Ye Jerusalén ca'ai Ñim Nataxala'
1Ñim Nataxala' aỹem 'enapega, 'eeta': 2«'Am shiỹaxaua, 'auachaxana qome ye Jerusalén nam ỹataqta qaiqaiga maye ỹo'ottacpi. 3Nache, qoneta': 'Era da la'aqtac Ñim Nataxala': 'Am Jerusalén 'auachegoxoguet co'ollaxa na Canaán le'ecpi, cha'aye 'arañoqo' yemaye, qaq so 'arta'a somaye amorreo le'ec, qaq aso 'arate'e qalaq hitita lashe. 4Qaq som na'a'q maye huaigui da 'auañiguiñi, nache saishet co'ollaxa da qaicheguec so 'arcom, qataq saishet da 'am qanachelaxan, qataq saishet da 'am qaỹa'amen na toue, qataq saishet da qaỹauo'o ca 'ara'am laxataxat. 5Qataq qaica ca 'am ichoxoreetac, qataq qaica ca 'am huapegue' da 'am itauan. Som na'a'q co'ollaq 'auañiguiñi, nache 'am qaỹasaxauga so no'onaxa, cha'aye 'am qaiqaiga. 6Qaq Aỹem 'am ñelectot, nache co'ollaq 'am sela'a da 'ancocatapigui na 'artago'q, nache iuennataxac da 'am, iuen da 'anca'alec. 7Nache Aỹem, so'ot co'ollaxa da 'anañaxat qoneta'am aca qo'oipaq maye netalec na no'onaxa. Qaq huaña nache 'anquictasheguem, nache 'avira'a da 'am late'erai, qataq 'avira'a da ỹoqta 'am 'alo. Qataq yo'o'q naua 'artete, qataq ñaxat ana 'araso, qalaxaye ñaq 'eetalec da qouetauec. 8Qaq ime, nache qaltaq 'am ñelectot, nache sela'a da mashe ishet da 'auauonaxan. Qaq huaña nache 'am sepegueelec so ipo', nache sapolec da 'aro'ocỹaxac nache 'am ñauone', qataq 'am ñaỹamaxate', qaq huaña nache ỹataqta 'am ỹalamaqte. Qaq 'era da ỹa'aqtac Aỹem Nataxala'. 9Qaq ime, nache 'am ñachelaxan qataq seỹouec so 'artago'q, qataq 'am secorelec so ỹataqta no'on coraxat. 10Qataq 'am sanaxanaxangui aso 'arpoto maye ỹotta'a't da lo'oxoỹaxac, qataq soua 'onaxaiqa 'arapela'ate maye chegaqaigui na huesottac lo'oc, qataq aso 'arpoto maye chegaqaigui na no'on lino qataq na qashelgaxaraic. 11Qataq sauo'o co'ollaxa aso 'ano'otaqtepi, qataq sanaguilo naua 'arhuaxaye so 'arhuaxashecpi, qataq sauo'o aso 'arqolapi, 12qataq sauo'o aso chiguishaqte sanagui na 'armic, qataq sauo'oi soua 'arshetel, qataq sanagui na 'arqaic aso ỹataqta no'on aro'o. 13Nache 'ayo'oxoraxat co'ollaxa na oro qataq na plata, aso 'arpoto qalaq ỹotta'a't da lo'oxoỹaxac chegaqaigui na lino, qataq na qashelgaxarai, qataq 'am sequia'axaateguec ana no'on nauole 'ayiiña, qataq na dapic lli'i, qataq na no'on aceite maye chegaqaigui ana olivo. Nache 'avira'a da ỹataqta 'am 'onaxai, qataq 'avira'a da 'am nate'e. 14Qataq da no'on na'aqtaguec da 'aryac, ivira'a 'enauac nam ỹotta'a't shiỹaxauapi. 'Am ỹataqta 'am 'onaxai nalochiguiñi da 'arataxac, cha'aye Aỹem 'am seyaquen co'ollaxa. Qaq 'era da ỹa'aqtac Aỹem Nataxala'.
15Qalaxaye 'am 'año'oxoyengui co'ollaxa da na'aqtaguec da 'aryac, nache 'auqopitaxan damaye da 'auacona da 'arquisheguetaxac, nache 'aỹa'anem da 'aro'ocỹaxac 'enauac nam 'anqopita. 16Qataq 'auo'onataxana aso 'arpoto da 'auo'ot na 'arpe'lpi 'aỹa'analec ana lcomaraxalatepi da 'avio'oxoren na ỹaqa'a atamnaqa'pi, qataq nache huaña da 'anquishestague' namayepi. Qaq saỹauano' da qaỹauaachigui co'ollaxa ca 'ena'am de'era. 17Qataq 'auo'onataxana ana 'ano'otaqtepi maye chegaqaigui na oro qataq na plata maye chochaq 'am saatem co'ollaxa, nache 'auo'ot na 'are'enaqtac lqui'ipi nam ỹalleppi, ime nache 'avio'oxoreetac, 18qataq aso 'arpoto maye ỹotta'a't da lo'oxoỹaxac qalaq 'aỹa'anagui nam 'are'enaqtacpi, qataq 'aỹa'anot na aceite qataq na nchenaxanaxat, maye Aỹem 'aỹa'anot taxa. 19Qataq 'aỹa'anot namayepi da 'arachetaqtaxanaqte aso nauole maye 'am sanem co'ollaxa, asom chegaqaigui na ỹataqta no'on trigo, qataq so aceite qataq so dapic lli'i, maye 'am sequia'axaateguec co'ollaxa. Qaq 'era da ỹa'aqtac Aỹem Nataxala'. 20Qataq nataqa'en 'auaconeua'a so ỹalaqpi ỹalleppi, qataq aso ỹalepi 'alpi co'ollaq 'am seco'on, nache 'aỹa'anot se'eso nqolacpi da 'eco' aloq 'anqa'en somayepi. ¿Qaq peta'a qapio'olec 'anqa'en dam naigui dam 'anquisheshaxac, 21qataq da 'auauo'o 'arachetaqtaxanaxat so ỹalaqpi da 'aỹa'anot na ỹaqa'a nqolacpi da yaqto' chepchiguiñi naqa'en so norec? 22Qaq 'enauac nam ỹataqta qaiqaiga 'auo'ottacpi, qataq da 'arquisheguetaxac, nachena na ỹo'ot da 'aucoua'ai da 'eetec co'ollaq ñaq 'am nogotole, qataq co'ollaq imauec da qouetauec, qataq 'ancocatapigui na 'artago'q. 23Qaq 'era da ỹa'aqtac Aỹem Nataxala': ¡Choxoraale 'am! Cha'aye souaxat nam qauem maye 'auo'ot co'ollaxa, 24qaq nagui nache qaltaq 'auo'ot na 'anatamnaqa'pi maye 'aỹa'anaña na ndaqa'pi da yaqto' huaña da 'anatamnot na nqolacpi, qataq 'anañaneguet da 'anquishestague' namayepi. 25Nache 'enauaque naua loga'te naua nqa'aico da 'aỹa'anaña na 'anatamnaqa'pi, qataq nache huaña da nmeneguet 'anqa'en da 'aryac dam qaiqaiga 'arataxac, souaxat da 'aỹa'anem da 'aro'ocỹaxac 'enauac na 'am nlectot, nache sa vi'iiguet da 'arquisheguetaxac. 26Qataq 'anquishestague' nam 'arhuoreuapi, nam Egipto le'ecpi maye 'añaxaicpi da hue'eguet aca 'alo, nache Aỹem 'aunogoqchet souaxat dam sa vi'iiguet 'arquesheguetaxac. 27Qaq ỹoqo'oye ñauaxaỹaxaasheguem na ihuaq da sauo'o so 'anhuaxanaguec, nache so'ot da nquiga't nam 'aralamaxatpi, qataq 'am saneguet na filistea le'ecpi, maye 'am lquiỹaqte, qataq saỹaỹamaxaren dam qauem 'arataxac maye ỹo'ot da na'agaxa. 28Qalaxaye saishet da 'auamagueñi souaxat de'era 'am so'otec, ỹoqo'oye 'anquishestague' na asiiriopi, qalaxaye ñaq 'eetalec saishet da 'auamachiguiñi. 29Qaq nache qonetec nataqa'en da 'anquishestague' na nmenaxaicpi ye Babilonia, qalaxaye ñaq 'eetalec da saishet da 'auamachiguiñi. 30Aỹem Nataxala' da ỹa'aqtac, 'eeta': ¡Ỹataqta qauem co'ollaxa dam 'arquiyaqteỹaxac, ye ỹo'oto' 'enauac nam lataxacpi maye ỹo'ottac aca quisheguetaxai maye qaica ca la'agaxa! 31Qataq 'enauaque naua loga'te naua nqa'aico qataq na ndaqa'pi da 'ano'oxoosheguem ana nca'atoxonaxalatepi da yaqto' 'avio'oxoren na nqolacpi, qataq da 'anañaneguet da 'anquishestague' namayepi. Qalaxaye 'am, saishet da qoneta'am da lataxac aca quisheguetaxai, cha'aye 'am saishet da 'ansheetela't. 32'Am 'alo maye saishet da 'aualemaq, 'anmitta'ai na ỹaqa'a ỹalleppi, qaq saishet da 'aualemaqteguet cam 'arhua. 33'Enauac ana quisheguetaxaipi qaisheeten, 'am qalaxaye 'auauo'o na nme, qataq 'ausheeten nam 'ancachaxauapi, da yaqto' chegoqteugalo da 'am naỹa da 'am lauañi'. 34Qaq dam 'arquisheguetaxac saishet da nateneguet dam 'eetec naxa ana laỹepi 'alpi, qaica ca 'am nmittaique da 'am lauañi', qataq da 'am isheeten, nacherata da maiche 'am 'ausheeten namayepi. Qaq 'era da huaỹoqtec 'arataxac. 35Qaq ỹoqo'oye 'ana'axaỹaxaachigui da ỹa'aqtac, 'am quisheguetaxai: 36Aỹem Nataxala', 'am shenapega: 'Am qaica co'ollaxa ca 'ara'agaxa da 'auachaxan da 'aro'ocỹaxac da 'anquishestague' nam 'ancachaxauapi, qataq da 'anañaneguet na nqaigaxat nqolacpi, qataq da 'aucoldec naua ltago'q so 'aỹa'alaqpi maye 'aỹa'an co'ollaxa da 'arachetaqtaxanaxat qaỹavigaxatta. 37Qaq ỹoqo'oye Aỹem, llaỹona't qome 'enauac nam 'ancachaxauapi, nam ỹo'ot co'ollaxa da 'aramaicỹaxac, qataq 'enauac nam 'arauotaxatpi co'ollaxa, qataq nam 'arquiỹaxatpi, llaỹona't qome namayepi da 'am laponeua'a, yaqto' ỹauaachigui 'enauac da 'aro'ocỹaxac da huetauec. 38Aỹem 'am ñemit qome souaxat da 'arquisheguetaxac, qataq da 'aralaataxanaxac, qaq souaxat da inogoxonaxac qataq da ica'alaxanaxac nache 'am saneguet da nleuaxa. 39Qataq 'am saneguet da lhuaqỹaxac namayepi, da yaqto' nlaxaañi nam huaña naxa da 'anquishestague' namayepi, qataq nam huaña naxa da 'avio'oxoreetac na nqolacpi. Nache namayepi naỹoqnec qome ana 'arpoto, qataq ana 'onaxai 'ano'otaqtepi, nache ỹataqta imauec da qouetauec naqa'en. 40Qataq nachaañi naqa'en na nhuo' le'ecpi da 'am dataỹa'aguet, nache ỹauota'a na coma' da 'am ỹasaq, qataq 'am irolec na lainec da 'am ỹalauat. 41Nache ỹavigaxat na 'arma'pi, qataq ỹacoolec da ỹo'ot ca 'anhuaxanaguec, ỹauaachigui naqa'en aca qalota 'alpi, nache vi'iiguet ñaqa'en da 'arquisheguetaxac, nache sa 'avi'eguelaxa da 'ausheetetac nam 'ancachaxauapi. 42Qaq huaña nache samachiguiñi da 'am talec da ỹayeloxo, qataq vi'iiguet qome da ica'alaxanaxac, qaq huaña nache she'emaqtac, qataq saishet da senotac. 43'Am, 'aucoua'ai da 'eetec co'ollaq ñaq 'am qa'añole, nache ỹataqta Aỹem 'aunogoqchet souaxat nam qauem maye 'auo'otpi qataq qaiqaiga, qaq ỹoqo'oye Aỹem sauo'o qome ca 'anhuaxanaguec souaxat de'era qauem 'arataxac. Qaq 'era da ỹa'aqtac Aỹem Nataxala'.
Dam lataxac aca nate'e nache lataxac aca ñale
44Qaq 'enauac nam ỹauoteque naua neta'a't na'aqtaqa, qom 'am detaxaỹa qalaq 'eeta': Dam lataxac aca nate'e, nache lataxac aca ñale. 45'Am nache 'am llale aso nate'e maye lquiỹaxat so lhua, qataq so llalaqpi, qaq nataqa'en soua 'arqaỹa't 'alo lquiỹaqa'ate soua lhua't, qataq so llalaqpi. 'Enauac da qoñeeta qarachi'i aso hitita lashe, qaq so qarta'ai qalaq amorreo. 46Da sheu' qalaq neta'ague añi 'arqaỹa ỹe, maye nacheye yem huaqta'a't nỹecpi ye Samaria, qataq 'enauac nam salamai' nỹecpiolec maye coleesop yemaye, qaq da taguiñi qalaq neta'ague añi 'arqaỹa na'asa, maye nacheye yem huaqta'a't nỹecpi ye Sodoma, qataq 'enauac nam salamai' nỹecpiolec maye coleesop yemaye. 47Qaq 'am, nache qoquegue co'ollaxa dam lataxac yeemaye, qataq 'auo'ot nam qauem maye ỹo'ottacpi qataq qaiqaiga. Qaq saishet da 'auamachiguiñi naqa'en de'era, da 'arataxac qalaq ỹataqta napacalec da lataxac yeemaye. 48Aỹem Nataxala', ñañan da san da ỹa'aqtac, da aso 'arqaỹa Sodoma, qataq 'enauac nam coleesop salamai' nỹecpiolec, saishet co'ollaxa da ỹo'ot, nam 'auo'ottacpi, qataq nam ỹo'ottacpi nam salamai' nỹecpiolec maye 'am coleesop. 49Qaq 'ena nam lasouaxashetpi co'ollaxa aso 'arqaỹa Sodoma, asomaye qataq nam salamai' nỹecpiolec maye coleesop, huo'o co'ollaxa da ño'oxonnaxac souaxat da saqoue na aloq, qataq souaxat da huetaigui da qaica ca iuen, qalaxaye saỹauano' da itauan ca choxoraq qataq ca deuenaxaatac. 50Nache ỹe'eguelaxa da ño'oxonnaxail, qataq ỹo'ot nam lataxacpi maye seqaiga, qaq ỹoqo'oye 'auauaachiguilo da 'eetec co'ollaq selaxachiguilo. 51Qalaxaye ye Samaria saishet co'ollaxa da ivi' na 'arasouaxashetpi, cha'aye 'am 'auo'ot co'ollaxa nam ỹactec da qaiqaiga, qaq sa qona'am yemaye. 'Am ỹataqta ỹaguec na 'arasouaxashet, qaq ye Samaria da huetaua'a na 'araỹe nache 'eeta'am da qaica ca lasouaxashet. 52Qaq 'am qalaq iuen da 'anque'etaxangui qome da 'ane'enaguec, cha'aye souaxat da 'auo'ot nam ỹataqta qaiqaiga, saishet da qona'ama soua 'arqaỹa't, qataq 'auo'ot da soomaye 'eeta'am da qaica ca lasouaxashe't. Qaq 'am qalaq 'anque'etaxangui qome da 'ara'agaxa, qataq da 'ane'enaguec, cha'aye 'auo'ot co'ollaxa da 'eco' qaica ca lasouaxashet soua 'arqaỹa't.
53Aỹem, so'ot qome da qaica ca iueetaique ye Sodoma qataq ye Samaria, qataq nam salamai' nỹecpiolec maye coleesopa yeemaye, qaq 'am nataqa'en 'am sanem qome da qaica ca 'aueetaique, 54qalaxaye iuen da 'anque'etaxangui da 'ane'enaguec, qataq da 'ara'agaxa souaxat nam 'auo'otpi, qaq nache 'am, da 'am chegoqchigui qome da huo'o da lamaicỹaxac yeemaye. 55Qaq ye Sodoma qataq ye Samaria, qataq nam salamai' nỹecpiolec maye coleesopa yeemaye, qom ỹe'eguelaxa som hua'auchiguiñi lataxac, qaq nataqa'en 'am qataq nam salamai' nỹecpiolec maye 'am coleesop, da 'eetec qome de'era lataxac. 56'Am 'avi'iitac co'ollaq huo'o da nhuaxanaguec aso 'arqaỹa Sodoma, co'ollaq 'am hueto'ot da 'año'oxonnaxac, 57qataq co'ollaq saxanaxa da qaỹachaxan dam qauem maye 'auo'ottac, qalaxaye nagui na huaqta'a't nỹecpi yem Edom qataq ye Filistea, qataq 'enauac nam 'arhuoreuapi da 'am isheueetac, ¡qaq 'enauac na shiỹaxauapi da 'am deqaiga! 58Qaq nagui qalaq iuen da 'anque'etaxangui da 'anhuaxanaguec souaxat nam qauem, qataq qaiqaiga maye 'auo'otpi. Qaq 'era da ỹa'aqtac Aỹem Nataxala'.»
59Aỹem Nataxala', da ỹa'aqtac, 'eeta': «'Am sanem qome nam naigui na 'auo'otpi, cha'aye sa 'aupaguelec som 'aỹa'an co'ollaxa 'ara'aqtac, qataq sa 'aupaguelec so 'anaỹamaxataxac co'ollaq Aỹem 'anaỹamaxate'. 60Qalaxaye Aỹem ñetoueeta'ac som ñaỹamaxataxac maye 'am so'otec co'ollaq ñaq 'am qa'añole, qataq so'ot qome ca ñaỹamaxataxac maye chochaq tatec da 'am ñaỹamaxate'. 61Qaq qom 'am sanem da 'eeta'am aca 'aỹa'ale aso 'arqaỹa ỹe, qataq aso 'arqaỹa na'asa, qaq na'aictaxa da som qanaỹamaxataxac saishet da Aỹem ỹamaqtalec da so'oteque de'era soomaye, qaq huaña qome nache tachigui 'arhuel som hua'au 'arataxac, nache huo'o da 'ara'agaxa. 62Qaq Aỹem ñaralaxat qome ca ñaỹamaxataxac da 'am ñaỹamaxate', qaq huaña qome nache 'auaỹaten da nachaỹem maye Aỹem Nataxala'. 63Qaq qom sapalaxat 'enauac nam 'auo'otpi, nache 'am 'auennate qome nam qauempi maye 'auo'otpi co'ollaxa, nache ỹataqta huo'o da 'ara'agaxa, qataq souaxat da qaica ca qonec, nache saishet qome da qaltaq 'avi'eguelaxa da 'autaqtac. Qaq 'era da ỹa'aqtac, Aỹem Nataxala'.»
