Ñim Lo'onatac 'Enauacna do'ogoxona ye Gog
1Ñim Nataxala' aỹem 'enapega, nache 'eeta': 2«'Am shiỹaxaua, 'auamata'ague da pa'aigue ye 'alhua Magog, nache 'aua'axata'a dam 'eetec qome ye Gog, maye lataxala' ye Mesec qataq ye Tubal. 3Nache qoneta': Da la'aqtac Ñim Nataxala', 'eeta': 'Am Gog maye 'am lataxala' ye Mesec qataq ye Tubal, Aỹem ñechoxot da 'am ñepa'aguenaxaua. 4Aỹem 'am she'eguelaxat qome, shemaqtagui na 'ap aca qoina, 'am so'orauec qome, qataq na 'analleppi, qataq na netalec naxa na caipi maye ỹaatrañi naua no'oñi anogo. Nam qalota alleppi maye na'atchigui naxa na lainecpi, qataq ana lpaqtaxanaqtepi maye ỹotta'a't da lataxac. 5Qataq nnaictague' qome na shiỹaxauapi maye lma' ye Persia qataq ye Etiopía qataq ye Libia, 'enauac ỹauota'a ana lpaqtaxanaqtepi qataq ana naro'o maye alaataxaquipi, 6qataq nataqa'en 'enauac na alleppi ye Gomer, qataq ye bet-togarmá, qataq yem ỹataqta qaỹoqta maye pa'aigue da sheu', yem qalota nhuo' le'ecpi maye 'artauapi. 7Ñaq 'anaỹamaxat qome, 'ana'achigui na 'aro'ogoxonaxatpi, 'am qataq 'enauac na alleppi maye 'am hueta'aguet, nache 'aulo'ogue qome namayepi. 8Cha'aye qom huo'oi caua inoxoorec vi'iye, nache 'am samaq da 'auloquiaxan yem 'alhua maye huetaigui co'ollaxa da nloquiaxac, qalaxaye mashe qaltaq ỹe'eguelaxa da na'ayiñi, yem nhuo' le'ecpi maye nlagaxattac co'ollaxa, nache ỹalecta'aguet na qalota ỹotta'a't shiỹaxauapi, qataq qailaxachigui co'ollaxa, qalaxaye qaltaq ỹe'eguelaxa da laỹona't da hueta'a aye qasoxonaxapi ye Israel. Yem chegoqta'a co'ollaxa na qalota 'alhuapi, qaq nagui qalaq ỹe'emaqtac. 9Qaq qom 'anvita yemaye, nache qoneta'am ca napo da ipegueelec 'enauac yi'iye 'alhua, qataq 'aunoxotaua'a qome yemaye qoneta'am ca la'at lta'araic, 'arỹateuo ca qalota 'analleppi, qataq ca qalota nhuo' le'ecpi.»
10Qaq Aỹem Nataxala', shenapec: Qaq que'eca na'a'q nache 'alapaxañi qome 'enauac cam qauempi. 11Qataq qonapec qome: Aỹem senoxotaua'a ye 'alhua maye qaica ca lpaqtaxanaxat, yem shiỹaxauapi maye ỹe'emaqtac, qataq qaica ca ñe'etaique qataq 'enauac yem huaqta'a't nỹecpi maye ỹotta'a't naua nañalo, maye qaica ca lpaqtaxat, qataq qaica ca lasom, qataq ca la'araxat. 12Qataq ñeuo', qataq secachiỹot, qataq seloquiaxan ye huaqta'a't nỹecpi maye ỹotta'a't naua nañalo, maye cheta'ague da no'oxoosheguem nam shiỹaxauapi maye laỹona't chegaqa'alo naua ỹotta'a't 'alhuaye, maye huo'o na na'atetpi, qataq na laỹepi lalamaxatpi, qataq netangui na laiñi ana 'alhua. 13Qaq na shiỹaxauapi ye Sabá, qataq ye Dedán, qataq na nmenaxaicpi ye Tarsis, qataq nam chegaqa'a na laỹepi huaqta'a't nỹecpi, 'am inat qome, 'eeta': ¿'Auanac peta'a da 'aucache? ¿Peta'a 'alaỹona't na 'analleppi da yaqto' 'auotaxanec qataq da 'auacona na lcat plata, qataq na lcat oro, qataq na 'atetpi, qataq na laỹepi nogoxoshetpi, qataq 'auache da qalota nsallaxa?
14Qaq ỹoqo'oye 'am Ezequiel 'auachegoxotchigui qome da ỹe'enaxat da qonapega ye Gog, qoneta': Da la'aqtac Ñim Nataxala', 'eeta': Ye ỹalamaxat nhuo' Israel le'ecpi qom ỹe'emaqtac, nache 'am qome qojec, 15'auachegoqchiguiña ye 'ana'alhua, yem ỹataqta qaỹoqta maye pa'aigue da sheu', 'annaictague' qome ca ỹataqta 'añaxaicpi qataq qalota alleppi, qataq cam netalec na caipi, 16nache 'auloquiaxan ye ỹalamaxat nhuo' Israel le'ecpi. 'Am Gog 'amattalec qome ye 'alhua qoneta'am ca napo. Qaq que'ecaua pa'atrec na'axa'te, nache 'am ñanacot qome da 'auloquiaxan yem hueta'a ye ña'alhua, yaqto' 'am chegoqchigui ñaqa'en da na laỹepi ỹotta'a't shiỹaxauapi ỹaỹaten qome, da sachaxana namayepi da qui'itta ỹataxac. 17Aỹem Nataxala', shenapec: Nache 'am da 'am setaqtega co'ollaxa soua hua'au' vi'iye, co'ollaq sa'aqtaxaatac, chegoqchigui som ỹamaxashecpi maye ỹa'ataxanaxanecpi ye Israel, qaq se'eso na'a'q, somayepi ỹa'axattac co'ollaxa da Aỹem taỹa'a da 'am ñanacot da yaqto' 'auloquiaxan na Israel.
Da nhuaxanaguec ye Gog
18Aỹem Nataxala', shenapec: ye Gog qom inoxotaua'a ye Israel, nache da ỹayeloxo ỹataqta huo'o da lchec qom 'eroigui. 19Qaq nache huaigui qome ca le'eraxa da ỹayeloxo, da san ca ỹa'aqtac, da que'eca na'a'q huo'o qome ca lta'araic nacholaxanaxa ye Israel. 20Qaq na nỹaqpi aso auaxai, qataq na maỹopi piguem le'ecpi, qataq na shiguiỹacpi maye huauec, qataq nam ỹotta'a't hualectapigui', qataq 'enauac na shiỹaxauapi ana 'alhua, iviloxol qom aỹem datato'ot. Qaq ana qasoxonaxapi qalaq qalagoxoñi qome, ana lcomaraxalatepi qalaq dacagueñi qome, qataq 'enauac na mpaqtaxanaxatpi hua'axauec qome. 21Qaq 'enauac nam netalec aye qasoxonaxapi, seỹaxaneuga qome da nalaate' ye Gog, nache ñi 'oonolec ỹalauat qome ca maiche lỹa, irolec ca ỹeelonec. Qaq 'era da ỹa'aqtac Aỹem Nataxala'. 22'Am Gog, qataq na 'analleppi, qataq na qalota alleppi maye 'antaueetague', sauo'o qome ca qanhuaxanaguiiqui, qami' seroleguete ca napiina, qataq qaicorec qome na ntago'q, qataq so'ot qome da naañi ca lta'araic auot, qataq aca lache, qataq ca norec, qataq ca quiquiaxaraic. 23Qaq 'era da 'eetec qom sachaxana na qalota laỹepi nhuo' le'ecpi, da ỹa'amaqchec qataq dam qui'itta ỹataxac, Aỹem so'ot qome da aỹem ỹauatton namayepi, qaq nache huaña qome da ỹaỹaten da Aỹem nachaỹem Nataxala'.
