Ana lmalate so ñe'eguelaqpi maye nnaictague' so Esdras
1Qaq 'ana ana lmalate maye nanettalec, na lataxala'pi na nalamaxat nhuo' le'ecpi, maye nnaictague' so Esdras, chegoqchiguiña ye Babilonia, maye huetoigui da lo'onataxanaxac so nta'a Artajerjes co'ollaq ñe'eguelaq:
2Guerson maye chegoxoguet so Finés, Daniel maye chegoxoguet so Itamar, Hatus maye chegoxoguet so David.
3Zacarías maye chegoxoguet so Secanías, qataq so Paros, qataq so ciento cincuenta nnaictague' ỹalleppi.
4Elioguenay, maye llalec so Zeraías, maye chegoxoguet so Pajat Moab, qataq so doscientos nnaictague' ỹalleppi.
5Secanías, maye llalec so Jahaziel, maye chegoxoguet so Zatu, qataq so trescientos nnaictague' ỹalleppi.
6Ebed, maye llalec so Jonatán, qataq chegoxoguet so Adín, qataq so cincuenta nnaictague' ỹalleppi.
7Jesaías maye llalec so Atalías, som chegoxoguet so Elam, somaye setenta so nnaictague' ỹalleppi.
8Zebadías, maye llalec so Micael, som chegoxoguet so Sefatías, somaye ochenta so nnaictague' ỹalleppi.
9Abdías, som llalec so Yejiel, maye chegoxoguet so Joab, somaye doscientos dieciocho so nnaictague' ỹalleppi.
10Selomit, som llalec so Josifías, qataq chegoxoguet so Bani, somaye ciento sesenta so nnaictague' ỹalleppi.
11Zacarías, som llalec so Bebay, qataq chegoxoguet so Bebay, somaye veintiocho so nnaictague' ỹalleppi.
12Johanán, som llalec so Hacatán, qataq chegoxoguet so Azgad, somaye diez so nnaictague' ỹalleppi.
13Elifelet, Jeiel qataq so Semaías, som pa'atrec chegoxogueta so Adonicán, soomaye sesenta so nnaictague' ỹalleppi.
14Utay, qataq so Zabud, maye chegoxoreguet so Bigvay, soomaye setenta so nnaictague' ỹalleppi.
Co'ollaq qañe'eguelaxa ye Jerusalén
15Qaq aỹem, Esdras, sataxana't 'enauac ne'ena lataxala'pi na nalamaxat nhuo' le'ecpi, cai huaña so la'auaxac maye taỹaxaama aso tala Ahava, qaq huaña somaye nache souaqta'a soua tres na'axa'te. Qaq co'ollaq setaxaỹaxaatac aso lmalate 'enauac se'eso maiche nhuo' le'ecpi, qataq na ntaxaỹaxanaxanecpi, nache saishet da selalec na nalamaxat nhuo' le'ecpi maye chegoxoguet so Leví. 16Huaña nache samaq so Eliezer, Ariel, Semaías, Elnatán, Jarib, Elnatán, Natán, Zacarías qataq so Mesulán, cha'aye soomaye 'amaqtaqaiqa, qataq soua paxaguenataxanaxaiqa Joyarib qataq so Elnatán, 17nache samaxalo soomaye so Iddo, maye lataxala' so netaña ye Casifia, da iỹaxanot somaye qataq so ltauapi, da huo'oi ca qomi' namaxalo nam ỹaỹaten da ilo'ogue añi atamnaxaqui maye lalamaqte Ñim Qanatamnaxala'. 18Qaq cha'aye Ñim Qanatamnaxala' ỹataqta qomi' hueta'agueta, nache qanamaq so shiỹaxaua maye Israel le'ec, cha'aye somaye ỹataqta huo'o na ỹaỹaten le'enaxat Serebías, qaq somaye nache llalec so Mahlí, maye lauo' le'ec so chegoxoguet so Leví. Ime, nache anac somaye nnaictagueto soua llalqa qataq so lqaỹañecpi, qaq da ima'a't somayepi nache ivi' dieciocho ye lcata. 19Nataqa'en qanamaq so Jasabías qataq so Isaías, maye chegoxoreguet so Merari, nache soomaye lỹatrec soua llalqa, qataq so lqaỹañecpi, qaq da ima'a't somayepi nache ivi' veinte ye lcata. 20Nataqa'en so namaxashecpi maye ilotague' aso atamnaxaqui, maye so David qataq so ltauapi ỹaneuo co'ollaxa da yaqto' itauaatac so leviitapi, ivi' doscientos veinte so qomi' qanamaxalo. Ime, nache ñi 'oonolec somayepi, qoỹiyiñi na le'enaxatpi.
21Qaq so ñaq sonaqtaña so loigue so tala Ahavá, nache samaxalec somayepi da nqouaqcheela't qataq ỹataqta ñemanaqot Ñim Qanatamnaxala', qataq seỹaxanaqot Ñimaye da qomi' nnaictagueto de'era qoyecỹaxac, qataq da ntela'a so qoyalaqpi, qataq 'enauac so qorogoxoshetpi. 22Cha'aye ỹataqta huo'o caillaye da icoxo da seỹaxanot ñi nta'a da ỹauo'o ca qomi' namaxaguelo nalleppi, maye huota'a lalopi caipi da qomi' nauanaleguete na qanqa'aic souaxat na qampa'aguenaxauapi. Cha'aye mashe sa'aqtaxanaxam ñi nta'a da lhuaqỹaxac Ñim Qatamnaxala' da npaxattalec ca pi'iỹa'a Ñimaye, qalaxaye da huo'otaq huo'o ca ỹaxanec Ñimaye, nache maiche nque'etaxangui ca nhuaxanaguec. 23Qaq 'era da 'eetec co'ollaq ñeqouaqchetaq qataq seỹaxanaqtacot Ñim Lo'onatac 'Enauacna da yaqto' qomi' npaxattaleguete, qaq Ñimaye qomi' hua'axaỹalo.
24Huaña, nache seỹotaugalo soua doce lataxala'ate so ntaxaỹaxanaxanecpi, so Serebías, Jasabías, qataq soua diez maye maiche lqaỹa't somaye. 25Ime, nache ỹauaachigui ñaqa'en somayepi da ñaloqten so oro, qataq so nogoxoshetpi maye lachetaqtaxanaxatpi so nta'a, qataq so ltauapi maye 'amaqtaqaicpi, nataqa'en so ỹaneuo so Israel le'ecpi maye ỹalectauo da yaqto' qoỹaneua'a aso atamnaxaqui maye lalamaqte Ñim Lo'onatac 'Enauacna. 26Nache se'eso ñaloqtenpi qataq saneuopi, ivi' veintiún mil cuatrocientos cincuenta kilos so lcat plata, qataq so cien nhuenecpiolec maye plata, qataq so tres mil trescientos kilos so oro, 27qataq aso veinte ỹomaxaquipi oro maye ivi' ocho kilos, qataq soua dos ỹomaxaqui' late'erail maye chegaqaigui so ỹataqta no'on bronce maye 'eeta'am na oro.
28Qaq so mashe imeta 'enauac de'era, nache shenapega so ntaxaỹaxanaxanecpi sheeta': «Qami' mashe sogote da qami' qaiỹotaugalo da qauo'onataxañiỹot Ñim Nataxala', qaq nataqa'en ne'ena nogoxoshetpi mashe qaiỹotauga da qoỹaneuo. Qaq ne'ena lcat plata qataq na oro, namaye qoỹanot Ñim Nataxala' maye Natamnaxala' so hua'au qarta'alpi. 29Qaq ỹataqta qantelỹa'a qome qataq qauaỹamaxache, ivitta'a qom qanaloqten, ỹauaachigui qanqa'en nam lataxala'pi na ntaxaỹaxanaxanecpi, qataq ca leviitapi, qataq ca lataxala'pi na ñalaqpi Israel le'ecpi da huaña aca atamnaxaqui maye lalamaqte Ñim Nataxala' maye naña ye Jerusalén.» 30Huaña nache so ntaxaỹaxanaxanecpi qataq so leviitapi ỹaconeguet so lcat plata, qataq so oro qataq so nhuenecpiolec maye qanaloqteetac co'ollaxa, nache iroua'a aso atamnaxaqui maye lalamaqte Ñim Lo'onatac 'Enauacna maye netaña ye Jerusalén.
31Qaq so na'a'q doce so la'auaxanec ca'agoxoic nache sachegoxosoqchiguiña so tala Ahava da ñeqo'onaxa ye Jerusalén. Qaq Ñim Qanatamnaxala' qomi' ilotagueto da ñanaguenaqtague' so nqa'aic, qataq qomi' ntelaqna'agueta so qanpa'aguenauapi qataq so cachaxaicpi. 32Qaq so mashe sevitaxa ye Jerusalén, nache ivittrec soua tres na'axa'te da ñemataxauec. 33Qaq so na'a'q cuatro nache ñeqo'onaxaua'a aso atamnaxaqui maye lalamaqte Ñim Qanatamnaxala' da ñaloqtenaq se'eso lcat, plata qataq oro, nataqa'en so nhuenecpiolec, huaña nache 'enauac sanaxam so ntaxaỹaxanaxanec Meremot, maye llalec so Urías. Nataqa'en ỹalectauo so Eleazar, maye llalec so Finés, qataq soua leviita Jozabad, maye llalec so Josué, qataq so Naodías, maye llalec so Binuy. 34Nache se'eso na'a'q qanaloqten ye lsallaxa qataq qanaloqten ye lcata 'enauac somayepi, nache qoỹereñi.
35Qaq so mashe ime 'enauac de'era, nache so ñe'eguelaqpi maye chegaqa'a ye Babilonia, ndouo so doce huaca llalaqpi, qataq noventa y seis so qagueta lhuaraicpi, qataq setenta y siete so qagueta llalaqpi, qataq doce soua quetaq, da lachetaqtaxanaxatpi da qaỹapalaxat na lasouaxashetpi. Nache 'enauac somayepi qaỹavigaxat da qaỹo'oxoren Ñim Nataxala'. 36Ime, nache qoỹanem so la'aqtac so nta'a, so nta'alpi qataq 'enauac so nataxala'pi maye ilotague' ye 'alhua maye pa'aỹa'ague da avit so tala Éufrates, nache somayepi 'enauac da itauan se'eso nhuo' le'ecpi, qataq da qaỹo'ot aso atamnaxaqui maye lalamaqte Ñim Lo'onatac 'Enauacna.
