1Qaq aso Raquel, co'ollaq ila'a da saishet da deco'oiguet so Jacob, nache huo'o da lquiỹaxa aso lqaỹa Lea. Nache 'enapego' so lhua Jacob, 'eeta':
«'Auauo'o qome ca ỹalaqpi, cha'aye da qaica ca ỹalaqpi, nache seleu qome.»
2Qalaxaye so Jacob, ye ỹataqta dalemataỹa asomaye, nache 'enapego', 'eeta':
«¿Peta'a nachaỹemo' maye So'ot 'Enauacna? Ñimaye maye saỹauo'o ca 'aỹa'alaqpi.»
3Nache asomaye 'enapega so lhua, 'eeta':
«Aỹem 'am sanem añi ỹamaxashe Bilá, da 'arauañi' añimaye, qaq qom huo'o ca llalec añimaye, nache 'eeta'am da maiche ỹalamaxat ỹalec. Qaq huaña qome nache huo'o ca ỹalaqpi.»
4Qaq 'era da 'eetec aso Raquel, da ỹanem co'ollaxa so Jacob aso lamaxashe Bilá, da yaqto' ỹauo'o lhua lỹa. Qaq so Jacob lauañi' co'ollaxa aso Bilá, 5nache asomaye deco'oiguet so Jacob. 6Qaq huaña nache aso Raquel, 'enapeco':
«Ne'ena nogotolec, le'enaxat qome da Dan, cha'aye Ñim Lo'onatac 'Enauacna hua'axaỹa co'ollaxa so ñatamnaxac, nache aỹem ỹo'otec da nalochiguiñi lataxac da aỹem ỹanem na ỹalec.»
7Qaq ime, nache aso Bilá qaltaq huo'o so lỹa llalec, 8nache aso Raquel 'enapeco':
«Ne'ena nogotolec le'enaxat qome da Neftalí, cha'aye saqalota da iloquiaxac da seloctague' añi ỹaqaỹa, qaq nagui mashe ñauec.»
9Qaq aso Lea, co'ollaq ila'a da mashe saishet da huo'o ca llalec, nache ỹaconeua'a aso lamaxashe Zilpa, nache ỹanem so Jacob, da yaqto' ỹauo'o lhua lỹa. 10Qaq aso Zilpa, co'ollaq deco'oiguet so Jacob, 11nache aso Lea, 'enapeco':
«¡Ỹataqta huo'o da ña'achec! Qaq ỹoqo'oye na nogotolec le'enaxat qome da Gad.»
12Qaq ime, nache aso Zilpa, qaltaq deco'oiguet so Jacob. 13Qaq huaña nache aso Lea qaltaq, 'enapeco':
«¡Ỹataqta huo'o da ỹamaicỹaxac! Qaq nagui na 'alpi aỹem ỹamata'ac qome da, aỹem machiguiñi. Qaq ỹoqo'oye ne'ena nogotolec le'enaxat qome da Aser.»
14Qaq huo'o so na'a'q, nache so Rubén tauga so no'onaxa, co'ollaq ña qanqattac na ala na trigo, qaq huaña nache ilalec aso ala ana le'enaxat mandrágoras, nache asomayepi iroua'a aso late'e Lea. Qaq aso Raquel co'ollaq ila'a asomayepi, nache 'enapega aso Lea, 'eeta':
«Ñaq aỹem 'arqouaguec, da aỹem 'aỹa'anem aca 'oonole ala, ana mandrágoras maye 'am ndoua'a so 'aỹa'alec.»
15Qalaxaye aso Lea, 'enapeco':
«¿'Aupi'itaxano' peta'a da saq quia'aq da 'auotaxanec so ihua? ¡Nagui qataq 'anshetaique da 'auotaxanec ana ala ana mandrágoras maye ndouo so ỹalec!»
Nache aso Raquel, 'enapeco':
«Ne'ena pe, so Jacob 'am lauañi' qome, qalaxaye naiguet aca 'oonole ana mandrágoras maye ndouo so 'aỹa'alec.»
16Qaq so mashe pe, co'ollaq nvireuo so Jacob, chegaqauga so no'onaxa, nache aso Lea huaqatta'aguet somaye, nache 'enapega, 'eeta':
«Ne'ena pe, aỹem 'arauañi', cha'aye mashe 'am sesheeten, naiguet ñaqa'en 'am, aso ala ana mandrágoras maye ndouo so ỹalec.»
Qaq se'eso pe, so Jacob lauañi' aso Lea, 17qaq asomaye qaltaq deco'oiguet so Jacob, nache ivi' cinco soua llalqa, cha'aye Ñim Lo'onatac 'Enauacna hua'axaỹa co'ollaxa da natamnaxac asomaye. 18Qaq huaña nache aso Lea, 'enapeco':
«Ne'ena nogotolec le'enaxat qome da Isacar, cha'aye Ñim Lo'onatac 'Enauacna aỹem isheeten, souaxat da sanem co'ollaxa aso ỹamaxashe so ihua.»
19Qaq co'ollaq qaỹata'ague, nache aso Lea qaltaq deco'oiguet so Jacob, nache ivi' seis soua llalqa, 20nache asomaye, 'enapeco':
«Ñim Lo'onatac 'Enauacna, ỹauo'o na ỹataqta no'on ñeme. Qaq nagui so ihua ỹataqta aỹem ỹauotec qome, cha'aye mashe seis naua llalqa. Qaq ỹoqo'oye ne'ena nogotolec, le'enaxat qome da Zabulón.»
21Qaq co'ollaq qaỹata'ague de'era, nache aso Lea huo'o aso 'oonole llale, nache ỹanagui da le'enaxat Dina. 22Qalaxaye Ñim Lo'onatac 'Enauacna, tachigui lauel aso Raquel, qaq hua'axaỹa so natamnaxac asomaye, nache ỹanem da lco'oxoc. 23Qaq co'ollaq huo'o so la'auaxanec llalec, nache asomaye, 'enapeco':
«Ñim Lo'onatac 'Enauacna, nqat so icoxo, souaxat da qaica co'ollaxa ca ỹalec. 24Qaq 'onaxaictaxa da aỹem ỹanem ca lỹa ỹalec.»
Qaq ỹoqo'oye ỹanagui da le'enaxat José.
So Jacob qataq so Labán
25Qaq aso Raquel, co'ollaq mashe ñiguiñi so llalec José, nache so Jacob 'enapego' so Labán, 'eeta':
«Aỹem 'auasheeta qome da she'eguelaxa ye maiche ña'alhua. 26Qaq aỹem 'aỹa'anema qome naua ỹalqa, qataq ñeua ihua't, cha'aye nacheñiua ñim huo'omshe 'am so'onataxaatacot, nache aỹem 'aua'aqta'a qome da ashec. 'Am, 'auaỹateeta da 'eetec da ỹo'onataxanaxac da 'am so'onataxaatacot.»
27Qalaxaye so Labán, 'enapeco':
«Ñaq aỹem 'arqouaguec da nache qoueta'a ne'ena. Cha'aye aỹem saỹaten, chegoqchigui da iloxoc, da Ñim Nataxala' ỹauo'o da ñechoxonnataguec souaxat 'am. 28Aỹem 'aua'aqtaxanem, negue't aca 'auỹaxanaique 'arasheue, qaq aỹem sesheeten qome.»
29Nache so Jacob, 'enapeco':
«'Am 'auaỹateeta da 'eetec da 'am so'onataxaatacot, qataq da 'eetec da selotague' na 'ana'atetpi. 30Cha'aye saq 'amaqtaq na 'ana'atetpi co'ollaq saxanaxa da ñevi', qalaxaye nagui namayepi nquiguec, cha'aye so ñevi', nache Ñim Nataxala' ỹauo'o da 'anchoxonnataguec, qalaxaye ¿chaq laguio', qaq so'onataxaalec na maiche ỹalamaxat ỹalaqpi?»
31Qaq so Labán, qaltaq ỹe'eguelaxalec da 'enapega, 'eeta':
«¿Negue't aca 'auỹaxanaique 'arasheue?»
Nache so Jacob, 'enapeco':
«Saishet qome da 'auauo'o aca ỹasheue. Aỹem qaltaq she'eguelaxalec qome da selo'ogue ana 'arelo qaguetapi qom 'auasateguet dam sheetapeguec: 32Aỹem 'aua'aqta'a nagui da saigui ana 'arelopi, da yaqto' seỹotauga 'enauac natai' qagueta llalec lairaxaic, qataq natai' quetaq llalec chiỹaxataxaic qataq na huo'o ana lte. Namayepi nachena qome na ỹasheue. 33Qaq yaqto' qom qaỹoqtegue de'era, nache da 'auanac da 'anmeenaxaneuga cam ỹaueguec, qaq huaña nache 'auaỹaten da no'on da ỹataxac. Cha'aye aca ilopi da huo'otaq ỹalectaigui aca quetaq maye saishet da chiỹaxataxai, huo'otaq huo'o ana lte, huo'otaq ca qagueta llalec maye saishet da lairaxaic, qaq huaña nache 'auaỹaten da 'am secachiỹot.»
34Nache so Labán, 'enapeco':
«Aja', saỹamaxareeta dam qonetapeguec.»
35Qaq nacheso se'eso na'a'q da so Labán, iỹotauga 'enauac so quetaq lhuaraicpi maye chiỹaxataxaicpi, qataq so huo'oi naua lte, qataq 'enauac aso quetaqpi maye huo'oi naua lache', qataq aso huo'o ana lte, qataq asom huo'o na lache' lapagaxaic, qataq 'enauac so qagueta llalaqpi maye lairaxaicpi, nache ỹanema soua llalqa, da yaqto' iloregue somayepi. 36Qaq ime, nache cot aso lalopi chegoqchiguiña yem netaña so Jacob, nache ivi' soua tres na'axa'te de'era llecỹaxac, qaq ivita som 'alhua maye ỹauega.
Qaq so Jacob qalaq nache queto'ot da ilotague' aso laỹe lalopi qaguetapi so Labán. 37Qaq so Jacob iquesoxorec co'ollaxa soua darala lcoue aso qo'oipaq le'enaxat álamo, qataq aso almendro, qataq aso castaño, nache icolai' soomaye da yaqto' yo'oqte' naua lchiỹaxata'q lapagaxaiqa. 38Qaq ime, nache ỹaachiguiña aso nỹomaxaquipi aso qaguetapi soua lcolagui'she qo'oipaq, asom naỹa naxa ana qaguetapi da nỹom, yaqto' so quetaq lhuaraicpi da do'oca, nache datategueta soua ncolagui'she qo'oipa. 39Qaq 'era da 'eetec aso qaguetapi da do'oca da datategueta se'esoua ncolagui'she qo'oipa, nache da ñiguiñi na llalec nache chiỹaxataxaic, qataq huo'o ana lte, qataq na huo'o na lache' lapagaxaic. 40Qaq huaña, nache so Jacob iỹottauga naxa so qagueta llalaqpi maye chiỹaxataxaipi qataq na lairaxaipi ỹachegoxotaigui aso lalopi so Labán. Qaq 'era da 'eetec so Jacob da iỹottauga aso maiche lalo qaguetapi, nache sa ỹalecnoigui aso lalopi so Labán. 41Qaq naxa da ivita da do'oca aso chaxaraipi qaguetapi da yaqto' huo'o ca llalec, nache so Jacob ỹanaña naxa so nỹomqa' aso qaguetapi soua qo'oipa, yaqto' da do'oca nache datategueta se'esoua qo'oipa. 42Qalaxaye naxa da anac som shiguiỹacpi maye ỹapo'ota, nache somaye nqa't se'esoua qo'oipa. Qaq ỹoqo'oye som shiguiỹacpi maye ỹapo'ota, 'enauac talec so Labán, qaq so chaxaraipi qalaq 'enauac talec so Jacob. 43Qaq 'era da 'eetec so Jacob, da ivira'a da ỹataqta sallaxanec, nache ỹataqta qalota aso lalo qaguetapi, qataq so lamaxashecpi qataq aso lamaxashepi, qataq aso lalo cameellopi, qataq so 'ashenapi.
