1Qaq ỹoqo'oye qomi', no'on da nquictasheguem da qarauattonaxanaxac, choche seviraqta'a da ỹe da qarauattonaxanaxac So Cristo. Qataq ño'onaxataqchigui dam hua'auchiguiñi napaxaguenataxanaxac maye ỹa'axat So Cristo, qataq saishet da qolaqto'ot da sa'axataqtac ca lataxac maye saq 'amaqtaq. Qataq saxanaxañi da so'otaq ca qauem, nache qolaxague So Cristo, qataq saxanaxañi da sauoqo'o ca qarasouaxashet, yaqto' saishet da seleuaq. Qomi' saỹatenaq da iuen da sauoqo'o ca qarpi'iỹaxac Ñim Lo'onatac 'Enauacna, 2qataq dam naigui da qomi' qanachelaxa'n. Nataqa'en iuen da saỹaanaq da llec nam ỹa'amaqten So Cristo da qaỹasheltalec da yaqto' ỹaconeguet So Saqcha'a Na'añaxac Qui'itta. Qataq nataqa'en iuen da saỹaanaq da na leuaxaicpi qaltaq ỹe'eguelaxalec qome da nca'alec. Qataq nataqa'en iuen da saỹaanaq da huo'o ca pa'atec nmitaguec 'enauacna. 3Qaq ỹoqta 'eesa de'era da qomi' qolaqto'ot da sapaxaguenataxanaqteguec, da Ñim Lo'onatac 'Enauacna qomi' ỹasheetema.
4-6Qalaxaye cam ỹaxaañi da ỹa'amaqten So Cristo, nache saishet da ỹañoxot da qaltaq ỹe'eguelaxalec da nauochaxaua Ñim Lo'onatac 'Enauacna. Na'aictaxa da huo'o co'ollaxa ca huaña da ỹa'amaqten da la'aqtaxanaxac Ñimaye maye ỹataqta 'eesa, qataq ỹataqta ỹaỹamaxareeta co'ollaxa da ỹaconeguet se'eso nme maye chegoqo'ot Ñim Lo'onatac 'Enauacna. Qaq damaye ỹataqta saishet da ishet da qanaralaxat. Na'aictaxa da mashe ỹaconeguet So Saqcha'a Na'añaxac Qui'itta, 'eeta'am na laỹepi, qataq ỹaỹaten da no'on maye nachera da la'aqtaxanaxac Ñim Lo'onatac 'Enauacna, qataq dam la'añaxac Ñimaye qom qanayeetalec aca dalaxai 'alhua, qaq camaye saishet da ỹañoxot da ỹe'egueloqot qome Ñimaye da mashe ỹaxaañi da ỹa'amaqten. Qaq ỹoqta 'eesa de'era ỹo'ot camayepi, da 'eeta'am da qaltaq ỹe'eguelaxalec da iuaxaneguet so npe'enaxaqui So Cristo qataq ỹe'eetac, ỹauaachigui naqa'en 'enauac na shiỹaxauapi ana 'alhua.
7Qaq de'era, na shiỹaxauapi 'eeta'am ca 'alhua. Nam ỹa'amaqteetac So Cristo 'eeta'am ca 'alhua maye taleguete naua lta'araiqa auo'oche, ime, nache huo'o da no'on alaỹaxac na lañiguishec cam danaxaatac. Qaq Ñim Lo'onatac 'Enauacna ỹaalec da nqouagaxa. 8Qalaxaye nam ỹaxaañi da lpi'iỹaxac, nache namayepi 'eeta'am ca 'alhua maye ndota't ana huoue maye huo'o ana le da ñaxaalec, ỹataqta qaica ca naigui, qaq Ñim Lo'onatac 'Enauacna ỹasaxalec ca qauem. Qaq da pa'atec, nache ỹoqta qaỹavigaxat.
9Qami' ỹaqaỹarolqa, na'aictaxa da qami' sa'aqtaxanaqtema de'era, qalaxaye saỹatenaqta da qami' saishet da qaỹa'axañiiuec da qarpi'iỹaxaqui, nachaqrata da nache qoquiito'ot da qaua'amaqchiñiitac Ñim Lo'onatac 'Enauacna. Qaq damaye ỹataqta ỹaỹamaqchiguiñi, cha'aye nachera dam qami' ỹauegalo da qami' qanca'alaxatre'c. 10Ñim Lo'onatac 'Enauacna ỹataqta no'on da lataxac, ỹoqo'oye saishet da huo'otaq icoua'ai nam qauo'oche qataq nam qoquiito'ot da qauo'ocheetac da yaqto' qautauañi nam lalamaxatpi qataq lca'aguishecpi. Qataq da nache qoñiitec de'era, nache qami' nataqa'en qauachaxañi da qauauochec Ñim Lo'onatac 'Enauacna.
11Ỹataqta huo'o da qaryaxa da qoquiito'ot de'era qarasapachaqai, choche ivitta'a ca loga't da qanachaalataxaqui, yaqto' qauacoñiiguet 'enauac nam no'on maye chegoqchigui da qarhualaxaviqui. 12Qataq sa saỹamaxarenaq da qavi'eguelaqaỹa da qami' hualaicpi. Nachaqrato' da saishet da huo'o ca huaña da qauqolectaxañi, qoquiitegue da lataxac som huo'o da lpi'iỹaxac Ñim Lo'onatac 'Enauacna, cha'aye da nache qoñiitec de'era, nache qauacoñiiguet dam qami' ỹachaxanapeguema Ñimaye.
Dam ỹachaxanapec Ñim Lo'onatac 'Enauacna
13-14Ñim Lo'onatac 'Enauacna ỹauo'o co'ollaxa de'era ỹachaxanapecot so Abraham, 'eeta': «Aỹem sauo'o qome ca 'anqouagaxa qataq 'am sami' ca ỹataqta qalota 'aỹa'alaqpi.» Co'ollaq Ñim Lo'onatac 'Enauacna da ỹami' de'era la'aqtac so Abraham da ipaqueelec, nache ỹan da la'aqtac chegoqchigui da maiche la'añaxac, cha'aye qaica ca lỹa 'amaqtaqaic da huo'otaq ỹachegoxoto'ot da la'añaxac. 15So Abraham huo'o da lhualaxavic co'ollaq iuattaique de'era, qaq Ñim Lo'onatac 'Enauacna ỹataqta ipaqueelec co'ollaxa de'era ỹachaxanapec.
16Da huo'otaq huo'o ca ỹan ca la'aqtac, qalaq iuen ca le'enaxat ca 'amaqtaqaic, yaqto' 'eeta'am da nacheca ca da'aqtaxan. 17Qaq ỹoqo'oye Ñim Lo'onatac 'Enauacna co'ollaq huotaique da ipaqueelec da ỹachaxanapec, nache ỹan da la'aqtac chegoqchigui da maiche la'añaxac da ỹan dam ỹachaxanapec ỹataqta ipagaqchiichigui. 18Qaq Ñimaye ye saishet da datenataxan, nache dam ỹachaxanapec qataq so ỹan la'aqtac chegoqchigui da maiche la'añaxac, saishet da naralaxat. Qaq damaye qomi' ỹa'añaqche't, cha'aye qomi' sauoqtaique da Ñim Lo'onatac 'Enauacna qomi' npaxattaleguete, qataq huo'o da qarpi'iỹaxac da Ñimaye qomi' ỹanema dam qomi' ỹachaxanapecoto. 19Qaq de'era qanaquitaxac, nachera dam qomi' ỹanema da ỹataqta 'eesa de'era. Damaye 'eeta'am acam lcat maye nllañi aso notaxaqui late'erai maye quiguingui na 'etaxat, da yaqto' qaica ca ldaxac ca hueta'a. Qaq de'era qanaquitaxac, damaye qomi' ỹanema So Jesucristo, Som pa'aueegue da laỹe so napoxonaxat maye pa'auo añi lo'onaxanaxaqui late'erai Ñim Lo'onatac 'Enauacna na pa'asheguem, qataq huenoxoneua'a yem ndaqa' maye ỹataqta sa qaishetapec. 20Ỹo'ot de'era, da yaqto' qomi' huesochiyiñi da qolaxague so nqa'aic maye taỹaua'a Ñim Lo'onatac 'Enauacna, cha'aye So Cristo nacheso som chochaq tatec da Lataxala' nam ntaxaỹaxanaxanecpi da qaitaxaỹapegue' Ñim Lo'onatac 'Enauacna, 'eeta'am da lataxac so Melquisedec.
