Qaỹa'axata'a dam talec qome ye Tiro qataq ye Sidón
1Da na'aqtac da qaỹa'axata'a dam talec qome ye Tiro.
Ña qanỹeñi qami' notaxaquipi ye Tarsis,
cha'aye mashe nlaguiñi na nỹecpi qataq yem ñegueta.
Qataq chegoqchiguiña ye Chipre da qara'axaỹaxaqui maye qami' nvitalo.
2Na shiỹaxauapi maye lma' ye Tiro qataq nam menaxanaxaicpi ye Sidón
qalaq ỹataqta ỹe'emaqtom.
Nam lamaxashecpi maye ỹa'axasoxooteguelec aso auaxai,
3qataq nam qalochiguiñi 'etaxat asomaye,
qalaq nache ỹachegoxottapigui da lauegaxanaxac na ala na nañiguishec
maye chegoqtega ye Sihor qataq ye Nilo,
nache nmeetague' nam ỹotta'a't shiỹaxauapi.
4Ñaq 'auauo'o da 'ara'agaxa 'am Sidón,
cha'aye ana auaxai detaqa, 'eeta':
«Mashe qaica co'ollaxa ca ñiqui'ic, mashe saishet co'ollaxa da seco'o.
Qataq mashe qaica ca ỹalaqpi da saqchet,
qataq aca ỹalepi da sapagaxaguen.»
5Qaq qom ivita ca la'axaỹaxac na Egipto le'ecpi,
nache ỹataqta nlaxagui qome da naquicoxo souaxat dam huaigui ye Tiro.
6Nache 'enapec qome: «Qanqo'oñiỹa qome ye Tarsis,
yaqto' qanỹeñi, qami' maye qoñiitaña na loigue.»
7¿Qaq sa nacheno' ne'ena nam huaqta'a't nỹecpi maye togoshaapec
nam huetaigui naxa da namaicỹaxac?
Nam jec naxa da yaqto' nalec nam 'alhuapi maye qaỹoqta.
8¿Chaq negue't cam lapaxañi de'era
da yaqto' dataỹa'aguet ye Tiro
huaqta'a't nỹecpi maye 'amaqtaqaic?
Ye na nmenaxauapi qalaq nda'a't nta'alpi,
qataq na lmenaxanaxanecpi qalaq nda'a't na 'añaxaicpi ana 'alhua.
9Qaq nacheñi Ñim Nataxala' maye Qaica ca Ỹaqalanapec
ñim lapaxañi de'era da yaqto' nquigaxaañi da 'amqaanaxac,
qataq huetaiya' naqa'en 'enauac na 'añaxaicpi ana 'alhua.
10Qami' nhuo' le'ecpi maye qarma'ai ye Tarsis
qauo'oche qome na qana'alhuai,
cha'aye mashe qaica so no'onataqa' ana notaxaquipi
maye quelec naxa na 'etaxat.
11Ñim Nataxala' ỹachaxaasheguem na lhuaq taalec naqa'en aso auaxai,
nache iviloxol naqa'en na ỹotta'a't shiỹaxauapi,
qataq damaxasoxoolec da qailaxachigui na npaqtaxanaxatpi ye Canaán.
12Qataq 'enapega ye Sidón: «'Am qa'añole maye 'am sa qaiyacnapec,
saishet qome da 'avi'eguelaxa da 'auamachiguiñi,
na'aictaxa da 'auauotaique da 'avira'a ye Chipre,
qalaxaye ñaqaiyeta qaica ca 'anmataxac.»
13Ña qauloỹa ye na'alhua ye caldeopi,
se'eso nhuo' le'ecpi mashe qaica.
Cha'aye ye Asiria le'ecpi ỹo'ot da lle'eguenaqa'
naqa'en na shiguiỹacpi maye chegaqa'a ye toolec 'alhua,
nauaxaỹaxaasheguem co'ollaxa ana nalloxolatepi,
qataq nachena nam ilaxachigui co'ollaxa so npaqtaxanaxatpi
nache ỹataqta dolachigui naqa'en.
14Qanỹeñi qami' notaxaquipi ye Tarsis,
cha'aye da qara'añaxaqui mashe qailaxachigui.
15Qaq que'eca na'a'q, nache ye Tiro ivittrec qome caua setenta vi'iye da qaicoua'ai, vi'iye maye ishet da ivi' da nachaalataxac ca nta'a. Qaq qom inoxoorec que'ecaua setenta vi'iye, nache nvita ye Tiro dam ỹa'axatta'a co'ollaxa som lo'onec aso quisheguetaxai.
16«'Am quisheguetaxai maye mashe 'am qaicoua'ai,
'auacona qome aca 'arvique arpa,
nache qoquetagui na huaqta'a't nỹecpi,
nache ỹataqta 'ano'onaxat ca 'arvicnaxanaxac
qataq 'auo'on ca qalota no'onecpi
shapegueto' qom 'am qantoonec.»
17Qaq qom inoxoorec caua setenta vi'iye, nache Ñim Nataxala' ỹe'eguelaxa da huapegue' ye Tiro, nache yemaye qaltaq ỹe'eguelaxalec qome da nmeela't qataq da nquishestague' na ỹotta'a't shiỹaxauapi ana 'alhua. 18Qalaxaye ana laueque maye ỹachegoxotaigui da nmenaxac qoỹanot qome da yaqto' lalamaqte Ñim Nataxala', nache saishet da qaỹaỹamaxat qataq saishet da choche qalapootasheguem, nacherata da qoỹanem cam do'onataxaatacot Ñim Nataxala' da yaqto' desheenaxana ca ỹataqta qalota nallec qataq ca no'on logoxot.
