Ñim Lo'onatac 'Enauacna ỹachegoxotchigui So Llalec da da'aqtaxan
1Soua ỹataqta qaỹoqteguelo vi'iye, so la'aqtaxanaxanecpi Ñim Lo'onatac 'Enauacna da'aqtaxaateguem som hua'au qarta'alpi. Ỹataqta qalota naxa da da'aqtaxanem da la'aqtac Ñim Lo'onatac 'Enauacna, qataq ỹotta'a't da lataxac naqa'en da da'aqtaxanem somayepi. 2Qalaxaye nagui ne'enaua pa'atre'c na'axa'te, Ñim Lo'onatac 'Enauacna qomi' ỹanema da la'aqtaxanaxac ỹachegoxotchigui So Llalec. Qaq Ñimaye ỹachegoxotchigui co'ollaxa So Llalec da ỹo'ot 'enauacna, qataq nacheso so ipataxalec da ilo'ogue 'enauac na huetalecna. 3So Llalec qomi' ỹachaxanalo da la'añaxac qataq da la'amaqchec Ñim Lo'onatac 'Enauacna, cha'aye imatta't da lataxac Ñimaye, qataq do'ogoxona da lta'araic la'añaxac da nlletañi 'enauacna. Qataq chegoqchigui Somaye da Ñim Lo'onatac 'Enauacna ỹapalaxa't naua qarasouaxashe'ete, ime, nache taỹa cam neta'ague Ñimaye da yaqto' nso'ooñi, na'ague da aloic.
So Llalec Ñim Lo'onatac 'Enauacna ỹactec da la'amaqchec
4So Llalec Ñim Lo'onatac 'Enauacna, ivira'a da nataỹaña 'enauac nam namaxashecpi piguem le'ecpi, cha'aye Ñim Lo'onatac 'Enauacna ỹanagui da le'enaxat maye ỹataqta ỹo'oxoraq, saq 'ena'am namayepi. 5Cha'aye Ñim Lo'onatac 'Enauacna sa ỹauano' da huo'otaq iỹaxana ca lamaxashec piguem le'ec da 'eeta':
«'Am, nache 'am Ỹalec;
qaq nache chegoqchiguiña
ne'ena na'a'q da Aỹem 'Arta'a.»
Qataq saishet da 'enapega ca 'oonolec nam lamaxashec piguem le'ecpi da 'eeta':
«Aỹem sheeta'am da Aỹem Lta'a,
qaq ñimaye qalaq 'eeta'am ca Ỹalec.»
6Qaq co'ollaq namaxalec ana 'alhua So Llalec, nache 'enapeco':
«'Enauac nam ỹamaxashecpi
piguem le'ecpi ỹo'oxoren qome Somaye.»
7Qaq naxa Ñim Lo'onatac 'Enauacna da detaxaỹa nam lamaxashecpi piguem le'ecpi, qalaq 'eeta':
«Na ỹamaxashecpi piguem le'ecpi, nachena na la'at,
qaq na ỹo'onataxanaxanecpi,
nachena na nqashelgaxa.»
8Qalaxaye da detaxaỹa So Llalec, qalaq 'eeta':
«Da 'aro'onataxanaxac chochaq tatec, qaica ca loga't,
qataq 'auo'onataxana da 'ara'añaxac da
'aupagaqchiichigui da 'eesa lataxac.
9Qataq 'anqopita da 'auo'ot ca ỹaỹamaqchiguiñi,
qataq ỹataqta sa 'auaỹamaxaren
da 'auo'ot ca sa ỹaỹamaxañi.
Ñim Lo'onatac 'Enauacna
'am ỹanagui da nta'a lauotaxat,
¡Nta'a maye ỹataqta lta'araic
da lamaicỹaxac ana 'alhua!»
10Nataqa'en 'eeta':
«'Am Nataxala', so hua'auchiguiñi
'am 'auo'ot ana 'alhua,
nache nataqa'en 'auo'ot na piguem,
11Qalaxaye naamaye taỹa'alo da ltoi',
'eeta'am ca nogoxot,
qaq huo'o ca na'a'q, nache nlaguiñi.
Qaq 'am, qalaq nache qonetai';
12da 'arataxac qalaq sa iuen da 'anaralaxat,
qataq naua vi'iye da 'anachaalataxac chochaq tatec.»
13Qataq Ñim Lo'onatac 'Enauacna sa ỹauano' da 'enapega ca 'oonolec nam lamaxashec piguem le'ecpi da 'eeta':
«'Anso'oota'ague da aỹoic,
choche ivitta'a qome da ñauec nam 'am ipa'agueetacpi.»
14Cha'aye na namaxashecpi piguem le'ecpi, namayepi choche saqcha'a na'añaxacpi maye do'onataxaatacot Ñim Lo'onatac 'Enauacna. Qataq Ñimaye ỹamaxa namayepi da itauan 'enauac nam shiỹaxauapi maye taỹa'a da nca'alaxatec Ñimaye.
