Hebreos 10

₁Na namaxasoxonaxacpi maye chegoqo'ot co'ollaxa so Moisés, namayepi 'eeta'am da ỹachaxaatac cam no'on maye taỹa'a da qomi' ỹanema Ñim Lo'onatac 'Enauacna, qalaxaye saishet da nachera da ỹoqta 'eesa da lataxac. Qaq ỹoqo'oye ne'ena namaxasoxonaxacpi saishet da ỹañoxot da nalochiguiñi naqa'en da lataxac nam ima'ape naua vi'iye da irotegueua'a ñim npe'l na lachetaqtaxanaxat, da yaqto' ỹanot Ñim Lo'onatac 'Enauacna. ₂Cha'aye ne'ena namaxasoxonaxacpi da ỹoqta 'eesactaxa da iỹouec na nasouaxashetpi, nache saishettaxa da huo'o ca iuennatega da huo'o ca lasouaxashet qataq, nache ỹaxaañictaxa da ỹanot Ñim Lo'onatac 'Enauacna aca lachetaqtaxanaqte. ₃Qalaxaye saishet da nache 'eetec de'era. Cha'aye 'enauac na ỹaategueuo na lachetaqtaxanaxat ye vi'i, da ivita da ỹaneuo, nache nachaqrata da ỹañoxot da iuennatega na lasouaxashetpi. ₄Cha'aye ne'enaua ltago'q na huaca lhuaraicpi qataq na quetaq lhuaraicpi maye qaỹavigaxattac, naamaye saishet da ỹañoxot da ỹapalaxat na nasouaxashetpi.

_5-6Qaq ỹoqo'oye So Cristo, co'ollaq naỹa ana 'alhua, nache 'eetega Ñim Lo'onatac 'Enauacna, 'eeta':

₈Qaq da hua'auchiguiñi 'eeta': Ñim Lo'onatac 'Enauacna saishet da ỹaỹamaxaren na nachetaqtaxanaxatpi, qataq nam qoỹaatapegueuo shiguiỹacpi da yaqto' qaỹavigaxat, qataq na qoỹaneuo maye naigui da yaqto' qaỹapalaxat na nasouaxashetpi, qaq na'aictaxa da nachena nam damaxasoxoolecpi na nqataxacpi. ₉Qaq co'ollaq ime de'era, nache So Cristo anac da yaqto' ipaqueelec da ỹataqta 'eetapeguec Ñim Lo'onatac 'Enauacna. Qaq damaye naigui da 'eeta': So Cristo nlaxaañi da togoshec lataxac da qoỹaneuo aca nachetaqtaxanaqte, ime, nache dalaxaic da lataxac naqa'en. ₁₀Ñim Lo'onatac 'Enauacna qomi' lca'agui'she, cha'aye So Jesucristo ỹalaxalec da 'eetapeguec Ñimaye co'ollaq qaiuaxaneuo, da ỹan da maiche lo'ocỹaxac da 'eeta'am naqa'en aca nachetaqtaxanaqte, qaq sa iuen da ỹe'eguelaxalec da nañan.

₁₁Qaq na'aictaxa da nam nachetaqtaxanaxat shiguiỹacpi maye qaỹavigaxat da saishet da ỹapalaxat na nasouaxashet, qalaq nache 'ena'am nam ltaxaỹaxanaxanecpi na judiopi da qaitaxaỹapegue' Ñim Lo'onatac 'Enauacna, queto'ot da ỹaategueuo namayepi 'enauaque naua na'axa'te. ₁₂Qalaxaye So Jesucristo nañanot Ñim Lo'onatac 'Enauacna da, 'eeta'am naqa'en aca nachetaqtaxanaqte maye qaỹavigaxatta, nache sa lỹa da qaltaq nañan. Qaq huaña, nache qaỹapalaxat na qarasouaxashetpi. Ime, nache Somaye nso'ooñi netaua'a na aloic añi nso'onaxaqui Ñim Lo'onatac 'Enauacna, ₁₃huaña, nache iuatta'a Ñim Lo'onatac 'Enauacna da nauec 'enauac nam ipa'agueetacpi Somaye. ₁₄Cha'aye 'oonolec so nachetaqtaxanaxat maye nacheso So Jesucristo da chegoqchigui da Ñim Lo'onatac 'Enauacna nalochiguiñi da lataxac naqa'en na lca'aguishecpi maye huotaique da ỹalecnoigui na nhuo' le'ecpi maye lalamaxatpi. ₁₅Qaq 'era dam ỹataqta 'eesa maye ỹa'axattac So Saqcha'a Na'añaxac Qui'itta co'ollaq 'eeta':

₁₈Qaq ỹoqo'oye da huo'otaq mashe qaỹapalaxat na qarasouaxashetpi, nache saishet da iuen da qaltaq qaỹauo'o aca lỹa nachetaqtaxanaqte da qoỹanot Ñim Lo'onatac 'Enauacna, da yaqto' ỹapalaxat na qarasouaxashetpi.

₁₉Qami' ỹaqaỹa't, soua ltago'q So Jesús maye huecolde'c co'ollaq ileu, nachesoua nagui soua chegoqchiguilo da ñauotaxai' Ñim Lo'onatac 'Enauacna qataq qaica ca sho'oqtaique da senoxonaxaua'a yem pa'auo ndaqa' maye ỹataqta qui'itta añi no'onaxanaxaqui. ₂₀Cha'aye co'ollaq ileu So Jesús, nache nqat so napoxonaxat maye qomi' npaxatta'agueta. Qalaxaye nagui So Jesús nca'altauec, qataq chegoqchigui Somaye da dalaxaic qataq huaỹoqtec da lataxac da ñequigaxaua'a Ñim Lo'onatac 'Enauacna. ₂₁Somaye nacheso so ỹataqta 'amaqtaqaic qartaxaỹaxanaxanec qataq nacheso som ilotague' añi no'onaxanaxaqui da piguem. ₂₂Qaq ỹoqo'oye no'on da ña'añaxataxac de'era qanauochaxac Ñim Lo'onatac 'Enauacna, qataq ỹataqta 'eesa ñaqa'enaq da qarpi'iỹaxac So Cristo. Cha'aye Somaye nacheso so qomi' iỹoueeguesopa na qarasouaxashetpi, 'eeta'am da qomi' iỹoi' da deỹoxona ca 'etaxat maye ỹataqta qui'itta. Qaq ỹoqo'oye mashe qomi' huesoueeguesopa naqa'en na qarasouaxashetpi. ₂₃Qolaqto'ot qome da sepi'iỹaqa'a Ñim Lo'onatac 'Enauacna da qomi' nca'alaxatre'c qataq saishet da seqolectaxanaq, cha'aye Ñimaye ipaqueelec nam qomi' ỹachaxanapecoto. ₂₄Qataq ñepogoxoinaqapegue' da ñetaunaxa't, qataq ñauotaxa't qataq so'otaq ca ỹaỹamaqchiguiñi. ₂₅Saishet qome da saxanaxañi da llaponaqtega't qataq ña'aqtaxanaqtega't da se'enaxataq da lataxac nam saishet da taỹapegueua'a da qaraponaxac. Nachaqrato' da ñi 'oonolec da shenaqta ỹa'añaqchet ca lỹa da yaqto' nquictasheguem da lpi'iỹaxac Ñim Lo'onatac 'Enauacna, lamaaxa nagui da selaqa'a da mashe saqaỹapeque que'eca na'a'q da ñe'eguelaq So Qarataxala' da nmit 'enauac na shiỹaxauapi.

₂₆Cha'aye da nache qarhuennataxa da qolaqto'ot da so'otaq ca qarasouaxashet da huo'otaq mashe sauattonaq dam 'eesa lapaxaguenataxanaxac Ñim Lo'onatac 'Enauacna, nache qaica ca ishet da qaltaq sanaqot Ñimaye da yaqto' ỹapalaxat na qarasouaxashetpi. ₂₇Nachaqrata da qomi' seuataqta'aguet cam qaica ca 'ena'am lchecỹaxac maye nmitaguec 'enauacna, que'eca na'a'q da Ñim Lo'onatac 'Enauacna nmit na ipa'agueetac Ñimaye qataq ỹavigaxat ỹasaxangui ca norec.

₂₈Da huo'otaq huo'o ca qanmit shiỹaxaua, qaq da huo'oi caua dos da da'aqtaxa'n da ỹa'axa't da 'eesa da saishet da ỹalaxaguet na namaxasoxonaxacpi maye chegoqo'ot so Moisés, nache cam nmit na nasouaxashet ỹataqta saishet da ichoxonnai' da damaxasoxoolec que'eca shiỹaxaua da qaỹalauat. ₂₉Qaq da ỹataqta qauennataxañiilec de'era, nache ¡ỹactec qone' da lchec ca nhuaxanaguec maye ỹaconeguet cam ỹo'otan som Llalec Ñim Lo'onatac 'Enauacna qataq da 'eetega qaica ca naigui da l-leuaxa Somaye! Qaq da nache 'eetec de'era, nache isheueetac som Saqcha'a La'añaxac Ñim Lo'onatac 'Enauacna maye lauotaxat camaye. Nataqa'en da ỹo'otan da l-leuaxa So Cristo qamaq nachera dam chegoqchigui da ipacchigui da naỹamaxataxac Ñim Lo'onatac 'Enauacna qataq chegoqchigui da qaỹapalaxat na lasouaxashetpi. ₃₀Nataqa'en 'enauac saỹatenaq da Ñim Lo'onatac 'Enauacna, ỹauo'o ca lvi' da ỹauo'o ca nhuaxanaguec na ipa'agueetacpi Ñimaye, souaxat na ỹo'ottacpi sa ỹaỹamaxañi namayepi. Qalaxaye nataqa'en 'enapec da nmit na lalamaxatpi. ₃₁Qaq ¡ỹoqta da ỹataqta ỹactec da lchecỹaxac ca lhuaxanaxanaxac maye ỹan Ñim Lo'onatac 'Enauacna maye nache 'eetai' da nca'altauec!

₃₂Qauennachiỹa'a 'enauac na lqalaicpi qataq na qanque'eenaxaqui maye qami' taleguete co'ollaq cheta'ague da qauacoñiiguet da no'on na'axaỹaxac. Qaq na'aictoxo' co'ollaxa de'era, qalaq saishet da qaỹa'axañiiuec da qarpi'iỹaxaqui. ₃₃Qalota da qoñiita na ivireguet da qaisheueetac qataq sa qaiyacnapec, ỹauaachigui qanqa'en na shiỹaxauapi. Qataq huo'o nataqa'en co'ollaxa da qoñiita na nhuanaua'a da nque'eenaxac nam nache 'eetec de'era da nque'eenaxac. ₃₄Nataqa'en ỹataqta huo'o da qarchoxonnataxanaqai nam ncoñeteguishecpi, qataq ỹataqta huo'o da qantonaxaqui souaxat da qauaqaita'a da na nta'alpi deuotaxanec na qaralamaxache, cha'aye qami' qauaỹaañita da qami' taleguete qome cam hueta'ague da piguem maye ỹactec da lyac qataq qaica ca loga't. ₃₅Qaq ỹoqo'oye saishet qome da qaỹa'axañiiuec da qarpi'iỹaxaqui Ñim Lo'onatac 'Enauacna, cha'aye da nache qoñiitec de'era, nache qauacoñiiguet ca lta'araic qaraviguiiqui. ₃₆Ỹataqta qami' 'añaxaiqa qome saishet da huo'o ca chegoqchigui qanqa'eñi da qaỹa'axañiiuec da qarpi'iỹaxaqui da qoviitaigui da qanque'eenaxaqui, yaqto' qaupaquiitelec da qauo'oche dam 'eetapeguec Ñim Lo'onatac 'Enauacna qataq qauacoñiiguet dam qami' ỹachaxanapecoto Ñimaye. ₃₇Cha'aye da la'aqtac Ñim Lo'onatac 'Enauacna, maye nanettalec ana nere maye huetalec na la'aqtacpi Ñimaye 'eeta':

₃₉Sanqot da qana'achec Ñim Lo'onatac 'Enauacna, cha'aye qomi' saishet da shenaqta'am nam ỹaxanec Ñimaye, nache ivira'a da qaỹauo'o ca nhuaxanaguec. Nachaqrata da nacheqomi' maye saconaxaguet da nca'alaxa souaxat da huo'o da qarpi'iỹaxac Ñim Lo'onatac 'Enauacna.