1Qaq ime nache se'eso shiỹaxaua aỹem ỹauegueua'a na pa'auo aso atamnaxaqui, nache naloqte'n soua lauoqtel, qaq soomaye ivi' tres metros ye lquesaxanaxa. 2Qaq so lasom qalaq ivi' cinco metros ye lcateueegue, qaq soua na'attaua'alo so lasom, qalaq ivi' dos metros y medio ye lcateueegue ñi 'oonolec, ime qaltaq naloqten na pa'auo so ndaqa', nache ivi' veinte metros ye lalogaxa, qataq diez metros ye lcateueegue. 3Ime qaltaq taua'a so lỹa ndaqa' maye ỹataqta pa'auo, nache naloqte'n soua lauoqte so ñegueuo, nache añi 'oonole soomaye ivi' un metros ye lquesaxanaxa. Qaq so ñegueuo qalaq ivi' tres metros ye lcateueegue, qaq soua lauoqtel maye netaua'alo naua laỹel ivi' tres metros y medio ye lquesaxanaxa añi 'oonole.
4Qaq ime, nache so shiỹaxaua naloqten na pa'auo so ndaqa', nache somaye ivi' diez metros ñi 'oonolec naua cuatro laỹel. Qaq huaña nache se'eso shiỹaxaua aỹem 'enapega, 'eeta': «Ne'ena nachena na ndaqa' maye saqaishetapec.»
So nỹecpiolec maye netaigui so mpaqtaxanaxat
5Qaq ime, nache se'eso shiỹaxaua naloqten so lpaqtaxat aso atamnaxaqui, qaq somaye ivi' tres metros ye lquesaxanaxa, qaq so nỹecpiolec maye netaigui se'eso lpaqtaxat aso atamnaxaqui qalaq ivi' dos metros ye lalogaxa na lauel. 6Qaq se'eso nỹecpiolec ñi 'oonolec na'attalec ñi lỹa, nache ivi' tres nỹaqa, qaq ñi 'oonolec se'eso nỹecpiolec qalaq huo'o so treinta ndaqa'pi. Qaq so lpaqtaxat aso atamnaxaqui saishet da lcaueegue, qaq 'enauac na pa'auec aso atamnaxaqui huo'o so lmala'pi maye nlletañi se'eso nỹecpi, yaqto' saishet da hua'aqtalec so lque aso atamnaxaqui. 7Qaq na pa'auec so se'eso nanataqa'pi maye coleesop aso atamnaxaqui, qalaq huo'o so ñeguisheguempi maye ivirasheguema na pa'asheguem, nache ishet da qaỹachegoqchiguiña na pa'aguiñi da qotasheguema so laiñiguishec, qataq so ỹataqta pa'asheguem se'eso nỹecpi. 8Nache aỹem sela'a da 'enauaque naua laỹel aso atamnaxaqui, da huo'o so qaỹoqotcheguemec lmala' maye netalec asomaye, qaq somaye nache no'oxootalec nataqa'en so nỹecpi. Qaq se'eso no'oxonaxala' somaye ivi' tres metros ye lshequitcheguema. 9Qaq da lquesaxanaxa na lque maye pa'aỹauec se'eso nỹecpi, qalaq dos metros y medio ye lquesaxanaxa. 10Qaq ye lshecta'ache so nỹecpi maye coleesop aso atamnaxaqui qalaq ivi' diez metros. 11Qaq na lasom ñi 'oonolec so nỹecpi qalaq datateuga som qui'ittelec, 'oonolec lasom so datategue da sheu', qaq so lỹa lasom qalaq datategue da taguiñi. Qaq ye lcateueegue se'eso qui'iteelec maye coleesop so nỹecpi qalaq ivi' dos metros y medio.
So nỹec maye pa'aỹa'ague da avit
12Qaq som nỹec maye pa'aỹa'ague da avit, maye datateuga som qasoxoc maye napotaua'a, somaye ivi' treinta y cinco metros ye lcateueegue, qaq ye lalogaxa qalaq ivi' cuarenta y cinco metros, qataq huo'o so lpaqtaxat maye ivi' dos metros y medio ye lquesaxanaxa.
Ye lalogaxa qataq ye lcachiguiñi aso atamnaxaqui
13Ime, nache se'eso shiỹaxaua naloqten aso atamnaxaqui, qaq da ima'a't nache ivi' cincuenta metros ye lalogaxa. Qaq ye lcateueegue so nqasoxoc maye napotaua'a, qataq so nỹec qataq so lpaqtaxat, nataqa'en ivi' cincuenta metros. 14Qaq na dataỹaueegue aso atamnaxaqui, qataq so qasoxoc napoteua'a maye pa'aỹa'ague da nala' lliguisheguem, qalaq ivi' cincuenta metros ye lcateueegue. 15Ime, nache naloqten ye lalogaxa so nỹec maye pa'aỹa'ague da l-laq aso atamnaxaqui, som datateguet so qasoxoc maye napoteua'a, qataq 'enauaque naua laỹel so mpaqtaxanaxat, nache somayepi ivi' cincuenta metros. 16Qaq so ñegueuopi, qataq so nalloxoquipi, qataq so ndaqa'piolec maye coleesopa soua tres nỹaqa, qalaq imauec da qalapaxalec na 'epaq. 17Qaq se'eso shiỹaxaua nataqa'en naloqten so pa'asheguem lasom, nache iviraxataua'a so ndaqa' pa'auo, qataq nataqa'en naloqten na pa'auo, qataq na pa'auec, qataq coleesop 'enauac so lque. 18Qaq se'eso lque, nache qoỹettalec so ne'enaqtacpi maye huo'oi naua laua't, qataq aso chaicpi, qaq ñi 'oonolec se'esopi huo'oi naua laua't qalaq dos naua lashego, 19so 'oonolec soua lashego qalaq 'eeta'am na lashec na shiỹaxaua qaq so lỹa qalaq 'eeta'am na lashec na llon. Qaq ñi 'oonolec lashec qalaq ilota'ague da pa'aỹa'ague aso chaic, qaq 'enauaque naua laỹel aso atamnaxaqui ishet da qailota'a se'eso ne'enaqtacpi. 20Qaq chegoqchiguiña na pa'aguiñi so lasom, nache ivirasheguema na pa'asheguem. Qataq 'enauac so lque aso atamnaxaqui, da qoỹettalec so ne'enaqtacpi maye huo'oi naua laua't qataq aso chaicpi. 21Qaq añi 'oonole soua lauoqte aso atamnaxaqui qalaq cuatro naua laỹel. Qaq naua lsheeneqa so ndaqa' qalaq nache 'eeta'a't.
Aso nca'atoxonaxalate maye 'epaq
22Qaq aso nca'atoxonaxalate 'epaq, qalaq ivi' un metro y medio ye lshequitcheguemegue, qaq soua lallemaqreuo, qataq so lo'oxonaxala' qataq naua laỹel qalaq 'enauac 'epaq. Qaq huaña nache se'eso shiỹaxaua aỹem 'enapega, 'eeta': «'Ena na nquia'axala' maye datatalec Ñim Nataxala'.»
23Qaq aso atamnaxaqui qataq so ndaqa' qalaq dos soua laso'omi.
24Ñi 'oonolec soua laso'omi qalaq dos naua laua't maye connapiguilo. 25Qaq soua laso'omi qalaq qoỹettaleguete soua ne'enaqtaqa huo'oi naua laua't, qataq aso chaicpi, 'eeta'am som qoỹettalec so lque. Qaq na pa'auec so ñegueuo qalaq huo'o so lapoxot 'epaq. 26Qaq naua laỹel so ñegueuo qalaq huo'oi naua nalloxoqui' maye lapoxot na lcat, maye qoỹettalec aso ne'enaqta chaicpi. Qaq nache 'eeta'ama da lataxa'c, soua saq 'amaqtache ndaqa'ate aso atamnaxaqui.
