Ezequiel 40

₁Co'ollaq mashe ivi' soua veinticinco vi'iye da souaqtaigui da qancoñetaguec, nache aỹem ỹashel-lec Ñim Nataxala', nache aỹem ỹauega ye Jerusalén. Qaq de'era huaigui so na'a'q diez, so la'auaxanec ca'agoxoic, qaq mashe ivi' soua catorce vi'iye da noxonec co'ollaxa ye Jerusalén. ₂Nache Ñim Lo'onatac 'Enauacna ỹachaigui so ỹauanaqchec da aỹem ỹauega ye 'alhua ye Israel, nache aỹem ỹanalec aso ỹataqta qaỹoqotcheguemec qasoxonaxa. Qaq dam pa'aỹa'ague da taguiñi asa'aso qasoxonaxa huo'o so lta'araic nỹec, 'eeta'am da lataxac ca huaqta'a't nỹecpi. ₃Qaq co'ollaq mashe soota'a yemaye, nache sela'a so shiỹaxaua maye netaigui so lasom, 'eeta'am na bronce, qaq somaye nasoqta'a so nañec maye chegaqaigui na lino, qataq so 'epaq maye lo'o da huo'o na qanaloqten. ₄Qaq se'eso shiỹaxaua, aỹem 'enapega, 'eeta': «Ñaq 'aulochigui qataq 'ana'axaỹaxaachigui 'enauac nam huotaique da 'am sachaxana, cha'aye Ñim Lo'onatac 'Enauacna 'am nauega ne'ena da yaqto' 'am sachaxana namayepi. Qaq qom ime, nache 'aua'aqtaxanem na nhuo' Israel le'ecpi 'enauac nam 'auauaachiguipi.»

₅Qaq na pa'auec aso atamnaxaqui huo'o so mpaqtaxanaxat coleesop asomaye. Qaq som 'epaq maye lo'o da huo'o na qanaloqten maye nasoqta'a se'eso shiỹaxaua, ivi' tres metros. Qaq huaña nache naloqten so mpaqtaxanaxat, nache somaye ivi' tres metros ye lcateueegue, qataq tres metros ye lshequitcheguema. ₆Ime, nache nqo'ona so ñegueuo maye pa'aỹa'ague da nala' lliguisheguem, nache quisheguemgue so napiaxala'pi, nache naloqten so pa'aguiñi se'eso lasom, nache somaye ivi' tres metros ye lcateueegue. ₇Qaq soua qapio'olqa nỹaqa, maye netaua'alo naua laỹel se'eso ñegueuo, ñi 'oonolec soomaye ivi' tres metros ye lalogaxa, qataq ye lcateueegue, qaq ye lshecta'ache ñi 'oonolec se'esoua qapio'olqa nỹaqa, qalaq ivi' dos metros y medio. Qaq huo'o nataqa'en so lasom se'eso ñegueuo maye datatta aso atamnaxaqui. Qaq na pa'aguiñi se'eso lasom ivi' tres metros ye lcateueegue. ₈Nataqa'en naloqten na pa'auo se'eso ñegueuo, nache somaye ivi' tres metros, ₉qaq ye lcachigui so ñegueuo qalaq ivi' cuatro metros, qaq soua lauoqtel qalaq ivi' un metros ye lquesaxanaxa. Qaq so lasom se'eso ñegueuo qalaq netaña ye pa'auo. ₁₀Qaq naua laỹel se'eso ñegueuo maye pa'aỹa'ague da yo'oxoñi, qalaq huo'oi soua tres qapio'olqa nỹaqa, qaq soomaye nache lcata'a't, qaq nataqa'en soua nhuoqtel maye huaqta'ato, nache lcata'ama soomaye. ₁₁Ime, nache se'eso shiỹaxaua naloqten ye lcachigui so lasom: nache somaye ivi' cinco metros ye lcateueegue, qaq ye lalogaxa ivi' seis metros y medio. ₁₂Qaq so naloteuga soua qapio'olqa nỹaqa, qalaq huo'o so saq 'amaqtaq mpaqtaxanaxat, maye ivi' medio metros ye lcateueegue. Qaq ñi 'oonolec se'esoua qapio'olqa nỹaqa, qalaq ivi' tres metros ye lcateueegue qataq ye lalogaxa. ₁₃Ime, nache ima'a't da naloqten ye lcateueegue se'eso ñegueuo, chegoqchiguiña so pa'auo so 'oonolec se'esoua qapio'olqa nỹaqa, nache iviraxata'a na pa'auo so lỹa qapio'olec nỹec maye datateguet, nache tachiviigui so 'oonolec lasom, nache iviraxata'a so lỹa lasom maye datateguet, qaq somaye ivi' doce metros y medio ye lalogaxa. ₁₄Qaq ime, nache naloqten so ñegueuo, qaq somaye ivi' diez metros. Qaq ana lauoqtepi se'eso ndaqa'pi qalaq imauec da coleesop so qasoxoc. ₁₅Da ima'a't ye lalogaxa chegoqchiguiña na pa'auec so lasom, nache iviraua'a ye pa'auo som ñegueuo, qalaq ivi' veinticinco metros. ₁₆Qaq soua qapio'olqa nỹaqa, qataq soua lauoqtel, huo'oi soua lta'al nalloxoqui' maye huo'o na lpa'axanaxat lcatpi na pa'auo, nache coleesop 'enauac se'eso mpaqtaxanaxat maye pa'auec. Qaq nataqa'en so ñegueuo huo'oi soua nalloxoqui' naua laỹel na pa'auo. Qaq soua lauoqtel qalaq qoỹettalec aso ne'enaqta chaicpi.

₁₇Qaq ime, nache se'eso shiỹaxaua aỹem ỹauega so qasoxoc maye pa'aỹauec. Qaq se'eso qasoxoc coleesop so no'oxonec coma', qataq huo'o so treinta nanataxaquipi maye coleesop so qasoxoc. ₁₈Qaq se'eso no'oxonec coma' maye nquicchiguiñi, somaye ivira'alo naua loiguiye som ñegueuo, qaq ye lcateueegue, qalaq nache 'eeta'am da lalogaxa somaye. ₁₉Qaq ime, nache se'eso shiỹaxaua naloqten ye lshequeelec ỹachegoxotchiguiña na pa'aguiñi so lasom nache iviraxataua'a so ñegueuo, maye pa'auo, qaq somaye ivi' cincuenta metros.

₂₀Qaq nataqa'en huo'o so ñegueuo maye pa'aỹa'ague da sheu' se'eso qasoxoc maye pa'aỹauec. Qaq se'eso shiỹaxaua naloqten ye lalogaxa qataq ye lcateueegue. ₂₁Qaq nataqa'en huo'oi soua tres qapio'olqa nỹaqa maye netaua'alo naua laỹel, qataq soua lauoqte qataq so ñegueuo, maye 'eeta'am ye lalogaxa qataq ye lcateueegue som ñegueuo maye pa'aigue da nala' lliguisheguem, qaq damaye 'eeta', veinticinco metros ye lalogaxa, qataq doce metros y medio ye lcateueegue. ₂₂Qaq som ñegueuo, qataq so nalloxoquipi qataq aso ne'enaqta chaicpi, qalaq 'eeta'am ye lalogaxa qataq ye lcateueegue som ñegueuo maye pa'aỹa'ague da nala' lliguisheguem. Qaq somaye nataqa'en siete so napiaxala'pi da qanayeguesheguemgue, qaq som ñegueuo qalaq pa'aỹaigui som pa'auo.

₂₃Qaq som qasoxoc maye pa'aỹauo, qalaq huo'o so lasom maye datateguet so lasom maye pa'aỹa'ague da sheu', qaq nache 'eeta'am som lasom maye pa'aỹa'ague da nala' lliguisheguem. Qaq se'eso shiỹaxaua naloqten ye lshecta'ache se'esoua laso'omi, nache soomaye ivi' cincuenta metros ye lshecta'ache.

₂₄Ime, nache so shiỹaxaua aỹem ỹauega so lasom maye pa'aigue da taguiñi, nache naloqte'n soua qapiolqa nỹaqa, qataq soua lauoqtel, qataq so ñegueuo, qaq soomaye ye lalogaxa, qataq ye lcateueegue 'eeta'am so laỹepi. ₂₅Qaq so lasom qataq so ñegueuo qalaq nataqa'en coleesop so nalloxoquipi, 'eeta'ama soua lỹa't ñeguereuo, qaq ivi' veinticinco metros ye lalogaxa, qataq doce metros y medio ye lcateueegue. ₂₆Qaq nataqa'en siete soua napiaxala'ate da qanayeguesheguemec, qataq so ñegueuo maye pa'aỹauo, qaq soua lauoqtel qalaq nataqa'en qoỹettalec aso ne'enaqta chaicpi, 'enauaque naua laỹel. ₂₇Qaq so qasoxoc maye pa'aỹauo nataqa'en huo'o so lasom maye pa'aỹa'ague da taguiñi. Qaq so shiỹaxaua nataqa'en naloqten ye lshecta'ache se'esoua laso'omi maye pa'aira'ague da taguiñi, qaq soomaye ivi' cincuenta metros.

₂₈Ime nache so shiỹaxaua qaltaq aỹem ỹauega so ñegueuo maye pa'aigue da taguiñi taỹaua'a ye qasoxoc maye pa'aỹauo. Nache naloqten so lasom maye pa'aỹa'ague da taguiñi, nache ye lalogaxa qataq ye lcateueegue nache 'eeta'ama soua lỹa't ñeguereuo. ₂₉Qaq soua qapiolqa nỹaqa, qataq so ñegueuo, qataq soua lauoqtel, qalaq 'eeta'ama ye lalogaxa qataq ye lcateueegue soua lỹa't ñeguereuo. Qaq so lasom qataq so ñegueuo qalaq nataqa'en huo'o so coleesop nalloxoquipi, qaq da ima'a't nache ivi' veinticinco metros ye lalogaxa, qataq doce metros y medio ye lcateueegue. ₃₀Qaq coleesop somaye so nanataxaquipi maye ivi' doce metros y medio ye lalogaxa, qataq dos metros y medio ye lcateueegue. ₃₁Qaq so nanataxaqui qalaq dataỹauga so qasoxoc maye pa'aỹauec, qaq soua lauoqtel qalaq nataqa'en qoỹettaleguete aso ne'enaqta chaicpi. Qaq ocho so napiaxala'pi da qotasheguema se'eso ñegueuo.

₃₂Qaq nataqa'en aỹem ỹauega so qasoxoc maye pa'aỹauo maye pa'aỹa'ague da nala' lliguisheguem, nache naloqten se'eso ñegueuo, qaq somaye 'eeta'am ye lalogaxa qataq ye lcateueegue soua lỹa't ñeguereuo. ₃₃Qaq soua qapiolqa nỹaqa qataq so ñegueuo, qataq soua lauoqtel, qalaq 'eeta'am da lalogaxa qataq ye lcateueegue soua lỹa't. Qaq se'eso lasom qataq so ñegueuo, qalaq nataqa'en coleesop so nalloxoquipi, qaq ivi' veinticinco metros ye lalogaxa, qataq doce metros y medio ye lcateueegue. ₃₄Qaq so ñegueuo qalaq datateuga ye qasoxoc maye pa'aỹauec, qaq soua lauoqtel qalaq qoỹettaleguete aso ne'enaqta chaicpi 'enauaque naua laỹel. Qaq ocho soua napiaxala'ate da qotasheguema se'eso ñegueuo.

₃₅Qaq ime nache se'eso shiỹaxaua qaltaq aỹem ỹauega so ñegueuo maye pa'aigue da sheu', nache naloqten se'eso ñegueuo, qaq somaye nache 'eeta'am ye lalogaxa qataq ye lcateueegue soua lỹa't ñeguereuo. ₃₆Qaq soua qapio'olqa nỹaqa, qataq so ñegueuo, qataq soua lauoqtel, qalaq nataqa'en coleesop so nalloxoquipi. Qaq so ñegueuo qalaq ivi' veinticinco metros ye lalogaxa, qataq doce metros y medio ye lcateueegue. ₃₇Qaq so ñegueuo qalaq datateuga so qasoxoc maye pa'aỹauec. Qaq soua lauoqtel qalaq qoỹettaleguete aso ne'enaqta chaicpi 'enauaque naua laỹel. Qaq ocho soua napiaxala'ate da qotasheguema se'eso ñegueuo.

₃₈Qaq nataqa'en huo'o so qapio'olec nỹec maye ỹa'atteua'a se'eso ñegueuo. Som huaña naxa da qaiỹo na shiguiỹacpi da yaqto' qoỹaneuo da nachetaqtaxanaxat maye qaỹavigaxatta. ₃₉Qaq se'eso ñegueuo, nache netañalo soua cuatro nquia'axala'ate. Dos soua netañalo na 'oonolec laỹe se'eso ñegueuo, qaq nachesoua naxa soua qaỹachaleguete da qaỹalauat na shiguiỹacpi maye nachetaqtaxanaxat qaỹavigaxatta, qataq ana nachetaqtaxanaqte da yaqto' qaỹapalaxat na nasouaxashetpi, huo'otaq ca lỹa nasouaxashet. ₄₀Qaq na pa'auec se'eso ñegueuo, qalaq nataqa'en huo'oi soua cuatro nquia'axala'ate, dos soua netañalo na 'oonolec laỹe se'eso ñegueuo, ₄₁qaq da ima'a't nache ocho soua nquia'axala'ate maye qaỹachaleguete naxa na shiguiỹac da qaỹalauat, cuatro soua netraña na pa'auo so ñegueuo, qataq cuatro soua pa'atraue'c. ₄₂Qaq soua cuatro nquia'axala'ate maye qaỹachaleguete naxa na shiguiỹac maye nachetaqtaxanaxatpi qaỹavigaxatta, soomaye lo'oxonaxat na coma' nchiiguishec, qaq soomaye ivi' setenta y cinco centímetros ye lalogaxa, qataq setenta y cinco centímetros ye lcateueegue, qataq cincuenta centímetros ye lshequitcheguemec. Qaq soomaye nache qaỹachetaleguete naxa na no'onataxanaxatpi maye qaỹo'ogoxona da qaỹalauat na shiguiỹacpi da qoỹaneuo da nachetaqtaxanaxat qaỹavigaxatta, qataq na laỹepi nachetaqtaxanaxatpi maye qaỹavigaxatta. ₄₃Qaq na pa'auo so lque qalaq coleesop na nemaxaquipi, maye ivi' veinticinco centímetros ye lalogaxa ñi 'oonolec, qaq se'esoua nquia'axala'ate nache qaỹachaleguete naxa na lapat na shiguiỹacpi maye nachetaqtaxanaxat. ₄₄Qaq so qasoxoc maye pa'auo, qalaq huo'oi soua dos nỹaqa, 'oonolec so netaua'a na laỹe som pa'aỹauo lasom maye pa'aigue da sheu', qaq somaye datategue da taguiñi, qaq so lỹa nỹec qalaq neteua'a na laỹe som pa'aỹauo lasom maye pa'aỹa'ague da taguiñi, qaq somaye datategue da sheu'. ₄₅Qaq se'eso shiỹaxaua aỹem 'enapega, 'eeta':

«Ñi nỹec maye datategue da taguiñi, ñimaye lma' na ntaxaỹaxanaxanecpi maye huetague' añi atamnaxaqui, ₄₆qaq ñi nỹec maye datategue da sheu', nache lma' na ntaxaỹaxanaxanecpi maye huetague' añi nca'atoxonaxalate. Qaq nachaqnata namayepi da ishet da nquigueua'a Ñim Lo'onatac 'Enauacna da do'onataxanot, cha'aye namayepi chegoxoguet so Sadoc.»

₄₇Qaq ime, nache se'eso shiỹaxaua naloqten so qasoxoc maye pa'aỹauo, qaq somaye ivi' cincuenta metros ñi 'oonolec naua cuatro laỹel. Qaq aso nca'atoxonaxalate nache datateua'a aso atamnaxaqui. ₄₈Qaq ime, nache se'eso shiỹaxaua aỹem ỹauegueua'a so ñegueuo aso atamnaxaqui, nache naloqte'n soua lauoqtel, nache añi 'oonole soomaye ivi' dos metros y medio ye lquesaxanaxa. Qaq so lasom qalaq ivi' siete metros ye lcateueegue, qaq soua na'attaua'alo so lasom qalaq ivi' un metros y medio ye lcategue ñi 'oonolec. ₄₉Qaq se'eso ñegueuo ivi' seis metros ye lalogaxa, qataq diez metros ye lcateueegue, qataq diez soua napiaxala'ate da qotasheguema se'eso ñegueuo. Qaq añi 'oonole soua lauoqtel, qalaq nache huaqta'ai' aso lỹa nhuoqte.