So npi'inecpi maye deqaqta
1Ñim Nataxala' aỹem ỹashel-lec, nache so Saqcha'a La'añaxac aỹem ỹauec, nache aỹem ỹanangui so laiñi so ca'amegue maye nlaqchigui na npi'inecpi. 2Nache Ñim Nataxala' ỹo'ot da secoleeteguelec somaye, nache ishet da sela'a da se'eso ca'amegue huetangui so ỹataqta qalota so npi'inecpi, qaq somayepi ỹataqta deqaqta. 3Qaq huaña nache aỹem 'enapega, 'eeta': «¿'Aua'amaqten peta'a, da ne'ena npi'inecpi ishet da ỹe'eguelaxa da qaltaq huo'o da lca'alaxa?» Nache aỹem sasat sheeta': «'Am Nataxala', 'am maye 'auaỹaten.»
4Nache Ñim Nataxala' aỹem 'enapega, 'eeta': «'Auachegoxotchigui da ỹe'enaxat da 'aua'aqtaxanem ne'ena npi'inecpi, qoneta': Qami' deqaqta npi'inecpi, ñaq qana'axaỹaxañiỹa de'era la'aqtac Ñim Nataxala'.
5Ñim Nataxala' qami' 'enapegalo, 'eeta': Qami' senoxonaqchetoiguilo qome ca nca'alaxa, da yaqto' ỹe'eguelaxa da qaltaq huo'o da qarca'alaqai. 6Qami' sanaguilo qome ana qaro'otaipi, qataq sanauo na qarapache, qataq sauo'o na qaro'oqui, qataq sauo'oi naua qara'achelli', yaqto' ishet da qaltaq huo'o da qarca'alaqai. Qaq huaña qome nache qami' qauaỹacheñi da Aỹem nachaỹem Nataxala'.» 7Nache aỹem sa'axatem somayepi, dam aỹem ỹamaxalec Ñim Nataxala'. Qaq co'ollaq ñaq sa'aqtaxaateguem somayepi, nache sa'axaỹa so nllimiaxa: 'eeta'am na lacholaxanaxa ana 'alhua, nache ñi 'oonolec se'eso npi'inecpi na'areguet ñi maiche lỹa. 8Qaq samata'a nache sauaachigui somayepi da no'oxon ana lo'otapi, qataq na lapat, qataq da lo'ocỹaxac. Qalaxaye saxanaqcaua naua la'a'che, maye ỹo'ot da lca'alaxa.
9Nache Ñim nataxala' aỹem 'enapega, 'eeta': «'Auachegoxotchigui da ỹe'enaxat da 'auỹaxanaique caua na'a'che maye ỹo'ot da nca'alaxa, qoneta': Da la'aqtac Ñim Nataxala' 'eeta': 'Am na'a'che, 'auanac qome 'auachegoqteguelo naua cuatro laỹel ana 'alhua, nache 'aỹa'anem ca lca'alaxa ne'ena no'ocỹaxacpi maye leuaxaicpi.» 10Qaq aỹem sachegoxotchigui da le'enaxat Ñim Nataxala' da sa'aqtaxanem somayepi da la'aqtac Ñimaye, nache soua na'a'che maye ỹo'ot da nca'alaxa taigui somayepi, nache somayepi qaltaq huo'o da lca'alaxa, ime nache nachaañi. Qaq somayepi, 'eeta'am ca ỹataqta qalota alleppi.
11Qaq huaña nache Ñim Nataxala' aỹem 'enapega, 'eeta': «Na nhuo' Israel le'ecpi, namayepi 'eeta'am ne'ena npi'inecpi. Namayepi 'enapec naxa: Naua qarpi'inaqa ỹataqta deqaqte', mashe qaica ca qanaquitaxac, qataq mashe seqataq. 12Qaq ỹoqo'oye 'auachegoxotchigui da ỹe'enaxat da 'aua'aqtaxanem namayepi, qoneta': Da la'aqtac Ñim Nataxala', 'eeta': Qami' ỹalamaxat nhuo' le'ecpi, Aỹem sauaangui qome ana huachiquipi maye qoviitangui, qami' sachegoxotchiguinguilo anamayepi da qami' ñeqatyeshegue'm, nache so'ot da qavi'eguelaqaỹa ye 'alhua ye Israel. 13Qaq qom sauaangui ana huachiquipi maye qoviitangui da qami' ñeqatyeshegue'm, nache huaña qome nache qauaỹacheñi qami' ỹalamaxat nhuo' le'ecpi, da Aỹem nachaỹem Nataxala'. 14Aỹem qami' sanaiguilo qome soua ỹa'a'che maye ỹo'ot da nca'alaxa, huaña nache qaltaq qanca'alleeuec, nache qami' sanaleguete yem maiche qaralamaxache qana'alhuai. Qaq huaña qome nache qauaỹacheñi da Aỹem nachaỹem Nataxala', maye ỹa'aqtac de'era, qaq ipacchigui qome ñaqa'en. Qaq 'era da ỹa'aqtac Aỹem Nataxala'.»
Ye Judá qataq ye Israel ỹe'eguelaxa qome da qaltaq huaxaỹa't
15Ñim Nataxala' aỹem 'enapega, nache 'eeta': 16«'Auacona aca nashelte nache 'erelec qome da, 'eeta': Ye Judá qataq na ltauapi Israel le'ecpi. Ime qome qaltaq 'auacona aca lỹa nashelte, nache 'erelec da, 'eeta': So José maye nacheso so Efraín qataq na ltauapi maye nhuo' Israel le'ecpi. 17Ime nache saq 'auaỹaloxon da 'auaconalo da 'auauaxaỹaxana't que'ecaua dos nashelte, nache caamaye 'eeta'am da 'oonole 'anqa'en. 18Qaq nam 'arhuo' le'ecpi qom 'am inat da, 'eeta': Ñaq qomi' 'aua'aqtaxanema cam naigui de'era, 19nache 'aua'aqtaxanem qome, qoneta': Da la'aqtac Ñim Nataxala', 'eeta': Aỹem sacona qome ara lashelte so José maye nasoqta'a so Efraín, qataq nam chegoxoguetpi so Israel maye ntaueetague' ñimaye, nache sauaxaỹaxaneguet aso lashelte so Judá, da yaqto' 'eeta'am da 'oonole nashelte da huetaigui na ihuaq. 20Qaq nache 'anasoqta'alo qome ỹauaachigui 'anqa'en 'enauac na shiỹaxauapi caua dos nashelte maye huo'o so 'erelec. 21Ime, nache qoneta': Da la'aqtac Ñim Nataxala', 'eeta': Aỹem ñeqateeguesop qome na Israel le'ecpi nam ỹotta'a't shiỹaxauapi maye taỹa co'ollaxa, nache sachegoxotteugalo qome da llaỹona't, nache ỹe'eguelaxa ñaqa'en ye maiche na'alhua. 22Qaq huaña qome yi'iye maiche na'alhua, qataq aye qasoxonaxapi ye Israel, da so'ot qome da ima'a't ne'ena nhuo' le'ecpi, qataq 'oonolec ca lta'a. Nache saishet da ỹe'eguelaxalec da colaqtagui namayepi qataq da dos caua lta'al. 23Qataq saishet qome da ỹe'eguelaxa da qaltaq nshepaxanaqcheela't, souaxat da ỹo'oxoreetac na nqolacpi maye nqaigaxat, qataq da ỹo'ottac na ỹotta'a't lasouaxashetpi. Aỹem sesoueeguesop qome 'enauac nam ỹo'ot da saỹalaq maye ỹo'ottac namayepi, qataq seỹouec na lasouaxashetpi. Qaq huaña qome nache ỹalamaxat namayepi, qataq Aỹem Natamnaxala' qome. 24Ñi ỹamaxashec David nacheñita qome da nta'a qataq 'oonolec da ilo'ogue 'enauac namayepi, qaq namayepi qome Aỹem ỹalaxaguet, qataq ipacchigui na iqataxacpi qataq na ỹamaxasoxonaxacpi. 25Qataq nalec yem 'alhua maye sanem co'ollaxa so ỹamaxashec Jacob, yem nataqa'en netalec co'ollaxa so hua'au lta'alpi. Qaq namayepi nache 'eetai' qome da netalec yemaye, qataq ca llalaqpi, qataq 'enauac cam chegoxoguetpi qome namayepi, qaq ñim ỹamaxashec David, nacheñi qome ñim chochaq tatec da ilotague' namayepi. 26Qataq so'ot qome ca ñaỹamaxataxac maye chochaq tatec da ñaỹamaxate' namayepi, cam ñaỹamaxataxac maye ỹo'ot da nlagaxayec. Qataq so'otec qome da nquictauec ye lcata namayepi, qataq nache 'eetai' qome da netangui ñaqa'en namayepi aca qui'itta ỹalamaqte atamnaxaqui. 27Qaq Aỹem sootangui qome namayepi, qaq nachaỹem qome da Aỹem Natamnaxala', qaq namayepi ỹalamaxatpi qome. 28Qaq aca'aca qui'itta ỹalamaqte atamnaxaqui qom nache 'eetai' da netangui namayepi, nache na laỹepi ỹotta'a't shiỹaxauapi, ỹaỹaten qome da Aỹem lleca'aguishec na Israel le'ecpi, da seỹotauga da yaqto' ỹalamaxatpi.»
