Ezequiel 46

₁«Aỹem Nataxala', shenapec: Ñi lasom maye pa'aỹa'ague da nala' lliguisheguem ye qasoxoc maye pa'aỹauo, ñimaye iuen da napotagui qome ivittre'c caua seis na'axa'te maye no'onataxanaxaqui', qaq nachaqyeta ye na'a'q mataxaqui, qataq ye dalaxaic ca'agoxoic maye ishet da qaỹauatoigui. ₂Qaq ca nta'a qalaq iuen da tateua'a ñi lasom maye naña ye qasoxoc pa'aỹauec, qaq nache nachattañi qome huaqta'ai' aca 'oonole lauoqte ñi lasom, qaq ca ntaxaỹaxanaxanecpi qalaq ỹavigaxattac qome cam shiguiỹacpi maye nachetaqtaxanaxat, qataq ca nachetaqtaxanaxat maye ỹa'axat da manaxac, maye ỹaneuo ca nta'a, qaq camaye ỹa'alyiñi qome naua l-llectel nache iviraxata'aguet na latap na 'alhua, qaq ime, nache pa'auec. Qaq que'eca lasom saishet qome da napogui choche ivitta'a da avit. ₃Qaq naua na'axa'te maye mataxaqui', qataq da dalaxaic so ca'agoxoic, nache na nhuo' le'ecpi iuen da ỹo'oxoren Ñim Nataxala' da huaña ca naloteuga que'eca lasom. ₄Qaq cam shiguiỹacpi maye ỹaneuo qome ca nta'a que'eca na'a'q mataxaqui, da yaqto' ỹavigaxat da nachetaqtaxanaxat da ỹanot Ñim Nataxala', qaq caamaye seis qome caua qagueta llalqa qataq 'oonolec ca qagueta lhuaraic, qaq 'enauaque qome caamaye qaica ca lque'emaxa. ₅Qaq ca 'oonolec qagueta lhuaraic nache ỹauaxaỹaxaneguet ca veinte litros nañiguishec ala da ỹaneuo, qaq caua qagueta llalqa qalaq maicheye cam ỹauaxaỹaxaneguet. Qaq cam veinte litros nañiguishec ala, qalaq ỹauaxaỹaxaneguet ca tres litros y medio ca aceite da ỹaneuo. ₆Qaq da ivita ca dalaxaic ca'agoxoic, nache ỹaneuo da lachetaqtaxanaxat ca 'oonolec huaca llalec, qataq caua seis qagueta llalqa, qataq ca 'oonolec qagueta lhuaraic, qaq caamaye 'enauaque qome da qaica ca lque'emaxa. ₇Qaq ca 'oonolec huaca llalec nache ỹauaxaỹaxaneguet ca veinte litros nañiguishec ala da ỹaneuo, qataq 'eeta'am naqa'en da ỹaneuo ca qagueta lhuaraic, qaq caua qagueta llalqa qalaq maicheye cam ỹauaxaỹaxaneguet. Qaq ca veinte litros nañiguishec ala, qalaq ỹauaxaỹaxaneguet ca tres litros y medio ca aceite. ₈Qaq ca nta'a da huenoxoneuo, qalaq iuen da tateua'a ca ñegueuo ca lasom, qataq nache ỹe'eguelaqcheviigui camaye da huenoxonec. ₉Qaq da huo'o ca naponaxac, nache na nhuo' le'ecpi da pa'auo da ỹo'oxoren Ñim Nataxala', qaq namayepi iuen da 'eeta': Cam tateua'a ca lasom maye pa'aỹa'ague da sheu', qalaq iuen da tachiviigui ca lasom maye pa'aỹa'ague da taguiñi da pa'auec, qaq cam tateua'a ca lasom maye pa'aỹa'ague da taguiñi, qalaq iuen da tachiviigui ca lasom maye pa'aỹa'ague da sheu' da pa'auec. Qaq saishet da nache ỹe'eguelachiviigui cam lasom maye nateua'a co'ollaq pa'auo, nacherata da tateuga cam lasom maye datateguet. ₁₀Qaq ca nta'a qalaq iuen da lỹateuo ca nhuo' le'ecpi da pa'auo, qataq lỹatec da pa'auec. ₁₁Qaq cam ỹora'a't naponaxacpi, qalaq qoỹaneuo qome da nachetaqtaxanaxat ca veinte litros na nañiguishec ala, huaqta'aguet qanqa'en ca huaca llalec, qaq ca qagueta llalaqpi qalaq maicheye ca qaỹauaxaỹaxaneguet. Qaq ca veinte litros ca nañiguishec ala, qalaq qaỹauaxaỹaxaneguet ca tres litros y medio ca aceite da qoỹaneuo. ₁₂Qaq ca nta'a da ỹanot aca lachetaqtaxanaqte Ñim Nataxala' maye maiche chegoqchigui da ỹan, 'eeta'am ca shiguiỹac qaỹavigaxatta, huo'otaq aca lachetaqtaxanaqte maye ỹa'axat da nmanaxac, nache qaỹauatoigui qome ca lasom maye pa'aỹa'ague da nala' lliguisheguem, nache ỹan aca lachetaqtaxanaqte 'eeta'am naqa'en naxa da 'eetec ye na'a'q mataxaqui. Qaq da choche huenoxonec camaye, nache qaỹapogui ca lasom.

₁₃Qaq 'enauaque naua na'axa'te, da ye nte'eta nache qoỹaneuo da nachetaqtaxanaxat ca 'oonolec qagueta llalec maye mashe ivi' 'oonolec vi'i da llaxa, qataq qaica ca lque'emaxa da yaqto' qaỹavigaxatta da qoỹanot Ñim Nataxala'. ₁₄Qaq nataqa'en ye nte'eta nache qoỹanot qome Ñim Nataxala' da nachetaqtaxanaxat ca siete litros ca nañiguishec ala, qataq ca un litro ca aceite, cam qaicorelec qome ca 'ayiiña. Qaq 'era da qalapaxañi lataxac maye qaỹamaxasoxoolec, qaq damaye chochaq tatec qanqa'en. ₁₅Qaq ca nachetaqtaxanaxat qagueta llalec maye qaỹavigaxatta, qataq ca nachetaqtaxanaxat ala ca nañiguishec, qataq ca aceite, qalaq iuen da saq qoỹet da qoỹaneuo ye nte'eta.

₁₆Aỹem Nataxala' shenapec: Ca nta'a da ỹanec ca na'alhua laỹe da nme naqa'en ca llalec, nache que'eca 'alhua lalamaxat qome cam chegoxoguetpi camaye. ₁₇Qalaxaye ca nta'a da ỹanem ca na'alhua laỹe ca 'oonolec cam lamaxashecpi, nache camaye lalamaxat que'eca 'alhua, qalaxaye da ivita ca laloxoqui da qaỹe'eguelaxat na 'alhua, nache que'eca 'alhua qaltaq ỹe'eguelaxa da taỹot ca nta'a, qaq camaye lalamaxat qome cam llalaqpi. ₁₈Ca nta'a saishet qome da ỹe'egueeta'a da ỹacona ca 'alhua maye lalamaxat na nhuo' le'ecpi. Qaq cam 'alhua maye ỹanec da lalamaxat naqa'en ca llalaqpi, qalaq iuen da ỹanec ca laỹe cam maiche lalamaxat na'alhua. Qaq 'era da 'eetec qome da yaqto' na ỹalamaxat nhuo' le'ecpi saishet da saqca ca na'alhua, qataq saishet da nlagaxattac.»

₁₉Ime nache so shiỹaxaua aỹem ỹauega som ñegueuo maye naua'a na laỹe so lasom, som nỹecpiolec maye datata'ague da sheu' som qaiỹotauga da lalamaxatpi so ntaxaỹaxanaxanecpi. Nache aỹem ỹachaxana so ỹoqta pa'auo ndaqa' maye pa'aỹa'ague da nala' lliguiñi, ₂₀nache aỹem 'enapega, 'eeta': «'Ena na huaña qome da na ntaxaỹaxanaxanecpi ỹaneuaq ca lapat ca shiguiỹacpi maye qoỹaneuo da nachetaqtaxanaxat da yaqto' qaỹapalaxat ca nasouaxashet, huo'otaq ca lỹa nasouaxashet, qataq da ỹaneuaq ca ala na nañiguishec maye nachetaqtaxanaxat. Qaq 'eetec qome de'era yaqto' saishet da irouga namayepi ye pa'aỹauec qasoxoc, qataq yaqto' na nhuo' le'ecpi saishet da pa'auo da nhuoiguet nam saqaishetapecpi.»

₂₁Qaq ime, nache qaltaq aỹem ỹauegueuga so pa'aỹauec qasoxoc, nache aỹem ỹauegalo soua cuatro lallemaqreuo se'eso qasoxoc, qaq naua lallemaqreuo somaye nache huo'o sotai' qapiolec qasoxoc. ₂₂Qaq se'esoua cuatro lallemaqreuo se'eso qasoxoc, qalaq huo'o so qasoxocpiolec maye qampaxattaua'a, qaq somayepi nache 'eeta'a't, veinte metros ye lalogaxa qataq quince metros ye lcateueegue, ₂₃qaq somayepi coleesop so lpaqtaxat coma', qaq na pa'aguiñi somayepi qalaq huo'o so norec laỹe'pi. ₂₄Qaq huaña nache se'eso shiỹaxaua aỹem 'enapega, 'eeta': 'Ena na nhuoshaqa'pi, nam huaña qome da na do'onataxaategueua'a añi atamnaxaqui ỹaneuaq ca shiguiỹacpi maye ỹaneuo da lachetaqtaxanaxat na nhuo' le'ecpi.