Qaỹa'axata'a dam talec qome so nta'a ye Tiro
1Ñim Nataxala' aỹem 'enapega nache 'eeta': 2«'Am Ezequiel, qonapega ñi nta'a ye Tiro, qoneta':
Da la'aqtac Ñim Nataxala', 'eeta':
Añi 'arquiyaqte ỹataqta nlaqchigui da 'ana'amqaanaxac,
qataq qonetega da 'am atamnaxala'
cha'aye 'anso'ootangui añi nso'onaxaqui na atamnaxala'pi
maye coleesop aso auaxai.
Qalaxaye 'am saishet 'am atamnaxala',
nacherata da choche 'am shiỹaxaua,
maye qonetega 'am hueto'ot ca laỹaanataxanaxac ca atamnaxala'.
3¿'Aupettega peta'a da 'anapacalec da laỹaanec so Daniel?
¿'Aupettega peta'a da qaica ca ỹapoguiñi 'anqa'en?
4Da 'araỹaanec qataq da 'araỹaanataxanaxac,
nachera da 'auachegoxotaigui da qalota 'arsallaxa,
nache 'anlaxatchigui ana 'araỹamaqtaxanaxaquipi na lcat plata qataq na oro.
5Qaq cha'aye sa 'anqalaate' da llec da 'anmenaxac,
nache 'anquigaxattasheguem da 'arsallaxa,
qaq de'era 'arsallaxa nachera da ỹo'ot da 'ana'amqaanaxac.
6Qaq ỹoqo'oye Ñim Nataxala', 'eeta':
Cha'aye qonetega da 'am hueto'ot ca laỹaanataxanaxac ca atamnaxala',
7nache so'ot qome da anac ca chegaqauec da 'am dataỹa'aguet,
cam shiỹaxauapi maye ỹataqta qauemaicpi
cam 'am irolec qome ca lainec da 'am iloquiaxan,
'am maye 'am 'onaxaic qataq 'am ỹaanaxanaxaic,
nache huetaiya' naqa'en da 'ayo'oxoyec.
8Qataq 'am ỹasaxangui qome aca huachiqui,
nache 'am sa iren da 'am ỹalauat da huangui aso auaxai.
9¿Qaq nache qoqueto'ot peta'a da qonetega 'am atamnaxala',
da 'auatata'aguet ca 'am ỹalauat?
¡Qom 'am loxonec cam 'am ỹalauat qome,
qalaq qoneta'am ca choche shiỹaxaua!
10'Am ỹalauat qome ca chegaqauecpi,
nache qoneta'am da l-leuaxa ca ỹaqa'a da la'amqaanataxanaxac.
Cha'aye Aỹem ỹa'aqtac, qaq 'era da ỹa'aqtac, Aỹem Nataxala'.»
Da no'onec da huo'o ca nasouaxac
11Ñim Nataxala' aỹem 'enapega nache, 'eeta': 12«'Am shiỹaxaua 'auo'on ca no'onec da huo'o da nasouaxac nache 'auo'onaxaalec ñi nta'a ye Tiro, qoneta':
Da la'aqtac Ñim Nataxala', 'eeta':
'Am maye 'am qaỹaloqnaxana naxa da ỹaỹamaqchiguiñi lataxac,
'am maye 'am nlaqchigui da naỹaanec qataq da lyacỹaxac.
13'Am qoueta'a co'ollaxa ye Edén, yem lanaxanaqa' Ñim Lo'onatac 'Enauacna,
'am llo'oxoraxat co'ollaxa na ỹotta'a't no'on coma'pi,
na rubí, crisólito, jade, topacio, cornalina, jaspe,
zafiro, granate qataq na esmeralda; ana 'ano'otaqtepi
qataq ana 'arshetepi qalaq chegaqaigui na oro,
maye qaiqataxaatai' so na'a'q co'ollaq 'am qaỹo'ot.
14Qataq 'am iuattague' ñaqa'en so huo'oi naua laua't,
qataq qoueta'a co'ollaxa añi qui'itta nqasoxonaxa Ñim Lo'onatac 'Enauacna
nache 'auqueuotapigui' 'aucoleetapoigui ana huaqaañipi.
15Qaq da 'arataxac co'ollaxa ỹataqta nalochiguiñi,
chegoqchiguiña so na'a'q co'ollaq 'am qaỹo'ot,
nache choche ivitta'a co'ollaq 'am nvita so qauem.
16Qaq souaxat na qalota 'armenecpi,
nache 'avira'a da qaica ca 'aureetac,
nache 'am nlaxagui na 'arasouaxashetpi.
Qaq huaña nache 'am so'orauec, qataq 'am ñeqateeguesop
añim nqasoxonaxa Ñim Lo'onatac 'Enauacna,
qaq som huo'oi naua laua't maye 'am mpaxattalec co'ollaxa
'am nqateeguesop ana huaqaañipi.
17Da 'aryac 'am nlaxatchigui co'ollaxa da 'año'oxonnaxac,
da 'ayo'oxoyec ỹo'ot co'ollaxa da deqat da 'araỹaanec.
Qaq ỹoqo'oye qouetaiya' ñaqa'en, nache so'ot da 'am ne'eetapigui na nta'alpi.
18'Am 'aushepaxanaqchet co'ollaxa na 'anatamnaqa'pi,
souaxat na qalota 'arasouaxashetpi qataq dam qaica ca lyac 'anmenaxac.
Qaq ỹoqo'oye natcheguemot ñaqa'en 'am so norec nache 'am ỹavigaxat.
Qaq nagui 'enauac da 'am qailota'a da qouetaiya' 'avi'eguelaxa da 'am alo.
19Qaq 'enauac na ỹotta'a't shiỹaxauapi maye 'am ỹauatton,
huo'o da lqaigaxa da 'am ỹauaachigui.
Cha'aye 'avita yem chaqaic 'oga't, nache saishet da ỹe'eguelaxa da 'am huo'o.»
Qaỹa'axata'a dam talec qome ye Sidón
20Ñim Nataxala' aỹem 'enapega nache 'eeta': 21«'Am shiỹaxaua, 'auamata'a ye Sidón, nache 'aua'axata'a dam taỹa'a yemaye. 22Qoneta':
Da la'aqtac Ñim Nataxala', 'eeta':
'Am Sidón, 'am ñechoxota nagui da 'am ñepa'aguenaxaua,
qaq huo'o qome da ỹo'oxoyec da sootangui na laiñi da qoneta.
Qaq qom sacoolec da 'am ñimit, qataq sachaxan da qui'itta ỹataxac,
huaña qome nache qaỹaỹaten da Aỹem nachaỹem Nataxala'.
23'Am ñamaxa qome ca nalolaxapi,
nache naua nqa'aico huecoreguelo qome ca ntago'q,
qaq nam 'am netalecpi qalaq huañi qome nache ileu,
souaxat da chegoqteugalo ca iloquiaxan irolec ca ỹeelonec.
Qaq huaña qome nache qaỹaỹaten da Aỹem nachaỹem Nataxala'.
24Na Israel le'ecpi, saishet qome da ỹe'eguelaxa
da nque'etaxangui da lqui'ic aca ỹaxat le maye shetteguet qataq quia'aq
maye nachera dam le'enaxanaxac na lauoreuapi.
Qaq huaña qome nache qaỹaỹaten da Aỹem nachaỹem Nataxala'.
25Qaq Aỹem Nataxala', shenapec: Llaỹona't qome na nhuo' Israel le'ecpi, sachegoxotelec nam ỹotta'a't shiỹaxauapi maye ỹalectaigui, nache sachaxana da qui'itta ỹataxac ỹauaachigui ñaqa'en na ỹotta'a't shiỹaxauapi. Nache na Israel le'ecpi nalec qome ye maiche na'alhua, yem 'alhua maye sanem co'ollaxa som ỹamaxashec Jacob. 26Qaq nache hueta'a qome yemaye qaica ca iraxaatapigui' qataq qaica ca ndaqtaique, qataq no'oxoosheguem qome ca lma'pi, qataq ỹaañi aca lañiguishepi uvapi. Qaq Aỹem sacoolec qome da ñimit na nhuoreuapi maye ỹe'eetac na nhuo' Israel le'ecpi. Qaq huaña qome nache qaỹaỹaten da Aỹem nachaỹem Nataxala', maye Aỹem Natamnaxala' na Israel le'ecpi.»
