Esdras 10

₁Qaq so Esdras co'ollaq ña nqouagaxaueetac qataq ỹaatac so la'aqtac, souaxat na lasouaxashetpi so lauo' le'ecpi qataq nỹeetac, ỹa'attrañi naua l-llecte, hueta'a aso atamnaxaqui maye lalamaqte Ñim Lo'onatac 'Enauacna, nache anac so qalota ỹalleppi, 'alpi qataq so ñaqpiolec maye Israel le'ecpi. Qaq 'enauac somayepi coleesop somaye, nache nỹeetac souaxat da lta'araic nqui'ic. ₂Nache so Secanías, som llalec so Yejiel, maye chegoxoguet so Elam, somaye 'enapego' so Esdras, 'eeta':

«Qomi' saishet co'ollaxa da salaxasoxoguet Ñim Qanatamnaxala', ỹoqo'oye saronaxaguet na 'alpi maye chegaqauec, maye natameetacot na ỹaqa'a atamnaxala'pi, qalaxaye ñaq huo'o da qanaquitaxac. ₃Qaq nagui sanaxam da qara'aqtac Ñim Qanatamnaxala' da ñalaataxai' qome ana qaramoxouapi maye chegaqauec, qataq 'enauac na llalaqpi. Qataq so'otaq 'enauac ca qomi' 'auamaxaleguete, yaqto' sepagaqtelec na lamaxasoxonaxacpi Ñim Qanatamnaxala'. ¡Qataq ỹataqta salaxasoxoguet 'enauac na lqataxacpi Ñimaye! ₄Qoñisheguem qome, cha'aye 'am maye ỹoqta 'aro'onataxanaxac damaye, qaq qomi' 'am setauanaq. ¡'Ana'añaxat da 'auacoolec da 'auo'ot damaye!»

₅Qaq co'ollaq huaqchigui se'eso na'aqtac so Esdras nache nachaañi, da iỹaxaneuga so lataxala'pi so ntaxaỹaxanaxanecpi, qataq so leviitapi, qataq 'enauac so Israel le'ecpi nache 'enapega da 'enauac ipacchigui da la'aqtac so Secanía. Nache 'enauac somayepi ỹasat da ipacchigui se'eso na'aqtac. ₆Ime, nache so Esdras nnoxonec, ca'ai aso atamnaxaqui maye lalamaqte Ñim Lo'onatac 'Enauacna, nache nqo'oneua'a so lanataxaqui so Johanán, som llalec so Eliasib. Ime, nache hueta'a se'eso pe qalaxaye saishet da huo'o ca chec, qataq saishet da nỹom, cha'aye ỹataqta lta'araic da laquicoxo, souaxat da saỹalaq se'eso shiỹaxauapi maye cheta'ague da ñe'eguelaq.

₇Qaq co'ollaq mashe lcopata'ague de'era, nache qaiỹaxaneuga 'enauac so noxonecpi co'ollaxa maye cheta'ague da ñe'eguelaqpi maye netaña ye Judá, qataq ye Jerusalén som chegaqa'a co'ollaxa ye Babilonia, da ỹo'ot ca naponaxac maye huaña qanqoỹen ye Jerusalén. ₈Nataqa'en qaiqattega 'enauac ca saishet da nvireuo caua tres na'axa'te maye naloqnaqa, maye ỹecchiguilo so nataxala'pi qataq so chegoqtacotpi na nqataxac, nache camaye qaiuotaxanec ca logoxoshetpi, qataq qaỹamaqhuec da ca'ai qanqoỹen som cheta'ague da ñe'eguelaqpi. ₉Nache so inoxoorec soua tres na'axa'te, maye huetoiguilo so na'a'q veinte so ca'agoxoic nueve, nache 'enauac so ỹalleppi maye chegoxoguetpi so Judá, qataq so Benjamín, laponaqa' ye Jerusalén. Qaq 'enauac somayepi hueta'a so nqasoxoc aso atamnaxaqui maye lalamaqte Ñim Lo'onatac 'Enauacna. Nache 'enauac somayepi ỹataqta iviloxola't souaxat da la'aqtac so Secanías, qataq souaxat so auot maye nactañi. ₁₀Qaq huaña nache so ntaxaỹaxanaxanec Esdras nachaañi, nache 'enapeco':

Qami' huo'o da qarasouaxashichi, cha'aye qauaroñiiguet na 'alpi maye natameetacot na ỹaqa'a atamnaxala'pi, qaq 'era da 'eetec da qanquigaxacheetauec da lasouaxashet na Israel le'ecpi. ₁₁Qaq nagui, ỹataqta qanauattoñiitela't da huo'o da qarasouaxashichi maye hueta'asop Ñim Nataxala' maye Natamnaxala' so hua'au qarta'alpi, qataq qauo'oche' qome naua ỹaỹamaxareete' Ñimaye. Qataq qaỹa'axañeeuec qome 'enauac na chegaqauecpi maye natameetacot na ỹaqa'a atamnaxala'pi, qataq na 'alpi maye chegaqauec maye qauaroñeeguet.

₁₂Nache 'enauac so shiỹaxauapi ỹataqta na'axannec da lasataxac, 'eeta':

¡Aja', qomi' so'otaq 'enauac dam qonapec! ₁₃Qalaxaye saishet da souaqta'aguet na auot, cha'aye namaye saishet da vi'iguet, qataq ye de'era qaỹo'ot saishet da 'oonolec, huo'otaq dos na'axa'te nache ime. Cha'aye ỹataqta qomi' qalota da huo'o da qarasouaxashet. ₁₄Qaq 'onaxaic da ndotec na qarataxala'pi da no'onañi da detaxaỹapigui de'era, nache sa iuen da salegaqtauo. Qaq qom ime, nache qaỹauo'o ca laloqo' da anac 'enauac na huaroneguet na 'alpi maye chegaqauec, qaq namayepi nache lỹateuo qome ca lataxala'pi qataq ca nmit qataq ỹaỹaxaañi ca nasouaxashet. Nache ivitta'a da vi'iguet de'era lta'araic lalemataic Ñim Qanatamnaxala' souaxat nam qarasouaxashetpi.

₁₅Qaq 'enauac se'eso mashe ñe'eguelaqpi maye noxonecpi co'ollaxa ỹataqta ỹaỹamaxareeta de'era qoỹeetec, qaq nachaqsouate' soua Jonatán, som llalec so Asael, qataq so Jahazías, som llalec so Ticva, da saỹaỹamaxade'n de'era, cha'aye soomaye huaxaigueta soua Mesulán, qataq so Sabetay maye leviita. ₁₆Qaq so mashe ñe'eguelaqpi maye noxonecpi co'ollaxa, somayepi ỹacoolec da ỹo'ot se'eso qanasachigui na'aqtac. Qaq huaña nache so ntaxaỹaxanaxanec Esdras, huo'oi soua lca'aua'alo lataxala'ate so nhuo' le'ecpi, qaq nache dataigueta soomaye da nmit ñi 'oonolec se'eso nasouaxashetpi. Qaq nache huetoigui so la'auaxanec na'a'q so ca'agoxoic diez, nache dataỹa't somayepi da qaitaxaỹapigui de'era. ₁₇Qaq so la'auaxanec na'a'q so la'auaxanec ca'agoxoic, nache huaigui da imat da nmit 'enauac da huaiguipi ñi 'oonolec so ỹalleppi maye huaroneguet so 'alpi maye chegaqauec.

₁₈Qaq 'ana ana lmalate so llalaqpi so ntaxaỹaxanaxanecpi maye huaroneguet co'ollaxa so 'alpi maye chegaqauec:

So chegoxoguetpi so Josué, som llalec so Josadac, qataq soua lauo' lashe': Maseías, Eliezer, Jarib qataq so Gedalías, ₁₉somayepi ỹa'n co'ollaxa so la'aqtac da nalate' aso lamoxouapi maye chegaqauec. Ime, nache somayepi ndouo so qagueta lhuaraic da ỹauo'o lachetaqtaxanaxat da yaqto' qaỹapalaxat so lasouaxashetpi.

₂₀Qaq so chegoxogueta so Imer: Jananí qataq so Zebadías.

₂₁Qaq so chegoxogueta so Jarín: Maseías, Elías, Semaías Yejiel qataq so Uzías.

₂₂Qaq so chegoxogueta so Pasjur: Elioguenay, Maseías, Ismael, Natanael, Jozabad qataq so Elasa.

₂₃Qaq so chegoxoguet so leviitapi: Jozabad, Simea, Quelaías (maye Kelita), Petajías, Judá qataq so Eliezer.

₂₄Qaq so 'onaxanaxaic: Eliasib. Qaq soua lasom lo'ol: Salún, Telén qataq so Uri.

₂₅Qaq so laỹe Israel le'ecpi maye nataqa'en huaroneguet co'ollaxa so 'alpi maye chegaqauec:

Som chegoxoguet so Paros: Ramía, Jezías, Malquías, Mijamín, Eleazar, Malquías qataq so Benaías.

₂₆Qaq so chegoxoguet so Elam: Matanías, Zacarías, Yejiel, Abdi, Jeremot qataq so Elías.

₂₇Qaq so chegoxoguet so Zatu: Elioguenay, Eliasib, Matanías, Jeremot, Zabad qataq so Aziza.

₂₈Qaq so chegoxoguet so Bebay: Johanán, Jananías, Zabay qataq so Atlay.

₂₉Qaq so chegoxoguet so Bani: Mesulán, Maluc, Adaías, Jasub, Seal qataq so Ramot.

₃₀Qaq so chegoxoguet so Pajat Moab: Adná, Quelal, Benaías, Maseías, Matanías, Besalel, Binuy qataq so Manasés.

₃₁Qaq so chegoxoguet so Jarín: Eliezer, Isías, Malquías, Semaías, Simeón, ₃₂Benjamín, Maluc qataq so Semaías.

₃₃Qaq so chegoxoguet so Jasún: Matenay, Matata, Zabad, Elifelet, Yeremay, Manasés qataq so Simea.

₃₄Qaq so chegoxoguet so Bani: Maday, Amirán, Uel, ₃₅Benaías, Bedías, Queluí, ₃₆Vanías, Meremot, Eliasib, ₃₇Matanías, Matenay, Jasay.

₃₈Qaq so chegoxoguet so Binuy: Simea, ₃₉Selemías, Natán, Adaías, ₄₀Macnadebay, Sasay, Sarai, ₄₁Azarel, Selemías, Semarías, ₄₂Salún, Amarías qataq so José.

₄₃Qaq so chegoxoguet so Nebo: Jeiel, Matatías, Zabad, Zebina, Jadau, Joel qataq so Benaías.

₄₄Qaq 'enauac se'esopi maye huaroneguet co'ollaxa so 'alpi maye chegaqauec, somayepi ỹalat co'ollaxa aso lamoxouapi nataqa'en so llalaqpi.