No'onec daquicota souaxat da huañi ye huaqta'a't nỹecpi ye Tiro
1Ñim Nataxala' aỹem 'enapega nache, 'eeta': 2«'Am shiỹaxaua, 'auo'on de'era no'onec da huo'o da nasouaxac 3da 'auo'onaxaalec ye Tiro, yem huaqta'a't nỹecpi maye hueto'ot na loigue aye auaxai, maye nmeetague' na ỹotta'a't shiỹaxauapi maye hueto'ot na loigue aso auaxai, nache qonapega qoneta': 'Era da la'aqtac Ñim Nataxala':
'Am Tiro, 'am 'aupettega da 'am notaxaqui maye ỹataqta 'onaxai, qataq nalochiguiñi
4da 'ara'añaxac qalaq iviraxaama na laiñi aso auaxai,
som 'am ỹo'otpi co'ollaxa qalaq ỹataqta huo'o naqa'en da 'aryac.
5'Enauac na 'epaqpi maye 'ano'onataxatpi
qalaq qaỹachegoxota'a co'ollaxa ye aviaq Senir,
qaq aso 'arhuoqte late'erai qalaq qaỹachegoxotaigui ana cedro ye Líbano,
6so 'arlloctaxanaxatpi qalaq qaỹachegoxotaigui na robles ye Basán,
qaq so 'ansoxonaxala' qalaq chegaqaigui na cipreses
maye qaỹachegoxota'a ye loigue ye Chipre, qataq qalapaxalec na marfil.
7Qaq so 'araỹoxonaqtac maye huo'o na llo'oxoraxatpi
qalaq chegaqaigui na lino maye chegaqa'a ye Egipto,
qaq somaye nache nataqa'en 'ara'anaxanaqte,
qaq som 'arpe'l malaxaraic qataq togaxaraic da lo'oxoỹaxac
qalaq qaỹachegoxota'a co'ollaxa ye loigue ye Elisa.
8Qaq so 'arlloctaxanaxat lo'opi ỹalleppi qalaq chegaqa'a ye Sidón qataq ye Arvad,
qaq so 'aramaicnaxanaxanecpi maye nma'ai' da ỹaỹaten na 'etaxat
qalaq somayepi maiche 'arma'ashecpi.
9Qaq so ỹa'axaiquipi maye lma' ye Gebal
qalaq ỹaỹamaxaañi naxa da huo'o ye sa ỹaỹamaxañi da qoneta,
cha'aye nacheso som ỹaanaxanaxaicpi.
Qaq som shiỹaxauapi maye ỹaỹaten da quiguingui na 'etaxat,
qalaq imeetac naxa na 'armenecpi.
10Qaq som ỹalleppi maye lma' ye Persia, Lidia, qataq ye Libia,
qalaq nacheso co'ollaxa so ntaueetague' so 'analleppi,
somayepi ỹauota'a co'ollaxa ana lpaqtaxanaqtepi qataq aso naro'opi
da yaqto' ỹo'ot da 'ayo'oxoyec, qataq 'am ỹaqashelgaqchet.
11Qaq so shiỹaxauapi ye Arvad, qataq so nalleppi, qalaq nauaatalec co'ollaxa so 'arpaqtaxanaxat maye 'am coleesop, qaq aso 'aralloxolatepi qalaq ilotague' so ỹalleppi ye Gamad, aso lpaqtaxanaqtepi qalaq ỹemaqtaua'a imauec so 'arpaqtaxanaxat, nache ỹo'ot da ỹataqta huo'o da 'aryac. 12Qaq ỹataqta logosheguem co'ollaxa so 'arsallaxa, nache ye Tarsis 'am nmeetague' co'ollaxa, qaq nmeneguet naxa na 'armenecpi ana alom plata, lcat, estaño, qataq na plomo. 13Qaq nataqa'en ye Grecia, Tubal qataq ye Mesec, 'am nmeetague' co'ollaxa, nache nmeneguet naqa'en na 'armenecpi na l-latacpi qataq na nhuenecpi maye bronce. 14Qaq ye Bet Togarmá da 'am isheeten naxa nache deshetenaxana na caipi maye no'onataxanaxala', qataq na notaxala'pi qataq na molapi. 15Qataq na shiỹaxauapi ye Rodas, 'am nmeetague' co'ollaxa. Qataq 'anmeetague' na ỹotta'a't shiỹaxauapi maye hueto'ot na loigue aso auaxai, qaq namayepi naxa da 'am isheeten nache desheetenaxana na marfil qataq ébano. 16Ye Edom nataqa'en 'am nmeetague' souaxat na qalota 'armenecpi: Qaq nmeneguet naxa naqa'en na 'armenecpi, na coma' maye tocalec, qataq na hualoq laỹe maye lqo'oilaxat na togaxaraic, qataq na hualoq laỹe maye huo'o na leraxatpi, qataq na 'onaxaic lino, qataq na corales qataq na rubíes. 17Qataq nataqa'en 'am nmeetague' ye Judá, qataq ye Israel, nache naxa da 'am isheete'n, nache lsheetenaxanaxa't na trigo maye chegaqaña ye Minit, qataq ana lqatelleguishe ama, qataq na dapic lli'i, na aceite qataq na bálsamo maye ama na laita. 18Ye Damasco qalaq desheenaxana naxa na qalota 'aro'onatacpi, qataq da 'arsallaxa, qaq naxa da 'am isheeten nache deshetenaxana na lataxa maye chegaqaña ye Jelbón, qataq na qagueta laue maye chegaqaña ye Sahar. 19Qataq ỹachegotchiguiña naxa ye Uzal da 'am nda'a na lataxa, qataq na no'onatac lcat, qataq na canela, qataq ana coqta maye ama na laita, da yaqto' nmeneguet na 'armenecpi. 20Qaq ye Dedán qalaq 'am imeetacot naxa ana naalatepi maye qaiuen da qanayeelec na caaỹo. 21Qaq ye Arabia qataq 'enauac na nataxala'pi ye Quedar qalaq 'anmenaxauapi co'ollaxa: Qaq da 'am isheeten naxa nache desheetenaxana na qagueta llalaqpi, peenaqpi qataq ana quetaqpi. 22Qataq nataqa'en 'anmenaxauapi co'ollaxa ye nmenaxaicpi ye Sabá, qataq ye Raamá, qaq naxa da 'am isheeten, nache desheetenaxana na no'on coraxatpi, qataq na no'on coma'pi, qataq na oro. 23Qataq 'am nmeetague' naxa ye Arán, Cane, Edén, qataq na nmenaxaicpi ye Sabá, Asiria qataq 'enauac ye Media, 24qaq yemayepi 'am imenot naxa na ỹataqta no'on hualoq laỹe, qataq na npo' maye togaxaraic da lo'oxoỹaxac, qataq na huo'o ana llo'oxoraqtepi, qataq na ishet da qalapaxauo maye ỹotta'a't da lo'oxoỹaxac, qataq na ncoñetaxanaxat maye mpaqtac. 25Qaq ana notaxaquipi da qanayiguingui na 'etaxat maye chegaqa'a ye Tarsis, qalaq nacalec ana lỹa da 'am ndotegueta na lmenecpi.
Qaq nache qoneta'am co'ollaxa aca notaxaqui
maye quetangui na laiñi aso auaxai, notaxaqui maye nlaqchigui da nsallaxa.
26So 'arlloctaxanaxat lo'opi qalaq 'am ỹavicchiguingui aso ỹataqta qoỹoqchiguingui auaxai,
qalaxaye so la'at maye chegoxogue da nala' lliguisheguem,
'am ilaxachigui co'ollaq huangui na laiñi aso auaxai.
27So 'arsallaxa, so 'armenecpi, so 'analleppi maye lo'o na 'etaxat,
qataq so 'aramaicnaxanaxanecpi qataq so 'arapannaxanaxanecpi,
qataq so 'armenaxanaxanecpi, qataq so 'analaataxanaxanecpi
qataq 'enauac son 'annaictague'pi somayepi 'arỹachiguiñi'
co'ollaq 'am iyiiñi da 'angui aso auaxai.
28Qaq da la'alaxac so 'analleppi maye lo'o na 'etaxat
qalaq ỹo'ot da iviloxol ana lapaxa aso auaxai.
29Qaq so 'arlloctaxanaxat lo'opi qalaq huenoteeguesop aso notaxaqui
so 'analleppi maye lo'o na 'etaxat qataq 'enauac so 'aramaicnaxanaxanecpi
parenaxaneuga na deqaqta 'alhua.
30Qataq nlamaxaren da na'alaqtapiguiñi da nỹeeteguelec 'am souaxat da laquicoxo,
qataq imeelec na lqaic na 'alhua qataq nviingui na alo.
31Qataq souaxat 'am, nache namarec na lqaic,
qataq ỹaayiñi naua lasouaxaqui' alogo,
qataq nlaqchigui da laquicoxo nache nỹeetac.
32Qataq souaxat 'am, nache ỹo'on ca no'onec maye lataxaua da huo'o ca ileu
cam no'onec maye ỹa'axat da naquicoxo:
¿Qaq negue't ca ishet da 'am qanaloqneguet 'am Tiro,
'am huaqta'a't nỹecpi maye qonetangui co'ollaxa na laiñi aso auaxai?
33Qaq naxa da qanỹoqteguiñi na 'armenecpi maye huetagui
ana notaxaquipi da qanayiguingui aso auaxai,
nache 'auo'ot da ntonaxac na ỹotta'a't shiỹaxauapi.
Qaq da qalota 'arsallaxa, qataq na qalota 'armenecpi
nachena na ỹo'ot naxa da lsallaxa na nta'alpi ana 'alhua.
34Qalaxaye nagui 'am dolachigui naqa'en aso auaxai,
nache qouetaña na ỹataqta pa'aguiñi na 'etaxat.
Qaq so 'armenecpi qataq 'enauac so 'annaictague'pi
nache 'arỹachiguiñi' co'ollaq 'aña na pa'aguiñi aso auaxai.
35Qaq 'enauac na ỹotta'a't shiỹaxauapi
maye neto'ot na loigue aso auaxai huo'o da lcolanaxa souaxat 'am,
na lta'alpi namayepi qalaq ñi'i, na lashec qalaq yo'oqta da lli'iỹaxa.
36Na nmenaxaicpi maye lma' na laỹepi 'alhuapi,
qalaq ñi'i co'ollaq 'am ỹauaachigui.
'Am mashe 'avira ye 'oga't nache saishet da qaltaq 'am yo'oq.»
