Da llo'oxoyec Ñim Nataxala' ỹe'eguelaxa aso atamnaxaqui
1Qaq so shiỹaxaua, aỹem ỹauega so lasom maye pa'aỹa'ague da nala' lliguisheguem, 2nache sauaateguet da llo'oxoyec Ñim Natamnaxala' na Israel le'ecpi chegoqtegue da nala' lliguisheguem. Qaq da l-lamaxa ỹataqta alam, 'eeta'am da l-lamaxa ca tala da ỹa'auat, qaq ana 'alhua nache nlaqaalec na le'eraxa. 3Qaq de'era ỹauanaqchec, 'eeta'am so ỹauanaqchec co'ollaq anac Ñim Nataxala' da ilaxachigui ye Jerusalén, qataq 'eeta'am so ỹauanaqchec co'ollaq huaña ye tala Quebar. Qaq huaña nache sa'alyiñi naua illecte, nache seviraxata'aguet na ỹatap na 'alhua, 4nache da llo'oxoyec Ñim Nataxala' taigui aso atamnaxaqui, tatoigui so lasom maye pa'aỹa'ague da nala' lliguisheguem. 5Qaq huaña nache so Saqcha'a La'añaxac Ñim Nataxala' aỹem ỹanaxanaxaasheguem, nache aỹem ỹauegueua'a ye qasoxoc maye pa'aỹauo, nache sela'a da llo'oxoyec Ñim Nataxala' da nlaxatchigui aso atamnaxaqui. 6Qaq se'eso shiỹaxaua, nache aỹem huaqta'ai', huaña nache sa'aqchigui Ñim Nataxala', lamaqtoigui aso atamnaxaqui da aỹem 'enapega 7nache, 'eeta': «'Ena na lma' añi ñeso'onaxaqui, qataq nachena na ỹapiaqa', nachena na huaña da chochaq tatec da soota'aguet na Israel le'ecpi. Qaq namayepi qataq ca lta'alpi, qalaq saishet qome da ỹe'eguelaxalec da ishepaxanaqchet da ỹe'enaxat souaxat da saỹalaq: qataq saishet qome da ỹe'eguelaxalec da no'oxoosheguem ca le'enaqtac maye lqui'ipi so lta'alpi maye mashe ileu, 8huo'otaq da no'oxoosheguem ca lma' lta'araicpi, da yaqto' na lasompi, huaqte' naqa'en ca lasompi aca ỹalamaqte atamnaxaqui, nache ima'aguet naqa'en ca 'oonolec hueque. Qaq namayepi ishepaxanaqchet da qui'itta ỹe'enaxat, souaxat nam ỹo'otpi maye ỹataqta seqaiga, ỹoqo'oye Aỹem salemataỹa co'ollaxa namayepi nache saneguet da l-leuaxa. 9Qalaxaye nagui namayepi da aỹem ỹalaxaguet, qataq da saishet da ỹo'oxoreetac na lqui'ipi so lta'alpi, nache Aỹem chochaq tatec qome da soota'aguet namayepi. 10Qaq 'am shiỹaxaua, 'aua'aqtaxanem qome na Israel le'ecpi dam 'auauaachigui lataxac aso atamnaxaqui, aso lmalate, qataq yem lcachiguiñi da ima'a't, yaqto' namayepi huo'o qome da la'agaxa souaxat na lasouaxashetpi. 11Qaq qom huo'o da la'agaxa, souaxat 'enauac nam ỹo'otpi, nache 'aua'aqtaxanem da lataxac aso atamnaxaqui, qataq nam hueta'a asomaye, som ñeguecpi qataq som ñegueuopi, qataq 'enauac na huetalec aso lmalate, qataq 'enauac nam lapaqtañi nqataxacpi maye iuen da ipaqueelec namayepi. 'Avi'inaxat qome 'enauac ne'enapi, yaqto' namayepi ỹataqta ỹaỹateeta dam lataxac aso atamnaxaqui yaqto' namayepi ỹo'ot. Nataqa'en 'iyiñi qome 'enauac na nqataxacpi, yaqto' namayepi ishet da ipaqueelec. 12Qaq 'ena na lapaqtañi nqataxacpi maye lalamaxat aso atamnaxaqui: 'enauac na 'alhua maye coleesop aso atamnaxaqui, nam huaña na pa'asheguem añi qasoxonaxa, namaye ỹataqta sa qaishetapec qome.»
Aso nca'atoxonaxalate
13Qaq 'ena na laloqnaxatpi aso nca'atoxonaxalate: naua loiguiye qalaq coleesop asomaye so la'auaxacolec, qaq somaye ivi' medio metro ye lshecchiguingui, qataq medio metro ye lcateueegue, qataq veinticinco centímetros so laỹe maye ỹapacasheguem. Qaq so lo'oxonaxala' aso nca'atoxonaxalate, qalaq 'eeta': 14na chegoqchiguiña na lauel so la'auaxacolec nache ivirasheguema na pa'asheguem qalaq ivi' un metro. Qaq so laỹe maye ỹapacauec lo'oxonaxala' qalaq ivi' medio metro. Qaq som pa'asheguem asomaye qalaq ivi' dos metros ye lshequitcheguemegue, qataq huo'o so ỹapacauec laỹe maye ivi' medio metro. 15Qaq so pa'asheguem asomaye maye qaỹachalec naxa da qaỹavigaxat na nachetaqtaxanaxat, qalaq dos metros ye lshequitcheguema, qataq cuatro soua lcoue maye iloyeshegue'm. 16Qaq naua cuatro laỹel aso nca'atoxonaxalate, qalaq ivi' seis metros ñi 'oonolec. 17Qaq so na'attalec asomaye nataqa'en cuatro naua laỹel, maye ivi' siete metros ñi 'oonolec, qaq so laua'axacolec maye coleesop asomaye ivi' medio metro ye lcateueegue, qaq som ỹacasheguem laỹe qalaq ivi' veinticinco centímetros ye lcateueegue, qaq som napiaxala'piolec da qotasheguemec asomaye qalaq pa'aỹa'ague da nala' lliguisheguem. 18Qaq ime, nache Ñim Nataxala' aỹem 'enapega, 'eeta': «Qom ivita da qano'oxoosheguem aca nca'atoxonaxalate, nache iuen da qaipacchigui ne'ena lataxacpi: Qaỹavigaxat qome ca shiguiỹac qaỹachalec aca nca'atoxonaxalate, qataq qaichegoxolec acamaye ca ltago'q. 19Qaq na ntaxaỹaxanaxanecpi leviitapi maye chegoxoguet so Sadoc, nam iuen da Aỹem nquigueua'a da aỹem do'onataxanot, qalaq 'aỹa'anem qome ca 'oonolec huaca llalec da yaqto' ỹan da lachetaqtaxanaxat souaxat nam nasouaxashetpi. Qaq 'era da ỹamaxasoxonaxac Aỹem Nataxala'. 20Qaq ime qome nache 'auacona ca ltago'q camaye, nache 'auchegoxoleguete naua cuatro lcoue, qataq naua cuatro laỹel aca nca'atoxonaxalate, qataq 'enauaque naua loiguiye maye coleesop. Qaq 'era da qonetec da 'auqui'itaxat 'enauac nam nasouaxashetpi. 21Ime qataq 'auacona ca huaca llalec maye qoỹaneuo da yaqto' qaỹapalaxat na nasouaxashetpi, nache 'auachaueegue da laỹe aca atamnaxaqui da 'auavigaxat, 'auachaña ca maiche lma' qanqa'en da qaỹavigaxat namayepi. 22Qaq ca lỹa na'a'q, nache 'aỹa'aneuo da nachetaqtaxanaxat ca quetaq llalec maye qaica ca lque'emaxa souaxat na nasouaxashetpi, qaq ca ntaxaỹaxanaxanecpi iqui'itaxat qome aca nca'atoxonaxalate, 'eeta'am naqa'en da 'eetec so huaca llalec. 23Qaq qom 'aumat de'era lataxac da nỹoxoc acamaye, nache 'auacona ca 'oonolec huaca llalec, qataq ca qagueta lhuaraic, qaq caamaye 'enauaque qome da qaica ca lque'emaxa, 24ime nache Aỹem 'aỹa'anoto caamaye. Qaq ca ntaxaỹaxanaxanecpi ichegoxolec qome ca toue, ime nache ỹavigaxat da nachetaqtaxanaxat da Aỹem ỹanot. 25Qaq ivittrec qome caua siete na'axa'te, da ye 'oonolec na'a'q nache iuen da 'aỹa'aneuo ca quetaq llalec da 'arachetaqtaxanaxat souaxat na nasouaxashetpi, qataq nataqa'en ca 'oonolec huaca llalec, qataq ca 'oonolec qagueta lhuaraic, qaq caamaye iuen da qaica ca lque'emaxa. 26Qaq ivittrec caua siete na'axa'te, da na ntaxaỹaxanaxanecpi iqui'itaxattac imauec aca nca'atoxonaxalate, qaq 'era da 'eetec qome da iqui'itaxat da yaqto' Aỹem qoỹanot. 27Qaq ivittrec qome caua siete na'axa'te da qoỹeeta'ac de'era, qaq ca na'a'q ocho, nache chegoqchiguiña qome da qoỹaategueuo ca qaỹavigaxatta nachetaqtaxanaxat, qataq aca nachetaqtaxanaqte maye ỹa'axat da añanaxac. Qaq huaña qome nache Aỹem qami' samaatetegueta da qami' saconegueta. Qaq 'era da ỹa'aqtac Aỹem Nataxala'.»
