Qaỹa'axata'a dam talec qome ye Tiro
1So hua'auchiguiñi na'a'q se'eso hua'auñi ca'agoxoic so vi'i once, nache Ñim Nataxala' aỹem 'enapega, 'eeta': 2Ye Tiro naxa detaxaỹa ye Jerusalén, 'eeta':
Yem llegueuo na ỹotta'a't shiỹaxauapi yemaye hua'axañi.
Naua naso'omi qalaq nauatoiguilo nache aỹem nquictasheguem da isallaxa,
qaq yemaye qalaq nquicta'a da nlaguiñi.
3Qaq ỹoqo'oye Aỹem Nataxala', shenapec:
'Am Tiro, aỹem 'am ñechoxota da 'am sataỹa'aguet,
so'ot qome da nachaañi ca qalota ỹotta'a't shiỹaxauapi da 'am dataỹa'aguet,
'eeta'am da 'eetec ana lapaxa aso auaxai da nachaañi,
4nache ilaxachigui na 'arpaqtaxanaxatpi
qataq hua'axañi naqa'en ana 'aralloxolatepi.
Qaq ivira'a ca lsoche na coma' da sequeloguec qome,
nache ivitta'a da 'eeta'am ñaqa'en aca salleeta coma'.
5Qataq qoueta'a qome na laiñi aso auaxai
qoneta'am ca lpeguenaxala' na naleguecpi.
Qaq 'era da ỹa'aqtac, Aỹem Nataxala'.
Na ỹotta'a't shiỹaxauapi ỹataqta nhuotta qome ye Tiro,
6qaq nam huetauga na no'onaxa maye nalochiguiñi
qalaq qaỹalauat qome qairolec ca ỹeelonec.
Qaq huaña qome nache ỹaỹaten da Aỹem nachaỹem Nataxala'.
7Aỹem Nataxala', shenapec:
«chegoqtegue ñaqa'en qome da sheu' ñi Nabucodonosor
ñim nta'a ye Babilonia ñim nta'a maye ỹataqta 'añaxaic,
yaqto' iloquiaxan ye Tiro.
Ñimaye anac qome ỹauota'a lalo caipi
qataq aca nnaigonapi
qataq ca nalleppi maye netalec na caipi
qataq ca ỹataqta qalota nalleppi.
8Nache ỹalauat qome cam huetauga na 'ano'onaxa
maye nalochiguiñi irolec ca ỹeelonec,
qataq no'oxoosheguem ca npaqtaxanaxat 'am coleesop naqa'en,
qataq nauaxaỹaxaasheguem ca lliguisheguempi
da yaqto' 'am iloquiaxan,
qaq 'am iloquiaxan qome ca alleppi
maye nasoqta'a ana lpaqtaxanaqtepi.
9Qataq ỹauota'a ana ltoqnaxanaqte 'epaq late'erai
da ilaxachigui na 'arpaqtaxanaxatpi
qataq da ilaxachigui ana 'aralloxolatepi.
10Qaq ñi nta'a ye Babilonia qom inoxonoigui na 'anasompi,
qalaq 'eeta'am da qainoxoneua'a
ca huaqta'a't nỹecpi maye noxonec,
qaq souaxat da qalota ca lalo caipi,
nache 'am ỹapolec ca namoxoỹaxa
maye naỹoxoosheguem naqa'en,
qataq cholaxan naqa'en na 'arpaqtaxanaxatpi
da l-llimiaxa aca nnaigonapi qataq ca lalo caipi,
11nache que'eca caipi ilaxachigui qome na 'anqa'aicpi.
Qataq qaỹalauat na 'arhuo' le'ecpi qairolec ca ỹeelonec,
qataq qaỹamaxañi ana ỹataqta qaramta 'arhuoqtepi.
12Qataq qaiuotaxanec da 'arsallaxa
qataq na 'aralamaxat nallecpi,
qataq qaỹamaxañi na 'arpaqtaxanaxatpi,
qataq qailaxachigui nam huo'o da lyac 'arma' lta'araicpi,
qataq qaỹasaxauga aso auaxai na no'on coma'pi,
qataq na 'arllecnaxanaxatpi lỹaueegue' qanqa'en na lsoche na coma'.
13Qaq 'era da 'eetec qom vi'iiguet ñaqa'en da l-lamaxa na 'aro'onecpi,
nache saishet qome da qaltaq qaỹa'aqtega da l-lamaxa aca 'ana'arpapi.
14'Am she'eguelaxata qome da qoneta'am aca coma' maye salleeta,
qataq qoneta'am ca lpeguenaxala'
na naleguecpi da qaiqaxaỹaxat,
nache saishet qome da qaltaq 'am qano'oxoosheguem.
Aỹem Nataxala', setaqtac, qaq 'era da ỹa'aqtac Aỹem Nataxala'.»
15Qaq Aỹem Nataxala' shenapega ye Tiro, sheeta': Nam ỹotta'a't shiỹaxauapi maye hueto'ot na loigue aso auaxai, iviloxol qom hua'axaỹa ca l-lamaxa da qouañi, qataq souaxat da hua'aqchigui da lachotaxac cam que'emaxaicpi qataq da nalaataguec na 'am netaigui shiỹaxauapi. 16Qaq huaña, nache 'enauac na nta'alpi maye lma' na hueto'ot na loigue aso auaxai, huenoteeguesop qome ana nso'onaxaquipi, qataq nqata'ai na lapo'pi, qataq naua alogo maye ỹotta'a't na llo'oxoraxatpi, qaq nso'ona'aguet qome na 'alhua souaxat da lli'iỹaxa, qataq sa vi'iiguet da lviloxolaxa qataq da lcolanaxa qom 'am ỹauaachigui. 17Qaq huaña qome nache 'am do'onaxaalec, ỹo'on de'era no'onec da huo'o da nasouaxac maye, 'eeta':
¡'Am Tiro, ca 'eeteco' co'ollaxa da ishet da 'am qailaxachigui,
qataq ca 'eeteco' da ishet da 'auqat co'ollaq qoneto'ot na loigue aso auaxai
'am huaqta'a't nỹecpi, 'am maye huo'o co'ollaxa da 'ayo'oxoyec!
¡'Am, qataq na 'arhuo' le'ecpi, huo'o co'ollaxa da 'ara'añaxac
co'ollaq qoueto'ot na loigue aso auaxai
qataq 'auo'ot da lcolanaxa 'enauac na nhuo' le'ecpi maye 'arhuoreuapi!
18Qaq nagui da qouañi nache na ỹotta'a't shiỹaxauapi
maye hueto'ot na loigue aso auaxai iviloxol souaxat da lcolanaxa.
Qaq nagui da 'auqat, nache ana ỹaqa'ata 'alhuapi aso auaxai,
ỹataqta nlaxagui da lcolanaxa.
19Qaq Aỹem Nataxala' shenapec: «Aỹem so'ot qome da ỹataqta 'anlachiguiñi, qoneta'am ca huaqta'a't nỹecpi maye qaica hueta'a. Aỹem so'ot qome da 'am ỹapolec na 'etaxat maye chegaqangui aso qaỹoqchiguingui auaxai, 20nache 'aviraña cam hueta'a nam leuaxaicpi, maye nacheso som hua'au shiỹaxauapi. 'Am sasaxaña qome cam ỹataqta pa'aguiñi ana 'alhua, cam 'alhua maye chochaq tatec da toolec, nache 'aualectaigui qome som mashe ileupi co'ollaxa. Nache saishet qome da 'avi'eguelaxa da qaltaq 'am qanayeetalec, qataq saishet da qaltaq 'am qano'oxoosheguem, da qouetalec na na'alhua nam nca'altauecpi. 21Qataq 'am she'eguelaxata da 'am chaqaic, qataq saishet qome da 'am qaila'a. 'Am qanmittaique qome, qalaxaye saishet da 'am qaỹanata. Qaq 'era da ỹa'aqtac Aỹem Nataxala'.»
