Qaỹaloqnaxana aso uva lcheyec qataq soua vi'ic
1Ñim Nataxala' aỹem 'enapega, nache 'eeta': 2«'Am shiỹaxaua 'aua'aqtaxanem qome na nhuo' Israel le'ecpi, 'auauota'a ca 'araloqnaxanaxat. 3Nache qoneta':
'Era da la'aqtac Ñim Nataxala':
Huo'o so vi'ic ỹataqta lta'araic nvita ye Líbano,
soua laua't qalaq ỹataqta late'el, qataq ỹataqta logorail,
qataq sansatchiguiñi na laue qataq ỹotta'a't da lo'oxoỹaxac,
qaq icheguec so lcom aso 'oonole cedro,
4qataq icheguec asom ỹataqta qaỹoqotcheguemec lcoue,
ime nache jec da ỹaalec so na'alhua so nmenaxaicpi,
som huaqta'a't nỹecpi maye qalota so nmenecpi.
5Qaq ime, nache ỹacona aso ala aso nañiguishe,
ỹachegoxotaña se'eso 'alhua, nache ỹaalec so 'alhua
maye mashe qanqalagoxotsheguem maye netaua'a na laỹe
so la'auaxac maye qalota na 'etaxat.
6Nache, aso ala aso nañiguishe ñaxat nache nañigui uva lcheyec,
nache ivira'a da ỹataqta qalochiguiñi ana lcouepi,
qaq na'aictaxa da saqaloc asomaye, qaq aso lcouepi qalaq taỹa so vi'ic,
qaq naua lpa'aye asomaye qalaq taigui na pa'aguiñi na 'alhua,
qaq asomaye nañigui uva lcheyec,
nache qalota ana llaxataxa qataq ana lcouepi.
7Qalaxaye huo'o so lỹa vi'ic lta'araic,
naua laua't qalaq ỹataqta late'el, qataq sansatchiguiñi na laue.
Nache aso uva lcheyec taỹa naqa'en soua lpa'aye
qataq aso lcouepi se'eso vi'ic da yaqto' somaye
ỹanem so qalota 'etaxat da yaqto' icottalec asomaye.
8Qaq na'aictaxa da asomaye nañaxattalec so no'on 'alhua,
qataq da saqaỹapeque so qalota 'etaxat,
maye ishet taxa da ỹo'ot da huo'o ana lcouepi,
qataq da huo'o ana ala, nache nañigui uva lcheyec maye ỹataqta 'onaxai.
9Qaq 'am qonapega qome, qoneta':
'Era da la'aqtac Ñim Nataxala', 'eeta':
Asa'aso uva lcheyec saishet qome da 'onaxaic da llecỹaxac.
So hua'auchiguiñi vi'ic napogoyeshegue'm qome naua lpa'aye asomaye,
qataq naañi naqa'en ana alapi, qalaxaye qaica qome ca na'añaxataxac,
qataq sa iuen ca qalota shiỹaxauapi da napogoyeshegue'm naua lpa'aye,
qaq huaña nache deqaqa ana dalaxai llaxataxapi.
10Qaq na'aictaxa da qaltaq qoỹaañi qalaxaye saishet da ñaxatec,
nacherata da deqaqa qom ỹasheerelec ca la'at
maye chegoxogue da nala' lliguisheguem,
qaq nache deqaqa da hueta'a yem huaña taxa da ñaxatec.»
11Ñim Nataxala' qaltaq Aỹem 'enapega, 'eeta': 12«Ñaq 'aunat ne'ena nhuo' le'ecpi maye saỹalaq, da huo'otaq ỹaỹaten ca naigui de'era maye qaỹaloqnaxana. Qoneta': So nta'a ye Babilonia naỹa ye Jerusalén, nache loxonec so nta'a ye Judá qataq so ltauapi, nache ỹauega ye Babilonia. 13Qaq ime, nache ỹaconeua'a so 'oonolec llalec so nta'a, nache naỹamaxate' somaye, nache 'enapega da ipacchigui so ỹan la'aqtac, qataq ỹauec so shiỹaxauapi 'amaqtaqaicpi yi'iye 'alhua 14qaq yaqto' da lo'onataxanaxac ye Judá, ỹe'eguelaxa da qaica ca la'añaxac, qataq saỹañoxot da qaltaq nachaañi, qaq na'aictaxa da lhuotta da ipaqueelec se'eso naỹamaxataxac, qataq da nache queto'ot da nachattañi naqa'en. 15Qalaxaye se'eso llalec so nta'a, saỹalaxaguet co'ollaxa so nta'a ye Babilonia, nache ỹauo'o so lamaxashecpi da ỹamaxa ye Egipto da yaqto' iỹaxanaique so qalota caipi qataq so qalota ỹalleppi. ¿Qaupi'itaxañiitega peta'a da qom ime de'era, nache huo'o ca la'amaqchic, qataq ishet da nca'alec? ¿Ishet peta'a da nca'altauec ca saishet da ipaguelec cam naỹamaxataxac co'ollaxa? 16Aỹem Nataxala', ñañan da san da ỹa'aqtac, da ileuaña qome ye Babilonia ñim ỹe'en co'ollaxa som ỹan la'aqtac, qataq saipaguelec som naỹamaxataxac maye ỹo'ot co'ollaq naỹamaxate' ñi nta'a maye ỹanem da nso'ongui añi so'onaxaqui. 17Qaq ñim nta'a ye Babilonia qom anac da iloquiaxan, qataq ỹauo'o na lliguisheguempi qataq na lpaqtaxanaxatpi da coleesop naqa'en na huaqta'a't nỹecpi, qataq ỹalauat ca qalota shiỹaxauapi, nache ñi faraón saishet qome da namaxa namayepi ca 'añaxaicpi alleppi, qataq ca qalota shiỹaxauapi, 18cha'aye ñim llalec ñi nta'a, ỹe'en co'ollaxa so ỹan la'aqtac, qataq sa ipaguelec som naỹamaxataxac co'ollaxa, ñimaye ỹataqta nañan co'ollaxa qaq nagui ñimaye ỹo'ot 'enauac de'era. Qaq ỹoqo'oye saishet qome da naneltaxan da yaqto' nca'alec. 19Qaq Aỹem Nataxala' ñañan da san da ỹa'aqtac: da ñimaye, ỹe'en so ỹan la'aqtac maye Aỹem ỹanem co'ollaxa, qataq saishet da ipaguelec so naỹamaxataxac co'ollaq ñaỹamaxate', qaq ỹoqo'oye Aỹem sechemaxata qome ñimaye. 20Qaq Aỹem sasaxalec qome ñimaye ca ỹaleguec, nache huetaigui ñaqa'en qome camaye da sauega ye Babilonia, qaq nache huaña qome yemaye da ñemit souaxat da Aỹem saỹalaxaguet. 21Qaq na ỹataqta no'on nalleppi ileuaigui qome ca alaataxac, qaq cam lca'alaxaicpi qome qalaq nlagaxattac. Qaq huaña nache qauaỹachiñi da Aỹem Nataxala' nachaỹem da setaqtac. 22Aỹem Nataxala', shenapec: Nataqa'en Aỹem secheguec qome aca ỹataqta pa'atcheguem lcoue aca cedro, qataq secheguec aca 'oonole llaxataxa maye ñaq huesottac aca ỹataqta pa'asheguem lcoue, nache saalec aca qaỹoqotcheguemec qasoxonaxa, 23aca qasoxonaxa maye ỹataqta qaỹoqotcheguemec ye Israel. Qaq huaña nache huo'o ana lcouepi qataq huo'o ana ala aca'aca cedro, nache ivira'a da ỹataqta huo'o da lyac. Nache na ỹotta'a't shiguiỹacpi hueto'ot qome na la'a' acamaye, qataq na ỹotta'a't qoỹopi ỹanaigui na lpata'cpi ana lcouepi acamaye. 24Qaq huaña qome nache 'enauac ana qo'oipaqpi maye netalec na no'onaxa, ỹaỹaten da nachaỹem Nataxala'. Qaq Aỹem sa'axasoxooñi aca qo'oipaq maye ño'oxonnaxai, qataq ishet da ñaxat ñaqa'en acatai' qapiole qo'oipaq. Qataq deqaqa ñaqa'en aca qo'oipaq maye nsalatec, qataq ishet da nsalatec ñaqa'en aca qo'oipaq deqaqta. Qaq 'era da ỹa'aqtac Aỹem Nataxala', qaq damaye sepacchigui qome.»
