo so ntaxaỹaxanaxanec. 22Nache 'enauac co'ollaxa so ỹalleppi qataq so 'alpi, som nanomta da ỹataqta lquiyaqteỹaxac da ỹaneuo aso chiguishaqte, nshete, nhuaxashec, nqola, qataq 'enauac som laỹe nogoxoshetpi maye chegaqaigui na lcat oro. Nache ñi 'oonolec somayepi, 'enauac da ndouo so maiche chegoqchigui da lachetaqtaxanaxat da ỹanot Ñim Nataxala'. 23Qaq som huo'o na lalamaxat hualoq laỹe malaxaraic, tocalec, qataq na togaxaraic da lo'oxoỹaxac, qataq na ỹataqta no'on lino qataq na quetaq laue, qataq na qagueta laue nqo'oilliguishec togaxaraic da lo'oxoỹaxac, qataq na ỹataqta no'on shiguiỹac lo'oc nache ndouo. 24Qataq so huo'o na lachetaqtaxanaxat lcat plata, qataq lcat bronce, nache iroua'a so lanataqa' Ñim Nataxala', qataq so huo'o na lalamaxat 'epaq acacia nache nataqa'en irouo. 25Qaq so 'alpi maye ỹaỹaten da lo'oxonaxanaxac, nataqa'en irouo so lo'oxonec malaxaraic, tocalec, qataq so togaxaraic da lo'oxoỹaxac, qataq so ỹataqta no'on lino, 26qaq so 'alpi maye ỹaỹaten da ỹo'oxon na quetaq laue, qataq maiche lquiyaqteỹaxac da ỹo'ot, nache ỹo'ot somaye. 27Qaq so nataxala'pi, qalaq ndouo so coma' cornalina, qataq so laỹe coma'pi maye ỹataqta no'on, da yaqto' lallagui'ishe so nhuomaigui lomaxaqui maye le'enaxat efod, qataq da qalapaxalec so ntogue lapoxot le'enaxat pectoral, 28nataqa'en irouo so coraxat maye ama da laitaỹaxac, qataq so aceite da yaqto' ncoỹaraxanaxat, qataq so aceite maye ncoraxanaxat, qataq so nchenaxanaxat maye ama da laitaỹaxac. 29Nache 'enauac so Israel le'ecpi, ỹalleppi, qataq so 'alpi, maye maiche lquiyaqteỹaxac da ỹaneuo aso lachetaqtaxanaqte, ỹanem co'ollaxa so Moisés da yaqto' qaỹo'ot 'enauac som damaxasoxoolecpi co'ollaxa Ñim Nataxala'.
Soua ỹa'ara't so npe'l
30So Moisés 'enapega so Israel le'ecpi 'eeta':
«Ña qauloỹa nagui, da na nhuo' le'ecpi maye chegoxoguet so Judá, Ñim Nataxala' lca'aua'a ñi Besalel maye llalec so Uri qataq laual so Hur, 31qataq ỹanaigui ñimaye so lta'araic la'añaxac da yaqto' ỹo'ot da laỹaanec, lauattonaxanaxac, qataq da sa nqalaate' da ỹo'ot, 32na ỹotta'a't no'onatacpi maye chegaqaigui na lcat oro, lcat plata qataq na lcat bronce, 33qataq da ichec, qataq da lapaxañi ca ỹataqta no'on coma'pi, qataq da ỹo'ot ca no'onatacpi 'epaqpi, qataq ca ỹotta'a't laỹe no'onatacpi. 34Nataqa'en ỹanem da ỹataqta ỹaỹaten da lapaxaguenataxanaxac. Nache 'eeta'am ñi Aholiab, ñim llalec so Ajisamac, maye chegoxoguet so nhuo' le'ecpi, maye chegoxoguet so Dan, 35nache ỹanema da ỹataqta ỹaỹate'n da ỹo'ot ca camachaqca na no'onatacpi maye qaichec, qataq da ỹo'o't ca llo'oxoraxat ca hualoq laỹepi maye imalaqalec, tocalec, qataq ca togaxaraic da lo'oxoỹaxac, qataq ca ỹataqta no'on lino, qataq da ỹo'o't ca camachaqca nam no'oxonecpi.
