2Qaq so Moisés, iỹaxana co'ollaxa so Besalel qataq so Aholiab, qataq 'enauac so laỹepi shiỹaxauapi maye Ñim Nataxala' ỹamem da ỹaỹaten da ỹo'ot na ỹotta'a't no'onatacpi, qataq 'enauac so maiche chegoqchigui da detaunaxan da ỹo'ot so no'onatacpi. 3Nache so Moisés, ỹami' co'ollaxa somayepi aso nachetaqtaxanaqtepi maye ỹaneuo so Israel le'ecpi, da yaqto' ỹo'ot 'enauac so iuen da qanauaxaỹaxaasheguem so npe'l, maye huaña da qanauane' Ñim Nataxala'. Qaq so Israel le'ecpi nache queto'ot da ndotegueuo na lachetaqtaxanaxatpi ye na'a'q. 4Nache 'enauac so sanqalaate' da huo'o na ỹo'ot maye ỹo'ottac so npe'l, ỹaxaañi da lo'onataxanaxac, 5nache nqo'oneua'a so Moisés da da'aqtaxanem, 'eeta': «Na shiỹaxauapi mashe ỹapacauec na ndotapegueuo maye iuen da qaỹo'ot na no'onatacpi maye damaxasoxoolec Ñim Nataxala'». 6Nache so Moisés damaxasoxoolec da qaỹa'aqtaxanem so ỹalleppi qataq so 'alpi, maye netaña so nanataqa' maye qanayeutaña, da yaqto' saishet da queto'ot da ndotapegueuo na lachetaqtaxanaxatpi. Qaq 'era da 'eetec co'ollaq so Israel le'ecpi da saishet da queto'ot da ndouo na lachetaqtaxanaxat. 7Cha'aye 'enauac so ỹaneuopi somayepi, mashe nalotalec da qaỹo'ot so no'onataxanaxatpi, qataq mashe ỹapacauec.
8Nache so 'onataxanaxaicpi maye ỹataqta ỹaỹaten da lo'onataxanaxac, ỹa'ara't so npe'l, ỹauota'alo diez soua napoxonaqa'ate maye chegaqaigui na ỹataqta no'on lino, imalaqalec, tocalec qataq togaxaraic da lo'oxoỹaxac, qataq qantette' soua llo'oxoraqa'ate ne'enaqtaqa shiỹaxau' maye huo'oi naua laua't. 9Qaq ye lalogaxa ñi 'oonolec so napoxonaxatpi ivi' doce metros y medio ye lalogaxa, qataq dos metros ye lcateueegue. Nache 'enauac somayepi 'eeta'a't ye lalogaxa qataq ye lcateueegue. 10Qaq soua cinco se'esoua napoxonaqa'ate, nache qantera't, qataq soua lỹa't cinco nataqa'en qantera't. 11Ime, nache qaỹo'ot aso la'aitepi soua laỹel, qataq so lquetpi imalaqalec da lo'oxoỹaxac se'eso la'auaxanec cinco napoxonaxat, nataqa'en soua laỹel soua pa'atrec napoxonaqa'ate. 12Nache qaỹo'ot aso cincuenta la'aitepi ñi 'oonolec se'eso napoxonaxatpi, añi 'oonole asomayepi naloteguet qanqa'en aso la'aitepi so lỹa napoxonaxat. 13Nataqa'en qaỹo'ot so cincuenta lemaxatpi maye chegaqaigui na lcat oro, da yaqto' qoỹemaxa't se'eso la'auaxanecpi napoxonaxat, nache se'eso npe'l na'atta't se'eso lapoxonaxatpi. 14Qaq so Besalel nataqa'en ỹo'oxon so once napoxonaxatpi chegaqaigui na quetaq laue, da yaqto' lapo' na pa'asheguem so npe'l. 15Qaq se'eso napoxonaxatpi nache 'eeta'a't, ye lalogaxa ivi' trece metros y medio, qataq dos metros ye lcateueegue. 16Nache qaỹa'auaxaañi da qantera't soua cinco, qataq soua lỹa't seis napoxonaqa'ate. 17Ime, nache qaỹauota'a cincuenta aso la'aitepi soua laỹel so 'oonolec ima'a't se'eso napoxonaxatpi, qataq qaỹo'ot aso cincuenta la'aitepi so loga't so lỹa napoxonaxat. 18Qataq qaỹo'ot so cincuenta lemaxatpi chegaqaigui na lcat bronce, da yaqto' qoỹemaxa't se'eso npe'l. 19Nache so Besalel ỹo'ot nataqa'en so nqo'oilliguishec qagueta lo'oc togaxaraic naqa'en da lo'oxoỹaxac, da yaqto' lapoxot na pa'asheguem, nataqa'en ỹo'ot so ỹataqta no'on lo'oc na shiguiỹaxac da lapoxot so npe'l. 20Nataqa'en ỹauo'oi soua nchiigui'ishe 'epaxaye acacia, nache ỹa'alyiñi da yaqto' lauoqtel naqa'en se'eso npe'l. 21Qaq ñi 'oonolec se'esoua 'epaxaye ivi' cuatro metros y medio ye lalogaxa, qataq sesenta y cinco centímetros ye lcateueegue, 22nache se'esoua 'epaxaye dos qanqa'en soua nchegaqa, da yaqto' llegueuo da qaỹa'areguet so lỹa 'epaq, qataq nache 'eeta'a't qanqa'en da no'onataxa'c soomaye. 23Qataq ỹo'o't soua veinte 'epaxaye da yaqto' pa'aira'ague qanqa'en da taguiñi se'eso npe'l, 24qataq cuarenta aso na'attalecpi chegaqaigui na lcat plata. Nache aso 'oonole lauoqte da qaỹa'ayiñi nache dos qanqa'en soua na'attaleguete. 25Qaq nache 'eeta'am nataqa'en so lỹa laỹe, maye pa'aigue da sheu' so npe'l, veinte nataqa'en soua nchegaqa 'epaxaye, 26qataq cuarenta aso na'attalecpi chegaqaigui na lcat plata. Nache da qaỹa'ayiñi aso 'oonole lauoqte, nache dos qanqa'en soua na'attaleguete. 27Qaq so pa'aigue da avit nache seis qanqa'en soua nchegaqa 'epaxaye, 28qataq dos soua nchiigui'ishe 'epaxaye nerañalo soua lallemaqreuo se'eso npe'l, 29Nache se'esoua lallemaqreuo so npe'l dostac qanqa'en so nchiiguishec 'epaq, qataq qaỹauaxaỹaxana't da qaỹa'ayiñi na pa'aguiñi qataq na pa'asheguem. 30Qaq ocho se'eso nchiiguishecpi 'epaqpi, qataq dieciséis so na'attalecpi lcat plata, qaq na pa'aguiñi nache dos naua na'attaleguete ñi 'oonolec 'epaq. 31Qaq so Besalel nataqa'en ỹo'o't soua cinco nchiigui'ishe 'epaxaye, da yaqto' hua'axagui naqa'en na pa'aỹa'ague so 'oonolec laỹe so npe'l. 32Qataq soua lỹa't cinco so nchiiguishec 'epaqpi, pa'aỹa'ague da lỹa laỹe so npe'l, qataq soua lỹa't cinco pa'aira'ague da avit. 33Qaq so nchiiguishec 'epaqpi maye laiñiguishec, nache ivira'ata naqa'en so lỹa loga't so laỹepi nchiiguishecpi 'epaqpi. 34Ime, nache qaỹo'ooxolec so lcat oro 'enauac se'eso nchiiguishecpi 'epaqpi, qataq qaỹo'ot aso la'aitepi yaqto' ishet da tachiviigui qanqa'en so laiñiguishec 'epaqpi maye nataqa'en qaỹo'oxoolec so lcat oro. 35Nataqa'en qaỹo'ot so lapoxonaxat no'oxonec malaxaraic, tocalec, qataq so togaxaraic da lo'oxoỹaxac, qataq so ỹataqta no'on lino, qataq qanteteua'alo soua dos shiỹaxau' maye huo'oi soua laua't da yaqto' llo'oxoraxat. 36Ime, nache qoỹemaxaua'a so lemaxaquipi lcat oro maye netagui aso cuatro lashepi maye chegaqaigui ana qo'oipaq acacia, maye qaỹo'oxoolec so lcat oro, qataq na'attaleguete soua cuatro lcat plata. 37Qataq so ñegueuo so npe'l, qaỹo'ot so lapoxonaxat no'oxonec malaxaraic, tocalec, qataq na togaxaraic da lo'oxoỹaxac, qataq so ỹataqta no'on lino, qataq qantetta so leraxat. 38Nataqa'en qaỹo'o't soua cinco lashel maye huo'oi soua lemaxaqui' qataq cinco aso na'attalec lcat bronce, qaq na pa'aỹasheguem qataq aso la'aitepi nache qaỹo'oxoolec so lcat oro.
