Hebreos 2

₁Qaq ỹoqo'oye qomi' iuen da ỹataqta sauoqo'o da qarqochoxo da na'aqtaxanaxac maye chegaqaigui da nca'alaxa maye sa'axasoqchigui, yaqto' saishet da qolaqa'ai so nqa'aic maye qomi' ỹachaxanalo Ñim Lo'onatac 'Enauacna. ₂Cha'aye dam na'aqtac maye ỹa'axat co'ollaxa na namaxashecpi piguem le'ecpi da ỹataqta 'eesa, qataq na saishet da ỹalaxaguet de'era na'aqtaxanaxac, nache ỹaconeguet da nhuaxanaguec, ₃qaq ỹataqta 'eesa qone' da huo'o ca qanhuaxanaguec da saishet da ñetelaqa'a de'era nca'alaxa maye ỹataqta qaica ca 'ena'am. Cha'aye So Qarataxala' nacheso so la'auaxanec da ỹa'axat de'era nca'alaxa, qataq nam na'axaỹaxaatega co'ollaxa de'era na'aqtaxanaxac nataqa'en qomi' ỹachaxanalo da ỹataqta 'eesa. ₄Ñim Lo'onatac 'Enauacna nataqa'en qomi' ỹachaxanalo de'era, ỹachegoxotchigui na qalota na'anecpi, qataq nam ỹo'otpi maye ỹo'ot da na'aalaxa qataq nam sa qaỹauanapega. Qaq co'ollaq ỹo'ot de'era, nache ỹami' So Saqcha'a Na'añaxac Qui'itta nam tatelec da ỹami'.

₅Ñim Lo'onatac 'Enauacna saishet da ipataxalec nam lamaxashecpi piguem le'ecpi da ilo'ogue cam 'alhua maye taỹa'a da sonaqtalec qome. Aca'aca 'alhua ₆acamaye ilo'ogue ca lỹa shiỹaxaua. Cha'aye ana nere maye huetalec na la'aqtacpi Ñim Lo'onatac 'Enauacna, 'eeta':

Qaq Ñim Lo'onatac 'Enauacna da ỹanem da ilo'ogue 'enauac nam lo'onatacpi, nache damaye naigui da qaica ca 'oonolec nam lo'onatacpi da sa ilo'ogue. Qaq na'aictaxa nagui da saxanaxa da semetenaq da 'enauac na lo'onatacpi da ỹataqta ilo'ogue. ₉Qalaxaye Ñim Lo'onatac 'Enauacna qomi' ỹauoteque, nache namaxalec ana 'alhua So Jesús da qomi' nca'alaxatre'c, chegoqchigui da l-leuaxa. Ỹoqo'oye na'aictaxa da Ñim Lo'onatac 'Enauacna da cara'ac co'ollaxa da ỹasheeteguet So Jesús da nquicchiguiñi da la'amaqchec saq 'ena'am na lamaxashecpi piguem le'ecpi, qalaxaye nagui Somaye nachaqsota da qaỹo'oxoreetac souaxat da qaica ca 'ena'am la'amaqchec.

₁₀Ñim Lo'onatac 'Enauacna ỹo'ot 'enauac nam huetalecna da yaqto' maiche lalamaxat, qataq huotaique da nhuanaua'a 'enauac da llo'oxoyec nam ỹauotec qataq ỹalaxaguet Ñimaye. Qaq nachera da huo'omshe Ñim Lo'onatac 'Enauacna ỹa'auaxaañi da naloqchiichiguiñi da lataxac So Jesucristo, nache ỹaneguet da l-leuaxa, cha'aye Somaye, nacheso Som Lca'alaxaqui namayepi. ₁₁'Enauac nam ỹauotec qataq ỹalaxaguet Ñim Lo'onatac 'Enauacna, nache nachena nam llalaqpi, qataq lta'a Ñimaye. Qaq So Jesús ye nataqa'en Llalec Ñim Lo'onatac 'Enauacna, Somaye saishet da da'acteguelec namayepi da iỹaxana da ỹataqta lqaỹañecpi, ₁₂cha'aye Somaye co'ollaq 'enapego' Ñim Lo'onatac 'Enauacna, 'eeta':

₁₃Nataqa'en 'eeta':

₁₄Qomi' sachegoxosoxoigui ca shiỹaxaua maye huo'oi naua ltago'q qataq naua lpi'ineqa. Ỹoqo'oye So Jesús maiche lhuennataxac da shenaqta'am naqa'en. Cha'aye da nache 'eetec de'era, nache ishet da ileu da yaqto' nauec so pa'aguenataxanaxaic maye huo'o da la'añaxac da ỹalauat ca ỹale qataq aca 'alo. ₁₅Qaq de'era l-leuaxa Somaye chegoqchigui da huesoueeguesop da lcolanaxa da nleuaxa nam ñaq nca'altauec nagui. ₁₆Qaq de'era ỹataqta ỹataqtegue da So Jesús saishet da anac da itauan nam namaxashecpi piguem le'ecpi, nachaqrata da anac da itauan 'enauac nam chegoxoguet so Abraham. ₁₇Qaq da yaqto' ishet da itauan, nache Somaye, iuen da ỹataqta 'eeta'am naqa'en da lataxac namayepi. Qaq ỹoqo'oye souaxat da chegoqchigui da 'eeta'am naqa'en da shenaqta, nache ivira'a da lataxala' na ntaxaỹaxanaxanecpi da qaitaxaỹapegue' Ñim Lo'onatac 'Enauacna qataq ishet da qaipi'iỹa'a. Qaq Somaye ỹataqta nlaqchigui da lsoxoyec da do'onataxanot Ñim Lo'onatac 'Enauacna. Qaq 'era da 'eetec Somaye da ỹan da nachaalataxac da 'eeta'am aca nachetaqtaxanaqte yaqto' Ñim Lo'onatac 'Enauacna ỹapalaxat na qarasouaxashetpi. ₁₈Qataq Somaye ye mashe nmate' de'era nque'eenaxac qataq ye so pa'aguenataxanaxaic ỹe'eguen co'ollaxa da yaqto' huo'o ca lasouaxashet naqa'en, qaq ỹoqo'oye nagui da so pa'aguenataxanaxaic da qomi' ỹe'egue'n, nache So Jesús ishet da qomi' itaua'n.