Som ỹataqta no'on Lataxala' na ntaxaỹaxanaxanecpi
1Qaq 'era da ỹoqta ỹactec da 'onaxaic, 'eeta': Qomi' huo'o Som Lataxala' na ntaxaỹaxanaxanecpi neta'ague da piguem, nso'ootañi, hueta'ague da aloic añi nso'onaxaqui Ñim Lo'onatac 'Enauacna. 2Qaq Somaye, nacheso So Jesucristo maye ỹo'ottac da lo'onataxanaxac da ntaxaỹaxanaxanec qataq huetasheguema yem ỹataqta 'eesa lma' Ñim Lo'onatac 'Enauacna maye maiche lo'onatac Ñimaye, qaq saishet da lo'onatac ca choche shiỹaxaua.
3Ana'ana 'alhua huo'o naxa ñi qoỹaneuo da lataxala' na ntaxaỹaxanaxanecpi da yaqto' ỹanot Ñim Lo'onatac 'Enauacna ana nachetaqtaxanaqte qataq ana qaỹavigaxatta maye ỹaneuo na shiỹaxauapi. Qaq ỹoqo'oye So Jesucristo nataqa'en huo'o da ỹan da ỹanot Ñim Lo'onatac 'Enauacna. 4Cha'ayectaxa da netaina'a nagui, nache saishettaxa da iuen da ntaxaỹaxanaxanec, cha'aye mashe huo'o nam qartaxaỹaxanaxanecpi, da nachena nam ỹanot ana qarachetaqtaxanaqte Ñim Lo'onatac 'Enauacna maye damaxasoxoolec co'ollaxa na nqataxacpi maye chegoqo'ot so Moisés. 5Qalaxaye de'era lo'onataxanaxac se'eso ntaxaỹaxanaxanecpi da qaitaxaỹapegue' Ñim Lo'onatac 'Enauacna, damaye 'eeta'am da choche qaiuennatega cam hueta'ague da piguem. Qaq ỹoqo'oye so Moisés co'ollaq huotaique da ỹo'ot so npe'l maye lanataqa' Ñim Lo'onatac 'Enauacna, qaq Ñimaye 'enapega somaye, 'eeta': «'Am, no'on da ỹataqta 'alotelec qome da lataxac qataq 'aue'enaxatchigui da no'onataxac so 'am sachaxana co'ollaq huaña añi qaỹoqotcheguemec 'alhua.» 6Qalaxaye da lo'onataxanaxac So Jesucristo maye ỹami' Ñim Lo'onatac 'Enauacna da Lataxala' na qartaxaỹaxanaxanecpi, damaye ỹataqta ỹactec da lyac, qataq chegoqchigui Somaye da qomi' nataqa'en huo'o da qanaỹamaxataxac maye ỹactec da lyac, qataq chegoqchigui Somaye da Ñim Lo'onatac 'Enauacna huo'o dam qomi' ỹachaxanapeguema ỹataqta ỹactec da lyac.
So togoshec aỹamaxataxac
7Da se'eso hua'auchiguiñi naỹamaxataxac Ñim Lo'onatac 'Enauacna co'ollaq naỹamaxate' na Israel le'ecpi da ỹataqta nalochiguiñictaxa, nache saishet da iuen da dalaxaic ca aỹamaxataxac. 8Qalaxaye Ñim Lo'onatac 'Enauacna ila'a da se'eso shiỹaxauapi saishet da ỹalaxalec dam 'eetapeguec, nache Ñimaye 'eeta':
«Anata ca na'a'q,
qom Aỹem ñaralaxat ca ñaỹamaxataxac
da ñaỹamaxate' na Israel le'ecpi
qataq na Judá le'ecpi.
9So hua'au ñaỹamaxataxac,
nache sacoota'a na lhuaq som hua'au qarta'ailpi
qataq ñeqateeguesop ye 'alhua Egipto.
Ime, nache sauo'o so ñaỹamaxataxac da ñaỹamaxate' somayepi.
Qalaxaye somayepi saishet da ipaguelec,
ỹoqo'oye saxaañi da seqochetega somayepi.
10Ỹoqo'oye da dalaxaic ñaỹamaxataxac
da ñaỹamaxate' na Israel le'ecpi, damaye 'eeta':
So'otec namayepi da ỹataqta
saishet da icoua'ai na ỹapaxaguenataxanaxacpi,
qataq nachena na ỹaueca'aguet da nachaalataxac.
Nache namayepi, Aỹem Lataxala',
qaq namayepi, nache ỹalamaxatpi.
Qaq de'era san ỹa'aqtac, damaye ỹataqta 'eesa.
11Huaña, nache saishet da iuen
da huo'o ca ỹapaxagueetac ca lỹa,
da ỹapaxaguenec da yaqto' Aỹem ỹauatton,
cha'aye 'enauac qome Aỹem ỹauatton,
na nsoxoppiolec qataq nam ỹa'axaiquipi.
12Qataq Aỹem sapalaxat
'enauac nam ỹo'ot qauemsat,
qataq saishet da seuennatega
na lasouaxashetpi.»
13Qaq Ñim Lo'onatac 'Enauacna da huo'omshe qomi' detaqtegalo da naralaxat ca naỹamaxataxac da qomi' naỹamaxatto, qaq damaye 'eeta'am da Ñimaye ỹamata'ac da mashe togoshec so hua'auchiguiñi naỹamaxataxac. Qaq som ỹamata'ac da mashe togoshec qataq qaica ca naigui, somaye nayeeta'a da imeuo.
