1Na Israel le'ecpi, qalaq 'eeta'am ana nañiguishe uva maye ỹataqta qalochiguiñi,
qalaxaye co'ollaq ỹataqta qalota ana alapi,
nache nataqa'en nquictauec ana no'oxoosheguem nca'atoxonaxalatepi.
Qataq co'ollaq mashe ỹataqta 'onaxaic na na'alhuapi,
nache nataqa'en ỹataqta 'onaxaic naqa'en nam saq 'en natamnaxala' coma'pi.
2Qaq ne'ena Israel le'ecpi, colaxagui da lquiyaqteỹaxac,
qaq namayepi nagui huo'o da lasouaxashet.
Ñim Nataxala' ilaxachigui qome ana lca'atoxonaxalatepi namayepi,
qataq nlaxaañi nam natamnaxala'pi coma'.
3Qaq namayepi nagui yo'oqta da 'eeta':
«Qaica ca qarta'a, souaxat da qaica ca 'enec ñaqa'enaq Ñim Nataxala'.
Qalaxaye da huo'o ca qarta'a nache ¿Negue'to' ca ishet da qomi' ỹo'oteque?
4Cha'aye namayepi nacherata da ltaxaỹaxac ỹaỹaten,
qataq ỹan na saq 'en la'aqtacpi da ỹo'ot da naỹamaxataxac,
qaq dam 'eetega no'on lo'onataxanaxac,
qalaq 'eeta'am ana huoue deshenataxan maye ñaxattalec na no'onaxa.»
5Qaq nam Samaria le'ecpi ỹataqta huo'o qome da lcolanaxa,
souaxat da deqat ñim huaca llalec maye netaña ye Bet Avén.
Qaq souaxat ñimaye, nache ỹataqta huo'o da nachoxonnaxac
nam nhuo' le'ecpi qataq na na'aqtaxanaxanecpi,
souaxat da deqat da llo'oxoyec.
6Cha'aye ñim huaca llalec qaỹache qome, qaira'a ye Asiria
da yaqto' qoỹanem so ỹataqta 'amaqtaqaic nta'a.
Huaña qome, nache nam netaña ye Efraín huo'o da la'aloxo,
qataq na Israel le'ecpi huo'o qome da la'aloxo souaxat ñi natamnaxala'.
7Huaña qome nache qaica so nta'a ye Samaria,
'eeta'am ca 'epaq laỹe da ỹache na 'etaxat.
8Qataq nlaguiñi qome na qauem natamnaqa'pi,
maye huaña naxa da ỹo'ot na lasouaxashetpi na Israel le'ecpi.
Qataq ana lca'atoxonaxalatepi ñaxaalec qome ana cotaquepi qataq ana 'epaqole maye huo'o ana le,
nache namayepi 'enapega qome ana qasoxonaxapi, 'eeta': «¡Ña qomi' qauapoileguete!»
Qataq 'enapega ana lcomaraxalatepi, 'eeta': «¡Ñaq qomi' qaupataqaiyiñi!»
9Ñim Nataxala', 'eeta': «Na Israel le'ecpi saishet da ỹaxaañi da ỹo'ottac nam lasouaxashetpi,
chegoqta'a co'ollaq huaña ye Guibeá da ỹo'ot namayepi.
¡Qaq nache saq ỹaxanec da ỹo'ottac namayepi!
Ỹoqo'oye que'eca alaataxac ique'elaxat qome ne'ena 'etaxaloxoicpi qom huaña ye Guibeá.
10Qaq qom ñeshet da sauo'o ca nhuaxanaguec ne'ena nhuo' le'ecpi,
nache na ỹotta'a't shiỹaxauapi dataỹa'aguet qome namayepi,
qom ivita da sauo'o ca nhuaxanaguec souaxat nam qalota lle'etaxaloxosat.
11Qaq ye Efraín, 'eeta'am aca 'oxoỹaxaale huaca llale,
maye nqopita da ilaxattapigui ana ala na nañiguishec.
Qalaxaye aỹem sano'ot qome na lqosot ca nauegaxanaxaqui 'epaq
da yaqto' ỹauecta'aguet aca naigona;
qaq na Judá le'ecpi qalaq ỹaueca'aguet qome ca 'arao,
qaq so Jacob qalaq ỹaueca'aguet qome aca namoxoỹaqtaxanaqte.
12Qaq aỹem shenapega namayepi sheeta': qauo'oche qome da nalochiguiñi lataxac,
yaqto' qauacoñiiguet da alaỹaxac da nauotaxanaqtaic.
Qataq qauqataxañiỹai' ca qana'alhuai, yaqto' qaỹa'añiiñi ca dalaxaic qa'añiguishequi,
cha'aye mashe ivita ye laloqo' da qanmitaique Ñim Nataxala',
nache ivitta'a qom anac Ñimaye da qami' taleguete naqa'en ca 'onaxaic auot da qami' nca'alaxatrec.
13Qalaxaye qami' qaỹa'añiiñi da qauem,
nache qami' taleguete da sa ỹaỹamaxañi lataxac,
qataq qolliquiitac na chegaqaigui da natenataxanaxac.
Qaq cha'aye qaupi'iitega anam naigonapi maye alaataxaquipi,
qataq nam qalota alleppi alaataxaicpi, 14nache na maiche 'arhuo' le'ecpi lliỹa't qome,
qataq 'enauac na lpaqtaxat na nỹecpi qailaxachigui,
'eeta'am ye Bet Arbel co'ollaq nlaxaañi so nta'a Salmán,
co'ollaq qaỹalauat so 'alpi cañe' qanqa'en so llalaqpi.
15Qaq 'era da 'eetec qome qami' maye qarmaye na Betel,
souaxat da ỹataqta lta'araic qaye'etaxalqoi.
Qaq nataqa'en ñi nta'a na Israel ileu qom mashe yaqta'a da yo'oxoñi».
