Hebreos 5

₁Ñim Lo'onatac 'Enauacna maiche lca'aguishec nam lataxala'pi na ntaxaỹaxanaxanecpi da qaitaxaỹapegue' Ñimaye, da yaqto' itauan nam lalamaxatpi Ñimaye qataq da yaqto' ỹaneuo ana nachetaqtaxanaqte maye saishet da qaỹavigaxat qataq ana qaỹavigaxatta da yaqto' Ñim Lo'onatac 'Enauacna ỹapalaxat na nasouaxashetpi. ₂Qaq cha'aye que'eca ntaxaỹaxanaxanec ye nataqa'en huo'o da lqalaic da ỹalaxaguet Ñim Lo'onatac 'Enauacna, nache iuen da ỹachaxan da nhualaxaune' nam qaica ca ỹaỹaanapec qataq 'etaxaloxoicpi. ₃Camaye ỹaneuo ana nachetaqtaxanaqte maye saishet da qaỹavigaxat, qataq ana qaỹavigaxatta, yaqto' Ñim Lo'onatac 'Enauacna ỹapalaxat na lasouaxashetpi na Israel le'ecpi, qataq nataqa'en na maiche lasouaxashet camaye, cha'aye nataqa'en saishet da ỹalaq.

₄Qalaxaye qaica ca ishet da lataxala' na ntaxaỹaxanaxanecpi da maiche lhuennataxac camaye. Nachaqrata da Ñim Lo'onatac 'Enauacna maye nacheñi ñim lca'aguishec camaye qataq ỹami' da 'enec. Qaq 'era da 'eetec co'ollaxa Ñim Lo'onatac 'Enauacna da lca'aua'a so Aarón da yaqto' lataxala' na ntaxaỹaxanaxanecpi da qaitaxaỹapegue' Ñimaye.

₅So Cristo, Somaye saishet da huo'otaq maiche nallegoxoola't da nacheso lataxala' na ntaxaỹaxanaxanecpi. Nachaqrata da Ñim Lo'onatac 'Enauacna maye lca'aguishec qataq ỹanem da la'amaqchec. Qataq nacheñi Ñimaye co'ollaxa da 'eeta' da la'aqtac:

₆Huo'o na laỹepi nanettalec ana nere maye huetalec na la'aqtacpi Ñim Lo'onatac 'Enauacna da 'eeta':

₇So Cristo co'ollaq hueta'a ana 'alhua, qalaq Somaye ỹataqta ỹaguec da nqouagaxaunaxac da nqouagaxaueetacot Ñim Lo'onatac 'Enauacna, qataq ỹataqta nỹeeto'ot qataq nachoxoreetacot da sa ivireguet qanqa'en da l-leuaxa, cha'aye Ñim Lo'onatac 'Enauacna huo'o da la'añaxac da yaqto' ỹo'ot damaye. Qalaxaye So Cristo ye nache 'eetai' naxa da laxaraic, nache Ñim Lo'onatac 'Enauacna ỹasateguet da nqouagaxaunaxac. ₈Na'aictaxa da Somaye ỹaỹaten da Llalec Ñim Lo'onatac 'Enauacna, qalaxaye chegoqchigui da nque'eenaxac, nache Somaye ỹaỹaten da naigui da, nache 'eetai' da qaỹalaxaguet Ñim Lo'onatac 'Enauacna. ₉Nache co'ollaq So Cristo da ỹo'ot 'enauac nam ỹamaxalec Ñim Lo'onatac 'Enauacna, nache Somaye ivira'a da Nca'alaxaqui da ỹami' da nca'alaxa chochaq tatec 'enauac nam ỹalaq. ₁₀Ỹoqo'oye Ñim Lo'onatac 'Enauacna ỹanagui So Jesús da Lataxala' nam Ntaxaỹaxanaxanecpi da qaitaxaỹapegue' Ñimaye, 'eeta'am da lataxac co'ollaxa so Melquisedec.

₁₁Qalota na qara'aqtaxanaxac da sa'axataq de'era, qalaxaye huo'o da lqalaic da ỹataqta sa'axataqtegue ca llec da qami' sa'axataqtema, cha'aye huo'o qanqa'eñi da lqalaic damaye. ₁₂Cha'aye ne'enaua na'axa'te maye huetaiguilo da qaua'amaqchiñi da no'on na'axaỹaxac, nache qami' mashe ishettaxa da huo'o ca qarapaxaguenataqui. Qalaxaye nagui qami' ñaq 'eetalec da qaviñiitac da qami' qaỹa'aqtaxaatema ca saqalaq napaxaguenataxanaxac maye ỹa'axat Ñim Lo'onatac 'Enauacna. Cha'aye qami' ñaq qoñiita'am ca nogotolec maye saxanaxa da chec ca nallec maye sa nsatta, nachaqrata da nỹomtapigui na nche'. ₁₃Ỹoqta ñaq qoñiita'am ca nogotolec maye cheta'ague da ñiguiñi maye saxanaxa da ỹaỹaten da ỹauatton ca 'onaxaic qataq ca qauem. ₁₄Qalaxaye nam mashe ỹauatton ca 'onaxaic qataq ca qauem qataq mashe naỹa'ac da ỹo'ottac, nache 'eeta'am ca shiỹaxaua mashe ỹe, maye ishet da chec ca nallec sa nsatta.