Da naquicoxo souaxat so nta'alpi ye Israel
1'Am shiỹaxaua, 'auo'onaxaalec na nta'alpi na Israel, 'auo'on dam no'onec da huo'o ca ileu:
2«Aso 'arate'e, 'eeta'am aca lloona,
maye ỹalectaigui co'ollaxa so llonpi.
Asomaye ỹalectaigui co'ollaxa so llonpi da ỹo'ot so lauanaxanaqa',
qaq nache huaña somaye da ỹaqchet so llalaqpi.
3Qaq so 'oonolec somayepi qalaq ỹataqta ỹaqchet co'ollaxa,
nache ivitta'a naqa'en da ỹataqta lta'araic,
qataq ivitta'a da ỹaỹaten da icolaxattac na loxonec, qataq chec na shiỹaxauapi.
4Qaq nam ỹotta'a't shiỹaxauapi hua'aqtega da na'aqtaguec somaye,
nache qairolec aso nqoina da qanqovin, nache noxonec,
ime nache qoỹanagui so lquet lcat, nache qaỹauega ye 'alhua Egipto.
5Qaq aso late'e co'ollaq mashe qaica ca naquitaxac da ñe'eguelaq so llalec,
nache ỹaconeua'a so lỹa llalec, nache itauan somaye
da yaqto' ivira'a da lta'araic.
6Qaq somaye co'ollaq mashe ivita da ỹe,
nache jec naxa, qaltaq ñe'eguelaq da quetaigui so llonpi,
nache ivitta'a da ỹaỹaten da icolaxattac na loxonec, qataq chec na shiỹaxauapi.
7Qataq ilaxachigui na nma' lta'araicpi,
qataq qaica ca lyac naqa'en na huaqta'a't nỹecpi
maye ỹotta'a't naua nañalo,
qataq da desoqo nache iviloxol naqa'en 'enauac na shiỹaxauapi.
8Qaq huaña nache nachaañi so lauoreuapi
shiỹaxauapi da dataỹa'aguet somaye,
nache ỹasaxalec somaye so laleguec nache loxonec.
9Qaq ime nache ỹauo'o so lquet lcat qataq ỹanaigui aso laỹe',
nache ỹauega ye Babilonia da icoñi', da yaqto' qaica ca hua'aqtega
da desoqtac da lamaqtapeguelec añi qasoxonaxa ye Israel.
10Aso 'arate'e qalaq 'eeta'am co'ollaxa aca uva lcheyec
maye netaña ca loigue ca 'etaxat, nache nquittasheguem
qataq qalochiguiñi ana lcouepi souaxat da huecottalec so qalota 'etaxat.
11Nache ana lcouepi ỹataqta qaramta, nache ivira'a da lashelte na nta'alpi,
qaq asomaye ye ỹataqta nquittasheguem,
nache ivirasheguema na lo'oc na piguem,
qaq ỹataqteguet qanqa'en souaxat da lalogaxa
qataq souaxat ana qalochiguiñi lcouepi.
12Qalaxaye sa qaicherapec co'ollaq qanapogosheguem, nache huetaiya' qanqa'en.
Nache so la'at maye chegaqa'ague da nala' lliguisheguem deqaqa naqa'en,
nache naañi ana ala uvapi, qataq deqaqa aso qaramta lcouepi,
nache qaỹasaxangui so norec.
13Qaq nagui qalaq ñaxattalec qanqa'en ye toolec 'alhua,
yem 'alhua maye deqaqta qataq qaica ca 'etaxat.
14Qaq ana lcouepi qalaq chegaqaigui so norec,
maye ỹavigaxat ana llaxataxapi qataq ana alapi.
Nache qaca aca no'onañi aso qaramta lcouepi
da yaqto' ivira'a da lashelte na nta'alpi.»
(Qaq 'era da no'onec maye qaỹo'on da huo'o ca ileu.)
