1Qaq ime nache se'eso shiỹaxaua aỹem ỹauegueuga so qasoxoc pa'aỹauec maye pa'aỹa'ague da sheu', nache aỹem ỹauegueua'a so nỹecpiolec maye datategue da sheu', som datateuga so qasoxoc maye napotaua'a, qataq so nỹec maye na'ague da l-laq aso atamnaxaqui. 2Qaq 'enauac se'eso ivi' cincuenta metros ye lalogaxa so pa'aỹa'ague da sheu', qataq veinticinco metros ye lcateueegue. 3Qaq da 'oonolec laỹe maye pa'aỹa'aguet so qasoxoc maye pa'aỹauo, qalaq ivi' diez metros ye lcateueegue, qaq so lỹa laỹe qalaq pa'aỹa'aguet so pa'aỹauec qasoxoc maye lo'oxonaxat na coma'. Qaq ñi 'oonolec soomaye qalaq tres naua nỹecolqa ỹashiquitcheguem. 4Qaq so datateuga se'eso nỹecpi, qalaq huo'o so qui'ittegue maye pa'aỹauo, qaq somaye ivi' cinco metros ye lcateueegue, qataq cincuenta metros ye lalogaxa maye taỹaua'a so pa'auo, qaq so lasompi se'eso nỹecpi qalaq datategue da sheu'. 5Qaq so nỹecpi maye pa'aỹasheguem somayepi salcagui, saq 'ena'am som nỹecpi maye pa'aỹangui na laiñi, qataq som ỹataqta mpa'achiguiñi, cha'aye som pa'asheguem nquicta't, qaq saq 'ena'am so mpa'achiguiñi. 6Qaq se'eso nỹecpi ỹashequitcheguem, tres naua ndaqa'ate, qalaq qaca aca lauoqte da 'eeta'am ana lauoqtepi so ndaqa'pi so qasoxoc, qaq ỹoqo'oye se'eso nỹecpi salcagui saq 'ena'am so pa'aỹangui na laiñi qataq so ỹataqta mpa'achiguiñi. 7Qaq huo'o so mpaqtaxanaxat pa'aỹauec maye datateguet so nỹecpi maye datatalec so qasoxoc pa'aỹauec, qaq somaye ivi' veinticinco metros ye lalogaxa. 8Qaq so nỹecpi maye dataỹauga so qasoxoc maye pa'aỹauec, somaye ivi' veinticinco metros ye lalogaxa, qaq na dataỹaueegue aso atamnaxaqui qalaq ivi' cincuenta metros. 9Qaq so ndaqa' maye mpa'achiguiñi se'eso nỹecpi da qotaua'a, qalaq qotateua'a som qasoxoc pa'aỹauec maye pa'aỹa'ague da nala' lliguisheguem. 10Qaq so pa'aỹa'ague da taguiñi, nache icanegue so lpaqtaxat so qasoxoc, qataq so datateuga so qasoxoc, qataq so naloteuga so nỹec maye na'ague da l-laq aso atamnaxaqui, qalaq huo'o so nỹecpi. 11Qaq huo'o so qui'itchiguingui maye datateuga somayepi, maye 'eeta'am so nỹecpi maye pa'aỹa'ague da sheu'. Qataq nache 'eeta'am ye lalogaxa qataq ye lcateueegue, qataq nache 'eeta'am so ñeguecpi, qataq so lasompi, qataq so ñegueuopi. 12Qaq da qotaua'a so nỹecpi maye pa'aỹa'ague da taguiñi, qalaq qotateua'a so lasom maye pa'aỹa'ague da nala' lliguisheguem som naña yem chegoqchiguiña som qui'itchiguingui, maye datateguet som mpaqtaxanaxat. 13Qaq se'eso shiỹaxaua aỹem 'enapega, 'eeta': «Yi'iye nỹecpi maye pa'aỹa'ague da sheu', qataq ye pa'aỹa'ague da taguiñi maye datateuga ye qasoxoc maye napotaua'a, yemayepi saqaishetapec. Qaq nache huaña yemaye da na ntaxaỹaxanaxanecpi maye nquigueua'a Ñim Nataxala', chec na nachetaqtaxanaxatpi maye saqaishetapec. Qaq nataqa'en nache ỹachaña ana nachetaqtaxanaqtepi ala na nañiguishec, qataq ana nachetaqtaxanaqtepi souaxat na nasouaxashetpi, qataq ana nachetaqtaxanaqtepi souaxat ca lỹa nasouaxashet, cha'aye yi'iye ndaqa' ỹataqta qui'itta. 14Qaq na ntaxaỹaxanaxanecpi qom huenoxoneua'a yemaye, nache saishet da pa'auec da tauga ye pa'aỹauec qasoxoc da saxanaxa da nqa't naua alogo maye lo'onataxanaxaqui' da ỹacheraña yemaye, cha'aye ne'enaua alogo ỹataqta qui'itte'. Qaq da pa'auec da tauga ye hueta'a na nhuo' le'ecpi, qalaq iuen da ỹaayiñi caua lỹa't alogo.» 15Qaq se'eso shiỹaxaua so imat da naloqten na pa'auo aso atamnaxaqui, nache aỹem ỹauegueuga so pa'auec, saqchiviigui so lasom maye pa'aỹa'ague da nala' lliguisheguem, nache somaye naloqten 'enauac na pa'auec asomaye. 16Qaq ỹacona so laloqnaxanaxat 'epaq maye lo'o da huo'o ye qanaloqten, nache naloqten na pa'aỹa'ague da nala' lliguisheguem, qaq somaye ivi' doscientos cincuenta metros, 17qaq ime nache qaltaq naloqten na pa'aỹa'ague da sheu', qaq nataqa'en ivi' doscientos cincuenta metros, 18ime qaltaq naloqten na pa'aỹa'ague da taguiñi, qaq nataqa'en ivi' doscientos cincuenta metros, 19qaq pa'atec da naloqten na pa'aỹa'ague da nala' lliguiñi, qaq nataqa'en ivi' doscientos cincuenta metros. 20Qaq ime, nache se'eso shiỹaxaua naloqte'n soua cuatro laỹel. Qaq 'enauac ye hueta'a asa'aso atamnaxaqui huo'o so lpaqtaxat coleesop asomaye, qaq somaye ivi' doscientos cincuenta metros ñi 'oonolec soua laỹel, qaq nacheso so ỹaqauga naqa'en som qui'itta, qataq so nshepaxan.
