Ezequiel 44

₁Qaq so shiỹaxaua qaltaq aỹem ỹauega som pa'aỹauec lasom aso atamnaxaqui, maye pa'aỹa'ague da nala' lliguisheguem, qaq somaye napotagui.

₂Qaq huaña yemaye nache Ñim Nataxala' aỹem 'enapega, 'eeta': «Ne'ena lasom nache 'eetai' qome da napotagui, nache saishet qome da qaỹauatoigui. Qataq qaica ca ishet da tatoigui namaye da inoxoneuo, cha'aye namaye nachena na sateua'a co'ollaxa Aỹem Nataxala' maye Natamnaxala' na Israel le'ecpi. Qaq namaye nache napotagui qome. ₃Qaq nachecata qome ca nta'a maye ishet da pa'auo da yaqto' nso'ooñi da deque'e, datato'ot Ñim Nataxala'. Qaq camaye iuen da tateua'a ñi ñegueuo ñim lasom, qataq nache tateuga da huenoxonec.»

₄Qaq ime nache se'eso shiỹaxaua qaltaq aỹem ỹauega som ñegueuo maye pa'aỹa'ague da sheu', maye datateguet aso atamnaxaqui. Huaña nache sela'a da llo'oxoyec Ñim Nataxala' da nlaxatchigui aso atamnaxaqui, nache aỹem sa'alyiñi naua illecte qataq seviraxata'aguet na ỹatap na 'alhua. ₅Qaq huaña nache Ñim Nataxala' aỹem 'enapega, 'eeta': «'Am Ezequiel, 'anlotec qome, qataq ỹataqta 'ana'axaỹaxaachigui 'enauac nam 'am sa'axatem, maye lataxac na nqataxacpi qataq na lapaqtañi lataxacpi aca atamnaxaqui. Qataq 'aulochigui qome negue't cam ishet da huenoxonoigui aca atamnaxaqui, qataq cam ishet da pa'auec. ₆Ñaq qonapega qome yi'iye nhuo' Israel le'ecpi maye qauemaicpi, qoneta': ‹Da la'aqtac Ñim Nataxala', 'eeta': Ñaq qavia'axañiiguet qome na qauo'ocheetac maye seqaiga, qami' nhuo' Israel le'ecpi. ₇Qami' qanshepaxanaqcheche añi ỹalamaqte atamnaxaqui, cha'aye qaua'aqaita'a da pa'aigui na chegaqauecpi, nam shiỹaxauapi maye saishet da ỹachetac da la'anaxat da ñaỹamaxataxac, saq huetaigui da ntoonaxac qataq da lo'ocỹaxac, namayepi nshepaxanaqchet cha'aye Aỹem ỹanot na lcheta, qataq na ltago'q na lachetaqtaxanaxatpi, nache saiyacnapec da ñaỹamaxataxac souaxat nam ỹo'otpi maye ỹataqta seqaiga.› ₈Qataq saishet da ipaguelec dam llapaxañi qui'itta lataxac, nacherata da ỹanem nam ỹaqa'a ca chegaqa'ague da ilo'ogue añi ỹalamaqte atamnaxaqui.»

₉Qaq ỹoqo'oye Aỹem Nataxala', shenapec: Saishet qome da huenoxonoigui añi ỹalamaqte atamnaxaqui cam chegaqauec maye saishet da huetaigui da ntoonaxac, qataq da lo'ocỹaxac dam la'anaxat da ñaỹamaxataxac, qataq ivira'a cam chegaqauec maye ỹalectaigui na Israel le'ecpi. ₁₀Qaq nam leviitapi maye Aỹem ca'ai co'ollaq na Israel le'ecpi ca'ai da ñeqa'aicỹaxac, da yaqto' ỹo'oxoren na nqolacpi, namayepi qome iuen da isheeten da lasouaxashet. ₁₁Namayepi iuen da huetague' qome añi ỹalamaqte atamnaxaqui da nauaatalec na lasompi, qataq na laỹepi no'onatacpi añi atamnaxaqui, qaq nachena namayepi da ỹalauattac qome ca shiguiỹacpi, maye qoỹaneuo da nachetaqtaxanaxatpi qaỹavigaxatta, qataq cam ỹaneuo na nhuo' le'ecpi da lachetaqtaxanaxat, qataq nataqa'en iuen da lhuotta namayepi da huapegue' na nhuo' le'ecpi. ₁₂Cha'aye namayepi nachena nam huetague' co'ollaxa na Israel le'ecpi, da ỹaatacot da llo'oxonnataxanaxa na nqolacpi, qaq nachena nam ỹo'ot na lasouaxashetpi namayepi. Qaq ỹoqo'oye namayepi isheeten qome dam lasouaxashet. Qaq 'era da ỹa'aqtac Aỹem Nataxala'. ₁₃Namayepi saishet qome da Aỹem do'onataxanot da ntaxaỹaxanaxanecpi, qataq saishet da ỹacootegueua'a nam ỹalamaxatpi maye saqaishetapec. Namayepi maiche ỹache qome da la'agaxa, souaxat nam qaiqaiga maye ỹo'otpi. ₁₄Namayepi sanem qome da ilo'ogue nam no'onatacpi maye qaica ca la'amaqchec añi atamnaxaqui, da yaqto' ỹo'ot 'enauac nam iuen da qaỹo'otpi.

₁₅Na ntaxaỹaxanaxanecpi leviitapi maye chegoxoguet so Sadoc, nam queto'ot co'ollaxa da Aỹem do'onataxaatacot da huaña aso ỹalamaqte atamnaxaqui, co'ollaq na Israel le'ecpi ca'ai da ñeqa'aicỹaxac, namayepi ishet da Aỹem naua'a da Aỹem do'onataxanot. Namayepi ishet da aỹem nachaateua'a da Aỹem ỹanot na lcheta, qataq na ltago'q nam nachetaqtaxanaxatpi. Qaq 'era da ỹamaxasoxonaxac Aỹem Nataxala'. ₁₆Nataqa'en ishet qome da huenoxonoigui aca ỹalamaqte atamnaxaqui qataq nquigueua'a aca ỹalamaqte nca'atoxonaxalate da Aỹem do'onataxanot, qataq nache huetague' qome nam ỹo'onataxanaxacpi. ₁₇Qalaxaye qom huenoxonoigui ñi lasom maye naña ye qasoxoc maye pa'aỹauo, qalaq iuen da ỹaatañi na logoxot maye chegaqaigui na lino. Qaq da do'onataxaatac da hueta'a ye pa'aỹauo qasoxoc, huo'otaq añi atamnaxaqui, qalaq saishet qome da ỹaatrañi naua alogo maye chegaqaigui na qagueta laue. ₁₈Qataq ỹaatañi qome ca laxataxat na lqaic, hualoq laỹe maye chegaqaigui na lino, qataq aca lamaxaso maye nataqa'en chegaqaigui na lino, qataq saishet da ỹaxattagui na lasot cam ishet da nchelchaxañi naqa'en. ₁₉Qaq da saxanaxa da tauga ca pa'aỹauec qasoxoc maye hueta'a na nhuo' le'ecpi, qalaq iuen da nqat ca logoxot maye lo'onataxanaxaqui da hueta'a aca atamnaxaqui, nache ỹachaigui ca pa'aỹauo nỹecpiolec, nache ỹaayiñi caua lỹa't alogo, yaqto' que'ecaua qui'itte' anogo saishet da nhuoigueta na nhuo' le'ecpi. ₂₀Qataq saishet da namarec na lqaic, qataq saishet da nalogoxat na laue, nacherata da ichectanguit. ₂₁Qataq na ntaxaỹaxanaxanecpi qaica qome ca ishet da nỹomgui na lataxa, da mashe taua'a ye pa'aỹauo qasoxoc. ₂₂Qataq saishet da huaroneguet aca pa'ai, huo'otaq aca mashe huo'o co'ollaxa ca lhua qalaxaye ỹalat, maye nda'a't da huaroneguet acam ñaq qa'añole Israel lashe, huo'otaq aca pa'ai maye lhua co'ollaxa ca ntaxaỹaxanaxanec. ₂₃Na ntaxaỹaxanaxanecpi iuen da ỹapaxaguen na ỹalamaxat nhuo' le'ecpi, da yaqto' ishet da ỹauatton cam ỹalamaxat, qataq cam lalamaxat ca shiỹaxaua, qataq ỹauatton ca qui'itta qataq ca nshepaxan. ₂₄Qaq da huo'o ca cotaxac, qaq namayepi nachena qome nam huapegue' da ỹaỹamaxaañi, qataq da nmit nache ipagaqchiichigui da lataxac na iqataxacpi. Ipaqueelec qome nam iqataxacpi, qataq na ỹapaxaguenataxanaxacpi da qaỹo'ot nam ỹalamaxat naponaxacpi, qataq huo'o naq 'enec naqa'en yem na'a'q mataxaqui maye seỹotauga co'ollaxa. ₂₅Qataq saishet qome da ipoteua'a ca leuaxaic yaqto' namayepi saishet da nshepaxan, nacherata da maiche lalamaxat lta'a, huo'otaq late'e, huo'otaq llalec, huo'otaq llale, huo'otaq ca lqaỹa ỹale, huo'otaq aca lqaỹa 'alo maye saxanaxa da huaron. ₂₆Qaq da huo'otaq ipoteua'a, nache iuen da nỹo, ime nache iuata'a da inoxoore'c caua siete na'axa'te. ₂₇Qaq da ỹe'eguelaxaua'a ca pa'aỹauo qasoxoc aca atamnaxaqui da yaqto' ỹo'ot nam lo'onatacpi, nache ỹauo'o ca ỹaneuo lachetaqtaxanaxat souaxat ca lasouaxashet. Qaq 'era da ỹamaxasoxonaxac Aỹem Nataxala'. ₂₈Na ntaxaỹaxanaxanecpi qaica qome ca lalamaxat da hueta'a nam Israel, cha'aye nachaỹemta qome da aỹem lalamaxat. ₂₉Namayepi, ishet qome da chectac nam ala na nañiguishec, maye Aỹem ỹanot na Israel le'ecpi, qataq na shiguiỹacpi maye qoỹaneuo da nachetaqtaxanaxatpi souaxat na nasouaxashetpi, qataq ca nachetaqtaxanaxat souaxat ca lỹa nasouaxashet. Qataq 'enauac qome nam iỹotauga na Israel le'ecpi da Aỹem ỹanot, nache lalamaxat qome namayepi. ₃₀Na ntaxaỹaxanaxanecpi taỹot qome nam ỹataqta no'on maye la'auaxanec ala na nañiguishec, qataq 'enauac ana nachetaqtaxanaqtepi. Qaq qami' da qauo'oche ca qardaqñiqui da qauo'oche aca nauole, nache namayepi taỹot qome aca ỹataqta no'on nauole. Qaq 'era da 'eetec, da yaqto' da iqouagaxanaqtaic huetalec qome ca qarma'aipi. ₃₁Na ntaxaỹaxanaxanecpi qalaq saishet qome da chec ca camachaqca maỹo, huo'otaq ca shiguiỹac maye maiche ileu, huo'otaq ca icolaxattac co'ollaxa ca shiguiỹac maye dequi'iỹapec.